|
بسم الله الرحمن الرحيم
Khutba Jummah
HADHRAT AMIR’UL MUMINEEN MUHYI-UD-DIN
Munir Ahmad Azim
(01 Dhul-Hijjah 1435 Hijri)
(Résumé Khutba)
Après ki li fine souhaite « Assalamoualaikum Warahmatullah Wabarakaatouhou » à tous so bane disciples (et tous bane musulmans) entier le monde – en mentionnant bane z’Iles avoisinants, l’Inde, Kerala, Trinidad et Tobago etc. – Hazrat Muhyi-ud-Din (atba) fine commence so Khutba avec Tashahhud, Ta’uz, Surah Al Fatiha, et ensuite li fine dire:
Mo remercier mo Rab ki Li fine donne moi par So grâce immense l’occasion en or pou continué le Khutba ki mo ti commencer Jummah dernier, et en vérité, sans la grâce, faveur et Ilm (connaissance) de mo Créateur, mo pas ti pou capave adresse zot aujourd’hui lors sa sujet là. Vraiment, bane bénédictions et faveurs de mo Rab li couma ene l’océan infini ki émerge de mo lécoeur pou lance zot ene l’appel pou purifier zot lécoeurs là-dans, pou fer zot lécoeurs rempli avec la lumière d’Allah ki déssane lors sakaine d’entre zot afin ki zot capave bénéficié de sa la lumière et bane bénédictions extraordinaire là. Insha-Allah.
En vérité, sans l’aide et guidance d’Allah, sans So support et So l’enseignement et sans So connaissance en grande quantité ki Li contigner déverse lors moi afin pou contigner fer sa travail noble là, alors nannié pas ti pou possible. Li bien difficile pou explique à bane dimounes couma mo Rab aide moi, et guide moi, et couma Li fine choisir moi dans sa siècle là couma So Khalifa ; ene Khalifa ki pas élu par l’homme, mais ki choisir par Allah tousél. Alors mo remercier mo Rab encore et encore et mo contigné lors même topic de mo Khutba de vendredi passé.
Fine rapporté ki nous bien-aimé prophète (saws) fine dire : “Pas jaloux les z’uns les z’autres ; pas augmente bane prix par rode dépasse prix ki les autres envie payer (pour ene marchandise), pas haïr les z’uns les z’autres, pas tourner avec les z’uns les z’autres, pas rentre dans bane transactions commerciale kan bane les autres fine rentre dans sa (transaction là) ; mais O bane esclaves d’Allah, reste couma bane frères. Ene musulman li ene frère pou ene l’autre musulman ; li pas opprime li, ni li cause menti avec li, ni li guette li avec ene mauvais l’œil ni li humilier li. La piété (Taqwa) li là (et Hazrat Muhammad (saws) fine pointe kot so lécoeur trois fois). Li ene assez mauvais travail ki ene musulman humilié so frère. Tout bane kitchoses d’ene musulman li sacré pour so frère de même la foi : so disang, so bane richesses (propriétés) et so l’honneur.” (Muslim)
Li bien étrange ki malgré ki Hazrat Muhammad (saws) fine mentionne sa à so bane compagnons (Sahaba) et so Ummah, et kot sa bane l’enseignements là trouve dans Quran et Sunnah tous les deux, mais selman malgré sa bane musulmans, en particulier bane soi-disant défenseurs de l’Islam et de l’Ahmadiyyat, zot pas suive sa bane l’instructions et commandements claires là. Le Jamaat Ahmadiyya ti bizin ene modèle pour bane les autres musulmans mais selman zot aussi fine tombe dans bane chemins non-islamiques, pareil couma bane les autres musulmans ki fine attiré avec bane attractions mondaine et ene façon de vivre non-islamique. C’est mo duah sa ki mo bane disciples et suivants sincères pas tombe dans sa bane la trappe là, bane la trappe de bane Shaytanes ki cachiette lors le chemin de l’Islam pou rode essaye pou dévier zot du droit chemin et pou sépare zot de zot bane frères et sœurs ki partage même la foi ki zot. Ki Allah protège zot tous de sa, Ameen.
Li bien chagrinant saki pé passé dans bane l’administration de plusieurs de bane Jamaats de l’Islam, sans oublier le Jamaat Ahmadiyya. Ena bane soi-disant défenseurs de l’Ahmadiyyat ki pas pratique saki zot causer/prêcher. Plusieurs d’entre zot agir avec malhonnêteté envers zot bane frères de la foi. Si à la tête même, dans l’administration pas ena même respé pour bane commandements divine et bane l’instructions du Saint Prophète de l’Islam (saws), alors imaginer dans ki l’état l’Ummah de Hazrat Muhammad (saws) en générale été, et le Jamaat Ahmadiyya en particulier, si zot pas agir d’après le code de vie islamique ! Astère maziné saki pé passé dans quartier générale (headquarters) de Jamaat Ahmadiyya, alors eski zot pensé ki l’administration au niveau locale (à Maurice) pou épargner kan pas ena aucaine guidance réelle ? Ena beaucoup ki montré ki zot pieux, mais en vérité zot pé trahir, fer malhonnête avec zot bane frères Ahmadis. Mo conne plusieurs de sa bane qualité dimounes là. Maintenant, si telle est l’état de Jamaat Ahmadiyya à Maurice, alors maziné saki pé passé au niveau mondiale ! Li vraiment pitoiyable ki bane représentants du Khalifatul-Massih pé montré ki zot soi-disant ena Taqwa mais en fait zot fer fraudes, kot zot « prend sans demander » bane contributions ki bane frères et sœurs fine travail bien dure pou donne dans le chemin d’Allah (couma Zakaat, Chanda, Tarik-e-Jadid etc.). En plusse de sa, zot pas hésiter pou pas paye salaire de zot bane travailleurs. Mo dans ene position pou dire sa parski mo fine passe dans même situation difficile kan, en tant ki ene travailleur du Jamaat Ahmadiyya depuis 1987-2000, le Jamaat Ahmadiyya de Maurice ensam avec so soi-disant Amir fine refuse pou paye moi mo salaire et temps service ; ene droit ki sak travail mérité gagner. 14 ans fine maintenant passé sans ki zot fine respecter zot l’engagement et sa ene dette ki zot pas encore rembourser. D’après bane la loi divines, et bane l’enseignements de nous bien-aimé prophète Hazrat Muhammad (saws), et aussi d’après bane la loi du pays, zot ti bizin juska maintenant respecté mo bane droits et zot l’engagements mais juska maintenant zot pas fine agir dans l’esprit de bane vrais musulmans pou paye ene travailleur du Jamaat ki fine donne plusieurs l’année de so la vie (kot sa ti mo gagne-pain aussi) pou travaille comme chauffeur pour le Jamaat. Et en plisse de sa, zot ena le toupé pou applique le boycott kan dans lizié d’Allah et lizié de la loi mondaine, sa traitement là et le refu pou paye salaire etc. li illégale. Non seulement le quatrième Khalifa fine fer la sourdre oreilles lors sa sujet là, mais le cinquième Khalifa aussi fine suive lors même comportement non-islamique. Couma Hazrat Muhammad (saws) fine dire, ene vrai musulman li celui ki protège l’honneur et richesse de so frère. En plusse de sa, nous bien-aimé maître (Aka) Hazrat Muhammad (saws) fine aussi enseigner ki avant ki ene travailleur so la sueur sec lors li, bizin paye li so salaire en entier.
Ena aussi couma mo fine mentionner bane Ahmadis ki fine fer malhonnête avec l’argent Jamaat et ena aussi bane les autres frères Ahmadis ki fine fer malhonnête avec zot frère et zot encore dans le Jamaat, et pas ena aucaine boycotte ki appliqué lors zot. Zot encore dans le Jamaat et zot inviter dans tous fonctions. Kan découvert zot bane mauvais travail, kante même sa, zot toujours honoré dans le Jamaat Ahmadiyya, tandis ki au début de la Manifestation Divine à Maurice, sa humble serviteur ki présent devant azordi et Zafrullah Domun Sahib ki fine note beaucoup de mo bane révélations (Révélations ki Allah ti pé déverser lors moi), nous fine informe Khalifa à sa l’époque là (Hazrat Mirza Tahir Ahmad) à propos le fait ki Allah pé communique à sa humble serviteur là, et alors seulement à cause ki Allah pé cause avec moi, fine ena bane mauvais complot ki fine organisé pou écarte Munir Azim et Zafrullah Domun de zot chemin. Peut-être ki zot ti pé peur ki mo ene menace pou l’institution de zot Khilafat élu par l’homme, ki maintenant administré par bane lécoeur vide de Taqwa. Nek maziné ene coup ki ene Khalifa ensam avec so bane officiers de l’administration pas fine hésité pou envoye malédiction (Laanat) lors nous zis à cause ki Allah fine choisir pou cause avec sa humble serviteur ki présent devant zot azordi.
Bane révélations divines, ki ene la lumière lékaire et de l’âme de l’homme pour fer li revivre dans le sens réel li d’après zot Haraam (illicite) et ki nous pé dépasse limite kan nous pé affirme sa, tandis ki fer malhonnête avec les z’autres zot l’argent c’est Halal (licite) et tolérable dans nouveau génération Jamaat Ahmadiyya (azordi jours). Nous bane grands dimounes, bane vrais musulmans Ahmadis fine sacrifié beaucoup pou amène le Jamaat Ahmadiyya à ene position d’honneur par la grâce et grand aide d’Allah, mais selman après sa, bane nouveaux générations de bane Ahmadis pas fine hésité pou rabaisse sa l’honneur là et fine tourne bane l’enseignements de l’Islam, couma Hazrat Muhammad (saws) fine enseigner et couma le Messie Promis Hazrat Mirza Ghulam Ahmad (as) fine revivre, enba là-haut. Longtemps nous ti habitué pousse sa argument là devant ki les reste des bane musulmans ti dans l’erreur kan zot fine rejette la véracité de Hazrat Massih Ma’oud Mirza Ghulam Ahmad (as) et sa mission de faire revivre l’Islam ki li ti recevoir de la part d’Allah là, mais selman astère kan Allah fine envoye ene l’autre de So Messie, sa bane même dimounes ki fine alle prêcher ki la porte de la révélations divines pou reste ouvert ziska le Jour du Jugement (Qayamat), alors sa bane même dimounes là fine tourne le dos à Allah So nouvo élu, Khalifa (Khalifatullah), Messie, Messager ki fine vini pour faire revivre la foi.
D’ene lécoeur ki fine vine la rouille, d’ene lécoeur rouillé ki ensuite converti en l’or, l’or là astère zot jette li dans ene difé ki pli chaud encore pou brûle li afin ki aucaine trace de Taqwa resté. Mais le plan d’Allah O mo bane chers frères et sœurs li vraiment merveilleux. Sa grand Maître Intelligent là (Allah), personne pas capave commande Li. Aucaine dimoune dans pouvoir dimoune pou capave contester le pouvoir d’Allah et So plan. Personne pas capave commande Allah pou pas envoye ene l’autre messager. Allah pou contigner envoye So bane messagers n’importe kan Li trouver ki le monde bizin zot. Lecoeur li ensuite revivre par de l’eau pur ki vine du ciel, ki enseigne à l’homme saki li pas ti conné et aussi sa ki li ti déza conné mais ki li ti essaye cassiette de so propre la vue et l’esprit afin ki li pas senti li coupable ki li fine abandonne bane l’enseignements d’Allah. Zot préfère mette bane l’enseignements d’Allah dans ti coin éloigner de zot lécoeur, et zot fer sourde et aveugle et zot contigner vivre zot la vie couma dire zot pou vivre éternellement lors sa la terre là.
Maintenant maziné saki pé passé dans le monde musulman. Mo capave donne plusieurs l’exemples coumsa avec bane preuves, mais c’est pas le sujet de mo Khutba azordi. Mais saki mo ena pou dire c’est ki consékances de sa bane dimounes là pou bien graves. En vérité, petit à petit nous pé témoigné couma Allah pé amène zot vers zot destruction couma Li fine promette, sans ki zot réalizé saki pé arrive zot. Allah pou contigner envoye So destruction lors zot – bane punitions divines – pour la façon ki zot fine comporte avec So Messager, et zot fine fer bane complots et dire toute kalité paroles contre li (c’est-à-dire, sa humble serviteur là). Bane ki fine agir traite avec sa humble serviteur là, Allah pou détériore zot la santé, kot zot même personnellement la santé pas pou ena et dans zot propre l’argent ki zot recevoir comme grand salaire, barakat (bénédictions) pas pou ena dans zot l’argent – Allah pou prive zot de sa bane bénédictions là. Et zot cause « L’amour pou tous, la Haine pour personne » pou montré lizié dimounes, mais zot lécœur rempli avec la haine contre nous, et zot refuse pou ouvert zot lécoeur à la lumière divine et vrai l’amour et fraternité. Allah fine informe moi à travers So bane révélations ki Li (Allah) pou deal avec zot dans ene façon bien dure pou façon ki zot fine comporte zot avec moi et comploter contre moi, pou façon malhonnête ki zot fine agir lors tout côté : ki li de côté travail (mondaine) et de côté la spiritualité aussi. Allah fine rassure moi ki sa bane soi-disant Ahmadis là, bane soi-disant défenseurs de l’Islam et l’Ahmadiyyat en complicité avec le Khalifa élu de l’homme et so Tabshir (so bane officiers), bane ki pé prend zot grand péto dans Jamaat là et pé sauter dans Jamaat à cause nom de zot famille, sois disant couma zot grand famille dans Jamaat Ahmadiyya Maurice péna etc. alors si zot pas répentir, et arrête fer bane mauvais travail et si zot pas reforme zot conduite et la vie, et si zot pas accepter la vérité divine et le Messager d’Allah, Allah pou fer zot tombe dépi ene hauteur et zot destination finale pou ene destruction complète. Le jour pé vini kot Allah pou amène sa destruction là.
C’est mo humble duah avec mo Rab, mo Allah ki Li donne le Tawfiq à tous bane membres de mo Jamaat, le Jamaat Ul Sahih Al Islam pou ki zot reflecté vraiment bane l’enseignements de l’Islam, et ki zot vivre honnêtement avec zot bane frères de même la foi avec bane lécoeurs rempli d’amour et de fraternité, et non pas avec la jalousie, parski la jalousie li ene z’arme de Shaytane pou cause la division parmi bane musulmans et pou amène zot vers zot perdition. Ki Allah préserve mo bane disciples et suivants de bane tels mauvais l’esprits et destruction spirituelle. Ameen.
Alors, O mo bane frères et sœurs dans sak partie de bane pays kot le Jamaat Ul Sahih Al Islam fine établir, fer zéffore pou obéir zot bane Amirs, montrer ene l’obéissance totale à zot bane Amirs kan c’est avec Taqwa ki zot pé fer zéffore zot aussi pou amène zot lors le droit chemin et sous mo supervision. Le Jamaat Ul Sahih Al Islam bizin vivre couma ene sel famille, ene sel lécorps. Si zot suive bane ki envie amène zot vers zot la perte, alors laisse mo dire zot ki zot pou bien malheureux, malchanceux et bane perdants et zot pou souffert beaucoup d’humiliations. Mo fer duah ki sa pas arriver dans nous Jamaat. Mo demande tous bane Amirs du Jamaat Ul Sahih Al Islam dans tous bane pays pou touzour respecter bane droits de zot bane travailleurs, ki li bane travailleurs de la vie de tous les jours ou bane travailleurs du Jamaat et paye zot, zot bane salaires complètement, et tous zot bane paroles ki zot fine donner, honore sa bane paroles là et régler zot bane dettes aussitôt possible. Zot tous zot bane frères, et sakaine d’entre zot précieux pou so lézot frère/sœur de même la foi. Zamais pas blesse bane sentiments de zot bane frères/sœurs. Fer zéffore pou passe le message de l’Islam dans ene façon islamique, et pas approche bane façon non-islamique pou communique l’Islam et bane messages de nous Jamaat à bane les autres. Par exemple, lors internet, dans bane tels sites couma Facebook etc. – Dawah bizin fer dans ene bon façon, sans mette aucaine innovation ou bane la musique attirant dans bane duahs et bane paroles islamique. Lors Facebook, ena bane tels Qaseeda ki fine transformer en bane chanté moderne kot zot mentionne le nom d’Alah et de So Rassool et sa accompagné avec la musique et tombour etc. Sa pas islamique ditout ! Sa donne ene mauvais l’image de Sahih al Islam à bane les autres. Alors mo conseille bane membres de mo Jamaat autour du monde pou enlève de zot bane compte internet/Facebook etc. tous bane zaffaires ki pou donne ene mauvais nom à l’Islam et à nous Jamaat, maintenant surtout en présence d’ene Messager d’Allah.
Comme le Khalifatullah de sa siècle là, mo apprécié bane zéffore ki zot pé fer pou répande le message divine de sa siècle là à bane les autres dimounes, même à travers Facebook, mais sa bizin fer dans ene façon islamique. Fer ene tel bon travail ki pou fer Allah content avec zot, et pas essaye attire la colère d’Allah lors zot. Insha-Allah.
En plusse de sa mo bane très chers, zot bizin toujours prêt pou aide bane les autres dimounes. Pas gagne peur ki zot pou vine pauvre. Non ! Vraiment, kan l’intention pure, alors en vérité c’est Allah ki pou ouvert zot tous zot chemin, et Insha-Allah, la caisse de nous Jamaat pou rempli, afin ki nous capave accompli bane projets de nous Jamaat avec bane bénédictions et l’aide puissant d’Allah. Bane fruits de la patience en vérité bien doux kan ou prend la peine pou attane avec patience. Li pou ene tel douceur ki pou attire bane les autres aussi, Insha-Allah. Ki Allah enlève aveuglement de bane ki spirituellement aveugle et amène zot pou témoigne d’ene guérison miraculeux de zot lizié intérieur, sa lécoeur ki pé pompé là, ki pé pompé seulement pour Allah, et pour l’accomplissement de So bane commandements. Insha-Allah.
Mo contigner lors le sujet de mo Khutba : En vérité, bane signes de Taqwa (la piété) c’est ki ene croyant li obéir bane commandements d’Allah, et reste loin avec bane kitchoses ki Shariah (la loi islamique) fine défanne. “Celui ki honore bane rites ki Allah fine ordonner, bizin faire li avec piété ki vine depuis dans so lécoeur.” (Al-Haj 22: 33).
Fine rapporté dans ene Hadith-e-Qudsi kot Allah dire: “La Sincérité li ene secret de parmi Mo bane secrets ki Mo fine place dans lécoeurs de Mo bane serviteurs choisies.” Rapelle bien ki ene lécoeur mou et ene lécoeur ki d’ene bon nature c’est sa ki le moyen pour gagne succès dans le domaine de Dawah et Tabligh. Allah (twt) fine adresse le Saint Prophète Muhammad (saws) dans Quran Shareef comme suite :
“(O Prophète) C’est par la grâce d’Allah ki to traite zot avec douceur. Si to ti traite zot avec ene lécoeur dur, zot ti va quitte to l’entourage bien vite.” (Al-Imran 3: 159).
Pou terminer aujourd’hui lors 2ème partie de sa Khutba Jummah là, mo faire sa doah là, ki Allah (swt) donne moi le Tawfiq pou mo continuer le Khutba Jummah lors le même sujet semaine après en Octobre à cause Eid-ul-Adha et pou terminer mo faire sa duah là avec Allah et mo demande tous mo bane disciples à travers le monde pou faire sa duah là aussi. Insha-Allah.
“O Allah, mo demande Toi pou séki plaire Toi, et mo cherche refuge en Toi de séki déplaire Toi, mo demande Toi pou lave mo bane péchés, purifier-moi de bane fautes, examine mo le cœur et mette la piété partout là-dans, O Celui ki passe lors bane manquements de bane pécheurs.” Ameen. |
|
|
|
Écoute le Khutba Jummah du Khalifatullah Munir A. Azim en intégralité (Audio) |
