|
Bismillah-ir-Rahman-ir-Rahim
Khutba Jummah de Hazrat Muhyi-ud-Din Munir Ahmad Azim le Vendredi 14 Juillet 2006
Après ki Hazrat Amirul Momeneen Muhyiuddin, Munir Ahmad Azim finne lire le Tashahhud, le Ta’ouz , li finne lire surah Al Fatiha du Quran Shareef suivi de V. 17 de surah Al-Qaf (Ch. 50) et li finne donne so traduction comme suit :
“Wa laqad khalaqnal-‘insaana wa na’-lamu maa tuwas-wisu bihii nafsuh: wa nahnu ‘aqra-bu ‘ilayhi min hablil-wariid”.
Sa deux versets Qur’an qui mo fine lire là, li trouve dans chapitre 50, verset 17, cotte Allah pe dire : « Très certainement, Nous fine créer dimoune et Nous conner qui suggestion li faire à li-même, car Nous plus près avec li qui so propre la veine jugulaire, c'est-à-dire la veine de so licou ».
L’homme ena ene connexion spécial avec so Créateur; surtout nous bane musulmans, qui fine gagne ene rapprochement avec Allah dans la meilleure façon qui exister. De ce fait nous tous bane musulmans nous bizin honore et nous senti ça profond connexion qui ena entre nous et nous Rab. Qui sanla aparte bane mouslemeens (bane qui soumette zot complètement avec Allah) fine gagne la distinction (l’honneur) pour gagne 5 fois namaz tous les jours pour tourné vers so Rab pour purifier li et pour être pardonner de so bane péchés ? L’homme ine né faible. Ça faiblesse qui li ena là bizin charger d’humilité envers so Seigneur, sinon l’homme vine ingrat et li oublier so Rab qui fine établir li lors ça la terre là.
Allah fine donne le musulman tous bane moyens et fine montrer li le chemin pour rapproche avec Li. Li (Allah) fine établir, à part namaz (la prière), plusieurs bane piliers de la foi Islamique, comme la Zakaat (la charité), le Roza (le jeûne), le Hajj (le Pèlerinage Sacré à Macca). Li fine aussi prescrire dans Qur’an le namaz Tahajjud (c.à.d, lever la nuite pour faire bane namaz nafil) pour vine plus près avec Allah. D'après Abu Harayrah (r.a), le Prophète (s.a.w) fine dire : Nous Seigneur (swt) dessane lors la terre chaque nuit dépi le ciel pendant dernier tiers de la nuit, et Li (Allah) dire: « Qui sanlà pé prier Moi aster-là afin qui Mo reponne so l’appel? Qui sanela pé demande quelque chose afin qui Mo accorde li (ça kitchose là)? Qui sanela pé demande miséricorde afin ki Mo pardonne li? » (Bukhari, Muslim, Malik, Tirmidhi et Abu Dawud). Dans ene l’autre version par Muslim, ça Hadith là terminer avec ça bane mots là: « Et Li (Allah) continuer demander coumsa ziska ki (la lumière) de l'aube apparaite cotte Allah dire, qui sanela encore pe prier moi afin qui Mo reponne so l’appel ? »
Ena aussi le Zikré-Ilahi par ki bane qui envie rapproche avec Allah, zot faire sa pour gagne ça l’amour d’Allah et la Lumière qui vine du ciel. Banne dimoune qui faire le Zikr-é-Ilahi là, zotte gagne ene l’envi pou rapproche zotte plus avec Allah cotte zotte gagne Allah So l’amour et aussi ene la Lumière qui dessane du Ciel. Le Zikr-é-Ilahi li bien important dans la vie d’ene musulman. Le Namaz li ene plus grand Zikr (mazine Allah) kot le Créateur de l’univers fine établir plusieurs positions d’humilité pour ene croyant kan li vine devant so Créateur. Nous conner quand nous faire namaz, ena plusieurs positions cotte ene dimoune li debouter, li croise so les bras, li faire sijda.. Pena positions d’humilité ki ene croyant montré quand li vine devant so Créateur, devant so Rab. Ça bane positions dans namaz là li très important pour ki ene croyant cotte li rapproche li sincèrement avec Allah. Allah envie ki nous rapproche avec Li et c’est Li qui fine montrer nous couma pour rapproche avec Li. Tous banne positions dans namaz zot très important mais le plus important à mo humble avis, c’est le Sijda (la prosternation).
Le Sijda c’est le signe le plus noble d’ene soumission complète envers Allah. Ça position là permette ene momin (croyant) pour vine plus près spirituellement et avec ene le Coeur soumis avec Allah. L’homme fine créer avec la terre, et ene jour li pour retourne en bas la terre. Qui zaffaire qui plus bas qui exister? C’est en fait ça la terre dans ki nous tous sans exception pou retourner ene jour. Quand nous faire Sijda devant nous Rab, nous Bien-Aimé Créateur, nous pé en fait montrer nous plus bas qui ça la terre lors qui nous pé prosterner là. L’homme li oulé, li na pas oulé, li ena ene connexion avec Allah. Ça connexion là qui faire li ene esclave et Allah Li le Maître absolu.
La faiblesse qui l’homme ressenti face à banne épreuves de la vie faire li souvent éloigner avec so Créateur parce qui li croire qui so Rab pas content li et fine oublier li. La lutte dans le chemin d’Allah li très important. Allah dire dans Quran Ch. Al-Ankaabut V. 2.
“Ahasiban naasu any yutrakuuu ‘any-yaquuluuu amannaa wa hum laa yuftanuun?” “Eski dimoune penser ki pou laisse zot dire seulement ‘nous ena la foi’, et pas pou tester zot?”
Ça montrer nous qui nous bizin faire z’éfforts dans So chemin et faudé pas nous désespérer dans So cause. C’est ki Li (Allah) faire, ça même meilleur pour nous. Allah fine donne nous, bane Momeneen (croyants) la capacité d’intelligence et pour faire bane choix dans la vie. Allah fine explique dans plusieurs place dans Quran couma pour analyse ça rapprochement avec Li là et pour comprend séki Li dire à propos d’ene relation avec Lui (Allah). Souvent des fois nous pas comprend séki Allah faire. Nous prend li comme ene épreuve ou soi ene mal ki vine dans nous chemin car ça même kitchose là capave ene bien qui Allah fine place lors nous chemin afin qui nous réussi rapproche avec li entièrement. Nous bane croyants, nous banne Musulmans qui croire en l’Unicité d’Allah nous bizin faire z’éffort pour comprend ça bane méthodes qui nous Rab servi afin qui nous trouve nous la paix lors ça la terre là. Vrai la paix c’est kan nous gagne nous Allah lors ça la terre là même, mais avant nous gagne Li, pareil couma l’or bizin passe dans difé pour li briller ou même couma ene chef cuisinier quand li pe cuit ene bouillon brède li péze sa brède la dans bouillon pour ki ça brède là vine bon pour manger dans l’assiette, alors dans ça façon là nous bizin expecte qui pour qui nous gagne rapprochement avec Allah, nous bizin accepter passe dans bane difé, parfois qui même paraître insupportable.
Allah mentionner dans Quran Ch.2 V.287 “Laa yukalli-fullaahu nafsan illah wus’ahaa”. (Allah pas mette difficulté, fardeau lors personne excepter séki li capave supporter).
Alors, nous bane mouslemeens, nous bizin heureux et saisir chaque épreuves/difficultés/problèmes dans ene meilleur façon et nous pas quitte la porte d’Allah car si nous quitte ça la porte là dans moments de difficultés, de problèmes, alors Allah pour délaisse nous, mais si nous repentir sincèrement avec Li, alors So Miséricorde et So pitié péna aucaine limites.
Allah dire dans Quran: Ch.2 V.187 : “Kan Mo bane serviteurs pose toi (en adressant à Hazrat Mohammad (s.a.w) des questions lors Moi, dire zot qui Mo près de zot. Mo reponne zot l’appel kan zot appel Moi. Zot aussi bizin écoute Mo l’appel, et gagne la foi en Moi afin ki zot trouve le bon chemin”
Couma ça bane versets Quran là expliquer, Allah fine montrer nous ki Li plus près de nous qui nous la veine kot nous licou (nous la veine jugulaire). Li Omniprésent (c.à.d, Li partout, même sans qui nous trouve Li). Alors si ene dimoune pas senti ene rapprochement avec Allah (sans qui li faire z’éffort vers Allah), bé ki sanla pour responsable, Allah ou soi ça dimoune là?
Ene dimoune qui abandonne le namaz et tous bane formes d’ibaadat, li pareil couma ene mort-vivant. So cadavre seulement qui pé vivre, qui pé profite bane attractions de ça le monde matériel là mais en fait li fine perdi tous connections avec so Créateur, et so Créateur aussi ine abandonne li dans sa le monde là jusqu’à so la mort, et Jour de règlement de comptes cotte pou ena pou ranne so comptes devant Allah.
Allah mentionner dans Quran : Ch.32 As Sajda (La Prosternation), V. 9 “Ensuite Li (Allah) donne l’homme so forme et souffler so l’esprit en li; et Allah fine donne ou pouvoir pou tender, pou trouver, et aussi l’intelligence pou comprend.” Mais seulement dans même verset, Allah dire: “qaliilammaa tashkurrun!” Mais ou très peu reconnaissant!... (Envers Allah).
Si ene dimoune dire ki Allah fine abandonne li, au contraire li bizin maziner ki c’est li au contraire qui fine abandonne et manque confiance en so Créateur. Nous bane mouslemeens, nous bizin pas vine couma ça dimoune ingrat qui Allah mentionner dans ça verset là-haut là. Au contraire nous bizin remercier Li pour tous bane faveurs qui Li fine donne nous. C’est Li qui fine, avant nous naissance même faire nous provisions lors ça la terre là. Li fine donne nous banne parents pour occupe nous jusqu’à nous maturité, donne nous la nuite pour nous reposer, le jour pour nous alle travail et cherche So faveurs (qui li matériel et spirituel), Allah ine donne nous la santé (et nous conner qui la santé c’est ene très grand faveur qui Allah ine donne nous, si nous pena la santé, narien pas bon, ou capave ena combien l’argent, combien kitsoz mais si la santé même pas bon narien pas bon), et aussi Allah faire la pluie tomber pou nous et avec sa de l’eau là nous servi pou boire, et aussi cotte li arrose tous bannes plantations pour nous gagne la nourriture pou nous manger. Tout sala c’est banne faveurs d’Allah même sa qui nous pas pour capave mentionner, tellement So bane faveurs immense (extra grand) qui pas pou capave ennumere tous.
Allah dire dans ene hadith qudsi (authentique): “ Moi, bane jinns et bane humains nous concerner dans ene grand kitchose. Mo crée et zot adore ene lotte kitchose. Mo donne zot de Mo bane faveurs, et zot remercier ene lotte qui Moi. Mo bane bénédictions dessane lors (Mo) bane serviteurs et zot péchés remonte vers Moi. Mo vine près avec zot avec Mo bane bénédictions et faveurs, et Mo pas bizin zot. Quand zot éloigner avec Moi par zot désobéissance, et c’est zot-même ki extra bizin Moi.” (Baihaqi)
Allah fine mentionne plusieurs de So bane attributs dans Qur’an, sa faire nous réfléchi Allah vrai même faire nous beaucoup de faveurs, mais seulement quand nous tappe la porte, nous tappe la porte banne créatures. Nous gagne la crainte des créatures plus qui la crainte de nous Créateur. Quand nous ena pou remercier, nous remercier les zottes au lieu qui nous remercier Allah Ta’ala. Allah même ine dire dans sa Hadith là quand zotte pou éloigner avec moi par zotte désobéissance, alors c’est pas Moi qui bizin zotte, c’est zotte-même qui bizin Moi. Alors Allah ine mentionne plusieurs banne Attributs dans Qur’an pour qui nous capave manifester ça bane mêmes attributs là dans nous et aussi afin pour vine plus près are Allah. Toutes louanges appartenir à Allah qui fine donne nous, la Jamaat Ahmadiyya Al Mouslemeen l’occasion pour étudier So bane attributs afin pour qui nous récite zot avec ene le Coeur pur et sincère afin ki Allah reste avec nous à chaque moment de nous la vie. Ena banne Attributs qui nous bizin lire dans chaque situation, qui li bon, qui li mauvais, pour qui Allah manifester Li et Li protège nous dans tous circonstances et Li montrer nous le chemin qui pour amène directement vers Li.
Tous kitchoses ki nous bizin faire, nous faire li seulement pour la cause d’Allah (swt). Dans l’époque de nous Bien-Aimé Prophète Hazrat Mohammad (s.a.w), ti ena bane sahabas karaams qui fine sacrifier zot la vie dans le chemin d’Allah et beaucoup fine vine shaheeds dans le droit chemin; ene chemin qui fine faire zot gagne zot Rab même en récompense.
Nous conner ki pour chaque musulman, l’amour d’Allah et de so Rassool (s.a.w) li bizin primer dans so le coeur, sans toutefois li faire le shirk dans n’importe ki forme dans l’amour du Saint Prophète (s.a.w). Nous dévotion, nous la vie, nous la mort li trouve dans la main d’Allah l’Unique et Hazrat Muhammad (s.a.w) li simplement ene serviteur et Messager, ene bénédiction pour ça l’univers là et li ene modèle parfait pou nous qui nous suivre li et amene nous vers Allah cotte nous gagne ene satisfaction et cotte Allah content avec nous quand nous suivre So Prophete (s.a.w). Malgré tout, Allah fine ordonne chaque momin pour envoye daroods (salutations de paix) lors So bien-aimé Prophète (s.a.w) qui ene modèle parfait pour ça le monde là. Celui qui content Allah et content so Messager, et li marche d’après la parole d’Allah et banne pratiques de So Bien-Aimé Messager (s.a.w) , alors ça dimoune là vine ene bien-aimé d’Allah kot Allah ouvert pour li la porte de So Grâce et de So Miséricorde afin qui li réussi atteindre so but lors ça la terre là et dans Aakhérat (l’autre monde).
Nous conner ki Allah dans aucaine cas pas bizin nous. Au contraire couma ça hadith qudsi ki mo fine mentionner là-haut là, li clairement démontrer qui c’est l’homme qui bizin Allah et l’homme li bien ingrat envers Allah malgré tous séki Allah fine faire pour li. La plupart de bane dimounes zot laisse zot tenter par bane shaytanes qui souffler dans zot z’oreilles qui invite zot pour suivre ene l’autre chemin qui celui d’Allah. L’homme so faiblesse faire li tombe dans ça banne pièges de shaytanes là facilement. Ça tentation là-même qui prouve fatale pour li, kot li trouve li-même seul, sans aucaine appuis d’Allah. Allah envoye So grâce, et ki ça dimoune là faire? Li rejette ça guidance qui vine de côté d’Allah, ene guidance qui pour permettre li rapproche avec Li (Allah) et afin ki li gagne la Lumière dans so le Coeur, ene Lumière qui pour éclaire so visage le jour kot li pour bizin retourne vers so Rab. Ena ene verset dans Qur’an cotte Allah dire « sa jour la banne dimounes pou tourne vers Allah avec ene le cœur pur et zotte suivre sa guidance qui Allah fine envoyé là », alors sa jour-là sa bannes figures là pou briller et Allah dire coumsa « quand zotte trouve zotte Maitre zotte content et zotte visages pou briller avec So la lumière. » Alors l’homme, li ena ça faveur d’Allah pour li capave repentir pour so bane faiblesses et péchés, en demandant pardon avec Allah. Quand li prosterner et supplier so Rab avec la foi sincère, alors Allah jamais refuse ene telle repentir et li continuer envoye So Grâce lors ça dimoune là. Nous bizin tout le temps remercier Allah Ta’ala pour tout banne faveurs ki li faire nous parce qui c’est dans ça banne actions là qui nous pou trouve nous salut auprès d’Allah (swt). Allah content quand So serviteur repentir (demande pardon pour so banne fautes et péchés). Ena ene hadith qui mentionner dans BUKHARI et MUSLIM kot le Saint Prophète (s.a.w) fine dire: “Assurément, Allah pli content avec repentir de So serviteur qui n’importe d’entre zot quand li retrouve so chameau perdu (sél moyen de transport de banne dimounes de ça l’époque là)”.
Alors zamais nous bizin désespérer et perdi confiance en Allah. Si nous penser qui nous loin avec Allah, alors nous bizin retire ça penser là et faire plisse z’éffort, pour ki l’amour pour Allah rentre dans nous le Coeur et nous faire plisse bane actes d’ibaadats comme namaz, donne charité, lire Quran et faire Zikr pour qui Allah content avec nous banne actions et Li béni nous partout kot nous été.
Ene Hadith Qudsi rapporté par Anas (r.a), ki le Messager d’Allah (s.a.w) fine dire: « Allah le Tout-Puissant fine dire: O fils d'Adam, aussi longtemps ki to pou appel Moi et ki to pou prier Moi, Mo pou pardonne toi pour séki to fine faire, et Mo pas pou condamne toi pour ça. O fils d'Adam, même si to bane péchés ti capave touche bane nuages dans lé ciel, et qui to demande Moi pardon, Mo pou pardonne toi. O fils d'Adam, même si to vine vers Moi avec bane péchés aussi grand ki la terre et ki to présente toi alors vers Moi, sans ki to attribuer aucaine associer avec Moi, Mo pou accorde toi ene pardon presque aussi grand. » (Tirmidhi, Ahmad ibn Hanbal, et Ibn Majah).
Est-ce qui ça pas ene bonne nouvelle qui nous Créateur fine annonce nous? Est-ce qui nous Créateur pas content nous? Allah de par So Grâce immense Li fine indique nous commié Li content so bane créatures. Chaque bonne action qui nous faire, nous pour trouve Allah pe donne nous plisse ki valeur ça bonne action en récompense mais si nous faire ene péché, Allah puni nous seulement ene fois pour ça péché ki nous fine faire là à moins qui nous repentir et nous vine vers Li avec ene le Coeur pur, ene le cœur rempli de regret ki nous fine faire ene tel péché. Allah juge nous l’intention. L’intention marche avec chaque action ki nous faire. Allah content pardonner et So pardon li extra grand.
D'après Abu Hurayrah (r.a), le Prophète (s.a.w) fine dire (sa aussi ene l’autre Hadith Qudsi) : Allah le Tout-Puissant fine dire : Mo tel couma Mo serviteur croire ki Mo été (ou Mo couma Mo serviteur penser Mo été). et Mo avec li kan li mazine Moi. Et si li mazine Moi en li-même, Mo mazine li en Moi-même; si li mazine Moi dans ene l’assemblée, Mo mazine li dans ene l’assemblée qui pli meilleur qui ça. Et si li approche avec Moi d'ene coudée, Mo approche de li distance d’ene lé bras. Et si li marche vers Moi, Mo galoupe vers li.” (Bukhari, Muslim, Tirmidhi, Ibn Majah)
Allah manifester li d’après ki So serviteur pense Li. Allah li Ar-Rahman (le Gracieux), Ar-Rahim (le Miséricordieux), As-Saboor (le Patient), Al-Ghaffaar (le Très Pardonnant), Ar-Rafick (le Camarade). Li Celui qui présent kan nous bizin Li et c’est Lui qui facilite nous banne z’affaires kan nous dans difficultés. Celui ki honore le nom d’Allah et mentionne li, Allah zamais pour oublier ça dimoune là. Allah présent partout et li conne profondeur de nous le Coeur. Alors nous bane mouslemeens dans le Jamaat Ahmadiyya Al Mouslemeen nous bizin galouper vers Allah pour qui Allah prend nous dan So Godi. Jamais l’homme pour perdi quand li ena Allah avec Li. C’est Allah Seul so support ki dans la joie ou dans la peine. Allah, Li ça Camarade éternel qui zamais pour abandonne ou. Alors place ou confiance dans Li Seul et ouvert ou le Coeur pour ou servi So cause avec sincérité. Mazine bien ki Allah pas bizin nous, mais au contraire nous ki bizin Li. Alors pour ki zamais Allah pas abandonne nous, nous bizin tou le temps, et à chaque seconde de nous la vie, mazine Li. Quand nous faire z’éffort pour mazine Li (Allah), alors petit à petit (avec le temps et persévérance), nous pour abandonne séki appelle nous nafs et nous pour conne soumettre nous complètement à la volonté d’Allah. Allah Li Tout-Puissant. Qui Allah donne nous Tawfiq pour accède dans So Royaume, avec la Lumière de la soumission et Li accueille nous comme So banne bien-aimés et So banne camarades, qui li lors ça la terre là et aussi dans l’au-delà. Insha-Allah.
Mazine Allah beaucoup car nous salut trouve dans le Zikr d’Allah. Ene le Coeur ki batté avec le Zikr d’Allah, li pour ene le Coeur éternel. (c.à.d, zamais li pour conne la mort spirituel). Allah tout le temps pour avec ça qualité dimoune qui possède ene tel le Coeur.
Qui Allah aide nous pour rapproche avec Li et préserve nous dans So secret car Li tout seul qui capave combler nous banne faiblesses et faire nous accéder à So l’amour éternel. Ameen. |