|
Bismillah-ir-Rahman-ir-Rahim
Khutba Jummah de Hazrat Muhyi-ud-Din Munir Ahmad Azim Vendredi 09 Décembre 2005
Surah Al Qariah Le Tapage
(Ch.101)
Après ki Hazrat Amirul Momeneen Muhyiuddin, Munir Ahmad Azim finne lire le Tashahhud , le taaouz li finne lire sourate Al Fatiha du Saint Coran suivi de sourate Al Qariah (Chapitre 101) et li finne donne so traduction comme suit :
1. Le jour de Tapage 2. Qui li été, ça tapage là ? 3. Et qui pour montrer toi ki été ça tapaze là ? 4. C’est ene jour kot dimoune pour vine couma bane papillons éparpillés. 5. Et montagnes pour vine couma la laine démêlée 6. Celui ki so balance pèze lourd 7. Pour dans ene la vie agréable 8. Mais celui ki so balance léger, 9. so destination pour dans ene fossé profond, 10. Qui pour montré toi séki li été ça ? 11. C’est ene difé ardent.
Ça Chapitre là fine révéler à Makka et li décrire le Jour de Jugement comme le jour de Tapaze, kot l’homme pour perdi so la tête et ki tous bane signes et bane bornes de ça lé monde là pour disparaître. Mais chaque action pour pézé lors ene balance et li pour trouve so vrai valeur et so place approprié. Couma eski bane sens de l’homme pour capave supporte tapaze, et l’appel de ça grand jour de comptes, kan tous bane limites de ça la vie (lors la terre là) pour disparaître et kan l’homme pour perdi tous so moyens pareil couma bane papillons de nuit ki emporté par du vent ?
En plus de ça, Allah pour montrer So Justice et Li pou pèze et évalué tous bane actions. Et bane bon actions et bane bon pensées zot pour gagne poids et valeur devant lizié d’Allah et ça kalité dimounes ki éna de tel bon actions et pensées comme garanti pour zot, zot pour gagne ene la vie spirituelle éternelle et rempli d’ene plaisir ki seul Allah capave donner, mais bane dimounes ki zot bane bon actions bien tiguitte et limité, zot pour malheureusement trouve zot dans punition douloureux de l’enfer.
V.1 « Al Qaria »
Le jour de Tapage – C’est le Jour de Jugement, quand tous bane l’états actuels de bane kitchoses pour renverser dans ene convulsion terrible. Tous nous bane limites actuel ki nous conné pour disparaître. Pour commencer, ça pour ene expérience bien douloureux, mais ça pour représente l’inauguration d’ene nouveau lé monde kot chaque kitchose pour gagne so valeur réelle et permanent. Alors pour pèze dans balance tous bane actions de l’homme et pour guette vrai et juste valeur de zot conséquences.
V. 2, 3 & 4:
« Mal Qariah Wa maa adraka mal qariah Yawma yakounoun naaso kal faraashil mabsoos »
Qui li été, ça tapage là ? Et qui pour montrer toi ki été ça tapaze là ? C’est ene jour kot dimoune pour vine couma bane papillons éparpillés.
Bane papillons de la nuit zot bane créatures bien fragile et léger. Kan ene tempête violent lévé, nous trouve zot éparpillés dans tous directions. Alors nous capave imagine la confusion l’état de détresse et d’impuissance ki l’homme ingrat, mauvais et rempli de péchés pour retrouve li ça jour de comptes là. Tous bane souvenirs, actions et l’espérances de l’homme pour rassembler devant li dans ene livre ki li ti conné exister mais ki li fine oublier. C’est Allah Li-même ki pour ene témoin entre ça dimoune là so la vie lors la terre ; alors tous so bane espérances pour bazé lors so bane actions et la Miséricorde d’Allah. Tous bane preuves quand pour présente devant li pour montrer li ene nouveau monde et si ça dimoune là ti ene croyant sincère envers Allah, alors ça nouveau lémonde là pour juste et équitable pour li et aukaine de so bane bon actions pas pour perdi et pour l’homme ki fine commette bane péchés lors la terre, li aussi so bane actions pour juger dans ene façon équitable.
V.5 « Wa takounoul jibaalo kal ihnil manfoos»
Et montagnes pur vine couma la laine démêlée – Bane montagnes zot bien solide et l’impression ki pas capave bouge zot par quoique ce soit. Mais kan ça jour terrifiant là pour vini, avec ça la force extraordinaire de la puissance d’Allah, tous bane montagnes pour dégringoler et pour éparpiller couma bane ti morceaux de la laine défilée. Ça ene métaphore ki montré nous et faire nous comprend ki tous bane kitchoses ki nous considère comme solide et éna valeur dans ça lé monde là ; tous ça bane fondations là, zot pas pour représente nennié dans le monde spirituel. Tous bane fondations de ça la terre là pour nennié, comparé avec nouveau lé monde ki pé attane nous.
V. 6. « Fa amma man sakolat mawazinohou »
Celui ki so balance pèze lourd – La balance ki pé mentionné ici li au sens figuré. Tous bane bon actions pour pézé et évaluées. Ça évaluation là pour faire dans façon ki pli juste et pli meilleure ; parski li prend compte tous bane « niyaat », tous bane tentations, bane provocations, tous bane circonstances, tous bane actions ki fine déjà faire dans le passé, bane réparations et bane repentances qui fine faire après ene mauvais action et enfin tous bane circonstances de la vie de ça dimoune là. Tous bane mauvais actions pour évaluer dans même façon. Si le poids de bane « biens » (bon actions) ki li fine faire pèze plisse ki poids de so bane mauvais actions, alors Jugement pour en faveur de ça dimoune là et li pour alle dans ene la vie de bon plaisir et rempli de satisfaction. L’homme ordinaire pas pou capave imagine ene tel la vie tanque ki li pas vive li, li-même. Ça li au-dessus de la capacité de l’homme pour imagine ça lé monde de bien-être là.
V.7 « Fa howa fi ishatir razia »
Pour dans ene la vie agréable – Ça l’état de bien-être li pas pour pareil pour tous dimounes mais pour chaque dimoune ki fine faire le bien et ki Jugement dans so faveur, li pour gagne ene bonheur sans égal ki pour convenir à nature particulier de chaque dimoune.
V.8, 9, 10&11 « Wa amma man khaffat mawazinohou Fa oummohu hawia Wa maa adraka maa héya Naaroun haméya »
Mais celui ki so balance léger, so destination pour dans ene fossé profond, Qui pour montré toi séki li été ça ? C’est ene difé ardent.
Pareil couma éna bane différents stage de bonheur pour bane bon dimounes, nous comprend aussi ki pour éna plusieurs stage de punitions ki pour convenir à chaque péché ki ene pécheur fine commette. Même dans la vie de tous les jours nous trouvé ki bane bon actions zot apporte ene satisfaction. Souvent de temps, nous conscience reproche nous quand nous faire ene mauvais action. Eski ça satisfaction là lipas ene bonheur et ça reproche là, ene punition ki nous attire lors nous par nous bane actions ?
Ki Allah aide chakaine parmi nous et écoute nous bane doah et donne nous l’occasion pour réfléchi lors chaque verset lors le Surah Al Qariah Ch.101.
« Rabbana atina fiddunya hasanatanw wa fil Aakhiraté hasanatanw wa qina azhabanaar. Wa adkhilnal jannataa ma’all abrar ya Azizu, ya Ghafaaru, ya Rabboul Aalameen »
« O Allah ! Accorde-nous bane bienfaits dans ça lé monde et bane bienfaits dans la vie future ; Préserve-nous du châtiment du feu ; faire nous accéder dans Paradis parmi bane vertueux, O Allah, Tout Puissant, indulgent, Maître des mondes. » Ameen. |