Bismillah-ir-Rahman-ir-Rahim

 

Khutba Jummah Vendredi 17 Février 2006

 

Hazrat Amir’ul Momeneen Muhyi-ud-Din Munir Ahmad Azim

 

Le Martyre de Imam Hussein (r.a)

 

2ème Partie

 

Après ki Hazrat Amirul Momeneen Muhyiuddin, Munir Ahmad Azim finne lire le Tashahhud , le taaouz li finne lire sourate Al Fatiha du Saint Coran et li fine lire:

 

“Wa laa taquuluu li-many yuztalu fii sabiil-laahi an-waat. Bal ah-yaaa-unw-wa laakil laa tashuruun”

 

(Pas dire de bane ki fine tués pour la cause d’Allah couma morts. Au contraire zot vivants, mais ou pas réaliser) Ch.2,V.155

 

Mo pé continuer mo khutba Jummah la semaine passé kot Imam Hussein fine envoye so cousin Imam Muslim bin Aquil et so deux enfants là-bas (c-à-d, à Kufa) pour gagne renseignements concernant situation ki pé prévaloir dans Kufa. Hazrat Imam Muslim et so deux garçons, Ibrahim et Mohammad fine arrive à Kufa dans le mois Zil Qada. Kan bane habitants Kufa fine apprend ki le cousin Imam Hussein pé vine Kufa et zot fine faire bane préparations pour accueillir ça grand personnalité dans zot l’endroit et ti éna environs 12,000 dimounes ti vini pour accueillir Imam Muslim et dans quelques jours, plus ki 40,000 dimounes fine prête serment lors la main Hazrat Imam Muslim.

 

Yazid, li dans la Syrie et li fine gagne nouvelle de saki pé traverser à Kufa. Toute suite li envoye ene lettre gouverneur de l’Iran Ubaidullah bin Ziyad. Li informe Ubaidullah ki aussitôt to recevoir mo message alle vite à Kufapour conner vraiment ki pé traverser là-bas. Ubaidullah bin Ziyaad, ti intelligent, li fine habille pareil couma bane habitants de Madina pour ki bane Kufis pas reconnaître li et ensuite li vine vers Kufa et li fine arrive à Kufa entre Maghrib et Esha. Bane Kufis fine croire ki c’était Imam Hussein (r.a) ki pé vini et ene grand nombre fine vini pour accueille li et zot tout fine commence crier « Marhaba ya Imam Hussein » et kan Ubaidullah bin Ziyaad fine arrive à Kufa, li fine couvert so figure et bane habitants de Kufa fine accueillir li avec beaucoup l’amour, croyant ki c’est Ima  Hussein (r.a) et li (Ubaidullah) fine bien observe tout séki qui fine manifester zot contentement, kan li fine rentre dans Kufa et à ce moment là li retire ça l’habillement là lors li et l’heure là zot tous fine reconnaître ki c’est Ubaidullah bin Ziyaad, c’est pas Imam Hussein ça et zot tous au courant ki Ubaidullah, li ene homme fort de Yazid et zot tous fine commence paniqué et Ubaidullah bin Ziyaad fine donne l’ordre pour arrête Hazrat Imam Muslim.

 

De l’autre côté, Imam Muslim ti fini écrire ene lettre à Imam Hussein (r.a) pour informe li ki situation dans Kufa bien correcte et ki Imam Hussein (r.a) bizin vine plus vite ki li capave aussitôt ki li recevoir ça lettre là. Ici Ubaidullah bin Ziyaad donne l’ordre pour attrape tous seki ti pé manifester zot contentement et empoisonne zot. Li fine réuni tous bane chefs tribus et li fine donne zot ene avertissement bien sévère, si zot continuer marche derrière Imam Muslim li pour assassine zot et zot famille et li fine donne l’ordre à bane ki fine mettre zot dans prison, si zot pas quitte Imam Muslim li pou touille zot. Tous bane habitants fine commence paniquer et situation commence changer et vine danger pour Imam Muslim. Ene par ene, fine commence quitte Imam Muslim jusqu’à finalement li retrouve li seule avec so deux garçons. Dans la nuit, Imam Muslim pas ti éna aucaine place pour li alle rester et personne pas fine manger, li commence tracasser et li écrire ene lettre Hazrat Imam Hussein (r.a) pour dire ki Kufa situation fine changer.

 

Imam Muslim fine quitte so deux garçons kot ene dimoune et li dire ça dimoune là demain gramatin premier caravane aller envoye mo deux garçons là-dans et li fine marcher dans la nuit jusqu’à ki li arrive kot ene la caze, li trouve so la porte ouvert et li tape la porte et li demande un peu boire. Ene vieille dame sorti et fine donne Imam Muslim de l’eau et li fine explique la vieille dame so situation et toute suite li faire Imam Muslim rentrer et reposer. Ça madame là so garçon ti ene soldat de Ubaidullah bin Ziyaad et kan li fine conner ki Imam Muslim pé reposer dans so la caze, li fine informe Ubaidullah et li fine envoye so l’armée pour arrête Imam Muslim mais ça moment là Imam Muslimfine défendre li kot li fine la guerre avec ça l’armée kot finalement zot fine réussi attrape li, amène li dans château Ubaidullah et fine éna ene grand débat entre ça deux personnes là. Ubaidullah fine commence insulter Imam Muslim et Hazrat Ali (r.a) et li dire ki Imam Muslim fine vine faire désordre dans Kufa et Imam Muslim dire li c’est bane habitant Kufa ki fine invite moi et mo l’intention c’est pas pour faire désordre, mais pour invite bane habitants vers le droit chemin. Discussion fine continuer, kot finalement Ubaidullah péna aucaine point de défense et Ubaidullah bin Ziyaad fine ordonne pour assassine Hazrat Imam Muslim et li fine shaheed le 3^ème Zil Hajj en l’an 60^ème Hijri (Inna lillaahi wa inna ilayhi raaji-oune).

 

Le jour ki li shaheed même, ça même jour Imam Hussein (r.a) recevoir lettre Imam Muslim kot pé dire li vine vite à Kufa et kan zot deux z’enfants Mohammad et Ibrahim fine apprane nouvel ki zot papa fine shaheed, zot fine bien chagrin et zot dans ene l’endroit étranger kot péna personne pour console zot. Ça deux z’enfant pas fine réussi rentre dans caravane ki zot papa ti dire ça dimoune là mettre zot et zot fine reste à Kufa même et rode ene l’endroit pour cachiette. L’armée Ubaidullah fine réussi attrape zot et fine mettre zot dans prison.

 

Ça gardien prison là ti appelle Mashkoor, li fine éna beaucoup pitié pour ça deux enfants là et li dire zot, dans la nuit li pou faire zot sauver dépi dans prison et lendemain matin kot zot capave faire zot nécessaire pour alle Madina. Alors gardien prison (Mashkoor) fine donne zot ene bague et li fine dire zot alle joindre mo frère, kan li pour trouve mo bague, li pou faire le necessaire pour zot. Dans la nuit ça deux z’enfants quitte prison et rode la caze frère gardien prison, puisque ti dans la nuit et aussi zot pas conne l’endroit là, ça deux là fine perdu complètement et zot pas fine réussi trouve Mashkoor  so frère et fine arrive gramatin et zot marcher, arrive kot ene la rivière et zot fine cachiétte derrièren ene z’arbre et ça même moment là ene madame fine vine cherche de l’eau dans la rivière et pendant ki li pé retire de l’eau, li fine remarque l’ombrage ça deux z’enfants là dans de l’eau. Et finalement madame là fine approche avec zot et zot fine raconte madame là tous séki fine passer, madame fine dire zot, « Pas tracasser mo pour amène zot kot mo patron, li ene bon dimoune, li pou essaye aide zot ».

 

Ça patron c’était ene madame ki ti éna beaucoup l’amour et pitié pour zot et li fine prépare manger et garde zot dans so la caze. Dans la nuit, madame là so missié fine rentre tard dans la nuit et madame là fine pose li question ki faire li en retard, missié dire ki dépi gramatin zot pé rode deux z’enfants Imam Muslim, parsqui Ubaidullah fine dire celui  ki réussi gagne ça deux z’enfants là, zot pour gagne beaucoup récompense. Madame là kan fine écoute ça fine gagne peur.

 

Ça deux z’enfants là ti pé rêver et chacaine ti pé raconte so rêve à so prochain. Ene la dans fine trouve le Saint Prophète  (s.a.w) et Imam Muslim pé marcher dans Jannat et le Saint Prophète  (s.a.w) fine dire Imam Muslim : « O Muslim couma to fine capave quitte ça deux z’enfants là dans la main bane cruels » et Imam Muslim fine répondre : « Ya Rassullullah  (s.a.w) très bientôt zot pou vine joindre moi », et chacaine ti pé raconte zot rêve en pleurant ki zot la voix fine sorti et missié fine tendre zot la voix. Ça missié fine traîne zot en chemin jusqu’à la rivière Furat. Missié là fine préfère touille ça deux z’enfants là parce qui li conner ki Ubaidullah pour donne li beaucoup cadeaux. Finalement, sans aucaine pitié et sans hésitation, li fine saute licou ça deux z’enfants là. Muhammad et Ibrahim fine Shaheed. Missié là prend ça deux la tête là et li amène ça devant Ubaidullah avec beaucoup la joie, li présente ça deux la tête là devant Ubaidullah bin Ziyaad. Ça moment là, Ubaidullah fine choquer et li dire missié là : «  Pour ki raison et ki sanlà fine donne toi l’ordre pour assassine ça deux z’enfants là ? ». Li dire ki li fék envoye ene lettre à Yazid pour informe li ki ça deux enfants là zot dans prison vivant et n’importe kan ou envie trouve zot, mo capave montrer ou. Ubaidullah bin Ziyaad fine très en colère et li fine ordonne pour touille ça missié là parcequi li fine faire ene kitchose qui pas supposer faire.

 

 (A Suivre …)