Text Box: بسم الله الرحمن الرحيم Khutba Eid-ul-Adha HAZRAT AMIR’UL MOMENEEN MUHYI-UD-DIN AL KHALIFATULLAH Munir Ahmad Azim 28 Novembre 2009 (10 Dhul Hijjah 1430 de l’Hégire) EID MUBARAK (Résumé Khutba Eid) Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine lire ça bane versets Quran suivant là: AL-SWAFFAT CH.37 V.102-113  Fa basharnaahu bi ghulaaamin haliim. Falammaa balaga ma ahussa ya qaala yaa bunnayya innii araa fil manaami annii azbahuka fanzur maa zaa taraa ! Qaala yaa abatif al maa tumar satajidunii insha allaahu minas saabiriin. Falammaa aslamaa wa lallahuu lil jabiini. Wa naaday naahu any-yaaa Ibraahim. Qad saddaqatar ruyaa, Inna kazaalika najzi Mulsiniin. Inna haaza lahuwal balaa ul Mubiin, Wa Fadaynahu bizibhin aziim: Wa taraknaa ‘alayhi fil-‘aakhiriin; Salaamun ‘alaaa ‘Ibraahiim! Kazaalika najzil-Muhsiniin, Innahuu min ‘ibaadinal-Mu’miniin. Wa bash-sharnaahu bi’-Ishaaqa Nabiyyam-minas Saalihiin. « Alors Nous fine annonce li (la naissance) ene garçon, avec ene tempérament douce. Kan sanlà là ti fine arrive à ene l’âge pou voyage avec (so papa), Abraham dire li : « Mon petit, mo trouve dans mo rêve ki mo pé coupe to licou. Guette ene coup, ki to penser. » Li dire (so papa) : « O mo papa, faire séki to fine gagne l’ordre. To va trouve moi, si Allah ouler, plein d’endurance. Kan tous les deux ti fine soumette (à l’irdre Allah) et ki Ibrahim fine renverse li lors so front, Nous fine crier li : « O Ibrahim, To fine ena foi dans to vision, et Nous récompense bane ki faire du bien comme ça. Ça, c’était vraiment ene teste. Et Nous ti ransonne li par ene grand sacrifice. Nous fine laisse so renom dans la postérité, la paix lors Ibrahim ! Coumsa, Nous récompense bane ki faire du bien. Car li ti ene Nous bane serviteurs avec la foi. Nous annonce li (la naissance) Ishaq, ene prophète et ene parmi bane bon dimounes. » Alors ça bane versets là pé cause lors sacrifice de Hazrat Ibrahim (as) et sacrifice de so garçon Hazrat Ismaïl (as). Ça Eid là nous appel li Eid de Qurbani, Eid-ul-Adha ou Bari Eid (grand Eid). Ça Eid là li célébrer pour ki faire nous rappel et faire nous révive l’esprit de sacrifice ki ti commencé avec Hazrat Ibrahim (as). Kan Hazrat Ibrahim (as) ti fine délivré de so peuple ki ti pé faire « Zulum » (cruauté) lors li, lerlà li dire ki mo pé alle vers mo Seigneur ki pou guide moi, et ça duah ki li faire dans ça même chapitre là : « Rabbi Hablii minas-Saalihiin » - O mo Maître, accorde moi ene (zenfant) ki pou parmi bane bon dimounes.  Li ti demande Allah ene garçon pieux pour continié so bane travail. Ler li ti faire ça duah là, ti ene moment kot so famille et so peuple ti séparé de li et ti éloigné de li. Et li ti décidé pou amène ene nouvo la vie en oubliant complètement le passé. Donc, duah ki Hazrat Ibrahim (as) ti faire fine rapporte so fruit. Ki ça fruit là ça ? Ça fruit là c’est la naissance de Hazrat Ismaïl (as). Dans verset suivant Allah mentionné ki « Nous fine donne la bonne nouvelle d’ene garçon, avec ene tempérament douce » ; mais seulement bien avant naissance de ça garçon là, Hazrat Ibrahim (as) ti rêvé ki li ti pé faire so garçon « zaba », c-à-d, li ti pé coupe so licou, li ti pé sacrifié li. Hazrat Ibrahim (as) ti faire beaucoup duah et beaucoup supplication avec Allah pou ki li gagne ene garçon et ki so descendant continuer. Mais étrange maintenant kan Allah montré li à travers ene rêve ki li pé sacrifié ça même garçon là avec so propre la main. Li paraître ki Hazrat Ibrahim (as) fine interprète ça rêve là comme quoi ki li bizin sacrifié ça garçon là. C’est pourquoi ki li fine décide pour alle quitte li dans désert. En d’autres mots li ti pé sacrifié li-même, et à la lumière de ça, li fine sorti à la recherche de « Khana Ka’aba », ene la case pour le bien-être de l’humanité. Le Khana Ka’aba c’est le premier la case ki fine construire pour l’adoration Allah et Quran pas fine mentionné par qui et quand. Mais Khana Ka’aba là ti déjà construire et mission de Hazrat Ibrahim (as), c’était li ti ena pour reconstruire le Khana Ka’aba. Couma nous tous au courant ki Hazrat Ibrahim (as) ti quitte so madame (Hazrat Hajra) et so garçon (Hazrat Ismaïl) dans ene place désert kot pas ti ena nannié, sauf ene ti récipient de l’eau, et quelques nourritures. Hadith raconté ki l’heure Hazrat Ibrahim (as) ti pé quitte so madame et so garçon, li ti terriblement chagrin, so la voix ti amarré et li pas ti pé capave causé. Mais li fine pointe so le doigt vers le ciel pour faire so madame conné ki li pé laisse zot sous la charge de Celui ki la haut là, c-à-d, sous la responsabilité d’Allah. C’est par confiance totale dans Allah ki li fine faire ça. Plitard plusieurs fois li fine retourné pour visite zot et li fine remarqué ki ça place kot li ti quitte zot là fine développé. Ça place là fine vine habitable et place là fine produire bane nourritures. Li paraîte ki ene zaffaire fine lors le cœur de Hazrat Ibrahim (as), c’est ki li dire attention li fine interprète et réalise so rêve dans ene façon différent. Li ti tellement sage, li ti tellement intelligent et d’ailleurs li reconnu comme le père de bane prophètes et li ti impossible ki li faire « zaba » de so garçon sans so consentement ; c-à-d, ki Hazrat Ibrahim (as) ti tellement sage ki li pas ti capave nek allé et coupe licou so garçon sans ki garçon là d’accord. Hazrat Ibrahim (as) fine éclaire ça sujet de dédication là pour nous, pour tous les temps dans l’avenir. Et effectivement Quran montré nous ki, ki faire Hazrat Ibrahim (as) fine bizin attane tous ça les temps là. Li fine attane ki so garçon vine assez grand, kot li capave raisonné et demande li so l’opinion aussi. Hazrat Ibrahim (as) aussi fine pensé ki li pas capave sacrifié so garçon sans ki li pas donne so consentement. Quran dire dans prochain Verset 103 : Et kan celui-ci, c-à-d, Hazrat Ismaïl (as) ti assez âgé pour travail avec so papa, lerlà li fine dire : « O mo cher garçon, mo ti trouvé dans ene rêve ki mo pé faire toi « zaba ». Alors réfléchi et dire moi ki to pensé lors là. Lerlà garçon là fine dire : « O mo papa, agir selon commandement ki to fine gagné et si Allah oulé, to pou trouve moi parmi bane ki ena patience. » Ça verset là li éclairci la question ki faire pendant tous ça les temps là Hazrat Ibrahim (as) pas ti faire so garçon « zaba ». D’abord li ti conné ki personne pas gagne droit prend la vie ene lotte dimoune, même pour so propre garçon sans so consentement. Kan à Hazrat Ibrahim (as), li ti totalement dédié li pour la cause d’Allah. Maintenant guette réponse magnifique ki so garçon fine donné et ça li indique ça excellent disposition de qualité de ça garçon là. Ça anecdote là ti passé dans ene désert et personne pas ti témoigne ça, mais puisque le monde ti ena pour tire leçon de ça l’esprit de sacrifice là et Allah aussi fine content de ça l’esprit de sacrifice là et Li fine mentionne ça dans Quran. C’est ça même l’esprit de sacrifice ki nous commémoré, ki nous faire révive en célébrant ça Eid azordi là. Pli devant dans versets 104-106, Allah dire : « Et kan tous les deux fine soumette zot à la volonté d’Allah et ki Ibrahim (as) fine mette Ismaïl (as) par terre lors so front, Nous fine appel li – O Ibrahim (as) to fine déjà réalise to rêve. Allah dire en vérité, coumsa même ki Nous récompense bane ki faire du bien. Nous fine capave comprend ki la façon ki Hazrat Ibrahim (as) ti interprète so rêve li ti correcte, li ti bon et Allah aussi ti conné façon ki li fine interprète so rêve de dédication de so garçon, ça li ene bon façon. Allah fine laisse li allé pou guetté jusqu’à ki point li capave allé dans ça l’esprit de sacrifice là. Et effectivement Hazrat Ibrahim (as) fine avance bien bien loin, et li fine établi ene l’exemple, ene leçon de sacrifice pour le monde entier. Et pour nous commémore ça, pour nous faire révive ça l’esprit de sacrifice là, Allah fine faire de sorte ki chaque l’année le monde célébré ça Eid-ul-Adha là. Et à chaque fois kan ou pé faire ça sacrifice là, ou pou pense ça et ça pour ena ene l’éffet lors ou. Kan même combien fois ou lire ça partie dans Quran là, ça li bizin ena ene l’effet spéciale lors ou parski ça c’est ene l’exemple vrai, ene l’exemple vivant. Là-dans ena ene l’exemple bien profond pour bane musulmans dans le monde entier et en même temps li ene secret pour la vie et aussi pour l’avenir de l’Islam. Comprend bien ki le pli grand récompense ki Allah fine donne à Hazrat Ibrahim (as), c’est l’heure li fine annonce li ki : « O Ibrahim (as), to fine déjà accompli to rêve. » Si quelqu’un ki ena la soif l’amour d’Allah et kan Allah annonce ene bonne nouvelle pareil, alors ki encore de plisse, li capave attane ? En effet, Allah réserve encore plisse ki ene récompense pour Hazrat Ibrahim (as). Dans Verset 107 & 108 Allah dire : « Ça c’était vraiment ene teste. Et Nous ti mette dans so place ene gros zanimeau pour sacrifier. » Le mot « Zibbin Azim » veut dire grand sacrifice et c’est pas ça grand mouton ou bœuf ou cabri là ki Allah fine faire apparaite devant li là, malgré ki ena beaucoup zot explique ça coumsa. Tout d’abord, Allah fine fini informe Hazrat Ibrahim (as) ki to fine déjà realize to rêve. Et couma capave compare sacrifice d’ene simple cabri et dire ki li pli grand ki kan ene papa pé sacrifié so propre garçon ? Couma capave dire ki sacrifice cabri là pli grand ? Ici séki pé montré, ki Hazrat Ibrahim (as) fine montré l’esprit de sacrifice et Allah fine content avec li et Allah fine informe li ki li fine accepté so sacrifice, parski li fine faire exactement couma Allah fine dire li. Après ça, Allah commence ene lotte sujet en disant ki Li pas pou laisse ça l’esprit de sacrifice là mort. Li pou préserve li et li pou propage li de sorte ki le monde entier pou au courant de ça « Zibbin Azim » là, de ça grand grand sacrifice là. Hazrat Muhammad (saw) et so bane compagnons zot sacrifice li lié directement avec ça sacrifice de Hazrat Ismaïl (as) là. Allah dire à Hazrat Ibrahim (as) : To fine fini accompli to devoir et Mo fine accepté. Maintenant, Allah pé dire : C’est Moi ki pou agir, Mo pou agir pou ki le « Zibbin Azim » pli grand sacrifice ki pou capave faire pour l’amour d’Allah capave faire par ene de to bane descendants et pou faire rappel to sacrifice aussi. Ici « Zibbin Azim » faire référence à Hazrat Muhammad (saw) et so bane compagnons et effectivement bane sacrifices ki Hazrat Muhammad (saw) et so bane compagnons ti faire, zot rappel un peu ça sacrifice de Hazrat Ismaïl (as) là. Dans prochain verset Allah dire : Nous fine laisse ene bon renom pou li parmi bane générations ki vine après bane Aakhéreen. Bé la question se pose couma Li pou été ça renom là ? Allah éclairci ça plus devant, en disant ki zot pour dire : « Salaamoun ala Ibrahim », c-à-d, la paix soit avec Ibrahim (as). Dans ça Chapitre 37 là mentionne « Salaam » lors Hazrat Ibrahim (as) et dans plusieurs les autres places de ça même chapitre là mentionne « Salaam » - lors plusieurs prophètes. Partout kot fine mentionne « Salaam », c-à-d, envoye la paix lors ça bane prophètes là, partout fine dire ki c’est bane Aakhéreen ki pou envoye ça « Salaam » là. Qui été bane Aakhéreen là ça ? Sans aucaine doute, Hazrat Muhammad (saw) et so bane compagnons. La preuve c’est ki c’est seulement Hazrat Muhammad (saw) ki fine proclame la véracité de tous bane les autres prophètes avant et fine même enseigne pour envoye Salaam lors zot, et ou pour trouver ki péna aucaine religion fine enseigne pour envoye « Salaam » (la paix) lors les autres prophètes, sauf l’Islam. Mais maintenant li claire ki ça pli grand sacrifice là, ça « Zibbin Azim » là c’est Hazrat Muhammad (saw) et so bane compagnons ça et ene preuve bien claire kan ou lire Darood Shariff, c’est nous envoye « Salaam » lors Hazrat Ibrahim (as). Allah dire c’est coumsa ki Nous récompense bane ki faire du bien. Ça oulé dire ki même après la mort de Hazrat Ibrahim (as), ça récompense là fine continué par Allah et Allah fine amène ça jusqu’à Hazrat Muhammad (saw). Ene seul Rassool, en la personne de Hazrat Muhammad (saw) malgré ki li ti supérieur en grade, li pas fine oublié bane ki ti sous li. Li fine enseigne so peuple pou envoye « Salaam » lors ça bane les autres prophètes là, et Hazrat Muhammad (saw) fine dire ki celui ki pas reconnaître ene de ça bane prophète là, alors li pas parmi mo bane suivants. Suite à ça duah ki Hazrat Ibrahim (as) fine faire là, fine ena Hazrat Muhammad (saw) ki fine vine comme descendent et dans la même ligné nous fine vine comme bane Aakhéreen. Ça Aakhéreen là li réfère à serviteur de Hazrat Muhammad (saw), c-à-d, Hazrat Massih Maoud (as) et pé réfère aussi dans ça siècle là aussi kot ena le serviteur de Hazrat Muhammad (saw) et de Hazrat Massih Maoud (as) kot tous zot bane l’enseignement fine vine en poussière et Allah fine bizin lève ene Messager pour refaire révive ça bane l’enseignements ki fine vine en poussière et ki Shirk fine prend toute sorte kalité formes dans le cœur bane dimounes. Azordi c’est ça même Aakhéreen ki Allah (swt) fine faire deboute pour le service de l’Islam ; C-à-d, le Jamaat Ul Sahih Al Islam ki prêt pour toute sorte de sacrifice pour la victoire de l’Islam. Insha-Allah. Ameen. Bane évènements ki fine suivre bane l’année précédents fine montré ki ça c’est ene plan d’Allah bien bien approprié, bien béni et sakaine parmi nous ena pour épaule bane grand grand responsabilité ki pé vini plus devant. Nous faible, nous bien faible même et nous péna aucaine pouvoir dans aucaine pays, mais nous le cœur li rempli avec ça certitude dans Allah là et ki pou rebâtir le monde et amène la victoire de l’Islam. Ça certitude là li vrai quand même les autres dimounes dire ki nous pé rêvé, kan même les autres dimounes dire ki nous pé cause dans vide, laisse zot. Bane compagnons de Hazrat Muhammad (saw) aussi ti pé faire face à bane grand grand difficultés. Parfois zot ti pé mange ene seul repas par jour. Pas oublié ça anecdote préparation Bataille du Fossé, ene Sahabi ti attache ene roche lors so ventre et ça ti ene coutume parmi bane Arab pou apaise zot douleur et faim. Sahabi là fine pensé laisse mo lève mo chemise et li montré Hazrat Muhammad (saw) pour ki le Prophète (saw) gagne pitié pour li et faire duah. A so tour, Hazrat Muhammad (saw) lève so chemise et ti ena 2 roches ki ti attaché lors so ventre. Sahabi là fine realize ki péna personne ki capave supporte pli grand difficulté ki Hazrat Muhammad (saw) et au cours de ça bane travail là, bane Sahaba ti zoine avec ene roche ki zot pas ti capave cassé ni bouze li. Alors zot fine informe le Saint Prophète (saw) avec ça conviction là ki c’est seulement li ki pou capave bouze ça roche là ou casse li. Et effectivement Hazrat Muhammad (saw) fine vini et li fine prend ene pique et li fine tappe lors roche là. Dans premier coup tappé, bane étincelles fine jaillir et le Saint Prophète fine dire « Allah O Akbar ». Li fine tappe ene deuxième coup et ene étincelle fine ré-jaillir et li fine ré-dire « Allah O Akbar » et finalement li fine tappe ene troisième coup et encore étincelle fine jaillir et li fine dire « Allah O Akbar » encore et cette fois-ci roche là fine cassé. Et li fine ré-dire « Allah O Akbar ». Pli tard le Saint Prophète (saw) fine explique so bane Sahaba ki le premier coup kan mo ti dire « Allah O Akbar », c’est parski mo ti trouve gloire de future de l’Islam, ti pé offert moi la clé du Royaume de la Syrie. Deuxième coup kan mo ti dire « Allah O Akbar », mo ti trouve gloire de future de l’Islam, ti pé offert moi la clé du Royaume de l’Iran et troisième coup kan mo ti dire « Allah O Akbar » c’était la clé du Royaume de Yémen. A cause ça partout mo ti dire « Allah O Akbar » - O Allah, nous bien faible, parfois ene repas même nous péna, mais kan même ça, Allah pé montré nous ki nous pou ena control lors tous ça là. Hazrat Muhammad (saw) et so bane compagnons ti ena ene confiance totale dans Allah et zot ti conné ki tous ça là pour réalisé et l’histoire témoigne ça ki c’est comme ça même ki fine arrivé. Azordi c’est nous ki pé révendiqué ki nous pour apporte la victoire de l’Islam, Insha-Allah. Bane dimounes capave prend nous pour bane fou, mais nous bane révendications li bazé lors confiance, même confiance absolu ki Hazrat Muhammad (saw) ti ena dans Allah. C’est nous ki pou amène ça victoire là et d’autres personnes. Magine ça responsabilité là, assume li et ça li possible seulement à travers l’exemple de Hazrat Ibrahim (as) ki ti dédié li complètement et aussi ti dédié so bane descendants. Alors Tarbiyyat commencé avec papa même. Ça anecdote là montré ki Hazrat Ibrahim (as) ti fini dédié li complètement avec Allah et après anecdote de Hazrat Ismaïl (as) fine vini. Azordi ça même mo message, ki ou bizin manifesté qualité Hazrat Ibrahim (as) dans nous, lerlà nous bane zenfants pou manifesté qualité de Hazrat Ismaïl (as) dans zot. Hazrat Ibrahim (as) so Qurbani fine accepter kan tous les deux, papa là et garçon là fine soumette ; sakaine parmi nous bizin manifester même l’enthousiasme de Hazrat Ibrahim (as), ki, pour la cause d’Allah li ti prêt pour passe couteau lors licou de so garçon. Lerlà Allah fine dire li, Nous (Allah et So bane anges), c’est pas ça sacrifice physique là ki Nous oulé, mais ene sacrifice ki pou duré tous les temps. Bizin ena ene qualité sacrifice ki kan même ou ena ou garçon, mais ou bizin dédié pour la cause d’Allah. Nous bizin paré pour toute sorte de sacrifices. C’est ça le « Zibbin Azim », c’est ça le grand sacrifice ki fine commencé par Hazrat Ismaïl (as), ki fine continué par Hazrat Muhammad (saw) et c’est ça même sacrifice ki nous bizin continuer azordi. Mo pé adresse moi spécialement à bane parents ; si zot bizin faire démarche vine bane vrai Mouslemeen, vine bane vrai Mouslemeen à l’image de Hazrat Ibrahim (as), à l’image de Hazrat Muhammad (saw). L’intention pas suffit. Li accompagné avec action aussi et de toutes sortes de sacrifice ki bien bien difficile, ki ena beaucoup épreuves et test mais ou bizin prend patience et faire li seulement pour le plaisir d’Allah. Auparavant peut-être ou pas ti pé prend compte et couma Allah ene seul coup Li pou apporte ça révélation là, alors de jours en jours bane travail là pé vine bien grand et travail là pou continuer grandi et tous ça là, Allah fine choisir nous pou donne nous ça responsabilité là. A la fin mo message c’est ki nous bizin élève nous niveau de sacrifice à la hauteur de Hazrat Ibrahim (as), à la hauteur de Hazrat Ismaïl (as) et ki Insha-Allah nous pou réussi dans nous tâche. Ameen. Le Khalifatullah fine souhaite zot tous bane frères et sœurs de bane plusieurs pays (bane l’îles couma Rodrigues, la Réunion, Mayotte, Seychelles et plusieurs autres pays couma l’Inde, l’Indonesie etc.) et à Maurice aussi ki pé prend le Khutba Eid-ul-Adha en direct, ene Eid Mubarak. C’est so souhait et duah ki zot tous réuni couma ene seul lecorps sous la bannière de l’unicité d’Allah et empreigne zot de l’esprit sacrifice de Hazrat Ibrahim et de so garçon Ismaïl pour amène la victoire de l’Islam, Insha-Allah...