Discours: L'Ame et so Créateur

1. Le But De Nous Présence Lors La Terre

Couma fér comprends dans Qu’ran, tous bane l’âmes pou quitte l’océan de la miséricorde, ça place kot zot fine gagne l’existence grâce à Allah pou alle lors la terre (ene lémonde de l’eau et d’argile), qui remplit de souffrances, afin ki zot vrai valère réssortie : pou ki celui ki sincère capave différencié avec celui ki hypocrite, et celui ki honorable capave différencié avec celui ki pas mérite ça l’honneur là.

S45.V22 : « Allah fine crée bane lé ciel et la terre avec ene but pou récompense chaque l’âme d’après ce qui li méritér ».

Quand Allah mette divant bane l’âmes bane plaisirs et bane kitchoses matérielles de ça lémonde ici-bas là (c-à-d : la terre), alors ça bane l’àmes là zot témoignage ki zot ti fér avec Allah (Ki Allah tousél zot Créateur kan Allah ti dire zot « Eski Mo pas zot Créateur ? » et ki zot ti réponde par l’affirmatif), et de ce fait avec l’attachement avec ça lémonde là, zot « oui » symbolique vine impure.Kan zot attaché avec ça lémonde là, zot oublié ça l’alliance et ça l’attachement sacré ki zot ti éna avec Allah. Mais pour celui ki tenir so l’engagement avec Allah, et li reste sincère avec so Créateur, alors so témoignage avant li vine lors ça la terre là, li vine ene témoignage pur et sincère. Allah (Al-Jalil ~ Le Majestueux) ine crée ça lémonde lémonde là et Li fine mette la vérité et la faussté afin ki dimoune capave différencié entre ça deux là. Et pou ki nous capave comprends et pou ki ça reste claire Li fine mette lors la terre chaque kithose avec so contraire : « le doux et l’amer, le bon et le mauvais, la pureté et l’impureté, de l’eau doux et de l’eau salée, ene kitchose ki joli et ene kitchose ki vilain (car nu pou capave comprend la beauté seulement à partir ene kitchose ki vilain), le grand et le petit, ene gros ek ene maigre, ene original et ene copie, la vérité et la mensonge, la santé et la maladie, droite et gauche, la vie et la mort, la sincérité et l’hypocrisie, le riche et le pauvre, bonheur et malheur, le monde visible et bane lézot lémonde invisible, le vrai et le faux (Ki fér bane fausses billets éxister ? Parski éna bane vrai billets! Si bane vrai billets pas ti exister, pas ti pou éna bane fausses billets !) :

S57.V3 : « C’est Li (Allah) le Premier (Al-Awwal) et Li aussi le Dernier (Al-Aakhir), L’Apparent et le Caché…». S89.V3 :«…par (tout ce qui exister en) pair et impair…». S94.V5,6 :« Oui, à côté diffikilté éna la facilité…».

La justice li oulé ki ene catégorie dimoune li uni a so propre catégorie et Allah (Al-Mûqit~Celui ki nourri zot tous) dire nu dans Quran :

S24.V3,26 :« Ene zomme adultère capave marier seulement ene femme adultère ou ene idolâtre ; et ene femme adultère, seulement ene zomme adultère ou ene idolâtre capave marier avec li – marriage avec zot défende pou bane ki éna la foi ».« Bane mauvais femmes mérite bane mauvais zomme et bane mauvais zomme mérite bane mauvais femmes!Pareillement, bane bon femmes pou bane bon zommes, et bane bon zommes pou bane bon femmes ».

Allah (Al-Ali ~ Le Très-Haut) éna ene ange ki réunit chaque dimoune avec ene l’autre de so propre catégorie (Eski ene dicton populaire pas dire : « Qui s’assemble se ressemble » ?). Ene catégorie dimoune li uni à ene l’autre dimoune ki pareille couma li. Chaque prophète ki Allah fine envoyé lors ça la terre là, ti vini pou fér dimoune trouve la différence entre la lumière et l’obscurité afin ki nu capave distingue la vérité au milieu de bane kitchoses opposées (exemple : Hazrat Nuh ^(a.s), kot ti éna bane dimounes ki ti rentre dans l’arche avec li, avec bane ki ti noyés ; Hazrat Moussa ^(a.s) , ki ti ene l’exemple pou démontré la vérité au milieu de la fausseté kan li ti bizin défié banes magiciens de Pharaon).

De ça façon là, l’époque après l’époque, beaucoup de bane différents prophètes fine vini, prêchant le message d’Allah, mais le sense de la prophétie fine reste unique ziska le sceau de bane prophètes : le Prophète Mohammad ^(s.a.w), c’est-à-dire kan le St.Prophète ti vini comme le dernier messager ki amène la loi (Qu’ran) et ki témoigné ki tous bane prophètes sans exception fine prêche l’unicité d’Allah. Exemple : Abou’l Hakam (le père de la sagesse) ine vine par la suite Abou Jahl (le père de l’ignorance, en raison de so impiété et so refus pour accepter la vérité).

S7.V35,36 :« O zenfants d’Adam, n’importe kan bane messagers de parmi ou même arrive parmi ou pou raconte ou Mo signes, celui ki suivre Mo chemin et améliore so conduite pas pou gagne ni peur ni chagrin. Mais bane ki rejette Mo signes et traite zotte avec arrogance, zotte pou vine camarades difé et zotte pou reste là-dans pour touletemps ».

S33.V7 :« Et kan Nous ti prend l’engagement bane prophètes, toi-même (Mohammad ^(s.a.w)), Nuh, Ibrahim, Moussa, et Issa garçon Mariam ; et Nous ti prend de zot ene engagement ferme ».

Nous tous nous lors ça la terre là pour ene but précis ; pou ki nous fér nous preuve et surmonte bane diffikiltélors nous chemin afin pour prouve nous sincérité envers Allah ek pour gagne Li tousél à la fin nous voyage lors ça la terre. C’est pour ça raison là ki le St.Prophète ine dire : « Celui ki pou éna comme dernier parole (avant li mort) : « Péna aukaine bondié apart Allah » pou rentre dans Paradis » (Rapporté par Moua’z ^(r.a)). Li évident ki kan ça dimoune là pé fér ça témoignage là, c’est so l’âme spirituelle ki pé causé, parski so l’âme charnelle au moment de la mort li occupé avec so élément primaire : l’argile, ki fér li encore attaché avec ça lémonde là. Quand nu presse ene z’orange, li automatique ki nu bizin gagne 100% jus de fruit. ki sorti. Si lékaire li contenir ene lot kitchose ki l’unicité divine, alors zis ene mélange impur pou sorti. Or, nous coné ki la pureté ek l’impureté zot séparé. Ene li destinée pou Paradis et l’autre pou l’enfer. Quand Allah (Al-Haseeb ~ Celui ki tenir compte de tout kitchoses) examine séki lékaire contenir à l’heure de la mort, alors à ça moment précis làki la vérité li automatiquement triomphé du mensonge.

2. Couma Pou Obtenir La Pureté Du Cœur ?

Quelqu’un fine dire : «Le principal, c’est l’action ; la parole pas important ». Si ou content la parole, pou bizin cause are ou parski ou pas ene dimoune d’action. Au sujet de bane actions, ou capave comprends ki ça veut dire seulement Namaz (la prière), Roza (le jeûne), Méditation, la Charité, l’invocation (bane doahs), Mazine Allah beaucoup (Dhikr) surtout par le myen de la langue, Hajj (pèlerinage à la Mecque), passe la nuite dans doahs, bane lamentations, bane larmes ek la dévotion. Mais tout ça là pas appelle action ; zot zis bane moyens pour parvenir à l’action. Li possible ki kan ou accompli ça bane « actions » là, zot exerce ene l’influence lors ou et zot transforme ou par rapport à séki ou ti été. Allah

(Al-Ghaffaar ~ Le Très-Pardonneur) ine dire :

S29.V45 : «…Oui, la prière (Namaz) empêche dimoune faire bane choses dégradants ek ki défanne…»

Namaz li ene moyen pou éloigne bane pêché et bane fautes et détruire le mal.L’action li consisté en sé ki ou purifié ou de ou bane fautes. Car Allah Le Sublime Li Pur! Li de nous devoir pou purifié nous parski l’impureté li pas admette dans le monde d’Allah (le monde de la lumière). L’action li consisté en séki nous change l’état de nous lékaire et atteindre la purification intérieur. Ça li vine par bane étapes spirituelles, ene sorte d’escalier, avec bane marches plus ou moins longues ki prend forme d’après nous capacité ; parski Allah (Al-Halim ~ Le Très-Clément) ine dire :

S7.V42 :« Allah pas oblige ene dimoune pou charier (ene fardeau) plisse ki li capave ».

S4.V28 :« Allah oulé diminuer ou diffikilté, parski dimoune fine créer faible ».

S17.V84 :« Dire zot : « Chaque dimoune agir dans façon ki li fine créer ».

La réalité de l’action li consisté à séki ou transforme ou même à chaque instant et ki ou progressé petit à petit vers Allah. Car le Prophète d’Allah ^(s.a.w) fine dire : « Allah pas guette ou lé corps, ni ou aspé extérieur, mais Li guette ou lékaire ». (Hadith : Muslim). Li guette lékaire afin pou coné ki dégré l’amour nous éna pou Li. Or, ça action là, ressemble à ene action matérielle. Li pareille couma bane z’éfforts et bane pratiques physiques ki nu fér, pareille couma Namaz, Roza etc…Hazrat Moussa ^(a.s) ene fois ti trouve lors so chemin ene berger ki ti pé adrésse à Allah dans so propre façon. Bane paroles ki ça berger là ti pé prononçé avec Allah ti pé irrite Hazrat Moussa ^(a.s) ki fine repproche li la façon ki li ti pé adresse Allah. Sa dimoune là fine éloignédans désert dans ene façon abriti. A ce moment-là, Hazrat Moussa ^(a.s) fine reçevoir ene révélation de la part d’Allah (en forme d’ene réprimande) kot Allah dire Hazrat Moussa ^(a.s) : « To fine sépare Mo serviteur de Moi ! Eski to mission c’est pour pour unir ou bien créer la division ? Tanque ki to capave, zamais rode séparation parski c’est ki pli détestable à Mo liyié c’est la séparation. (Hadith). Mone donne à saque dimoune zot façon d’agir ; Mone donne à saquaine ene forme d’expression. En séki concerne ça berger là, céki li fine dire mérite bane louanges, et toi céki to fine faire, ça mérite ene blâme ; Pou li (ça berger là), so bane paroles ti du miel et quant à toi , to bane paroles ti couma dire poison. Mo indépendant de tout pureté et impureté, de tout paresse ou de tout empressement dans la religion. Mo pas fine ordonne tous ça là pour Mo propre profit mais pour ki Mo bane serviteurs trouve ene bienfait dans ça. Pour bane Indiens, la langue de l’Inde li digne de louanges, et pour tous bane lézot pays, bane langues de ça bane pays là ! Mo pas vine Saint kan kan zot glorifié Moi, c’est zot ki vine saints et pur (kan zot glorifié Moi (Allah). Mo pas guette la langue et la parole, Mo guette l’esprit et disposition ki zot éna. Mo guette dans bane lékaire pou inspecté si lékaire là égoïste, malgré le fait ki bane paroles prononcés là capave paraître bon là-haut, là-haut !

S9.V8 : «…Zotte fér ou plaisir avec zotte la bouche, mais zot lékaire faire le contraire…»

S48.V11 : « Bane Bédouins (Madina), ti reste derrière pou dire toi : ‘Nu ti occupé avec nu du bien ek nu famille. Dimane alors Allah pardon pour nu’. Zot dire avec zot la langue ce qui pas dans zot lékaire… »

S3.V167 : « Et bane ki ti hypocrite, kan ti dire à ça bane là : ‘Vine fér la guerre pou la cause d’Allah, ou simplement défanne (Madina)’; Zotte ti dire : ‘Si nu sûr pou éna la guerre, nu ti va suivre ou’. Sa jour là zot ti penché vers l’infidélité qui vers la foi. Zt ti dire avec zot la bouche ce qui pas ti dans zot lékaire. Allah cone plus bien ce qui zot ti pé cassiette ».

Ça bane verset Quran là qui bane valeurs de la parole, zot véridique seulement kan dimoune éna ene lékaire pur car c’est lékaire ki l’éssence même de tout action, et c’est l’essence (séki lékaire contenir) qui compte. Allah explik Hazrat Moussa ^(a.s) ki bane dimounes ki cone zis bane pactes de la vie de tous les jours zot ene catégorie dimounes tandis ki éna ene lot catégorie l’âme qui « mort » pou Allah (c-à-d : ki zot prêt à tout pou gagne ek réalize Allah). Nous pas capave sépare l’action de la connaissance parski li amène la crainte d’Allah et ça dimoune ki Allah plisse content là bizin ene dimoune ki plisse éna la crainte d’Allah :

S4.V1 :« O dimoune, craindre ou Seigneur, qui fine créer ou à partir ene seule personne, et qui ti créer ene compagne pou ça dimoune là, et qui fine répande (lors la terre) à partir de ça deux personnes là beaucoup d’hommes et de femmes… »

L’action ek la soumission zot pas transforme ni l’origine ni la nature de l’homme mais zot rendre apparent ça l’essence là ki fér li atteindre la perfection. Si péna action, alors péna aukaine rendement (l’essence détruit et pas produire aukaine fruit!). Quand nu plante ene pié pêche ek ene pié grénadine dans ene jardin, pli nu okipe zot bien (nu arrose zot, tire bane mauvais l’herbe etc…) alors zot pli grandit bien et zot rapporte bane zoli fruits. Le fruit c’est ça-même le but de l’arbre et li vini zis dans dernier l’heure. Kan ene pié rapporte bane fruits, so bane branches vine lourd et zot versé embas et zot pas affecté par di vent tellement zot lourd mais d’ene lotte côté ene pié ki pas rapporte fruits, li reste droite et li vine fière de so feuillage ki fér tapaze kan di vent sakouye li [Tandis ki pié ki rapprte fruits là li montré so humilité et soumission à Allah, lotte pié-là montré so l’arrogance parski li pas cone valeur d’ene piéki rapporte fruits] ; Pareillement, bane croyants zot capave réagir couma ça pié ki rapporte fruits là ou soit pareille couma ça pié sans fruits là couma di vent de ça lémonde matérielle là touche zot. Éna bane croyants ki reste ferme dans bane épreuves, et zot montré zot humilité et soumission envers Allah malgré banes diffikiltés parski zot fine apprane ki été la souffrance mais à la fin zot fine gagne la faveur pou gagne Allah à zot côté tandis ki bane lézot ki pas cone valeur de bane faveurs d’Allah, zot montré zot l’arrogance et zot laisse zot zot entraîné par ça lémonde matérielle là. Toutefois, en ce qui concerne l’accomplissement ultime, li impossible ki ene pié grénadine transforme en ene pié pêche. Li pou reste toujours ene pié grénadine. [Ici, pé explik nous le sense de ça pacte ki bane l’âme ti fer avant ki zot vine lors ça la terre là kan zot ti témoigné ki c’est Allah zot créateur et ça fer référence à ça bane l’âme ki reste fidèle à zot pacte].

Le but de la Shariah (la loi islamique) consisté pou fér dimoune tourne zot complètement vers Allah, ki l’océan de la miséricorde. C’est bane dimounes ki mazine Allah beaucoup et tourne zot complètement vers Li ki gagne ça faveur pou gagne tout bane zaffaires ki zot bizin grâce à la miséricorde d’Allah parski Allah Li couma ene la mer immense et l’homme par le moyen de zikr, namaz, doahs etc… et la pureté du cœur, li arrivé à réalise ça divinité ki en li-même et li zoine ça la mer là et li unifié avec li. Ça bane kalités dimounes là, même dans zot sommeil sommeil et zot réveille, zot connecté avek Allah ek zot mazine Li beaucoup :

S3.V191 :« Même assizé, diboute ou bien allongés lors zot côtés zot (ça bane dimounes pieux là) mazine Allah beaucoup et zot fer ça réflexion là lors la création bane léciel et la terre :’O nu Maître, To pas fine tous ça là pou narien. Gloire à Toi et protège nu comtre punition difé’».

La plupart de bane dimounes ki attaché avec ça la terre là, zot pas pou capave accomplir bane exploits de ça bane dimounes ki fine cansacré zot à Allah, ki la mer de la connaissance. Tous séki arrivé à l’homme, c’est selon so propre la force et endurance (patience dans bane épreuves). Mais tout comme bane poissons ki nagés dans l’océan, coumsa bane pieux zot nagé dans l’océan de la miséricorde divine, zot gagne la perfection de zot l’obéïssance à Allah dans l’essence même du Shariah. Bane ki considère ki bane saints ki éna ene façon mystique pou montré zot rapprochement continuelle avec Allah zot en contradiction avec l’enseignement de l’Islam, ça pareille comme si zot (ça bane dimoune ki pensé ki bane saints éna bane l’enseignements ki en contradictoire avec l’enseignement de l’Islam) ; ça pareille comme si zot pensé ki di pain dans ene di pain d’ene kilo li pas pareille avec ene la mine di pain, ou bien ki de l’eau d’ene fleuve li différent avec de l’eau ki fine ramassé dans ene seau ou ki zot confondre de l’huile coco avec coco la même. Ça dimoune làcapave dire ki ça bane noix de coco là zot séparé et ki nu capave compte zot kan nu réunit zot dans nu la main et ki zot bouzé ek fér tapaze. Dans de l’huile de coco, ça bane caractéristiques là népli éxister. Eski de l’huile là capave ene lotte kitchose ki ça noix de coco là ? Or, par ça bane paroles là, nu prend compte ki bane dimounes pas cone vraiment ki été ene noix de coco ; zot nék associé li avec so kantité ek so tapaze ki li fer. Zot pas comprends en quoi noix de coco là consisté vraiment. Nous dire ki ça bane dimounes là zot bane formalistes [c-à-d : zot nék juge ene kitchose par so l’apparence et so bane lézot aspé physiques ki paraître logique pou zot].

Le vrai sense du Shariah c’est la soumission à Allah, ki nu tourne vers Li tousél et ki nu tourne nu lé dos avec ça lémonde là (la terre) et avec satan. [En Arabe nu appelle ene dimoune ki soumette à Allah-Ene Musulman]. Si namaz, soumission ek Shariah éna ça même forme là, alors pou bizin ki tout bane religions du monde éna même forme et même apparence ; c-à-d, ki le but le même kot zot tous réunit sous l’unicité d’Allah et la soumission complète à So volonté. Parski Allah ine dire dans Qur’an,

S26.V96 :« Oui, et tous ça (bane enseignements) là, ti déjà dans bane écrits de bane anciens ».

S88.V18,19 :« Oui, certainement ça c’est bane écrits anciens, bane écrits d’Ibrahim et de Moussa ».

C'est-à-dire ki ça Qu’ran et ça Religion là (L’Islam) ti déjà exister dans bane écrits et bane la loi de bane prophètes passés.

S2.V136 :« Dire : ‘Nu croire dans Allah et dans séki Li fine révélé pou nu, et séki fine révélé à Ibrahim et Ismael et yaqub et bane tribus, et séki fine révélé à Moussa et à Issa, et séki fine révélé à bane prophètes de la part de zotte Seigneur : Nu pas fer aukaine différence entre zot. Et c’est à Lui (Allah) ki nu soumette nous-même ».

S5.V44, 45 :« Et Nous fine fer descende la Thora ki ene guide et ene source de lumière. C’est lors so fondement ki bane prophètes ti soumette à Allah, ainsi ki bane prêtres Juifs et bane savants en matière de bane z’affaires de bane Juifs ; Car Nous ti confié zot la garde du livre d’Allah et zot témoins de ça… ». «…Et bane ki pas juge d’après ce ki Allah fine révélé, c’est ça bane-là ki bane incroyants ».

S5.V46, 47 :« Et après zot Nous fine envoye Jésus fils de Marie, pou confirme séki ti éna dans Thorah

avant li. Et Nous fine donne li l’Évangile, zot éna là-dans guide et lumière, pour confirmer séki ti éna dans Thora avant li… ».«Ki bane dimounes ki suivre l’Évangile jugent d’après séki Allah fine révélé. Bane ki pas jugent d’après sé ki Allah fine révélé, ça bane là zot bane pervers ».

S5.V48 :« Et lors toi (Mohammad), Nous fine révèle le Qur’an avec vérité pou confirme le livre ki ti là avant li et pour prévaloir lors li. Juge donc parmi zot d’après ce qui Allah ine révélé. Pas suivre zot passion, loin de la vérité ki fine vini. Si Allah ti oulé, certainement, Li ti capave faire de zot tous ene sél communauté. Mais c’est afin pour tester zot à travers séki Li donne zot. C’est vers Allah ki zot tous pou rétourné ; alors Li pou informe zot à propos de quoi zot pas ti pé d’accord ».

Bien sûr, bane livres précédents, zot pas ti existé sous la forme et l’apparence du Quran et zot pas ti composé dans ça l’ordre là. Le Quran li en arabe, et bane lézot écritures zot en syriaque et en hebreu. Dans sakaine de ça bane livres là éna ene certain forme de jeûne ki fine prescrire, bane différents et zot décrète certain actes comme justes et licites et bane lézot actes comme illicites (interdit).

Li bien évident ki la réalité de la réligion li pas concerne ni la forme et la langue. Li apparaître dans chaque forme et chaque langue. Bane langues et bane Shariahs zot pareille à bane mezure ek la religion et la connaissance d’Allah zot pareille à bane mezure, ek la religion d’Allah et la Connaissance d’Allah zot pareille couma de l’eau ek di vin ; ki capave trouve dans pluzieurs de bane récipients ki existé ; par exemple : ene vase. Mais de l’eau li pas ça vase là. Celui ki adore ça récipient là, li ignore de l’eau là. Avant ki li trouve n’importe ki récipient, li pas admette l’existence de ça de l’eau ki dans récipient là. Ene tel dimoune pas cone la valeur ek le contenu de ça de ‘leau là. Ça dimoune là li nék ene formaliste ; c'est-à-dire ki li adore nék la forme ki trouve divant li en l’occurrence ici, c’est ça vase là. Kan à celui ki adore ça de l’eau là, li trouve de l’eau dans n’importe ki mezure et façon ; et li réconnaîte li au fond de so l’âme et lékaire et li prosterne li devant ça vase là. [Ici, pé fer comprends ki Allah li couma ça di l’eau là mais ki Allah li partout ; Kan nu réconnaîte et trouve l’essence d’Allah dans ene kitchose ou ene dimoune, nu oublier ça forme physique ki divant nu là et nu prosterne devant Allah, la réalité des réalités ki trouve dans ça kitchose ou ça dimoune là et nu trouve Li partout car nu prend conscience de Li tousél dans chaque être et chaque forme ki nous rencontré].

S2.V34 :« Et kan Nous fine dire à bane anges :’Prosterne zot devant Adam’, zot tous fine prosterner sauf Satan (Ibliss) ki fine réfusé et ki fine gonflé (avec orgueil) ; Or li ti du nombre de bane mécréants ».

Le but c’est ça de l’eau là, parski c’est li ki nourrit et non pas ça vase là. Le goût de ça de l’eau là li dépanne de nu l’état réelle et non pas par imagination ; c’est par nu l’état purifié ki nu capave goûte au plaisir de ça la joie suprême et kan nu gagne Allah et c’est pas l’imagination ki capave amène vers ça mais la pureté du cœur ek ene dévotion réelle pou Allah. Ene fois, le Prophète ^(s.a.w) ti embrasse Aìsha ^(r.a) ; Aisha fine guette li-même et fine émerveillé. Pendant quelques jours, le Prophète ^(s.a.w) pas fine pose so liyié lors li et ça fine cause Aisha beaucoup de chagrin. Li fine alle plaigne so douleur (ki ça action du Prophète ^(s.a.w) fine cause li là) à Allah. Alors ene message fine vini kot Allah fine dire le Prophète ^(s.a.w) : « Alle console Aisha ». Le Prophète ^(s.a.w) après ça message là, fine alle rode Aisha pou demande excuse pou so comportement et li fine embrasse li ek dire li : « O Aisha, pas pensé ki mo embrasse toi par amour pour to visage. Mo embrasse toi pour l’amour d’Allah, parski dans to visage, mo trouve le visage de mo Camarade (Allah) et dans la nuit sombre, c’est la lumière de l’aurore (naissance du soleil à l’horizon) divine ki mo trouvé dans to lécorps. Mo prosterne devant Allah (Al-Samad~ L’Absolu), et non pas devant to lécorps physique. To bizin évite pou guette toi pendant pluzieurs jours ». Or c’est ça la vrai raison ki cause bane diversité d’apparences de bane prophètes, bane saints, bane Shariah, bane religions, bane chemin, depuis le commencement ziska la fin. Nous pas considère ene imitateur ek ene chercheur de vérité couma égale. La beauté de l’essence de çà chercheur de vérité là pou apparaître ek la laideur et la fausseté de ça imitateur là pou dévoilées :

S3.V106 :« Le jour où certains visages pou éclairés et bane lézot pou vine noirs…»

Satan ti prié pendant 6000 ans ; li ti Imaam (guide) de bane anges. So la prière dans so forme extérieur ti parfait, mais so lékaire ti impure. Allah ti mette li à l’épreuve devant Adam.

S38.V73,74 : « Tous bane anges fine prosterner sauf Satan, ki fine montréso l’orgueil et fine vine du nombre de bane mécréants ».

De ça façon là, fine capave triyé le faux ek fine sépare li avec la vérité, et li fine vine évident ki, bien ki satan en apparence ti unique et proche d’Allah, en réalité et en vérité, li ti opposé à Allah et li ti ene étranger. L’éxistence de Adam fine cause la différence entre le vrai et le faux. Allah fine crée bane anges, zot fer so adoration en permanence, zot pas manzé et zot nék nourrit zot-même de la lumière d’Allah. Ensuite Allah fine crée bane z’animeaux ; zot manzé, dormi ek reproduire ; mais pas n’importe couma. Zot soumis à l’ordre d’Allah (dans bane périodes précis ek d’après bane règles fixes). Enfin Allah (Al-Muhyi~ Celui ki donne la vie) fine crée l’homme ; et li possède ene côté animale ek ene côté angélique. Si li dirige li-même vers so côté angélique, li capave réussit dépasse stage d’ene ange. Si li alle vers so côté animale, li capave vine pli pire ki bane z’animeax. Pendant le mois béni de Ramadhan, bane Musulmans, ni boire, ni manzé dépi commencement kan soleil lévé ziska ki soleil couché ; la nuite zot fer bane namaz Tarawi et ainsi zot la foi et zot spiritualité augmenté bien vite et bane masjids reste rempli. Mais couma ça mois béni là fini, bane masjids révine vide couma avant, parski l’homme so nafs « l’âme charnelle » réprends control lors li. Pour ene croyant, le combat intérieur contre li-même, ki nu appelle le « grand Jihad » li permanent. L’être humain li pareil couma ene cheval (l’âme charnelle) ek so cavalier (l’âme spirituelle). C’est celui ki domine l’autre ki dirige ça dimoune là! L’âme charnelle li vine de l’argile, difé ek ene désire permanent pou rétourne vers so l’origine. L’âme spirituelle, k iso source c’est Allah, li vine du paradis, et li aussi li désire retourne vers ça paradis là ; et c’est pourquoi éna ene la guerre permanent dans l’homme, entre le bien et le mal. Ki ça dégré ki nu bizin atteindre ?

Ene l’example :

« Ene zour, Hazrat Ali ibn Talib ^(r.a) ti pé la guerre avec ene ennemi d’Allah et li fine réussi domine li ; mais à ça moment là, dimoune là fine crasse lors so figuire. Alors, Hazrat Ali ^(r.a) fine senti ene la haine monter dans so lékaire (pou ça dimoune là) et aussitôt li fine ramasse so l’épée dans so fourreau et li fine arrête combat là » parski si li ti pou contigne la guerre, li pas ti pou pé fer li pour Allah mais pou satisfaire so l’âme charnelle parski so l’intention fine changé (kan ça dimoune là fine crasse lors li) et si li ti contigne la guerre, ça ti pou fer Allah encolère. Le Prophète Mohammad ^(s.a.w) fine dire dans ene hadith Qudsi (qui vine d’Allah) et ki rapporté par Muslim ; kot Allah pé dire :

« Mo suffit tellement à Moi-même, ki Mo pas bizin bane associés. A partir de maintenant, ene kikaine ki pou fer ene action pou Moi en associant ene l’autre avec Moi, Mo pou réjette so action, et abandonne li à (ça kitchose ou kikaine) ki li fine associé are Moi là ».

Nous bizin en permanence rode la satisfaction d’Allah, ziska ki nu « moi » (nafs) disparaîte :

S89.V27,28 : « Oh! L’âme tranquilizé, retourne vers to Seigneur satisfait de Lui et Li aussi satisfait de toi ».

Allah (Ar-Raouf~Celui ki affectueux) fine crée bane formes dans ça lémonde là, afin ki bane créatures zot cone fer la différence entre ene chose crée ek le Créateur, et li fer z’éffort pou alle vers so Créateur. Par example, ene lady (dame) lors ene balcon ki trouve ene cavalier en bas et li jette ene roche lors li pou attire so l’attention là-haut. Cavalier là guette là-haut, non pas pou observe roche là mais pou guetté ki sanla ki pé jette ça roche là. Pareillement lady là jette roche là pou ki cavalier là trouve li et non pas pou ki li guette roche là. Bane léciéls, la terre, soleil, z’étoiles, bane formes, bane accidents, tous ça là zot pareille couma ça roche là ki le Bien-Aimé de l’âme (Allah) Li jetté dépi le monde invisible, ziska dans ça lémonde physique là (pou ki nu contemplé Li)

S11.V7 : « C’est Li ki fine créer bane léciel et la terre en six jours, alors ki So trône ti lors de l’eau afi ki Li tester ki sanla parmi ou faire pli bon travail ». S10.V5 :« C’est Li ki fine crée soleil comme ene la lampe, et la lune comme ene lumière, et Li fine prescrire pou li (la lune) bane différents stages, afin ki ou conne kantités l’année et létemps ki passer…». S14,V33 :« Li fine mette soleil et la lune ki fer zot travail sans relâche, à ou service ; Li fine mette la nuite li zour à ou service ». S78.V9-11 :« Nous fine accorde ou sommeil pou ou reposer.Nu fine faire la nuit comme ene vêtement (c-à-d, ene couverture) et le jour pou ou gagne ou la vie ». S13.V2 :« Allah, C’est Li-même ki fine mette bane léciel là-haut sans colonnes, couma ou capave trouvé…». S15.V.16 :« Nous fine place bane planètes (ek z’étoiles) dans léciel et Nous faire li joli, pou dimoune guetter ». S15.V19-22 :« Nous fine étende la terre et Nous fine mette là-dans banes montagnes fermes et solides et Nu fer toutes sortes de choses pousser lors là, et bien proportionner. Et Nu fine place là-dans tout séki nécéssaire pou ou vivre et aussi pou bane ki ou pas responsable zot nourriyure. Et Na pas éna narien ki Nu pas stocker, et Nu envoye li graduellement, par kantité ki Nu décider. Et Nu envoye divent ki fertilize (bane plantes), et Nu fer di l’eau descende dépi lors léciel, et Nu appaize ou la soif avec ça…».

S80.V24-32 :« Dimoune bizin prends compte so nourriture. C’est Nu ki verse de l’eau en kantité, ensuite Nu fer la terre fende, et Nu fer la grain pousser là-dans, et raisin aussi, légumes, z’olives, tames, et bane jardins touffus, fruits et fourrage, pou ou jouissance et pou ou bétail ».

S13.V12,13 :« C’est Li ki fer ou trouve dans z’éclaire ene peur mais aussi ene l’espoir, et Li créer bane nuages lourds (épais avec la pluie). L’orage fer So louanges et glorifié Li, et bane anges aussi (glorifié Li) par crainte de Li. Li envoye la foudre (l’orage) et Li frappe avec ça bane ki Li oulé…».

Et dans S24.V43 kot Allah mentioné :«… Et Li fer descende dépi lors léciel ene montagne la grêle, et Li fer ça tombe lors ki Li oulé…»

Nu bizin fer ki l’amour d’Allah rentre dans nu lékaire ; et zis l’amour d’Allah capave chasse l’amour de ça lémonde là de nu lékaire et nu bizin fer tout en nu pouvoir ki l’amour d’Allah éna le dessus lors tout bane l’amour ki nu éna pou ça lémonde là (e.g : télévision, l’auto, etc..), tout bane kitchose ki fer nu éloigné avec Allah. Allah (Al-Qayyoum~ Celui ki subsisté par Li-même) mette nu en garde :

S6.V32,70 : « La vie lors la terre, c’est seulement badinage et amusement. C’est la vie dans l’autre monde ki meilleur pou bane ki suive chemin Allah… ». « Quitte bane ki prend zot religion en badinage et amusement, et ki laisse la vie lors la terre embête zot… ».

Dans ça lémonde là, éna bane dimounes ki intéressé avec l’astrologie (ene croyance de la divinité ki exprimé par le mouvement de bane z’étoiles ek bane planètes), la cosmologie (l’étude de bane structures et l’évolution de l’univers) et éna bane lézot ki intéressé avec la connaissance de bane substances, et à bane science et pluzieurs bane lézot travails. Chakaine de ça bane 100,000 sciences là, zot bien attirants, tellement attirant, ki zot influence bane dimounes plisse ki bizin! Kan dimoune plongé dans bane kitchoses ki vain (initile), alors alle dans l’erreur et l’orgueil et la fierté gagne le dessus lors zot et zot considère bane prophètes et bane Saints couma bane dimoune ignorant et fous, parski zot bane critères pas applik à ça bane kalité dimounes exceptionelle là ; parski Allah (Al-Afuww~ L’indulgent) dire nu dans Quran :

S8.V31 :« Et kan récite zot Nu bane versets, zot dire : ‘ Nu fine déjà tende ça avant. Si nu ti oulé, nu ti capave cause pareil nu aussi, et ça, c’est seulement zistoires vié l’époque’ ».

S16.V24 :« Et kan dire zot : ‘ Ki kitchose ki Allah fine fer descende ?’. Zot réponne :’ Zistoires vié dimounes’ ». S25.V5 :« Et zot dire aussi : ‘ Ça zistoires vié dimounes, ki li fer dimounes écrire pou li, et ki zot dicter li, gramatin, tantôt’ ». S26.V137 :« Ça c’est zis morale vié dimounes ».

Ça li pas étonnant parski tous bane prophètes sans exception fine traité de menteurs, de magiciens et de fous :

S43.V6,7:« Commié prophète Nu fine envoyer parmi bane anciens ! Mais pas ene prophète ti vine parmi zot, ki zot pas ti moque de li ».

S5.V19 :« O Juifs et Chrétien ! Nu prophète fine vine parmi ou pou explik ou, après ene intervalle fine passer depuis bane lézot prophètes, afin ki ou pas capave dire :‘ Personne pas fine vine parmi nu pou donne nu bon nouvelle ou pou averti nu’.Voila ki ene annonciateur bon nouvelle, et ene avertisseur fine vine parmi ou. Allah éna pouvoir lors tout kitchose.

Mais le jour du jugement, tous bane ki fine traite bane livres d’Allah, So bane signes, et So bane messagers de mensonge, zot punition pou terrible.

Lékaire d’ene croyant li soumis à Allah, le Miséricordieux. Allah fer séki li content avec So serviteur. Allah (Al-Hayy ~ Le Vivant) Li-même li control tout kitchose. Kan nu réconnaître Allah partout, dans tout kitchose, nu oublier nu-même et nu vine près are Li. Allah (Al-Haqq ~ La vérité) dire nu :

« Zot perdi kan zot éloigne zot de Mo l’amitié. Si zot rode Moi, rénonce à zot-même et acceptez-Moi avec tout zot l’âme et lékaire, afin ki Mo vine zot guide ; Anéanti zot même pou ki Mo vine zot l’aide. Reste patient touletemps afin ki Mo sauve zot ; « Mo serviteur li pas arrête vine près are Moi ziska Mo content li ; et kan Mo content li, Mo vine so z’oreilles par ki li tendé, so liyié par ki li trouvé, so la main par ki li attrapé et so lipié par ki li marché… » (Al Bokari, Hadith Qûdsi).

Zot capave observé ki Allah (Al-Muhyi~ Celui ki donne la vie) réssucite et touye bane dimounes justes.

Li fer ene nombre parmi zot mort jeune et de l’autre côté li prolonge la vie de bane tyrans ziska ki zot vine vieux. Li donne à bane pays de bane mécréants la paix et la sécurité et Li cause parmi bane musulmans beaucoup de diffikiltés, bane dangers ek famines. Li laisse bane sans la foi gagne le dessus lors bane musulmans, bane dimounes ki droites et ki soumette zot à Allah. Li (Allah) maintenir bane voleurs et bane pirates en sécurité et Li fer bane ki craindre Li et ki dévoué à Li noyé (dans diffikultés). Parfois bane riches et bane lé rois zot pas capave gagne z’enfants même kan zot marié avec pluzieurs madames et de l’autre côté Li donne à bane pauvres plisse z’enfants ki zot capave okipé ek nourrit. Zot ki pas même capave trouve ene boute manzé pou zot-même. Li fer aussi bane prophètes et bane saints brûlé, coupés en morceaux et morts de faim.

S3.V112 : «… Et zot touye injustement bane prophètes ».

Nu bizin conscient ki pou tester So bane créatures, Li (Allah) fer zot passe par certains épreuves et même si zot pas récolté zot récompense lors ça la terre là, dans Akhérat li pou gagne séki li mériter. Ça li vrai pou ene pauvre ou ene homme pieux ki écrazer par le poids de bane diffikilté mais ki malgré ça zot ferme avec zot Créateur. Ça bane kalité dimounes là pé passe par ça bane diffikiltés là parski Allah content zot et désir pou éprouve zot. Kan à bane mécréants, seul ça lémonde là intéresse zot et alors Allah laisse zot jouir bane richesses de ça la terre là mais dans l’autre monde zot pas pou gagne narien parski zot ti oublié zot Créateur et la vie futur.

S57.V20,21 : « Apprane ki vraiment ça la vie lors ça la terre-là, li nec ene jeu et ene amusement, een décor, ene course à l’orgueil et ene rivalité pou gagne plisse l’argent ek z’enfants. Li ressembler la pluie. Bane sans la foi émerveillé par végétation (ki li produire), mais bientôt li flétri et to trouve livine jaune et li vine l’herbe sec. Dans la vie future pou éna ene punition sévère, mais aussi le pardon d’Allah et So satisfaction. Mais ça la vie là, nec ene jouissance trompeur ». « Dépêcher pou cherche pardon ou Maître et le paradis, k iso largeur couma largeur léciel et la terre ensam, et ki fine préparer pou bane ki éna la foien Allah et So bane messagers. Ça, c’est faveur Allah, ki li donne à celui ki Li oulé. Et vraiment Allah possède ene faveur immense ».

Aussi, étant donné ki tous ça bane actions-là vine d’Allah, mais nu pas capave critiqué et blâme Allah parski celui ki fer ça li vine ene dimoune ki alle à l’encontre de la religion ; parski Li pas convenir ki nu critique bane actions d’Allah. Quran donne nu ene l’exemple dans S18 « Al-Kahf – La caverne » kot Hazrat Moussa ^(a.s) fine critique par trois fois bane actions d’ene saint « Khadir ». C’est après ki ça saint là fine explik li ki liyié li nék trouve la surface de bane kitchoses li pas capave comprends ki ça bane actions ki ça dimoune ki pé fer aster là, li pou amène ene bien meilleure réziltat dans le future. Liyié là pas trouve bane plans ki éna endans ça bane actions présents là, même ki li ene prophète d’Allah. Pourtant Allah

(Al-Wali ~ Le Protecteur) fine montré li la différence entre bane kitchoses ki apparent lors la terre et bane kitchoses cachés de l’invisible.

S20.V17-20 kot Allah demande Hazrat Moussa ^(a.s) :« Ki été ça ki dans to la main droite là, O Moussa ? Moussa dire : ‘ C’est mo bâton, mo appuye lors là, et mo servi li pou casse feuilles pou mo moutons. Mo servi li pou fer d’autre choses encore’. (Allah) dire li : ‘ Jette li en bas, O Moussa’. Li jette li en bas, et voilà ki li vine serpent en mouvement. »

Hazrat Moussa ^(a.s) ti pé prend so bâton couma ene appui et ene soutien ; ene réalité ça ti ene ennemi, ene serpent ki ti pou capave détruire li si li pas ti éna la Grâce d’Allah lors li : L’utilité de ça bâton là li pas couma Hazrat Moussa ti supposé été. Kan bâton là ti transforme en ene serpent, ça ti ene signe du jugement dernier. Li ti ene échantillon afin ki nu coné ki été la mort, et par ki par ça tipti malheur là nu arrive à comprend ene pli grand malheur. Puiski ça même bâton là, si faible, fine transformr en ene serpent et li fine avale tout séki bane magiciens de Pharaon fine fabriqué, et fine anéanti par la suite Pharaon et so bane suivants dans la mer. Alors ki léciel et la terre pou dévini ?

S21.V104 :« C’est ene jour kan Nu pou ploye léciel couma ploye rouleau papier pou fer livre. Pareil couma Nu ti commence premier création, Nu pou réfaire (ene l’autre). C’est ene promesse ki Nu fer et Nu capave accompli li. »

Nu bizin trouve l’action d’Allah (Al-Hâdi ~ Le guide de tousse) partout, afin pou évite tombe dans piège ki zis ene orgueilleux tomber :

S35.V27,28 :« Eski to pas trouver ki Allah fer descende de l’eau dépi lors léciel et Nu produire avec ça bane fruits de différent couleurs ? Dans montagnes aussi éna bane raie blanc, rouge, de couleurs différentes, et bane roches extra noirs. Parmi dimoune, zanimeau et bétails aussi, éna différents couleurs… »

S41.V51 :« Kan Nu accorde bane faveurs à ene dimoune, li tourner et alle ene côté ; mais kan ene malheur touche li, li alors fer ene longue prière ».

S10.V107 :« Si Allah fer ki ene malheur touche toi, personne à part Li pas capave retire ça. Si Li oulé fer toi ene bien, personne pas capave répousse So faveur, ki Li envoye lors So bane serviteurs ki Li oulé, et Li pardonner et grâcier’. »

S3.V26 :« Dire : ‘ O Allah, Toi ki possède tout pouvoir. To donne pouvoir à bane ki To oulé, To enlève pouvoir de ki To oulé, To donne l’honneur à bane ki To oulé, et To abaisse bane ki To oulé. Tout le bien trouve dans To la main et To éna pouvoir lors tout kitchose ».

C’est à travers ça bane versets là ki nu rendre nu compte de l’omniprésence d’Allah derrière chaquaine de nu bane actions. Kan ou prétanne ki ou fer tout kitchose par ou-même, par ou propre capacité, ça ene signe d’orgueil et ene faute grave parski Abdullah Ibn Massoud ^(r.a) rapporte ene hadith kot le Prophète ^(s.a.w) fine dire : « Celui ki éna l’orgueil ki pèse le poids d’ene atome, pas pou rentre dans paradis ». Alors nu trouvé couma l’orgueil dans n’importe ki mezure – même tigitte ou beaucoup – li fatale pou nu propre bien-être.

3. La Création pas ene zoué

S21.V16-17 :« Nu pas fine créer le ciel et la terre et ce ki exister entre les deux, en badinage ». « Si Nu t ioulé prend ene distraction, Nu ti va capave gagne li avec (bane créatures) autour de Nu, au lieu fer lézotte kitchoses ».

S23.V115 :« Eski ou ti penser ki Nu fine créer ou couma ene badinage et ki ou pas pou rétourne devant Nu ».

S38.V27 :« Nu pas fine créer lé ciel et la terre et sé ki exister entre les deux pou narien. Ça c’est pensée bane ki péna la foi. Malheur, du feu lors bane sans la foi ! »

S44.V38-39 :« Nu pas ti créer bane lé ciels et la terre et tout ce ki exister entre zot deux couma ene badinage. Nu fine créer les deux avec ene but, mais la plupart d’entre zot pas conner ».

S15.V27 :« Bane jinns* Nu ti créer, avant ça avec difé d’ene chaleur terrible ».

* Bane jinns zot bane créatures invisibles ki vivent dans ene dimension parrallèle avec nu, tout autour de nu, lors la terre (Satan li ene jinn).

S18.V50 :«…Sauf Satan ki ti parmi bane jinns…»

C’est avec banes créatures là ki bane sorciers ek bane magiciens travaillent (S72.V6). Ce ki stictement interdit par Allah! Éna aussi de parmi bane jinns, bane ki bons et ki éna aussi bane réligions différents (lire S72.V11). l’Ame de bane morts okipe aussi ene dimension ki bien différents (lire S23.V100 – Barzah) ki pas connue de bane jinns [ par example la mort de Hazrat Suleiman ^(a.s) ]

S34.V14 :« Et kan Nu ti décide so la mort, ce ki ti montré zot comme signe de so la mort, c’est seulement ene ti bébête la terre , kit i ronge so bâton. Alors kan ti tomber, bane jinns fine réalizer ki, si zotte ti vraiment conne bane secrets, zotte pas ti va continuer dans zot punition dégradant ».

Or Allah (Al-Bâri~Source de vie) Li le Créateur de centaines de bane milliers de créatures de toutes sortes, ki zot sorti de bane léciéls, de la terre, de l’homme, de bane jinns, de bane démons, de bane z’animeaux, de tout sé ki vivre dans la mer, bane z’oiseaux, la lune, soleil, bane z’étoiles, Paradis, l’enfer, bane bons et bane mauvais créatures, bane ki pures, bane prophètes, bane saints et bane anges : étant donné ki éna tous ça bane kalités créations là, ki fer bane dimounes, ki cone zot camarades, zot pas éna ene connaissance ki mille fois pli grand ki Allah ?

Parfois c’est à cause d’ene tipti action ki ene dimoune fine fer, bane dimounes dire ki zot cone li, ki zot coné ki kalité dimoune li été et ki bane capacités ki li éna. Mais pour celui ki donne tous : so travail, so la caze, so manzé, so de l’eau, so madame, so bane z’enfants, etc…(pour la cause d’Allah), ki fer dimoune pas réconnaîte li ?... Ki fer zot fine vine aveugles, ignorants en séki concerne la connaissance d’Allah ? Ek par ignorance et négligence, zot dire : « Couma ça étonnant ki éna ene Bondié! » et kan zot pas capave comprend la beauté de la création, zot dire : « C’est la loi de la nature! ». Alors si ça ene la loi, mais ki sanlà fine à l’origine de ça la loi là ? O ignorant! à cause d’ene tipti action ou d’ene travail ki ene dimoune fine fer , ou déclare ki ou cone li bien. Tout séki ou conné de lui ti nék so l’aspé déhors. Ki fer ou pas comprend Allah (Bondié) grâce à tous ça bane créations là, à So bane qualités extraordinnaire, So bane vertus, et So bane connaissances ki sans limites, et ki nu pas capave compter ? Ou cas li pareille à celui d’ene dimoune ki rentre dans ene jardin et ki dire : « Mo trouve dans ça jardin là ene tipti feuille, mais mo pas trouve ça jardin là ». Ça li paraîte bien comique mais couma nu pou capave qualifié ça bane kalités liyié là ek ene telle l’intélligence ?

C’est pour ça raison là ki l’incroyant pou dire le jour du jugement dernier kan li pou trouve so châtiment : S78.V40 :« Malheur lors moi! si mo nék ti la poussière! ». Malheur lors moi, si mo né ti ene la poussière, couma mo ti été (avant création lécorps physique de l’homme), bane l’herbes et bane plantes ti pou pousse à travers moi et l’homme ti pou servi ça bane plantes là. Maintenant ki mo fine prend l’existence , ça plante ki pousse de moi là trouve zis feuille là et non pas jardin là. Ki ene tel plante enpoizonnée et ki pas donne aukaine fruit pas pousser, même dans ene désert di sél ! mo ti content kan mo ti prend existence depuis l’inexistence, et mo fine vine dans bane premiers rangs – moi ki ti parmi bane derniers. Aster mo pensé lé contraire ki ti vrai ! En réalité, mo fine retourne en arrière et mo régrétté, mais li trop tard.

S35.V36,37 :« Bane sans la foi pou gagne difé l’enfer… ». « Et là-dans zot pou crié :‘O nous Maître, tire nu de là, nu va fer le bien, contrairement à séki nu ti pé fer avant’. ‘Eski Nu pas fine donne ou ene longue la vie, côte celui ki oulé réfléchi ti capave réfléchi ? Et ene avertisseur ti vine parmi ou. Alors goûte (ou punition)’. Et bane malfaiteurs pas pou gagne l’aide.

Allah (Al-Nur ~ La Lumière) li pli manifeste et li pli apparent ki soleil. Celui ki rode ene argument ek ene témoignage à propos de ça soleil divin là (c-à-d : Allah), li plonge dans malheur. Li vine couma ene dimoune ki fine vine aveugle dès so naissance, et so souffrance ek so handicap péna aukaine rémède et lisans guérison. Li ene véritable z’animeau, même pire ki ene z’animeau (ki li au moins li soumis à Allah) et ça dimoune là li vine inférieur à ene kitchose ki péna la vie. La terre, de so côté, malgré ki li ene chose inanimé (sans la vie) li accompli so devoir. Allah fine crée li pou ki bane plante capave pousser. Tout bane la grain ki planté dans la terre, poussé et gagne ene bon récolte nék grâce à l’ordre d’Allah. Si nu plante ene certaine kalité plante en li, li pou récolter ça même kalité plante là. Si nu plante du blé, nu pou récolté du blé. De ça façon là aussi, bane z’animeaux fine créer pou rendre service à l’homme (e.g trasport, manzé, comme compagnons, etc…). L’homme fine créer pour ki li apprane pou cone Allah, pou adore Li tousél, et servi Li. Kan l’homme pas accompli so devoir, li vine pli bas ki la terre ek bane z’animeaux.

Lékaire de ça bane kalités dimounes là, zot pli dûr ki ene roche ; et même ça roche là li rendre service, parski de l’eau sointé de li et tombé (S2.V74). Mais de ça bane kalités dimounes là ki zot lékaire dûr, zis difé ki sorti, aussi la colère, la fumée, et la haine.

Le soleil possède 2 qualités : la clarté ek la chaleur ; Bane ki trouvé, zot trouve la clarté tandis ki bane aveugles zot senti la chaleur. Soleil là li présent pou tous dimounes, et li manifesté par ça 2 qualités là et li pas cachiette li-même. Allah (Al-Ghani ~ Celui ki riche par excellence) ki le Créateur du soleil, de bane léciel,et de la terre, et ki le Créateur de tout kitchoses ki manifeste et caché, Couma Li capave reste dissimulé et non manifesté Li ? Parski so bane qualités zot innombrables et So bane créations sans limites ; et tout séki nu trouvé : enbas, là-haut, à gauche, à droite, devant, derrière, chaud et frais, bon et mauvais, tous ça là zot forme partie de bane signes et de bane attributs d’Allah. Alors, dans ça façon là, couma eski nu capave dire ki Li caché (pas manifeste) ?

De la même façon, le printemps li brille partout. Mais dans ene l’endroit li fer bane piquants pousser tandis ki dans bane lézot l’endroit li fer bane fleurs pousser. Li rende certains fruits doux, et bane lézot amers et acides (aigres).

Le Prophète Mohammad ^(s.a.w) fine amène so la loi (la Shariah) et fine formule bane interdictions pour bane dimounes, afin ki zot rénonce à zot défauts et ki zot gagne bane bon qualités, pour ki zot capave quitte l’impureté pour alle vers la pureté. Le corps d’ene humain li influencé par so côté animal (so l’âme charnelle « nafs »), et so bane caractéristiques zot : la sensualité, l’avarice, la méchanceté, l’injustice, l’absence de générosité, et la capacité pou fer ditort à bane lézot dimounes : « Rénonce à ça bane défauts là et cultive dans zot bane qualités ki bane anges éna, afin ki Allah (Dhul-Jalali-Wal-Ikrâm ~ Ki le Possésseur de la Majesté et de la Générosité) capave content avec zot ».

Celui ki humilié li-même devant Allah et ki rénonce à so « moi » et so l’orgueil, li vine digne pou vine bien près avec Allah. C’est l’humilité qui fer nu vine près avec Allah. Et puiski le Prophète Mohammad ^(s.a.w) li ti pli humble ki bane lézot dimounes, li ti vine extra près avec Allah comparé à bane lézot. Bane incroyants ti sauvage avec li et ti haïr li à tel point ki zot ti jette lors so licou béni, bane intestin et d’autres parties de moutons kot saletéti pé tomber. Banes z’enfants, bane jeunes, et bane vieux ; tous ti pé crié derrière li, et ti pé batte zot la mains et ti pé moque li. So bane compagnons ki ti témoigne la scène là et ki ti souffert ensam are li fine entoure li et fine dire : « O Messager d’Allah ! To-même to lé roi de tous bane prophètes, to le but même de la création. Kan zot peuples ti insulter zot, bane lézot prophètes fine maudit zot : ainsi ki le peuple de Houd, Sâlih, Loth, Noé et bane les autres kot Allah fine envoye punition lors ça bane peuples là couma dans Quran, kot Allah dire ; S29.V40 :« Alors Nu fine saisit chaque peuple pour so péché ;ti éna bane à ki Nu ti envoye ene divent violent ; ti éna zis ene sél cri ; et ti éna bane ki Nu fine anéanti par tremblement de terre ; et d’autre ki Nu ti noyés… ». Par le rang et la valeur, to supérieur à bane lézot prophètes ; ça bane kalités traitements ki ça bane incroyants fine fer lors toi là, zamais bane lézot prophètes fine gagne pareille. Parski to fine dire : « Aukaine prophètes pas fine gagne maltraités couma mo fine gagné ». Alors priépou ki Allah anéanti ça peuple ki fine maltraite toi là. Le Prophète ^(s.a.w) fine réponne : « O Allah (As-Sami ~ Celui ki entende tout ; Al-Ghaffur ~ Celui ki pardonne bane péchés) ! Dirige mo peuple, parski li ignorant ». « O Allah (Al-Afuww ~ L’indulgent) ! Montré zot le chemin, et fer zot vine conscients, et pas encolère avec zot parski zot pas coné et zot ignorants ». C’est à ça l’occasion là ki ça verset suivant là fine révélé :

S68.V4 :« Et certainement oui, to éna ene caractère excellent ».

Mohammad ^(s.a.w) ti le plus humble de bane z’hommes et li ti pé plusse tenir li à l’écart (et li ti préfère consacrer li plisse à Allah). Li ti patient, endurant, résigné (à la volonté d’Allah), compatissant (envers bane lézot), li ti éna l’affection pour bane dimounes ki Allah ti content et aussi pour bane dimounes ordinnaire ; ki li ene ennemi ou bien ene camarade :

S33.V21 :« Zot éna dans le Messager d’Allah, ene (bien) zoli modèle pou zot… »

Le St.Prophète ^(s.a.w) so mission ti universelle :

S21.V107 :« Et Nu fine envoye toi comme ene miséricorde pour l’univers ».

Le fait ki li fine combattre ça bane incroyants là, li ti fer ça à cause de so compassion extrême ki li ti éna pou zot ; pareille couma ene jardinier li oblizé coupe bane branches morts dépi so bane pié pou ki bane

branches en bonne santé capave pousser plisse et prends la force. Ça li pareille aussi kan ene la main ou ene la jambe engangrenées, nu oblizé coupe zot afin pou évite ki ene lot partie lécorps contaminé. Ça action là, sans aukaine doute, li motivé par ene très grand compassion ! …

Si ene prophète li, li transforme ene bâton en serpent, ene l’autre li réssussite ene mort et ene lotte possède la Connaissance et la Parole, tous les trois, en fait, zot ene sél. Nu pas dire : « Ki fer tél dimoune li coumsa, et ene lotte dimoune li coumsa ? » A cause ça, dimoune fer beaucoup erreur. Chaque prophète éna la capacité pou fer bane miracles. Li manifesté uniquement séki li envie ene fonction de so communauté ; pareille couma en médecin ki applik ene traitement pour la bile et ene l’autre pour la fièvre ou pou ene problème lé foie. Nu pas dire ki chaque médecin pas éna la capacité pou applik d’autres traitements. Li applik dans chaque cas traitement ki bizin. Zot tous zot prisonnier du sense ; mais bane dimounes dire ki zot amoureux de l’aspé extérieur. Zot pé fer erreur : zot zis attiré par le sense, aspé physique péna aukaine l’importance ; ou gagne peur kikène parski li éna ene mauvais caractère ou bien li ene fou. et ou content kikène parski li intélligent et li éna bon caractère. Or, l’intélligence ek bon caractère zot pas ene forme (ene aspé extérieur) mais zot ene sense (ene aspé intérieur). C’est donc à cause sense ki ene kikène éloigne de quelqu’un ou bien li tombe amoureux. Kan ene kikène trouve ene zoli madame gagne la fidélité, li content li plisse ki li ti content li au début, bien ki la fidélité pas chanze so l’apparence. Li pas content ene beauté ki pas attaché avec la fidélité. La fidélité li ene sense et non pas ene forme. Ll’amour ek la haine zot pas vine de l’apparence mais seulement du sense.

Nu capave compare la forme à ene récipient, ek le sense à ene aliment. C’est à cause de l’aliment (manzé) ki nu trouve l’utilité de ça récipient là, et non pas par récipient là li-même et nu éprouve sois contentement ou répugnance pour récipient là par la qualité de ça manzé ki fine cuit là. Si manzélà bon, alors nu content avec récipient là et si manzé ine pane sorti bien, nu éprouve ene dégoût pour ça récipient là et nu mette li ene côté. Bane formes zot réflète profondeur de sense et li manifesté li physiquement comme si li pé explik ça sense là extérieurement, mais pas tout dimounes ki arrive dans profondeur du sense et zot pas trouve so beauté devant zot liyié. La forme li trouve la forme et l’âme li trouve l’âme. Li nécéssaire ki mette ene forme lors ene sense, afin ki bane ki pas cone sense là capave apprane pou découvert li grâce à ça forme là. Bane léciel fine créer dans ene l’aspé bien haute pour capave fer dimoune comprends bane hauteurs et stages ki l’âme capave arrivé. Ça hauteur là li pas physique, mais spirituelle. Li même zaffaire kan nu dire : « Ça dimoune là li supérieur à ça lotte dimoune là ». Ene tél supériorité li pas dépanne lors l’apparence, mais li bazé lors l’estime, la valeur, dégré ek perfection ki ça dimoune là éna. Dans le monde invisible, tout séki éna forme lors ça la terre là pou fini parski la forme li pas exister dans ça lémonde invisible là. Bane l’état ki manifesté lors la terre et dans léciel zot nék ene zoué par rapport à l’au-delà et zot zis bane symboles devant ça réalité là.

S6.V32 :« Et la vie présent zis ene zoué ek ene amusement… »

Kan bane z’enfants choisir ene d’entre zot-même pou vine léroi ou bien ministre, kan zot monte lors ene bâton et fer semblant ki zot pé monte lors ene monture (e.g loto, bicyclette, etc…) et tout séki zot imité dans zot zoué, réflecté ene aspé réel et sérieux de la réalité. Si zot pas ti trouve ça bane kitchoses là sous zot formes réelles, couma eski zot ti pou capave créer bane amusements à partir de ça ?

Chaque zoué ki zot imité, réflecté séki exister dans la réalité et chaque transformation li vine d’ene réalité, chaque fausse kitchose li vine d’ene original, et chaque menti d’ene vérité. Parfois dimoune présente ene fausse kitchose devant liyié de bane lézot et fer croire ki ça c’est l’original et en fait c’est ene faux et zot rode passe ene mensonge comme ene vérité. Ene homme de sagesse li, li bizin rode la réalité de la vérité au milieu de bane jeux et bane innovations. Li essaye atteindre l’essentiel par l’intermédiaire ene kitchose sécondaire. Li essaye rode l’homme grâce à so l’ombraze, et li pas laisse li embêté par la beauté de ça l’ombraze là. Si ou trouve dans de l’eau, ene pié, la lune et bane z’étoiles, et ki ou rode zot dans de l’eau même, zamais ou pou réussit kasse fruits de ça pié là, ni alle ziska ça bane z’étoiles là par tous z’éfforts ki ou fer. Sé ki ti paraître dans de l’eau ti nék ene réflé et ene z’imaze et non pas la réalité. Ene homme sensé (et intélligent) li cherche la vérité à partir de ça réflé et ça z’imaze là. Pareillement, l’existence de ça lémonde (visible) là li le reflet et l’ombre de l’autre monde (ki invisible). Nu bizin rode dans ça lémonde là-même ça l’autre lémonde là et nu pas bizin arrête zis avec reflet là !...

Celui ki oulé mette li-même au service d’Allah (Al-Mudzill ~ Celui ki humilié bane fiers) bizin fer li avec so l’âme et so lékaire et li bizin passe so létemps dans l’humilité et la soumission. Le chemin de la religion c’est la soumission ek zéffort. Chaquaine de nu bane zéfforts bizin pou le seul but pou recherche satisfaction de nu Seigneur le Très-Haut. L’unique but de la science de la religion, c’est ki nu bizin rode séki Allah content et séki Li détester afin pou faire li plaisir.

« Bane savants zot bane héritiers de bane prophète » car zot connaissances zot sans attaches. La connaissance c’est zot attribut couma la lumière, li l’attribut du soleil, et couma la chaleur li l’attribut du feu et aussi la douceur ki l’attribut du sucre.

La connaissance sorti de nu lékaire couma ene la source. Couma le Prophète Mohammad ^(s.a.w) fine dire : « Celui ki servi Allah pieusement pendant 40 jours, bane sources de la sagesse coule dépi so lékaire ziska so la langue ».

La connaissance spirituelle et zikr zot bane élément ki permettent nu pou fer le DAWA. Si nu néglize zot, alors li bien probable ki nu bane activités perdi zot valère et zot dégradé. Si l’Islam perdi la connaissance spirituelle, nék le nom de l’Islam pou resté (car l’Islam pou perdi so vrai signification) et si nu pas fe zikr en même temps ki cherche la connaissance spirituelle, ça pou amène zis l’obscurité et non pas la lumière.

4. La Pratique de la Foi bizin entraîne bane comportements suivants

A force ki le croyant fer bane zéfforts pou vine près avec Allah, Allah vine satisfait de lui et dimoune là vine petit à petit ene dimoune honnête, chaste ek compatissant ; avec ene l’esprit content et ene lékaire rempli de misérocorde. Tous so bane pensées ek actions vine pure ainsi ki so bane intentions, ki reste touletemps bon et pure ; péna aukaine méchanceté et la haine dans so lékaire ; Et li reste éloigné avec la médisance (ribat) ek bane blâmes. Li cause touletemps la vérité et zamais li prononce ene mensonge. Ça dimoune là aussi garde ene bon relation envers so famille ; li respecté so bane parents, zamais fer zot lékaire fermal, et aussi li content so madame et respecté so bane droits ; Li montré l’affection pou so bane z’enfants et élèvé zot dans ene bon façon et li éna beaucoup respét pour bane droits de so famille ek so bane camarades. Ça serviteur d’Allah là, li aimable envers bane ki travaille sous so l’autorité et li mette li-même à égalité avec zot ; li manze même manzé ki zot et li donne zot même linge ki li metté. Li zoine so frère musulman avec ene lékaire ouvert, et respecté so condition sociale. Li salué so frère en premier, donne li bane conseils sincère et aide li dans so bane travailles. Li souhaite pou so frère séki li désiré li-même, rendre li visite kan li malade et console li. Touletemps li garde dans so l’esprit ki tous bane musulmans zot forme ene sél lécorps. Ça kalité dimoune là zamais trahir so prochain, et zamais li renonce à so la foi même secrètement ! Li bon avec so bane voisins, aide zot et zamais pas gêne zot. Li reçevoir so bane invités avec contentement, honore zot et donne zot l’hospitalité ; Si ene lotte dimoune invite li, zamais li donne ça dimoune là tracas ; li pas égoïste et li éna beaucoup respét pour bane droits de tous bane humains.

Par consékance, li reste dans ene bon disposition vis-à-vis de tous dimoune. Li juste et respecté chaquaine selon so situation ; li tenir so bane engagements et so bane promesses, li rempli so bane obligations, et zamais li offense personne et li content la paix. Li toujours courtois et zamais pas mette li en colère et si li senti la colère envahir li, so compassion prend le dessus lors ça colère là. Li pas prend l’alcol et li pas pratique magique et li tenir li loin de tout kalité vices comme l’adultère, l’homosexualité… Tous séki li fer en société mérite éloges et servi couma réfléxions dans so bane travails et li donne so bane travailleurs zot la paye bien vite. Ça dimoune là li gagne so la vie honnêtement par so bane propres zéfforts, li pas mendié et zamais li convoite bane kitchoses de so frères. Li pas cokain et li tenir li éloigné avec l’hypocrisie. Li pas tardé pou rembourse ene dette ki li éna mais li pas compté et pas préssé si ene dimoune tardé pou rembourse li ene dette ; li même préfère rénonce à èa somme la monnaie là et donne ça so frère. Li ene dimoune généreux et charitable. Seulement li donne la charité en secret et li pas « show-off » kan li fer ça bane kalité faveurs là. Li le gardien de bane veuves et bane orphelins et li vine la lumière ki guide bane aveugles et bane dimounes ki fine perdi le droit chemin. Li aide bane opprimés et li fer tout pour ki bane dimounes pas fer dominaire lézot dimounes. Zamais ene tél dimoune (ki proche d’Allah) encourage la tyrannie et zamais li fer lézot di mal – Li fer l’humanité vivre avec li en sécurité. Li réconforte bane dimounes ki fine déçu avec la vie. Li enlève diffikiltés de bane dimounes ki dans problèmes, li nourrit bane dimounes ki gagne faim et li enlève tristesse de bane ki fer du tort à zot-même.

Li ordonne le bien et condamne le mal. Kan li envie empêche ene kikène fer di mal, zamais li pou fer li en public mais li fer li en privé. Li cachiette bane pêchés et bane mauvais actions de so bane frères devant bane lézot dimounes, mais li informe zot de bane consékances de zot actions dans ça la vie là et dans l’au-delà, dans ene bon façon – avec délicatesse et amour, li fer zot comprends tous ça. Li maziné ki li pou mort ene jour et li prépare li-même pour l’autre monde. Li respecté bane morts et zamais pas cause mal pou zot. Si li arrivé fer ene erreur, li fer ene manière pou répare ça erreur là par ene bonne action. Li fer zéfforts pou vine ene homme parfait et respectable et li évite tous bane mauvais zaffaires. Li essaye fer so peuple cultive bane bon qualités en zot-même ek pratique li. Li pas place so l’espoir lors bane zaffaires mondaines parski so l’objectif principale c’est pou rode en permanence la satisfaction d’Allah (Mâlik-ul-Mulk ~ Le Maître du pouvoir) et pratique l’obéïssance totale à So bane commandements et li suive le chemin de Hazrat Mohammad ^(s.a.w) et de so bane compagnons ^(r.a).

Conclusion

Ou bizin essaye débarasse ou de ou bane mauvais côtés et développe en ou bane excellent qualités morales et spirituelles. C’est kan ou fer ou côté spirituelle fleurir ki ou pou récolter l’amour d’Allah ek So satisfaction. Bane attributs de bane zanimeaux zot inférieur tandis ki bane qualités angéliques, zot supérieur. Difé li vine de l’enfer et la lumière li vine du paradis. A la fin, tout vine ene sél parski « Tout kitchose rétourne à so source » couma nu tout ene zour nu pou rétourne vers Allah (nu Créateur). Si ou oulé gagne Allah, alors ou bizin débarasse ou de bane attributs bestiales (attributs de bane zanimeaux) ki en ou et développe ou côté angélique et spirituelle. Ou bizin fer ene manière gagne le paradis et non l’enfer. « Prends compte ki c’est ou bane nafs (l’âme charnelle) ki amène ou vers l’enfer. Ou bizin fer ene manière ki ou cultive bane qualités appropriés pou gagne l’amour et la satisfaction d’Allah et humilié ou devant Li afin ki Li élève ou rang.

L’humilité c’est le reflet de la connaissance spirituelle. Nu obtenir la connaissance proportionellement avec l’humilité. « L’amour ki nu éna pour ça lémonde là (la terre) li à l’origine de tous banes fautes ». Allah (Al-Bâtin ~ Le Caché) examine lékaire d’ene croyant kan li pé fer so 5 fois namaz par jour et kan li pé récite ça verset dans Sourah Al-Fâtiha kot li pé dire Allah :« C’est Toi tousél ki nu adoré (priér)… » pou guetté si séki li pé témoignér li vrai ; si vraiment ça dimoune là li sincère dans so témoignage ek so l’amour ; afin ki ça sincérité là capave séparé de l’hypocrisie !... L’amour c’est ene attribut d’Allah. Li incréer ek li éternelle. Si nu pas obéïr Li, alors Li capave créer ene lotte peuple « ki pou content Li et ki Li aussi pou content » (S5.V54).

Quelques Conseils

Pou apprane pou cone Allah et pou vine reconnaissant envers Li, ene dimoune bizin commence par débarasse li de so « moi ». Kan so « moi » disparaîte, chaque parole, chaque geste et mouvement, chaque regard, zot rode Allah, trouve Allah et zot agir dans ene tél façon pou gagne le plaisir d’Allah. L’essence de la soumission, c’est l’amour, kot ene amoureux li prêt à tout pour plaire à so bien-aimée. Ene kikène ki donne li-même à Allah, Allah vine pou ça dimoune là ! Celui ki suive bane pratiques du St.Prophète ^(s.a.w), Allah so regard pose lors li. Alors chaque dimoune bizin vine ferme dans tous bane pratique « Sounnah » du Prophète ^(s.a.w). Ki ou réflecte bane bons qualités du St.Prophète ^(s.a.w) de L’islam.

Aussi, avec détrois paroles lors l’Unicité d’Allah (Al-Ahad ~ Le Un) :

Allah Li-même le Créateur du soleil, léciel ek la terre et ki fine créer tout kitchoses ki manifeste (visible) ek caché (invisible).

S13.V9 :« Li coné séki cachiette ek séki apparent ».

S57.V3 :« C’est Li le Premier et aussi le Dernier, L’intérieur et L’extérieur… »

Allah li partout. So bane kalités zot sans limites et so bane créations aussi beaucoup. Tout dans la nature réprésente ene signe pou nu. Et c’est par ça bane signes là ki nu capave perçevoir ki Allah li manifeste.

S2.V115 :« Soleil lévé, soleil couché, tout les deux pou Allah. N’importe ki côté ou tourner, là éna présence Allah. Pouvoir Allah bien grand et Li cone tout ».

Imam Abou Hanifa ^(r.a) fine déjà dire ki li impossible ki le Créateur éna ene ressemblance avec séki Li fine créer.

Hazrat Abu Bakr ^(r.a) aussi fine aussi dire ki kan ene kikène réconnaîte so incapacité pou cone Allah dans so réalité, ça en li-même li ene connaissance ; mais kan li rode atteindre ça réalité là, ça li vine de la mécréance et li vine ene forme d’association ki li pé établir ».

Nu devoir, c’est le devoir de chaque musulman. Et nu tout bizin coné ki nu maître péna aukaine z’imazes ou apparence parski ene z’imaze implique couma ça z’imaze là ine prend existence et ça « couma » là, li rejeté par Allah et So bane attributs.

Nu pas capave spécifié Allah par ene l’endroit spécifique ni ene place. Li pas dépanne lors létemps et c’est li ki fine établir le temps.

S10.V5 :« C’est Li ki fine créer soleil comme ene la lampe, et la lune comme ene lumière, et Li fine prescrire pou li (la lune) bane différents stages, afin ki ou cone kantité l’année et létemps ki passé. Allah fine créer tout ça dans ene vrai but, et Li explik So versets à dimoune ki comprend ».

Li éna pouvoir absolu lors tous kitchose dans l’Univers.

S13.V8 :« Allah coné ki zenfant chaque femme porter, et commié létemps zenfant là pou reste dans matrice (ventre so mama), plus courte ou plus longue ki ordinnaire. Tout kitchose éna so mesure avec Li ».

Tout séki dans l’univers fine gagne la vie par la volonté d’Allah parski c’est Li ki donne la vie. Li pas prend narien, mais Li donne tous so bane créatures parski c’est Li-même Allah, zot Seigneur. Tout séki l’homme éna, li provenir de la miséricorde d’Allah.

S24.V35 :« Allah, c’est Li la lumière bane léciel et la terre. So la lumière comme ene tipti grotte dans miraille avec ene la lampe là-dans, et la lampe là dans ene crista, et cristal là ressembler ene z’étoile bien brillant. La lampe là fine allumé avec produit ene pié z’olive béni, ki pas trouve ni dans l’est ni dans l’ouest. So de l’huile près pou éclairer, sans même ki difé touche li – ene la lumière lors ene la lumière. Allah guide vers So la lumière ce qui Li oulé et Li donne dimoune bane l’exemples. Et Allah cone tout kitchose ».

Tout bane kitchose tire zot l’existence d’Allah et zot gagne ça la lumière là ek ça la vie ki zot tant bizin là, et par consékan zot adore Li.

Kan ene kikène manzé ek boire ek li oublié rémercier Allah ki fine donne li ça manzé là ; c’est l’âme charnelle ki manifesté kan li pé prend goût à ça bane manzé là et couma dire dimoune pé fer louanges so nafs et non Allah.

Allah li le Seigneur ki pas bizin nu mais ki nu nous bizin Li ; Li dépane lors personne mais tout dépanne de Li.

En séki concerne bane travails de DAWA, ça veut dire ki nu bizin revivre bane zéfforts de Hazrat Mohammad ^(s.a.w) et de so bane compagnons ^(r.a).

Nu tous bane pécheurs, mais lékaire de bane croyants bizin reste uni et c’est à partir de ça moment là ki Allah pou cachiette nu défauts. Si nu lékaire pas uni, même si nu fer nu travail de DAWA avec sincérité, nu pas pu éna bane bons réziltat.

Si dimoune prend travail tabligh couma ene zoué ; ça pou vine ene zoué mais si zot fer li avec dévotion en suivant bane règles de baze, alors zot pou récolter ene bon réziltat et ça pou vine ene guide pour pour l’humanité en entier pendant beaucoup siècles.

Afin ki nu obtenir succès dans ça domaine là, alors nu bizin cone sacrifié nu bane désirs personnels ek bane passions.

Nu bizin reste bien vigilant pour ki ça lémonde là pas réussit gagne le dessus lors nu. Si nu pas prend compte, alors par consékance, pou éna plisse corruption [même dans la religion couma nu pé trouver zordi zour !].

Nu bizin dédié nu-même dans le chemin d’Allah car nu fine créer pour So religion. Nu tous bane être humain et nu trouve nu bane nécéssité lors ça la terre là mais sans exagération. Alors nu dédié nu la vie à Allah, et nu prend aussi ene ti létemps pou prend compte de nous bien-être aussi. Nu la santé…etc….