|
BEAUCOUP DIMOUNES PÉ CAUSE À PROPOS LEGALIZATION L’AVORTEMENT DANS MAURICE. FAUDE PAS NOUS GUETTE ZIS LA LOI MONDAINES MAIS PRIMORDIALE C’EST LA LOI DE DIEU. EN TANT KI CHEF DU JAMAAT UL SAHIH AL ISLAM, LI MO DEVOIR POU DONNE MO L’OPINION D’APRÈS BANE PAROLES SACRÉS DE DIEU KOT MO PÉ ENVOYE ÇA AU PREMIER MINISTRE, LES AUTRES MINISTRES, MEMBRES PARLEMENTAIRES, LEADER L’OPPOSITION, BANE MEMBRES L’OPPOSITION ET BANE MÉDIAS.
L’AVORTEMENT D’APRÈS BANE L’ÉCRITURE SAINTS
Le Créateur dire dans le Coran :
« O dimoune, si ou ena des doutes à propos ki pou faire ou réléver, ki Nous ti créer ou avec la terre, ensuite d’ene goutte sperme, ensuite ou ti vine ene boute collant, ensuite ene morceau la chair, en partie bien formé, et en partie pas bien formé. Ainsi Nous explique ou tout. Ensuite, Nous laisse séki Nous oulé, reste dans matrice ziska terme ki fine décider. Après ça, Nous faire ou sorti comme ene bébé et Nous faire ou arrive à l’âge majeure. Ena parmi ou ki arriver mort avant et ena ki vivre ziska ene l’âge si méprisable ki zot pas conne nannié de séki zot ti conné avant… » (Coran 22 : 6)
L’Avortement li pas ene badinaze, ni li ene jouet. Et li pas ene zaffaire simple ki du jour au lendemain ou nék décider pou faire ene l’avortement, parski l’avortement li touye ene la vie ki Bondié fine rende sacré ! Bondié dire dans le Coran:
« Pas tire la vie … parce qui Allah (Bondié) fine rende la vie sacré. » (Coran 2 : 153)
« Pas tire la vie qui Allah fine rende sacré… » (Coran 17 : 34)
« Pas touye ène à l’autre (entre ou). » (Coran 4 : 30)
Si ene tibaba li alle mort par accident, par example si maman là fine tomber, alors ça la mort là li considéré comme ene perte et non pas ene l’avortement. Dans ene l’autre cas, si arrivé bébé li encore vivant, mais la vie maman là en danger si li arrivé mette ça tibaba là au monde, kot maman là capave perdi so la vie, dans ça cas exceptionel là, pour sauve la vie maman là, l’Islam permette pou avorter. Mais à l’exception de ça, si ene maman ou ene parent ordonne pou touye so zenfant, que ce soit ki li encore dans ventre maman là ou sois si li fine fini né, ça li ene crime énorme dans lizié Bondié, et ça li ene l’enseignement de tous bane grands religion, tel que l’Islam, l’Hindouisme et le Christianisme.
Le Prophète de l’Islam (pssl) fine dire : « Mo faire serment par Celui ki mo l’âme trouve dans So la main, ki touye ene croyant, li pli grave auprès de Dieu ki disparition de ça lémonde là. »
Azordi ou trouver ki l’avortement fine vine ene fléau, kot bona vini, bane jeunes, ki fine perdi pudeur pé tombe dans bane tel situations kot zot pé mette au monde bane zenfants illégitime, mais malgré ça, l’Islam li condamne si ene telle jeune parent li alle touye so zenfant dans n’importe ki situation li été. Zot peur ça responsabilité ki ene zenfant pou donne zot, attention zot l’avenir, dignité, l’honneur, couma pou nourri tibaba là et aussi ki dimounes pour dire lor zot et zot prestige alle fini, si zot mette ça zenfant là au monde. Avant ki zot ti faire ene telle action sans pudeur et condané par bane Dieu l’Unique, vers Qui zot éna pou alle rende ene compte ene zour, eski zot pas fine réfléchi à tous salà ? Maintenant ki bébé là fine formé dans matrice maman là, astère ki zot alle tire ene la vie innocent, ki ignorant de zot crime, sans pudeur et immoralité. Eski li péna droit à la vie? Eski zenfant là ki responsable de ça?
Dans Coran, Bondié le Tout-Puissant dire:
« Pas touye ou zenfant, par peur de pauvreté. Nou pou donne zotte provision pareil couma Nous donne ou. Touye zot, sa ène grand péché. » (Coran 17 : 32)
« …ene malfaiteur lor la terre pou puni, li pou pareil couma dire li fine touye toute la communauté. Et si li sauve ene la vie, c’est comme si li fine sauve toute la communauté. » (Coran 5 : 33)
Et en plisse couma Bondié fine dire dans ça verset Coran là, ça c’est ene grand péché ça ki ou touye ou zenfant, même si li encore dans ventre so maman.
Sakaine responsable de so propre actions. Alors écarte ou de ça bane travail malpropres là kot Bondié condane ça totalement, et ça c’est le travail de Satan ça kot li encourage la perte de vie, et faire ou éloigner avec l’enseignement de Dieu, et kot ou pas pou ena aucaine peur pou Bondié.
Ena beaucoup cas aussi kot bane madames marié aussi alle faire ene telle crime couma l’avortement. Nous bizin rappler ki le mariage li ene institution sacré devant lizié Bondié, et de ce fait ene couple ki gagne le bonheur pour gagne ene zenfant, au fait c’est ene vrai bénédiction de Dieu et ene grand cadeau ki vine de Li. Ena bane couples ki fine marié dépi commié l’années et fine dépenses des milliers l’argent pour gagne ene zenfant, mais zot pas réussi. Alors la venue d’ene zenfant dans ça le monde là li ene vrai grâce de Dieu, kot li pure de tous bane péchés mondaines, kot ça zenfant là capave prend le droit chemin et vine ene guide pour l’humanité, pour amène bane dimounes vers zot Créateur. Alors pensé ki crime ça pou été, kot ou barre l’avenir ene bébé dans ça le monde là, kot li ti pou faire bane bon travail pour l’humanité et aussi pour so pays, et par ça faire so famille gagne l’honneur, gagne ene dignité dans ça le monde là.
Bondié fine explique couma li fine créer l’homme:
« Nous fine créer la race dimoune avec ene extrait la terre mouillée. Après ça, Nous fine place li comme ene goutte sperme dans ene réposoir en sécurité. Ensuite Nous fine faire le sperme coller et Nous fine faire ça boute collé là vine ene morceau (la chair) et Nous fine créer avec ça morceau là, les os, et Nous fine couvert les os là avec la chair. Et Nous fine produire ene l’autre créature avec ça. Gloire à Allah ! Allah Li même meilleur Créateur ! » (Coran 23 : 13-15)
A la lumière de ça verset là, mo cite ene dire du Prophète de l’Islam (pssl) pou donne nous encore plisse la lumière pou comprend bien couma ene la vie formé dans matrice ene maman, et ki kalité Bondié So travail extraordinaire.
« Certes, sakaine parmi zot, kan li fine créer dans matrice so maman, li d’abord pendant 40 jours comme ene goutte sperme (Nutfa), après li vine ene caillot de sang (‘Alaqa) pendant ene durée pareil, et après ene durée pareil li vine ene embryon (Moudgha). Lerlà, ene ange vini, ki insufflé l’âme, et li ordonne li pou accomplir quatre commandements, c’est-à-dire, inscrire : so bane moyens de vivre (de ça nouveau être là), terme de so l’existence, so bane actions, enfin, so malheur ou so bonheur future. »
Alors, Bondié continié dire (à bane madames) :
« Li pas permette ki zot cassiette séki Bondié fine créer dans zot ventre, si zot éna la foi dans Bondié et le dernier jour. » (Coran 2 : 229)
Maintenant mo pou mette devant zot, séki bane l’Écritures saints de l’Hindouisme à propos l’avortement et la vie comme étant sacré :
Rig Veda dire: « ki le fetus li vine alors ene partie de bane madames, couma n’importe ki partie de so lécorps; li (fetus là) pas faire li aucaine ditort; li (ça maman là) protèze (fetus là) et développement de ça zanfant là li faire endans li-même. En même temps ki li protèze fetus là, alors li aussi li gagne protection. »
Dans Satapatha Brahmana, fine mentionner ki ça dimoune ki retire ene fetus li ene malfaiteur.
Pareil couma lézot religion, bane hindous fine dépi bien lontan considère bane zenfants couma bane cadeaux Bondié.
Bane écritures dépi bane periods Védique ziska bane Smritis (100 B.C à 100 A.D) fine appelle l’abortion couma bhrunahatya (meurtre du fetus) ou farbhahatya (destruction d’ene grossesse) et fine condane ça comme ene péché bien bien grave.
La destruction d’ene fetus li pareil couma touye ene dimoune saint et pieux, d’après bane écritures hindous. (Abortion in a Crowded World, p.44)
Dans bane Puranas de bane hindus, ena ene prophécie concernant l’arrivée du Kali Yuga (période d’obscurité). Ça période là li ene période kot Satan pou faire ravage, kot menti, malhonnêteté, maladies, et la misère noire pou répandu partout. D’après ça bane prophécies là, le Kali Yuga li pou ene l’époque kot bane « sinyassins » (renonceurs de bane plaisirs de ça lémonde là) pou mette bane linge rouges, et li ene telle l’époque kot l’avortement aussi pou répanne partout.
Maintenant mo pou mentionne quelques versets de la bible kot fine condane tire ene la vie, parski la vie li sacré.
1. « Fécondé et multipliyé » (Genèse 1:28). 2. « Si ene zomme essaye faire du tort ene femme enceinte, ziska ki so fruit (l’enfant-fetus) avorté, et péna aucaine méchanceté après ki suive ; alors li pou être surement puni d’après séki le mari (de ça madame là) pou décide pou li, et li pou bizin payé couma le juge pou décider. Et si ena méchanceté ki suive ça acte là, alors ou prend ene la vie pour ene la vie, ene lizié pour ene lizié, ene lédent pour ene lédent, ene la main pour ene la main, ene lipié pour ene lipié, ene brûlure pour ene brûlure, ene dimal pour ene dimal, ene mark pour ene mark. » (Exodes 21 : 22-25) 3. « Bane garçons zot ene l’héritage du Seigneur, tandis ki bane zenfants zot ene récompense ki vine de li. » (Psaumes 127 : 3) 4. Psaumes 139 faire nous comprend ki ene fetus (ene tibaba ki pas encore né) li ene humain ki Bondié contan. Et Bondié ti dire le Prophète Jérémie (la paix lor li) : « Avant ki Mo ti forme toi dans ventre (to mama) Mo ti conne toi ; et avant ki to sorti dépi matrice (to mama) Mo fine donne toi ene statut sacré, et Mo fine faire toi vine ene prophète à bane nations. » (Jérémie 1 : 5). En d’autres mots, kan le Prophète Jérémie (la paix lor li) ti encore dans ventre so mama, Bondié ti fini faire plan pour faire li vine So serviteur Choisi.
A la lumière de ça verset biblique là, à propos Jérémie (la paix lor li) nous capave comprend, ki nous pas conné demain ki ene zenfant pou dévini ; li capave vine ene Messager de Dieu, ene homme pieux, ene bon dimoune ki pou faire du bien lor ça la terre là.
Moi, mo personellement, après séki tous ça bane paroles sacrés là fine dire concernant ça acte méprisable là (c’est-à-dire, l’avortement), si l’avortement li faire soit avant ki l’âme li rentre dans fetus ki pé développer là, même soit après, li bien condamnable devant lizié Bondié, parce ki ça tibaba ki pé grandi dans matrice de so maman li ene faveur ki vine de Li (Bondié), et ça ti être ki pé formé là li appartenir zis pou Bondié, et non pas pour l’homme. Ça tibaba ki pou vini là li ene zenfant innocent, sage, et pure de tous bane péchés et li vine de côté Bondié. Ça l’âme ki rentre dans li là li ene propriété ki appartenir à Bondié, et l’homme péna droit touye ene créature ki pas appartenir à Li. Rappler ki Bondié pas mette aucaine difficulté lor personne excepté séki li capave supporter. Et c’est Bondié même ki fine donne nous pouvoir pou guetter, tendé, comprend, mais malheureusement rarement nous remercier Li pour tout séki Li fine accorde nous, pour rafraîchi nous lizié, comme ene contentement pour nous lor ça la terre là.
Parmi Bondié So bane signes, Li fine créer pour l’homme bane femmes de même kalité pour ki ou vivre en trankilité avec zot (bane femmes) et Bondié fine mette entre hommes et femmes l’affection et la bonté. Ena là-dans bane signes pou dimounes ki réfléchi. Mais concernant bane malfaiteurs, bane dimounes ki pas réfléchi, zot suive zot propre dézir dans zot l’ignorance. Alors ki sanlà pou capave guide séki Bondié fine laisse égarer. Zot pas pou gagne personne pou capave secoure zot. Zot pas montrer aucaine reconnaissance pour séki Bondié fine accorde zot, et zot pé réjouir dans zot bane actes ignorants. Alors si ça bane kalités dimounes là ti voyager lor la terre partout côté, zot ti pou guette bane dimoune ki fine dézobéir Bondié, couma Bondié fine amène zot vers zot destruction !
Alors calamités fine vine lor la terre, et dans la mer : bane actions dimounes même fine mérite ça, et Bondié fine faire zot goûte zot conséquences ene partie de zot propres actions ki zot fine faire de mal.
Bane l’enseignements sacrés zot contre l’avortement, et de ce fait, l’avortement à Maurice FAUDÉ ZAMAIS LI ENCOURAGÉ OU LÉGALIZÉ !
Zis bane ki intélligent pou capave comprend le message ki ena derrière ça bane l’enseignements de toutes les religions, parski la religion amène vers moralité et la décence, tandis ki la liberté sans moralité amène dimounes plisse encore dans l’obscurité de ça le monde là kot li éloigner avec Bondié et So bane commandements afin ki Li gagne ene chemin de salut. Alors celui ki intelligent (Al-Aql) zamais pou légalize l’avortement, parski li pou capave distinguer entre bon et mauvais. L’intelligence li forme partie de nous-mêmes et li ene partie de la création Bondié. Bazé lor là, ene dimoune li être vu comme ene Mukallaf ki responsable pou comprend et accepter le message de Dieu, et li, par ça, li considéré comme Saint d’esprit. Mais si li laisse so égo et so l’esprit autoritaire manifesté, alors divant lizié Bondié, li pas ene Mukallaf (Responsable), au contraire, li vine ene dimoune ki fine dérangé mentalement.
Dans lizié Bondié, bane pli mauvais c’est bane ki faire sourds et muets, ki pas servi zot l’intélligence.
C’est Li (Bondié) ki fine créer la mort et la vie, pou tester ou et trouver ki sanlà faire meilleur travail. Li (Bondié) Puissant et Pardonneur aussi. (Coran 67: 3)
Alors ki sakaine parmi nous réfléchi lor ça verset Coran là, afin ki nous capave prend décision ki vine de côté de Dieu afin ki nous gagne So bénédiction et non pas So malédiction.
Munir Ahmad Azim Hazrat Imaam Muhyi-ud-Din
Jamaat Ul Sahih Al Islam
General P.O Box 599, Port-Louis
10 Mai 2009 |
