Text Box: Bismillah-ir-Rahman-ir-Rahim KHUTBA JUMMAH HAZRAT AMIR’UL MOMENEEN MUHYI-UD-DIN AL KHALIFATULLAH MUNIR AHMAD AZIM 18 Juillet 2008 (Résumé du Khutba Jummah) 1er Jour Jalsa Salana Maurice Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine lire ça bane versets suivants là :  Innamal-Mu’minuuna ‘Ikhwatun ... – Bane croyants, zot vraiment bane frères. (Ch. 49 Al Hujurat V.11) L’Islam fine regroupe bane croyants comme bane vrais frères. Ça même lien de fraternité là fine amène beaucoup de révolutions spirituelles au temps de nous Bien-Aimé Prophète Hazrat Muhammad (s.a.w). Ça lien de fraternité là consolide la loyauté et la fidélité ki ene croyant li bizin ena l’un envers l’autre. L’Islam encourage bane musulmans aussi pour respecter bane les autres dimounes, sans aucaine barrière de religion, culture ou race ki li été. L’Islam li ene religion universelle et so but aussi li universel; kot li englobe tous dimounes comme ene seul. Allah dire dans Ch.2 Al Baqara V.214: “Kaanan-naasu um-matanw waahidah” – Tout dimoune forme ene seule nation. Mais le lien de fraternité ki existe entre bane croyants li bizin pli fort comme si dirai zot bane frères d’ene seule maman. Penser bien ki nous tous nous bane descendants Adam (a.s). C’est nous bane actions, et le respect ou le non-respect de bane commandements d’Allah ki fine faire l’humanité divisé en plusieurs sectes et religions. La vérité c’est ki la base de chaque religion ki fine exister li le même; c-à-d, l’Unicité d’Allah. Mais c’est Insaan (l’homme) ki fine créer ça division là dans bane l’enseignements divines. Nous bane musulmans, à travers le Quran nous fine gagne la chance ki Allah fine encourage nous pour faire le bien et interdire le mal et pour entreprendre bane travails seulement pour le plaisir d’Allah (swt). Ene de ça bane responsabilités là c’est ki nous bizin être loyal envers nous prochain, surtout nous frères et soeurs musulmans. Faudé pas nous oublier toutefois ki ça loyauté et fidélité là li bizin accompagner avec ene sincérité du coeur. Ki serti nous pé frékante ene frère mais ki nous le coeur pé critique li et méprise li. Pour cela, nous bizin ena la crainte d’Allah et suive so bane commandements couma bizin suivre. Chaque l’amitié et fraternité li pas pareil, parski tous dimounes pas pareil. D’habitude nous montrer nous loyauté envers bane ki proches avec nous couma nous mama, papa, frères, soeurs, conjoint/es, zenfants, bons camarades etc... Mais l’Islam li prêche la loyauté surtout envers bane frères et soeurs musulmans (croyants) malgré nous pas conne nous camarades. Nous forme parties d’ene même lécorps ki Allah fine béni par l’arrivée de So Bien-Aimé Prophète Hazrat Muhammad (s.a.w) lors ça duniya (la vie) là. C’est ça bane ki fine croire en l’unicité d’Allah et en Allah so Rassool (Messager) ki nous bane vrais frères et soeurs. Nous l’amour et nous l’amitié li bizin pli fort ki tout nous bane relations après nous l’amour pour Allah et So Rassool (s.a.w). C’est ça l’amour ki nous ena l’un envers l’autre ki démontrer nous l’amour pour Allah et nous bizin garde ça lien là attacher bien fort, arrive séki arrive. C’est aussi ene démonstration de nous la foi et nous l’obéissance à bane commandements d’Allah ki fine metter dans Quran. C’est avec ça sincérité dans ça l’amour là ki le Saint Prophète (s.a.w) fine réussi établir la communauté de bane premiers croyants avec l’aide d’Allah (swt). Et ça croissance là fine aller ziska azordi. Li malheureux seulement pour mo dire ki azordi fine arrive ene tel l’époque kot nous tous bane musulmans lors ça la terre là ti supposer réuni mais nous fine laisse nous-même tenter avec bane biens de ça le monde là et nous fine laisse ça l’amour sincère là glisser de nous la main. Azordi frères et frères musulmans, pays et pays musulmans pé la guerre? Eski ça ene solution à nous problèmes? Eski nous bizin déchire nous propre lecorps, ça le corps ki nous Bien-Aimé Prophète (s.a.w) fine vini pour guéri et consolider ? Eski par nous propre la main nous pour suicide nous, kan dans Quran dire ki Allah condamne le suicide? Li bien chagrinant ki le mot loyauté entre bane croyants dans l’Islam fine perdi so valeur? Eski nous pou laisse même ene commandement d’Allah ki trouve dans Quran perdi so valeur et so raison d’être? Kan nous guette dans le passé, au début de l’Islam, nous trouver ki kalité sacrifices nous Bien-Aimé Rassool (s.a.w) et so bane compagnons fine faire face pour faire l’Islam briller dans chaque le coeur. Mais pas tout le coeurs ti propres. Ti ena parmi bane hypocrites! Eski ça fine empêche l’Islam gagne la victoire kan Allah fine décrète la victoire pour li? Non! L’homme li ene race kot li capave vine hypocrite envers li-même et oublier so devoir et responsabilité ki li ena envers so l’autre frère/soeur musulman. Kan li hypocrite envers li-même, li délaisse ça crainte d’Allah kot li vine à ce moment là à l’état animal kot li pas reconnaître so bane propres torts. Mais à l’époque du Saint Prophète de L’Islam, ti ena aussi beaucoup croyants ki ti ena ene la foi ferme en Allah et So Rassool (s.a.w) et c’est ça fidélité et loyauté envers Allah et So Rassool (s.a.w) ki fine faire zot gagne la victoire lors le mal. Kan ti ena l’immigration de bane mecquois à Madina, le Saint Prophète fine faire établir ça lien d’amitié et d’amour entre bane frères musulmans de la Mecque (bane Mujjahireen) avec bane frères musulmans de Madina (bane Ansars). Par ça acte là, le Saint Prophète (s.a.w) fine envie démontrer ki bane musulmans zot égales dans lizié d’Allah et ki tous bane ki fine accepter bane signes d’Allah zot formes parties d’ene seule famille, pareil couma bane ki fine rentre dans l’Arche de Hazrat Nuh (a.s). Hadith: Hazrat Muhammad (s.a.w) fine explik structure de ça nouveau société là (c-à-d, L’Islam) et li fine dire: “Bane croyants, dans zot l’amitié, miséricorde et affection l’un envers l’autre, zot couma ene seul le corps; si n’importe ki partie fermal (pé gagne difficulté), alors tout le corps là en entier bizin ressenti ça douleur là”. (Bukhari) Ena ene l’autre hadith ki mentionner ki ene musulman li ene miroir pour ene l’autre musulman. Ça hadith là li contigne l’explication de ça l’autre hadith ki mo fine mentionner à propos ki bane croyants zot comme ene seul le corps. Ene croyant li bizin vine dans ene tel façon ki li vine le confident de so frère sans trahir li pareil couma ene miroir jamais trahir secret de celui ki pé guette li dans ça miroir là. Chaque frère et soeur musulman bizin vine couma ça miroir là. De ce fait, dans ça l’amitié spéciale là, la confiance bizin présent. Avant toute choses bizin ena la confiance ki Allah présent et pour guide nous vers le droit chemin et vers bane bons décisions. Avec duah, tout est possible; avec duah nennié pas impossible. Allah faire ce qu’Il veut. Li ena assurément pouvoir lors tous kitchoses. Zamais nous pou fini conne So grandeur (la grandeur d’Allah). Hadith: Le Prophète (s.a.w) fine dire: “Pena aucaine deux dimounes ki content zot camarades pour la cause de l’Islam, ki pour laisse ene offense minime vine entre zot”. (Bukhari) Alors kan nous l’amour pour l’Islam li réel et sincère, alors péna aucaine obstacle ki capave devié ça. Mais li pas acceptable ki deux dimounes zot à mal (pas d’accord) dans la religion de l’Islam. En fait, pli ene réconciliation li tarder, et li dépasse 3 jours, pli péchés augmenter pour tous les deux, spécialement pour celui ki en tort, mais si l’un d’entre zot faire le premier pas (faire salaam) dans l’espace de ça 3 jours là, Allah béni li. Ça action de pardonner là li aider pour faire de ça dimoune là humble et permettre li pour rapproche avec Allah plisse. Dans ene l’autre hadith mentionner, ki le plus fort parmi zot c’est celui ki avale so colère. Nous tous conner ki kalité la colère et la haine li destructive kot li capave detruire ene famille, même ene communauté. Hadith: Le Prophète Hazrat Muhammad Mustapha (s.a.w) fine dire: “ C’est pas permettre ki ene croyant pas cause avec so frère musulman plisse ki 3 jours kan zot zoine; ene tourne figure dépi so camarades et vice-versa. Assurément, le meilleur parmi ça deux là c’est celui ki faire le salaam le premier”. Kan nous bane musulmans nous séparer, ena plisse tendance pour l’ennemi de l’unicité d’Allah (shaytane) réjouir et profite de l’occasion pour créer plisse tension entre bane frères et soeurs musulmans. Mais ene l’armée de bane vrais frères et soeurs de L’Islam qui ena la foi en Allah et So Rassool Hazrat Muhammad (s.a.w) et ki maintenir le lien de fraternité entre croyants, li vaut plisse ki tous bane l’armées ki exister, parski bane musulmans zot seuls armes, c’est dua (la prière). C’est la prière qui consolide ene nation, et la nation de l’Islam li ça même nation qui représenter par Hazrat Ibrahim (a.s). Tous prophètes et bane qui fine croire dans zot ki fine vini, fine bizin passé par bane teste (péna aucaine prophète ki pas fine passe par bane blâmes, bane accusations, bane problèmes, banes persécutions etc...) de fidélité et de loyauté envers Allah. Kan zot fine rempli zot pacte, Allah récompense zot énormément pour zot fidélité et accorde zot le Jardin éternel du paradis. Dans Paradis, bane croyants pour camarades et face à face l’un à l’autre et “pou faire circuler entre zot ene coupe (rempli à) la fontaine” (Ch.37 As Swaffat V.46) Allah dire dans Quran: “Fine ena parmi bane croyants des hommes sincères dans zot engagement envers Allah. Certains parmi zot fine morts (martyrs – dans le chemin d’Allah), d’autres pé attende, mais zot pas fine change (zot conviction). Ainsi Allah récompense bane sincères pou zot fidélité, et Li puni bane hypocrites, si Li ouler, ou bien Li accepter zot repentir. Allah sûrement pardonner et gracier” (Ch.33 Al Ahzaab V.24&25) [C’est Allah ki décider si Li pou pardonner ou pas] Dans Ch.16 Al Nahl V.94 Allah dire: “Si Allah ti oulé, ti capave mette ou tous dans ene seule communauté, mais Li laisse egarer ce ki Li ouler et Li guide ce ki Li ouler. Mais pas ena doute qui pou interroge ou lor ce ki ou ti faire” [Kan ça jour là pou vini? Kan nous pou rétourne vers nous Rab kot Li pou juge nous pour nous bane actions] Alors nous tous nous bizin pour l’amour d’Allah et la crainte d’Allah ouvert nous le coeur à l’amour pour nous bane frères et soeurs musulmans entier le monde et nous prier ki Allah aide zot tout les temps et retire zot de zot difficulté et montrer zot ça chemin là, ça chemin ki Li (Allah) fine illumine de So la Lumière, So Nur-é-Ilaahi couma nous dire. Nous prier pour nous bane frères et soeurs ki pé souffert dans bane pays Islamique et nous prier pour tous le reste l’humanité (pour tout bane religions aussi), et demande ki Allah mette la foi dans zot le coeur et réunir nous comme ene vrai et seul communauté (Oummaté waahidah). Insha-Allah. AMEEN *** *** ***