بسم الله الرحمن الرحيم
Khutba Jummah
HADHRAT AMIR’UL MUMINEEN MUHYI-UD-DIN
Munir Ahmad Azim
28 Mars 2014 ~
(26 Jamad’ul Awwal 1435 AH)
(Résumé Khutba)
Après ki li fine souhaite « Assalamoualaikum Warahmatullah Wabarakaatouhou » à tous so bane disciples (et tous bane musulmans) entier le monde – en mentionnant bane l’Iles avoisinants, l’Inde, Kerala, Trinidad et Tobago etc. – Hazrat Muhyi-ud-Din (atba) fine commence so Khutba avec Tashahhud, Ta’uz, Surah Al Fatiha, et ensuite li fine dire:
Jeudi 20 Février 2014, mo ti dans le Nord de Maurice dans ene de so bane plus grands villages, Triolet. En route, mo fine zoine deux Moollahs ki sorti dépi Bangladesh. Zot fine présente zot avec moi après ki zot fine fer Salaam, et avec bane bons paroles, bane mots doux, zot fine invite moi dans Masjid vers environ 10h00 le matin. Là-bas mo fine zoine encore beaucoup musulmans ki sorti dépi Bangalore et l’Inde en générale. Zot fine demande moi mo nom, et avant ki mo réussi dire mo nom en entier – mo fine nek capave dire : Munir Ahmad, et alors ene de bane Moollahs là fine dire moi ki so Burzuq aussi appelle : Munir Ahmed, mais kan mo fine dire zot mo nom en entier : Munir Ahmad Azim, alors zot tous fine guette moi avec bane regards surpris et alors zot l’attitude envers moi fine changer complètement. Zot agressivité envers moi fine alors vine bien évident.
Finie bane bons mots, bane mots doux! Ton de zot la voix fine changer et zot fine toute suite demande moi : « Ou fine proclamé ki ou le Mohyuddin, Khalifatullah etc. » Alors sans aucaine hésitation et sans aucaine peur pou créatures, malgré ki zot ti en grand nombre dans Masjid, mo fine réponne zot : « Oui ». Zot fine ensuite demande moi ene série questions portant lors bane titres ki mo fine recevoir de côté d’Allah, et zot ti envie conné bé ki sanlà ki fine dire moi ki mo le Khalifatullah Mohyuddin etc. et alors mo fine dire zot ki c’est mo Créateur, mo Rab, ki c’est dans So la main ki mo la vie, la santé, manger, dignité et l’honneur trouver. Kan mo fine dire sa, zot pas fine croire moi, et zot fine dire ki mo ene menteur et alors ene débat fine commencer lors finalité de bane prophètes (Khatme Nabuwwat) ki zot croire dure comme fer.
Parmi bane les autres questions concernant le Mahdi et le Messie ki bizin vini, zot fine commence pose moi question lors là et zot fine mette devant moi sa Hadith là : « Mo fine laisse pou zot le Livre d’Allah (Quran) et Sunna ; si zot attache zot à sa, alors zamais zot pou égarer. »
Certain dimounes prétende ki sa hadith ki concerne le Mahdi zot contradictoires et Hadith ki cause de la venue de Nabi Issa (Jésus, (as)) zot pas certains, pas fiable. D’après zot, en l’absence d’ene verset clair de Quran Shareef, ki spécifié ki pou ena kikaine ki pou bizin vini, et à la lumière de sa Hadith là, alors pou sa bane kalité dimounes là, zot ena sa kalité raizonnement là : Eski alors sa pas veut dire ki seule moyen pou ramène la gloire de l’Islam, alors li seulement suffit pou suivre le Quran et Sunna de Hazrat Muhammad (saw)?
Quand zot fini pose zot question et avant ki mo réponne zot, zot fine dire moi : « Ou ene Qadiani, ou ene suivant de Mirza (c’est-à-dire, Hazrat Mirza Ghulam Ahmad (as)). Ou ene menteur, et imposteur couma Mirza. » Mo fine alors dire zot: « Oui, mo ene Ahmadi ki croie sincèrement dans mo maître Hazrat Mirza Ghulam Ahmad (as). Par la grâce d’Allah, mo pou réponne tous zot bane questions, et zot pou trouver ki sanlà ene menteur, imposteur, etc., entre Hazrat Mirza Sahib, moi et zot ki bane dimounes ki fine piétine en poussière bane l’enseignements Quran Shareef et bane paroles du Saint Prophète (saw). »
Ena bane les autres dimounes, bane ki dire ki zot bane musulmans, mais selment zot pose bane questions tellement stupides, et alors mo envie réfute zot aussi dans sa Khutba là, spécialement concernant zot questions et moqueries ki zot fine fer lors split ki fine ena dans Jamaat Ahmadiyya et couma ene Khalifatullah fine vini de parmi « zot », sa bane là même (c’est-à-dire, Jamaat Ahmadiyya). Zot pou trouver ki tous réponses à zot bane questions trouve dans Quran même.
Mo réponse pou zot: En ce qui concerne dernier partie de la question, nous pas capave nié ki sel façon pou amène bane dimounes de l’Islam ensemble, c’est-à-dire, bane musulmans, et pou mette zot lors chemin droite c’est pou fer zot mette en pratique, Quran et Sunnah. Nous absolument pas capave nié sa fait là. Mais la grande question ki vini après, c’est ki nous bizin conné ki sanlà pou amène sa et comment?
Alors ki le Quran Shareef fine reste intact ziska azordi, mais selment dans so présence même, dans présence Quran même bane dimounes fine commence ena dissension, différences entre zot et zot fine divisé en bane sectes et ti groupes. En premier lieu, kifer fine ena déclenchement de sa procéssuss là, et eski li ene procéssuss sans ene direction et sans ene tendance ou eski zot ena ene plan positif pou mette en pratique pou fer sa procéssuss là marché ?
Kan deuxième partie de la question vini, alors ou capave répondre positivement à sa question là sans nié à nouveau, ki nous trouve ene direction et ene tendance et ki sa tendance et direction là zot alle enbas au lieu de monte là-haut. C’est-à-dire, péna amélioration ; au contraire ena détérioration. Depuis le début même, c’est-à-dire, depuis l’époque de Hazrat Muhammad (saw), malgré ki Sunna ti très claire et nette à sa l’époque là et ki le Quran Shareef so l’influence ti pli grand, mais selment ki nous trouver ? Après Hazrat Muhammad (saw) bane dimounes fine commence ena bane dissensions, différences et divisions entre zot, et sa bane dissensions et divisions là fine contigné aller même, fine vine pli pire avec le temps, ziska fine arrive ene l’époque kot Khilafat fine disparaîte et alors la situation (de l’Islam et l’état de bane musulmans) fine commence dégringoler, fine sale, et fine pourri complètement. Fine commence ena bane nouveaux sectes et groupes et le Quran Shareef fine commence considérer couma ene simple livre ki cause lors plusieurs de bane sujets et ki d’après certains en même temps, contradire li-même. D’après ene certain kalité dimounes, zot dire ki Quran Shareef ena tel et tel commandements et explications et bane les autres affirme lé contraire et zot mette de l’avant bane les autres vues ki Quran Shareef ena, et alors c’est coumsa même ki bane différents groupes fine rentre en conflits directe l’un contre l’autre.
Donc, tout sa fine commencé et fine continué aller même ziska zot fine arrive à sa stage là. Concernant nécessité pou vine ensam lors le Quran Shareef et Sunnah, alors li bien claire ki bizin fer li, mais couma pou fer li, sa c’est pli grand question. A moins ki ene dimoune li résoudre sa question là, alors sa problème là pas pou résoudre. Le temps li contre nous, et sa li claire. Pli nous tardé, pli travaille là vine difficile. Pli nous navigue loin de Hazrat Muhammad (saw) – so l’enseignement – zot vine pli divisé et zot bane savants de la religion vine pli corrompu. Zot vine de moins en moins péna Taqwa (la crainte d’Allah) et au lieu pou amène nous tous ensam, zot fer dézordre, zot créer la haine, et dresse ene contre l’autre. C’est aussi ene fait connu de l’histoire. Donc, si nous suppozé pour ene ti moment, nous oublier ki ena kit Mahdi ou Messie ki bizin vini (suppozon ki zot pas pou vini), alors couma eski l’Oummah pou capave alors survivre ? Couma sa dimoune ki ti pose sa question là li-même, d’après li, li croire ki sel moyen pou ki l’Oummah survivre c’est pou reste attacher avec Quran Shareef et tradition et pratique du Saint Prophète (saw).
Alors, kifer zot (bane Oulémas là, bane Moollahs là) pas pé reste attacher avec Quran et Sunnah et kifer zot fine commence quitter et fer sakaine zot propre chemin si vraiment zot ti attacher avec Quran et Sunnah ? Zot pas ti capave vine divisé si zot ti vraiment attache zot avec Quran et Sunnah. Alors sa procéssuss là, nous trouver couma li pé prend chemin la descente et pé détérioré et nous pé témoigne ene décadence constant aller même, et dès ki li fine commencer, alors li pas fine améliorer ; li fine contigner détériorer même. Pli le temps passer, pli nous trouver couma bane générations gâté et vine de moins en moins pieux, zot pas attacher avec Deen-é-Islam ditout, zot pas fine dévéloppe le Taqwa (la crainte d’Allah), et pli le temps passer, pli bane générations zot moins confiant pou adopter façon de vivre islamique. Bien sûre, fine ena bane cas izolé de bane mouvements ki fine fer bane zéffort pou amène la gloire de l’Islam à travers l’histoire, mais zot pas fine constant partout. Zot ici et là et nous bizin mette sa bien claire ki zot pas fine réussi établir ene tendance pou ki pou casse sa bane tendance non-islamiques là parmi bane musulmans. Zot pas fine réussi teigne sa bane l’oppositions anti-islamiques ki ti pé envahir l’Ummah. Donc, bane ki croire ki sa situation pou capave changer sans ki ene kikaine bizin vini (de la part d’Allah), alors zot pé vivre dans ene « paradis » ki pas ena aucaine réalité parski zamais nous pas fine réussi trouve ene nation fer sa kalité travail là. Anou ré-analyse l’histoire couma Quran Shareef fine préservé. Et anou essaye gagne nous bane réponses là-dans. Quran li en vérité ene baze solide et positif et c’est là-dans même ki nous pou capave vraie l’histoire et saki li raconte nous.
D’après Quran Shareef, à sak fois ki la vérité révélé, après bane l’oppositions et bizin précizé, plusieurs de bane l’oppositions bien dure, alors en dernier lieu c’est la vérité ki réussi établir li et ensuite petit à petit bane dimounes ré-perdi le droit chemin, zot dévié du droit chemin et zot plonge dans ene société en décadence.
Alors, d’après l’histoire du Quran, ki fine passé ? Nous trouver ki sois Allah fine envoye ene prophète pou sauve bane dimounes ou bien si la religion fine aboli complètement, alors ene nouvo prophète fine vini avec ene nouvo religion. Nous pas fine lire aucaine-part dans l’histoire de la religion ki après ki ene la religion fine pourri et dimounes fine vine corrompu, et bane savants de la religion fine commence ena bane différences d’opinions entre zot lors bane questions fondamentales, alors nous pas fine lire ou tendé ki nék ene coup, coumsa même tous bane savants de la religion fine répentir pou zot comportements, et ki zot fine vine ensam et maille zot camarades et fer la paix et dire : « Anou oublier nous bane divergences d’opinions et anou uni. »
Couma eski sakaine pou capave oublier zot divergences d’opinons kan zot tous penser ki zot même lors le droit chemin et ki c’est zot-même ki pé fonde zot lors le Quran Shareef ou ene Livre Saint ou n’importe ki livre sa été, et alors couma zot ti contigné persisté ki zot lors le droit chemin à moins ki zot gagne ene dialogue entre zot, à moins ki zot essaye convaincre sakaine zot camarade, et essaye passe zot point de vues à bane les autres. Et dans ene société religieux ki fine vine tellement à part, tellement séparé et loin de bane vraies l’enseignements divines, alors sa li pas permette (d’après zot). Sakaine rode tini lors so bane propre l’idées de la religion. De ce fait, bane dimounes fine vine alors intolérant envers les autres kot zot pas rode écoute bane les autres zot points de vues. Sa pas concerne seulement bane savants, mais la société en entier fine vine corrompu. Et d’après l’histoire ki fine préserver dans le Quran Shareef, sa zamais fine arriver avant ki kan ene peuple ki suive ene religion fine vine corrompu, ki zot fine vine ensam encore et ki zot fine rectifié zot bane erreurs à travers zot bane Pirs ou Fakirs ou Oulémas ou Sufis et tous bane ki à la tête de l’Oummah, mais ki pas élu par Allah.
Kifer pas? Sa c’est parski d’après Quran Shareef, c’est bane chefs à la tête même ki vine corrompu en premier et après la masse (bane dimounes en générale ki suive sa bane chefs là) ki vine corrompu ensuite. Dès ki bane à la tête même vine corrompu mentalement et zot arrête ena la crainte d’Allah, alors la masse de bane dimounes zot suive sa bane chefs là automatiquement et alors c’est ene fait sa ki c’est toujours sa bane kalités chefs là ki détruire bane dimounes, et sa li ene vérité ki englobe bane dirigeants de la religion et aussi bane dirigeants politiques et bane les autres types de dirigeants aussi. Alors saki bizin en premier et ki très très important c’est ki faudé ena ene bon direction, ene vrai dirigeant ki dans le droit chemin, et ki honnête.
Si leadership religieux ti reste intacte, alors pas ti pou ena aucaine raison kifer zot fine commence ena bane disputes et différences d’opinions entre zot-mêmes, les z’uns contres les autres. Peut-être à cause ene kitchose, ene erreur zot fine gagne clash, mais certainement sa déclenchement là fine dégrader finalement dans ene procéssuss de différence kot maintenant zot ena sa bane différences, pas inconciaman, mais avec full conscience de saki zot pé fer, et alors zot créer encore plisse division par zot l’esprit tordu ki zot ena dans zot. Et alors sa abouti à sa bane différences là (pareil couma nous pé trouver azordi jour).
Si nous suppozé ki pas ena aucaine Mahdi ki bizin vini, et aussi pas pou ena Messie, ki zot venu li pas indispensable et ki tout types ‘Nabuwwat’ (l’apostola) fine fini pou toujours – alors ki pou arrive bane Musulmans en générale ? Astaire c’est la responsabilité de bane ki fer croire ki zot ena solution dans zot la main kan zot dire ki zot bizin seulement Quran et Sunnah pou vine de l’avant et prouver couma zot pou résoudre sa et mette sa en pratique dans ene façon satisfezan. Si ene dimoune vine ene bon musulman, alors laisse li vine ene bon musulman – li bon même, mais ki sanlà pou capave prend charge la suprémacie de l’Islam lors tous bane les autres religions ? Bane Oulémas là ? Ki sanlà pou capave revivre l’intégrité de bane musulmans en générale ?
Sa bane Oulémas là, si sa ti dans zot pouvoir pou fer li, alors dès le début même zot pas ti pou divisé entre zot-même et en vérité si ti compte lors bane Oulémas tousél, alors surement prend dépi siècle ki bane Oulémas fine amène dimounes dans l’époque de Hazrat Muhammad (saw) – pou soi-disant fer zot applique l’Islam et marche d’après Quran et Sunnah – mais nous trouver ki au lieu ki zot fine fer changement positif dans zot-même et bane dimounes en générales, zot-mêmes sa bane Oulémas là fine contigner la guerre entre zot-mêmes, et zot fine blâme sakaine zot camarades ki c’est zot camarades ki pé alle contre la religion, et pas zis sa, zot fine aussi appelle zot bane camarades bane traitres dans l’Islam, et d’après zot, sa bane l’autres bande de bane Ulémas, chefs et savants là etc., zot fine alle en dehors cadre de l’Islam et pli pire ki sa encore. Et d’après bane les autres, sa bane Ulémas là ti bane grand savants de la religion de l’Islam, zot ti bane grands serviteurs de l’Islam, et sa bane dimounes là ti pé lève zot là-haut là-haut, tandis ki bane les autres pas d’accord.
Donc, sa c’est zot l’attitude encore azordi, et alors couma eski ou capave dire ki l’Islam pou revive de nouveau ? Ki bane moyens et bane mesures pou servi ? Bizin ena kit l’espoir quelque part, ki raisonnable, mais selment l’histoire de la religion (ki dimounes fine fabriqué par zot propre pensées) rénié sa, zot rejette catégoriquement sa bane possibilités là. Alors ki réponses ki Quran Shareef et Sunnah donne nous lors sa sujet là?
Mo arrête ici même pour aujourd’hui. Insha-Allah, mo pou contigne lors le même sujet, vendredi prochain. Ki Allah donne nous bane musulmans à travers le monde le Tawfiq pou réfléchir lors l’état de l’Islam de nos jours et pou suivre bane instructions d’Allah couma fine stipulé dans Quran et Sunna, et ki donne l’espoir pour le maintien de l’islam et de so conservation, so préservation jusqu’au Jour du Jugement Dernier. Insha-Allah, Ameen.
