Khutba Jummah vendredi 18 Février 2005

 

Hazrat Muhyi-ud-Din Munir Ahmad Azim

 

Surah Al-Hujurat
(La Chambre)

Deuxième Partie

 

Après ki Hazrat Amirul Momeneen Muhyiuddin, Munir Ahmad Azim finne lire le Tashahhud , le taaouz li finne lire sourate Al Fatiha du Saint Coran suivi du verset suivant et li finne donne so traduction comme suit :

 

“Innamal-Mu-minuuna Ikhwatun-Fa-aslihuu bayna akhawaykum wattaqullaha làallakum turhamun”

Traduction:

“Banne croyants zotte vraiment banne frères. Alors faire la paix entre où deux frères, ek crainde Allah, pour ki où gagne So Miséricorde”

(surah Al Hujurat, chapitre 49, verset 11)

 

A la lumière de ça verset ki mo fine lire devant où là, mo pour revinne lors banne versets 11,12,13 ek avec banne commentaires, parseki Allah pé faire nous comprend encore banne kitchose dans so profondeur. Alhamdolillah ek li bien important ki tous banne membre pas dormi ek écoute avec beaucoup l’attention. Surah “Al Hujurat” li ene de banne pli important chapitre du Quran, kotte li clairement décrire couma bâtir ene société vraiment islamique ki éna comme baze l’amour d’Allah (swt) et So Prophète (saw) et kotte ça l’amour là, attaché banne musulmans pour reste fidèle à banne principes de fraternité, d’égalité, co-orpération ek l’amour pour so prochain dans zotte la vie de tous les jours. Seki vraiment important, c’est le fait ki tous banne croyants, zotte banne frères ek zotte tous égale devant Allah (swt).

 

Pour ki ene croyant gagne ene considération spéciale dans lizié d’Allah, li bizin faire prévue d’ene “Taqwa” (Crainte d’Allah) ek d’ene piété bien élevée. Tous les trois versets (11,12,13) du Surah Al-Hujurat contenir banne principes, banne règles, bien important, quand où appliqué zotte, zotte amène la naissance d’ene société islamique unique ek ki li épanouit (rempli de bonheur). Ça type de société là représente ene “Paradis” lors la terre. Ça banne versets là explique aussi banne droits fondamentales de ki l’Islam enseigne à banne musulmans, ek zotte explique clairement couma banne musulmans bizin comporte zotte ene envers l’autre. Zotte donne ene l’attention particulier à banne kitchose ki gâte banne liens de Fraternité, et zotte bizin stresse lors l’importance pour évite ça banne kitchose négatifs là, dans le but pour purifié l’homme ek la société. Ça banne versets là donne nous ene aperçu complet de la loi Islamique concernant la diffamation ek fine mette beaucoup l’emphase lors l’honneur ek dignité ene musulman ek aussi couma so disang ek so dibiens li sacrés.

 

Alors versets 11, pose fondement baze ene société Islamique ek Li affirmé ki dans ene tel société, l’amour, la paix ek coopération, zotte banne principes fondamentales ki guide comportements de so banne membres ek ki faudé pas éna banne déviations de ça but là couma la haine, méfiance ek banne conflits ek si ça arriver, alors, li devoir de chaque musulmans pour résoudre problème là. Ene société ki l’Islam rode créer, Li unique dans plusieurs façon. Li complètement différent de banne systèmes social ki déjà existé, ki li communisme ou capitalisme, ou bien démocratique ou dictateur. L’idée fondamental ki l’Islam oulé mette en pratique c’est l’égalité de tous banne dimoune devant lizié d’Allah (swt) ek l’établissement de tous banne relations social lors base de la foi, ki en d’autres mot pé faire références à tous banne ki croire dans ene même cause ek ki pé la guerre pour même objectifs, zotte lies ensemble ek zotte forme ene seul communauté, couma ene seul famille.

 

Par zotte la foi en Allah ek So Prophète (saw), banne musulmans forme ene seul Ummah (communauté) ek zotte vine banne frères ki plis soudé, ki banne les autres liens disang éna. Si ene relation ki fondé lors banne liens disang vine ene obstacle à banne pratiques de l’Islam, alors la foi (Imaan) bizin éna préférence lors ça relation de lien de sang là. C’est ça ki Quran ek le Sunnah du Saint Prophète (saw) répète souvent ek ça ti ene point important pour le prophète (saw) ek so banne compagnons pour établir ça dans l’Arabie. L’histoire de l’Islam donne beaucoup l’exemple kotte la foi fine prend le dessus lors banne relations disang. Ene grand l’exemple c’est l’exemple de Hazrat Ibrahim (as) ki malgré so l’amour ki li ti éna pour so papa ki pas ti musulman, Li pas fine disposer pour implore pardon Allah pour so papa; ki li fine surnommée “l’ennemi de l’Islam”, lire surah Al-Tawba versets 115 où pour trouver ki “Ibrahim ti demande pardon pour so papa, seulement à cause ene promesse ki li fine faire à so papa. Mais quand li ti assure ki so papa ti ene ennemi d’Allah, li ti abandonne li. Ibrahim ti éna ene le coeur bon ek tender.”

 

Ça li démontrer couma banne liens de sang zotte vine secondaire face à la foi ek tous seki forme partie de la foi. Ene l’autre l’exemple c’est quand Mohammad ibn Abu-Bakr (garçon de Hazrat Abu Bakr) ti près pour alle touye so papa avec so l’épée dans la guerre Badr, mais so sentiment pour so papa ti fort, so lien de parenté ti plis fort, li pas fine touye so papa ek li fine sauve la vie de hazrat Abu-Bakr (ra). Mais Hazrat Abu Bakr fine dire so garçon (ki ti ene l’énnemi de l’Islam à ça l’époque là) ki si, situation ti renversé, mo pas ti pour hésiter ene seul seconde pour touye toi, ça montré nous ki en Islam la foi en Allah li plis fort ki tous banne lézotte kitchoses ki capave éna, c’est ça, la mentalité ki l’Islam envie faire tous so banne membres comprends ek pratiqué ek demande zotte ignore banne difficultés ek banne tentations ki capave vine lors zotte chemin.

 

Quran pas nié l’éventualité de banne conflits ek même de séparation de banne Musulmans, parcequi dans zotte nature banne dimounes zotte faibles ek ki zotte capave laisse zotte tenté par satan, si zotte pas reste lors zotte garde. Par conte Quran ordonne banne musulmans pour réconcilier entre zotte même, aussi vite ki possible , non pas lors ene base d’injustice ou humiliation (humilié so camarade), mais tous ça là bizin base lors l’équité ek Taqwa (la crainte d’Allah). Le Taqwa fine mentionné beaucoup fois dans Surah Al-Hujurat ek ça ene signe très révélateur. Taqwa li pas ene éléments ki apparaître de façon visible lors ene dimoune ek pas capave mesure li lors banne critères matériels, mais au contraire li ène grâce ki trouve so racine dans le coeur, ki seulement Allah (swt) capave connait ek évalué. Dimoune gagne le vrai Taqwa quand zotte suivre avec volonté ek conscience, tous banne enseignements d’Allah (swt) ek zotte convaincu ki tous les temps zotte en so présence ek ki I trouve tous actions ki zotte pé faire. Si zotte réussi réalise ça c’est seulement alors ki zotte pour mérite la Miséricorde d’Allah (swt), ki essential afin pour gagne la vie bien paisible ek calme, ki li dans ça le monde là ek aussi dans Akhérat. Le Saint Prophète Muhammad (saw) ti bien insister pour ki tous banne musulmans resserre banne liens de fraternité parseki ça li jouer ene garnd rôle dans l’Islam. Éna quelques hadiths ki illustré ça:

 

1. “Banne croyants zotte couma banne briques dans ene bâtiment kotte chakaine support ek renforce zotte camarade.” (Bukhari)

 

2. “Banne croyants zotte couma ene seul le corps par zotte lien d’amour, bonté ek l’affection ki zotte éna l’un pour l’autre. Si ene membre souffert c’est le corps là entier ki souffert ek ni l’un ni l’autre pas dormi ek zotte gagne la fièvre ensemble.” (Bukhari & Muslim)

 

3. Jabir (ra) fine rapporté ki le Saint Prophète (saw) ti demande pour faire serment pour 3 kitchoses: “ki li reste fidèle avec le Namaz, ki li pour paye zakaat ek ki li pour souhaite du bien pour chaque musulman.” (Bukhari)

 

4. Quand où trompe ene musulman c’est ene mauvais action (fisq) ek combattre ene musulman li ene acte d’incroyance (kufr). (Bukhari)

 

5. “La vie, banne dibiens ek l’honneur d’ene musulman zotte sacrés pour banne lé zotte musulmans.” (Muslim)

 

6. Ene vrai musulman c’est celui ki pas faire banne lé zotte musulman ditort, ni par so la langue ni par so la mains. (Bukhari & Muslim)

 

Ça c’est banne quelques hadiths parmi banne les autres hadiths ki mette l’accent lors la fraternité islamique à tel point ki ene musulman ki trompe so frère li vine ene (fisq) ek ki même so banne bon actions pas pour suffit pour sauve li dans Akhérat. Banne bons qualités islamiques ki fine mentionnée dans banne hadiths, ki cause lors la fraternité, zotte pas banne simple souhaits ki pieux ni banne simples propositions théoriques. Mais bien au contraire, zotte fine présent dans la vie de banne Sahabas (ra) ek banne musulmans vertueux, ek zotte fine atteindre so plis haute degré. Ene société kotte sa banne bon qualité là pas présent, pas capave considère li couma ene société islamique.

 

Dans verset 12, toujours dans Surah Al-Hujurat, Chapitre 49, kotte Allah pé dire: “ô banne croyants, pas laisse ene groupe moque d’ene l’autre. C’est possible ki ene la meilleur ki premier groupe là; ek pas laisse banne femmes moques d’autre femmes. C’est possible ki seconde là meilleur ki premier groupe là, pas diffamé entre où, ek pas lance ene à l’autre banne sobriquets. Couma mauvais ene nom vicieux à quikaine ki déjà éna la foi! Banne ki pas répentir, zotte de vrai malfaiteurs.”

Ça verset là pé faire comprend tous banne aspects négatifs dans banne comportements ki dimoune bizin coûte que coûte évité, même dans la vie social eek personnel. Trois éléments ki faire le mal ki mentionné dans sa verset là, même ki zotte capave paraître simples ek sans aukaine l’importance zotte capave détruire la racine même de la fraternité ek créer la division parmi banne frères ek ça capave amène la destruction de ça société là. Quand nous examine ça banne éléments là ene par ene, nous pour trouver couma zotte détruire l’essence de la fraternité ek couma zotte prépare terrain pour “fitna” (faire désordre) dans la vie sociale.

 

(a)  Sukhriyya:

Le premier de ça banne éléments là, c’est “Sukhriyya”, ene terme ki couvert ene quantité signification ek ki capave prend différent formes dans différents situations. À l’origine li signifié “moque banne lé zotte”, “rire kikène”, dire li li couma ene bourrique, ridiculiser, assizer en groupe commence tire défaut avec lé zotte. Ridicilize banne lé zotte dans plusieurs façon, ek décrire li dans plusieurs formes. Par exemple, copier la voix ene kikène, rire so banne paroles, tire défaut lors so figure ek so linze, faire banne signes pour attire l’attention lors faiblesse ek handicap de banne lé zotte, tous ça banne attitudes là zotte formes parties dans “Sukhriyya”. Ene l’autre l’idée ki capave cachiette derrière ça expression là, c’est quand exprime ene supériorité personnelle tout en détruisant l’honneur de banne lé zotte dimounes. Ça banne zaffaires là, consideré en Islam couma dire où pé touye personalité d’ene dimoune, ek ça li comdané par l’Islam, pareil couma ene agression physique ek persécution, li comdané dans l”islam. “Sukhriyya” li offense celui ki trouve li même ridiculizé par banne lé zotte ek ça amène li pour réagir pareille couma banne lé zotte fine réagir avec lie k de ce fait ça créer ene cercle ki pas facile pour sorti, kotte éna banne agressions ek banne attaques ek kotte l’autre parti rode défende li par banne même moyens ek ça finalement créer banne lé zotte problèmes plis graves.

 

Dans versets ki mo fec lire devant où, où pour trouvé ki banne zhommes ek banne femmes fine mentionné séparément, seki confirme le fait ki l’Islam, li pas tolère banne réunions mixtes dans lesquelles banne messieurs ek banne madames gagne opportunité pour tire défauts zotte camarades, pour moque chakaine parmi zotte. Nous conner ki éna plusieurs verstes coraniques ki interdire banne l’assemblés ki mixtes ek banne lé zotte réunions mixtes, le verset présent indique très clairement, quand même indirectement, banne zhommes ek banne femmes bizin tenir zotte l’assemblée séparément à moins éna observation “Pardah” totales ek complet, ki li dans ene réunion, ou ene l’assemblée, n’importe côte ça, sinon bizin désapprouvée. Faudé pas nous donne ene fausse interprétation de ça versets là ki pretender ki si banne zhommes ek banne femmes, zotte pas autorisé pour ridiculize banne membres de zotte propre sexe, alors li capave ridiculize banne sexe opposé. Fine bien interdit dans ça versets Quran là, ki humain, li pas parfait ek personne pas conne l’attitudes les autres, li bien probable celui qui où pé ridiculizé, li meilleur en piété, ek li éna ene meilleur conscience d’Allah ek li acquitte li mieux de so banne devoirs envers Allah (swt), ki celui ki nec li là pour ridiculizer.

 

Seulement Allah (swt) conne l’âme de quelqu’un véritablement, personne pas capave juge banne action de banne les autres. Ene meilleur suggestion pour où, ki où gagne ene bon l’attitude, arrête faire banne remarques à banne les autres, offense banne les autres, ridiculize les autres, surtout quand où en groupe de famille ek ça éna parmi banne madames surtout. Prend précaution lors là, attention ça tombe lors où banne zenfants, plitôt engage où dans banne bon paroles.

 

Ameen