Bismillah-ir-Rahman-Rahim

 

Khutbah Jummah le Vendredi 23 Décembre 2005

 

Hazrat Amir’ul Momeneen Muhyi-ud-Din Munir Ahmad Azim

 

Lors Fête Noël et l’Année

 

Après ki Hazrat Amirul Momeneen Muhyiuddin, Munir Ahmad Azim finne lire le Tashahhud , le taaouz li finne lire surah Al Fatiha du Quran Shareef et li fine lire:

 

« Wa laa tamuddanna aynayka’ilaa maa mattanaa bihii azwaajam-minhum zahratal hayaattid-dunyaa, linaftina-hum fiih : wa rizqu Rabbika khayrunwwa abqaa » (Surah TaHa Ch.20V.132)

 

Pas tire lizié lors séki Nous fine accorde ene partie parmi zot, comme décor ça la vie lors la terre là, pour jouir, parcequi Nous tester zot avec ça. C’est provision qui to Maître donne toi qui meilleur et plus durer.

 

Comment zot tous conné ki voilà nous dans ene mois de Décembre, dernier mois de l’année. Zot tous conner kan arrive le mois de Décembre éna beaucoup zaffaire ki passé et bane dimounes faire beaucoup de shopping, tous les temps li ene mois kot dimoune pé faire shopping pour fin d’année et beaucoup ou trouve bane publicité ou trouver lors journal, lors télévision, même bane la fiche. Alors ça mois là kot bane travailleurs gagne zot la paye (zot salaire) et aussi zot cadeaux fin d’année (par eg. Zot 13^ème mois et même parfois 14^ème, 15^ème mois ou sois bonus) – dans n’importe ki façon zot gagne zot cadeaux de fin d’année – et là bane dimounes zot pas guette divant derrière, zot faire bane dépenses (zot dépenser), et lors là ça bane dépenses là c’est bane dépenses exagérer, surtout pour bane ki fine attache zot lécoeur avec ça lémonde là, couma Allah (swt) fine mentionné dans ça versets ki mone fék lire là, Li dire ça bane dimounes ki fine attache zot lécoeur avec ça lémonde là, pour zot la vie lors ça la terre là li ene décor et zot jouir. Allah dire parcequi nous tester zot avec ça bane décoration là et ça bane jouissances là, et li ene tél jouissances ki avec ça bane décorations ki zot trouver là, là-même là si ou sorti ou alle dans la ville ou pou trouve ça bane mouvements ki éna là kot vraiment li attire bocoup de bane dimounes, attire beaucoup jeunes lors bocoup bane zaffaires. Alors Qui bane ki jouir, ki amuser ? Couma nous dire dans nous langue créole, Zordi éna commême dimain na perna pas veut dire nenié. C’est bane ki perna le taqwa (la crainte d’Allah) dans zot lécoeur, bane dimounes ki na pas éna aukaine réconnaissances envers zot Créateur, bane dimounes ki pas tourne vers Allah. Ça mois là c’est ene mois kot zot plonger bocoup dans bane kitchoses ki Allah même pas content et zot pas reconnaître ça grâce (faveur) ki Allah fine faire lors zot, à la fin de l’année, zot dépense zot l’argent pas couma Allah (swt) fine dire dépensé et pas exagéré ni faire gaspillage. Alors, ça bane qualité dimoune là zot lécoeur aussi dans distraction.

 

Alors, si chakaine parmi nous comprend nous but lors ça la terre là et pour ki but Allah Ta’ala fine crée nous, c’est l’obéissance totale envers nous Créateur, envers nous Allah Ta’ala. Nous obéir Allah Ta’ala pour faire li plaisir ; c-à-d, tous ce qui li dire nous faire, nous faire  et ce qui Li empêche nous pour pas faire nous pas faire. Ki faire nous faire ça ? Seulement pour nous gagne le plaisir d’Allah, pas plaisir de personne, et quand nous gagne ene kitchose, nous bane Momin (croyants) nous remercié Li avec beaucoup d’humilité – kan Allah fine faire ene grâce lors nous, Li faire nous gagne kitchoses, premier zaffaire séki ene Momin bizin faire, li remercié so Rab (Allah) avec bocoup d’humilité – et nous faire doah ki Li mettre So barakat là dans et aussi nous profite pour gagne So récompense pliss et nous contente nous lors séki Li fine donne nous. ki veut dire nous profite pour gagne so recompense pliss ? c-à-d, dans saki Li fine donne nous là, nous reconnaître c’est ki Allah fine donne nous, là-dans nous tire ene part pour Allah. Li faire nous faire ça ? Pour nous gagne So contentement pliss et Li mette barakat là-dans. Ça l’argent ki Allah fine faire ene grâce lors nous, fine donne nous là et nous tire ene partie là-dans, nous donne dans So chemin (par exemple, premier zaffaire ki ene Muslémeen couma nous bizin faire, couma nu gagne nu la paye, nu 13^ème mois, nu paye nu chanda Décembre et 13^ème mois aussi et aussi ki ou faire ? Dans ça l’argent là, ou tire le Sadqua aussi ki capave distribué parmi bane pauvres, bane dimounes ki pendant ça mois là ki peut-être pé assizé péna manger dans zot marmite. Éna pé souffert, zot la santé pas bon, zot dans ene souffrance et ça bane l’argent là capave aide zot pou zot capave acheter bane medicaments et même aster bane manger pou zot nourri zot. C’est ça ki ou bizin faire ; ki Allah fine donne ou ene partie là-dans pour ou tire ene partie là-dans, ou donne dans le chemin d’Allah comme chanda, ou tire ça comme sadqua pour aide bane pauvres et aussi pas oublier ki l’année 2006 pour faire 2 ans ene fond (béni) ki appelle Mokaddam Fund (commié dimounes reflechi lors ça ?) Au moins ou contribué ça l’argent là dans ça fond béni là aussi, ki Allah capave mette barakat là-dans, Insha-Allah.

 

Ene croyant ki faire ça action là, 1^er li pas tire lizié lors ceki lézot pé faire, càd, kan li faire ça bane actions là, ene croyant, ene bon Muslémeen li pas tire tire so lizié lors ceki lézot pé faire couma ça verset Quran là fine dire – càd, ou pas guette séki lézotte pé faire, ou pas pou tire ou lizié lors là. Par exemple, si lézotte fine aster ene grand frizidaire ou soi ene grand télévision si pas ki grosseur (commié pouces). Ou dire, « non ça l’année là mo aussi mo bizin gagne même télévision, même grandeur, même frizidaire etc… ». NON, Faudé pas tire lizié. Ene momin li pas tire so lizié lors séki lézot pé faire. 99*6+.2^ème li pas pour jouir ça l’argent ki par la grâce d’Allah li fine gagner à la fin de l’année dans l’amusement. Li pas pou dépense li inutilement. 3^ème li pour dépense li couma Allah et So Rassool fine enseigne nous pour dépenser et li pas faire bane exagérations, dépenses initile et li pour économize so l’argent, kot bizin dépenser, li pour dépenser. 4^ème Allah dire : « Linaftina-hum fiih » - Nous tester zot avec ça, ce ki Allah fine donne ou, Allah guetter couma ou dépense li. Allah ine servi le mot ‘Nous’.

 

Ki faire Allah ine servi le mot ‘Nous’ ? Éna place Allah servi le mot « Moi » mais éna place Allah servi le mot « Nous », càd, Li et So bane anges et So Avertisseur, So profét ki fine vini pour donne nous ça avertissement là. A travers le message ki Allah donner, ça messager là li vini li donne ou ça message là, pou transmettre ça message là. Et ça message là c’est ene teste pou ou ça ! C’est ça Allah dire « Nous tester ou si pas ou éna Imaan, la foi solide envers Allah et ou reconnaître So grâce, ça bénédiction ki Allah fine faire lors ou là. 5^ème Allah dire : « Wa rizqu Rabbika khayrunwwa abqaa » - c’est provision qui to Maître donne toi ki meilleur et plus durer. Ça ki Allah pour donne toi comme récompense, en obéissant So bane commandements et façon ki ou pou dépense ou l’argent et ça récompense ki Allah pou donne ou et ou provision ki ou Maître pou donne ou là, c’est ça ki pou ene provision meilleur et ki pour durer.

 

Donc le but de nous l’existence même c’est vivre dans le plaisir d’Allah Ta’ala. Dans vivre seulement pour le plaisir d’Allah Ta’ala, éna ene quantité bienfaits et bane bons l’éffets. Mais faudré pas nous vive dans l’obéissance d’Allah Ta’ala avec l’intention pour bénéficié So bane bon l’éffets. Dans faire ça nous pour perdi nous vrai direction. Et ça pour dévié nous de nous destination réelle. Par exemple, ene dimoune li ena ene destination ki li pé oriente li vers ça. Pour alle ziska so destination, li bizin suive ene trajet ou ene chemin. Dans li pé alle vers so destination, li trouve bane joli joli vues. Si li reste guette ça bane jolie vues-là, peût-être ça capave dévié li de so destination. Sinon ça au mins pour rétarde li dans complète so trajet. Coumsa même nous vrai but et nous vrai destination c’est le plaisir d’Allah Ta’ala. *

 

Si tout saki nous faire, nous faire seulement pour le plaisir d’Allah. C’est ça nu trajet ; c’est ça nu chemin. C’est ça nu chemin ki nu pé prend, ki tout bane zaffaire ki nous faire , nu faire li seulement pour le plaisir d’Allah. Par exemple (Anou nous prend ene nous bane membre Jamaat même) ; si ene dimoune faire ene travail contre le plaisir d’Allah, pour li, li pé faire ene bienfait mais seulement contre le plaisir d’Allah. Si li faire ça, ki so résultat en retour ? Essaye reflechi – Alors séki pé rode faire comprends : 1^er zaffaire – comme ene vrai croyant (muslémeen), nu bizin faire tous bane kitchoses seulement pour faire Allah plaisir, càd, préférence pour Allah (Tabaarak wa Ta’ala) So bane travails, So bane l’instructions, So bane commandements vine premier avant tout. Si ou réussi comprend ki ça c’est le commandement, l’instruction, le travail d’Allah, pour gagne le plaisir d’Allah li vine premier avant tout bane lézotte kitchoses ; bé définitivement pour éna tout bane lézot kitchoses ki pour vini – Pour éna le Barakat ; pour éna la bénédiction d’Allah là-dans.

 

Le moyen ki pour servi pour atteindre ça, c’est so bane l’instructions, commandements divines. Dans suive ça bane l’instructions là, nous trouve so bane bons l’éffets. Faudré pas reste admire so bane bons l’éffets. Sinin ça pour faire nous attane bane bons l’éffets pour bane bons travails. A ce moment là, nous pour faire bon travail pour trouve so bon l’éffet. Nous pour blié ki nous but réel c’est le plaisir d’Allah Ta’ala. Par exemple, ene dimoune quand li pratique so Deen bien, li capave trouvé ki so travail pé marche bien. Li commence rêve bane joli joli rêves. Dimounes content li. Li trouve tout so bane transactions dans l’ordre. Mais faudré pas li galoupe derrière ça bane l’éffets-là. Si li faire ça, li pour alle perdi chemin. Parski couma dire li pé pratique Deen ziste pour ça bane bienfaits là. Or, li ti bizin pratique Deen pour faire Allah Ta’ala plaisir quand même li pas trouve aukaine l’éffet. C’est necque pratique Deen dans ça façon là ki éna succès. Ça explication là nous pour comprend ene principe : Quand nous faire ceki bizin, avec l’intention ki bizin, alors après ça nous pas bizin guette ki l’éffet li éna. Par contre quand nous gagne ene bon l’éffet pour ene travail ki fine mal faire, ça na pas justifié ça mauvais travail là ou bien ça bon travail ki fine mail faire-là.

 

Si ou dire ki ou ene Musulman, ou appartenir à l’Oumma de Hazrat Mohammad  (s.a.w) et ou déclaré ki ou croire dans ene seul Dieu ; alors comme ene Musulman ou pas gagne droit fête Noël ou donne cadeaux à ça l’occasion là. Quand nous dire pas gagne droit, ça signifié ki li haraam, et pas tire lizié lors ceki les autres pé faire, parski quand ou aussi ou pé fête Noël et ou pé mette sapin dans ou la caze, sans ou conne la raison derrière ça, aveuglement, ou pé imite bane non-musulmans. Eski bane Musulmans ine déjà réfléchi lors la ki ça z’est ene insulte pour l’Islam ? Laisse mo cite Surah Imran :

 

Bane anges ti dire “O Mariam, Allah fine choisir toi, fine purifier toi et fine choisir toi pour ene rang plus haut ki toutes bane femmes dans le monde ».

 

Et bane anges ti dire : « O Mariam, Allah envoye toi ene bon nouvelle. C’est ene l’ordre ki vine de Li ; so nom, c’est Messie Issa (Jésus Christ) Garçon Mariam. Allah pour donne li grand l’honneur lors la terre et la vie future et li pour parmi bane proche avec Allah et li pour cause avec dimoune dépi dans so berceau même. Hazrat Mariam fine dire : « o mo Maître, ki manière mo pou capave gagne ene zenfant, quand aucaine zomme pas fine touche moi ? L’ange fine reponne « c’est comme ça même Allah crée ce qui Li ouler, Li dire seulement « Yaquulu lahuu kun-fayakuun ! : exister et chose là paraître ».

 

Dans surah Mariam Ch.19 V.23 kot pé dire ki Hazrat Mariam fine enceinte (de Hazrat Issa (a.s). Ça douleur accouchement ti faire li alle vers tronc ene pied Tame (pas sapin), et li dire : « Mo souhaite la mort avant ça et qui dimoune oublier moi complètement. L’heure là-même, li tende ene la voix crier depuis en bas :  « pas chagrin, to Maître fine déjà place côte toi ene la source et aussi secouer tronc pied tame là vers toi. To va faire bane tame frais et mûr tomber pour toi. Allah fine dire li : « manger et boire et rafraîchi to lizié ».

 

Eski Allah pas fine faire nous comprend ça bien dans surah Al Imraan Ch. 3 V. 62 kot ti éna bane Chrétiens sorti Najran ti vine discute avec le prophète  (s.a.w) lors ça question là. L’heure là même Allah revele li ça verset là (Mubahila) kot Allah dire li : « Si kikaine dispute avec toi lors là (lors Issa), après qui to fine gagne connaissance de la vérité, dire li : « vini, à nous invite nous bane zenfants, ou bane zenfants, nous femmes, ou femmes, nous-mêmes et ou-mêmes, et puis à nous prier Allah et demande Li envoye  ‘La-natallahi alal kaazibiin’ So malédiction lors bane parmi nous ki menti. Couma dire zot ça pli divant Allah dire (V. 64) : Fa-in tawallaw fa-innallaaha Aliimun bil mufsiidiin – Mais si zot tourne zot lé dos (et refuse ça invitation (Mobahila) là… Allah conne bien ça bane ki faire désordre là.

 

Nous bien-aimé Prophète  (s.a.w) fine adopter ene l’attitude bien sévère à l’égard bane ki imite lézot. Selon ene hadith, Hazrat Mohammad  (s.a.w) fine dire : ene dimoune ki imite ene l’autre communauté, li vine pareil couma ça bane là. Li vine pareil couma ça communauté-là dans Akhérat. Ou capave reste en bon terme avec lézot sans imite zot. Li pas nécéssaire faire pareil pour montrer ki ou en bon terme. Au contraire c’est nous devoir pour faire lézot conne l’enseignements de l’Islam et ki aussi ene religion universel. Et ça li possible quand ou même ou conne respecter et mette en pratique ou propre l’enseignements. Si ou pas conne ou Deen même, alors lézot aussi pas pour respecter ou Deen et ni zot pour éna respect pour ou.

 

Mo donne ene l’exemple, si ou même sonne pétard, bé ki bon l’exemple ou pé donné et l’autre côté ou pé gaspille ou l’argent inutile. Sonne pétard li pas travail ene bon musulman. Parski ene musulman c’est ene personne ki amène so la vie d’après commandement Allah Ta’ala. Sonne pétard li ene façon pour casse Allah So commandements et quand li casse Allah So commandements li pas reste ene bon musulman. Sonne pétard li ene gaspillage. Allah Ta’ala appelle li, frère de shaitaan. Celui ki rallié li avec shaitaan, li éloigne li avec Allah Ta’ala. Perna kitchose pli mauvais ki ene dimoune li éloigné avec Allah. 

 

Par sonne pétard ene dimoune li fatigue so prochain et indispose bane ki déjà dans la peine. Ça empêche bane dimoune reposé. Ene dimoune ki fatigue so prochain li vine ene zaalim. Ene zaalim li expose li à la colère divine. Eski ena ene la vie pli misérable ki vivre dans la colère divine ? D’après ene hadice, Hazrat Mohammad  (s.a.w) fine dire ki ene veritable musulman c’est celui ki pas faire bane Musulmans du tort. Par sonne pétard ene dimoune li disqualifié d’être ene véritable musulman. Parski ça li dérange bane frères et sœurs couma li. Perna aukaine utilité dans sonne pétard aparte nuire la vie dimoune et brûle ou la monnaie ki ou capave fine gagne li avec tant de sacrifice. Ki conné avec ça l’argent ki ou pé teigne la flamme de ou désir injustifié, ou ti capave soulage kikène dans so souffrance. Sans doute ou frère et ou sœur ki dans la peine, li pli mérite ça l’argent ki ou pé brûlé là dans sonne pétard. Par ene ti sacrifice ki ou faire par résister contre ça mauvais désir là, ou pou ranne ou-même et ou la famille heureux ici dans ça le monde là et dans Aakhirat. Donc sonne pétard li travail shaitaan. Li pas travail ene musulman.

 

Lot kitchose ki à l’occasion fête la fin l’année ou capave gagne bane proposition couma « faire ene ti plaisir » - c-à-d, ou bane camarades et ou bane collègues invite ou pou prend ene ti verre ziste pour faire ene ti plaisir. Li très simple ki ou pas bizin à aukaine moment accepter ça invitation là. Par accepter ene invitation pareil, ou pou laisse ou emporter par shaitaan ki li ene l’ennemi déclaré pour ou. Ou pou débalance ou position ki ziska l’heure li ti encore stable. Ou pou alle faire ene premier pas vers ou propre destruction. Ene croyant faudé pas laisse li tenter par ça. Ou madame, zenfant et ou proche, zot tous pour souffert ensemble avec ou. Eski ça aussi appelle plaisir même ça ? Ki faire ça quantité dégâts là ? Nous bizin conne dire « NON » à bane plaisir ki faire nous désobéir Allah Ta’ala. Nous Allah, Li content nous pliss ki maman papa content zot zenfants. Alors dans bane l’occasion pareil pas laisse ou Imaan fêler, ou perdi la foi. Allah dire dans Quran : « Wa ja-alnaa Jahannamaa lil-kaafiriinaa hasiiraa ». Nous fine mette l’enfer comme ene prison pour bane qui pas éna la foi.

 

Qui Allah aide chakaine parmi nous, ki pas laisse nous tombe dans ça bane situations de fin d’année là et Allah guide nous toujours lors le droit chemin. Ameen.