Text Box: Bismillah – ir – Rahman – ir - Rahim. Khutba Jummah Hazrat Amir’ul Momeneen Muhyi-ud-Din Munir Ahmad Azim Bait-ul-Zikr dans le Nord de Maurice 15 Février 2008 Aujourd’hui comme Khutba Jummah, après le Salaam, Tashahhud, Taouz et Surah Al-Fatiha, le Muhyi-ud-Din fine lire Surah Hamim Ch 41 Ruku 4 V. 26-27-28 26) Banne sans la foi dire: « pas écoute ça Coran là et cause bon à vini pendant So récitation, afin qui ou sortie victorieux. » Allah dire ki, banne qui péna la foi, et banne dimoune qui créer désordre, alors ça banne là zotte pas pou laisse banne croyants tranquille. Zotte pou cause bon à vini quand pé lire le Quran Shariff, pou zotte l’attention pas attiré lors sa banne paroles du Quran Shariff là. Banne qui ena la foi zotte assizé avec beaucoup de respect, zotte écoute la parole d’Allah avec beaucoup d’attention, et c’est ça même ki pou amène zotte sur le droit chemin, et zotte pou gagne bénédiction et la grâce d’Allah et quand ça banne bon parole rentre dans zotte z’oreilles, ça descende ziska zotte lécoeur, purifié zotte lécoeur, et accorde zotte aussi ene tranquilité du coeur. Et faudé pas, nous banne croyants, nous vine pareil couma ça banne qualité dimounes ki pas éna la foi là, parcequi sa banne la, pé rode envie dévié ou depuis droit chemin. C’est ça ki Allah dire dans le Quran, ki kan éna la récitation du Quran, faudé pas ou causé, marcher, faire tapage, sinon ou aussi ou pou vine couma sa banne sans la foi là. Et Allah dire ki banne ki pas éna Iman (la foi), zamais zotte pas pou gagne la foi, à moins si Allah même donne zotte Iman. Et sa banne qualité dimoune là zotte pas pou être attiré par sa banne bon parole là et toujours zotte pou cause, causer mondaine. Banne sans la foi la, zotte là pou dévié dimoune sur le droit chemin et lors là zotte senti zotte victorieux. 27) Nous pou certainement faire banne sans la foi goûte éne punition sévère, et Nous pou rétribuer zotte pou plus mauvais actions qui zotte ti faire. Allah dire le mot “NOUS” parcequi Li applique pour Li même et pou So banne Anges. Alors ici Allah pé continuer cause pou banne dimoune ki pas éna la foi, Allah dire ki zotte pou gagne éne punition bien sévère, et kan zotte pou alle devant Allah, Allah pou montrer zotte, zotte banne plis mauvais actions ki zotte fine commette. Et ki ça plis mauvais péché là ça? C’est ki zotte pas ti pé écoute le parole d’Allah et zotte pas ti prend ça en considération. Et li bien important nous aussi banne croyants, faudé pas nous rentre dans ça qualité catégorie la, nous aussi. Nous bizin faire doah avec Allah ki nous tous lé temps reste marche sur le droit chemin et ki nous Iman (la foi) reste solide. (Insha-Allah) 28) Ça c’est récompense banne l’ennemi d’Allah, du feu zotte pou gagne là dans zotte lacaze pou toujours, c’est zotte récompense, parcequi zotte finne réfuse accepter Nous signes. Quand lire banne verset du Quran, c’est banne Signes de banne évènements, qui ti pé passer à l’époque et banne l’instruction qui Allah pé donne le Saint Prophète (saw). Pou qui amène nous suive le droit chemin et pou nous obéir Allah. Si arrivé ou pas obéir le commandement d’Allah, alors ou pou vine définitivement éne de banne l’ennemi d’Allah. Nous bizin faire doah avec Allah ki nous pas vine éne de banne l’ennemi d’Allah. Nous bizin faire zéfforts pou qui Allah content avec nous et pou qui nous réussi créer éne l’amour profond entre nous et Allah, nous créer éne l’amour plis profond ki banne dimoune qui pé célébrer le Saint Valentin, et ça zotte célébrer ça zis pou éne jour, mais par la grâce d’Allah nous banne musulmans nous célébrer nous l’amour pour Allah cinq fois par jour. C’est-à-dire, nous purifié nous même cinq fois par jour (c.à.d, faire cinq Namaz par jours). En d’autre mots, nous montrer nous l’amour pou Allah cinq fois par jours. Ça ki appelle ene bon musulman li lire so Namaz, li lire so Quran, li reste toujours écoute le parole d’Allah avec humilité, et li reste toujours faire Zikr. So l’amour pou Allah bien grand et li dire ki so Créateur qui fine créer tous kitchose lors ça la terre la, c’est pas ‘moi’ (so égo pas manifesté). Quand ene teste vine lors li, li dire ‘mo pas pou quitte Mo Créateur’, et si même teste la doublé alors ou reste toujours fidèle, ler la ou pou trouve ça l’amour la descend dépi lors léciel avec parfum et de l’eau qui pou purifié ou, quand Allah éna éne l’amour pou ou li pou éne l’amour extraordinaire, ou bizin éna éne l’amour aussi pou Allah So parole et pou So Prophète (saw). Ki Allah (swt) purifié, nous lécoeur. Qui Allah envoye so la rosé lors nous pareil couma lor éne Rose le matin. Qui Allah guide nous et mette nous sur le chemin droit et augmente nous l’amour pour li plis ki banne les autres z’affaires. Ameen. Soubhan’Allah Alhamdollillah