Bismillah-ir-Rahman-ir-Rahim

 

Khutba Jummah de Hazrat Muhyi-ud-Din Munir Ahmad Azim

le Vendredi 21 Avril 2006

 

Surah Al Kaafiroun

Bane Non-Croyants

(Ch.109)

 

Après ki Hazrat Amirul Momeneen Muhyiuddin, Munir Ahmad Azim fine addresse le salaam, li fine lire le Tashahhud, Ta’ouz et ensuite li fine lire Surah Al Fatiha du Saint Coran et puis li fine lire le Ch.109 Al-Kaafiroun en entier.

 

 

1. Qul yaaa’ ayyuhal KAAFIROUN 

2. Laaa ‘a’budu maa ta’buduun

3. Wa laa antum aabiduuna maaa’a’bud

4. Wa laaa ‘ana ‘aabidum-maa ‘abattum

5. Wa laa antum aabiduuna maaa’a’bud

6. Lakum Diinukum wa liya Diin.

 

1. Dire : ‘O les non-croyants,

2. mo pas adore séki ou adorer,

3. et ou pas pour adore séki mo adorer,

4. Mo pas capave adore séki ou adorer,

5. et ou pas capave adore séki mo adorer,

6. Ou religion pour ou, et mo religion pour moi.

 

 

Ça chapitre là fine révélé à la Mecque, li enseigne nous façon convenable ki nous bizin adopter envers bane ki rejette la foi, dans bane zaffaires concernant le Raisonnement et la Vérité, c-à-d, la Religion. Péna accord ki possible, mais péna lieu pour persécute ou insulter quelqu’un à cause so la foi ou so croyance.

 

Celui ki éna la foi, et qui li éna ene croyance ferme lors l’existence d’Allah, li tini ferme lors ça conviction là parski ça li la vérité. Mais l’homme matérialiste, ki rejette la foi, li attache li-même à bane l’avantages et à bane zaffaires mondaines. Ki li occupe so bane zaffaires mondaines et matériels commié li envie, mais ça pas permettre li pour force bane dimounes sincère et honnêtes pour accepter so point de vue, par bane promesses, par bane faveurs, par contrainte ou par fraude.

 

Ça chapitre là prouver ki li fausse ki l’Islam fine propager avec l’épée. Personne pas capave être forcer pour accepter l’Islam et Quran li ferme dans ça croyance là. C’est so bane grands principes (L’Islam) ki fine attire lécoeur de bane dimounes vers li. La pureté de so bane l’enseignements fine amène dimounes pour réfléchi lors la vérité ki li contenir. Nous bizin adore, content et servi ene seul Dieu et pas adore et content séki bane infidèle, qui fine dévier du droit chemin adorer.

 

Bane profits ki nous gagner par ene moyen dans ça lémonde là, bane coutumes, bane l’habitudes fanatiques et bane superstitions de nous bane ancêtres, et bane l’intérêts personnel empêche nous pour adore et pour servir Allah avec la sincérité ki bizin. Par contre, banes infidèles, cherche en préférence bane kitchoses mondaines et zot adore bane idoles et bane statues.

 

V.1 : Qul yaaa’ ayyuhal KAAFIROUN ; Dire : ‘O les non-croyants

 

La foi li dépanne lors chakaine so l’opinion personnel et li péna nennié à faire avec bane avantages ki capave gagner de bane kitchoses matériels. L’adoration et la prière li bizin dicter par ene la foi pure et sincère, mais malheureusement souvent li pas coumsa, à cause l’idée pour gagne bane zaffaires mondaines, bane coutumes bane ancêtres, bane convention sociale et l’instinct pour imite bane lézot dimounes, ou même la paresse ki éloigne nous de la vérité et ki faire nous reculer devant ça obligation pour rode vraie signification de nous bane actions et bane raisons ki faire nous faire ça, tout ça la tourne ene grand partie de nous bane actes adoration et nous la prière en péchés, en égoïsme et en ene kitchose inutile parski nous pé faire ça par fanatisme ou par superstition ou pour ene show (montrer lizié dimounes). Bane idoles ki symbolique capave zot-mêmes être simplement seulement bane l’instruments ki servi pour protège bane privilèges de bane prêtres égoïstes, ou pour protège bane ambitions, soif richesses et bane désirs de bane dimounes. C’est à cause ça ki le Saint Prophète  (s.a.w) ine insister ki premier enseignement de l’Islam li ene adoration sincère et pure d’ene seul vrai Allah. Le Saint Prophète  (s.a.w) ti résister fermement à bane tentations pour so l’avantages personnel et li ti tini ferme à so message, et li ti continié proclame l’unicité d’Allah.

 

V.2&3 : Laaa ‘a’budu maa ta’buduun, Wa laa antum aabiduuna maaa’a’bud ; mo pas adore séki ou adorer, et ou pas pour adore séki mo adorer

 

Bane versets 2&3 décrire situation kan ça chapitre là fine révélé et ça bane versets là veut dire : « Mo ene adorateur de ça Dieu Unique là, Maître de tout bane kitchoses ki éna dans ça lémonde là, zot Maître aussi bien ki mo Maître ; mais zot, par l’intérêt ki zot montrer et par l’amour ki zot éna pour ça lémonde là, zot péna volonté et courage pour abandonne zot fausse adoration idoles et de zot-même ».

 

V.4&5 : Wa laaa ‘ana ‘aabidum-maa ‘abattum, Wa laa antum aabiduuna maaa’a’bud ; Mo pas capave adore séki ou adorer, et ou pas capave adore séki mo adorer

 

Bane versets 4 & 5 décrire bane raisons : « En tant ki ene Prophète d’Allah, mo pas capave suivre et pas suivre zot bane coutumes ki fausses ; et zot, kan zot pé rode garde ça fausse adoration là, zot péna ni volonté, ni courage pour abandonne zot façon pour adorer et pour servi – ene façon ki définitivement bien mauvais.

 

V.6 : Lakum Diinukum wa liya Diin ; Ou religion pour ou, et mo religion pour moi.

 

Ça phrase là signifie : « Kan mo fine gagne la vérité, mo pas capave adopter zot façon faire ki fausse ; zot pas disposer pour abandonne zot bane intérêts. Responsabilité de séki zot pé faire li zis lors zot même ; en séki concerne moi, mo fine faire zot trouve la vérité. Mo prend tout responsabilité lors façon mo pé faire, et zot péna droit pour demande moi pour abandonne la vérité. Zot bane persécutions, li dans vide : La vérité pour bizin triompher en dernier lieu ».

 

C’est ça l’attitude là ki bizin toujours éna dans la foi, pareil couma ça ti été dans l’époque kot ça chapitre (surah) là ti pé révélé.

 

Bane Chrétiens et bane infidèles pas pour rode jamais abandonne zot idoles, zot bane saints et tout séki zot content dans ça lémonde là pour alle embrasse l’Islam, parski Islam défanne nous pour content n’importe quoi ou n’importe qui plisse ki Allah, le Créateur.

 

Puisseki bane infidèles zamais pour rode accepter bane vérité de ça vrai religion là – L’ISLAM – ni zot pour rode abandonne l’adoration de zot bane idoles et zot bane saints et puisseki nous, bane musulmans, nous pas capave abandonne adoration ene seul Dieu Unique, li impossible pour arrive à ene accord. Alors, bizin laisse bane infidèles croire dans séki zot envie et prend chemin ki zot envie, tandis ki nous, nous bizin reste fidèle à l’Islam et adore et servi ene Dieu Unique. Li non seulement le Créateur, mais Li aussi maintenir toute la création dans ene l’ordre parfait, même dans so pli tipti détail.