Text Box: Bismillah-ir-Rahman-ir-Rahim PREMIER KHUTBA JUMMAH DE L’ANNÉE ISLAMIC 1430 A.H & DE L’ANNÉE 2009 HAZRAT AMIR’UL MOMENEEN MUHYI-UD-DIN AL KHALIFATULLAH MUNIR AHMAD AZIM 02 Janvier 2009 (Résumé du Khutba Jummah lor L’Année) Après ki le Khalifatullah fine saluer zot tous et fine souhaite zot tous ene « Naya Saal Mubarak », li fine commence lire le Tashahhud, Taouz et Surah Al Fatiha et ensuite li fine dire: Pou commencé, laisse nous enrichi nous connaissance à propos le mois de Muharram. Calendrier Islamique fine commencer à partir de l’année kot le Saint Prophète Muhammad (s.a.w) fine émigré de Makka pour vine Madina et li inclure douze mois, kot Muharram li le premier mois. Alors l’Année Islamique commencer kan nous trouve la nouvelle lune du mois de Muharram. Le premier mois, Muharram li ene mois de grande vertu et récompenses. Le mot ‘Muharram’ li-même veut dire ‘sacré’ et li forme partie de bane quatre mois ki Allah fine mentionné comme sacrés dans Quran. Allah (twa) dire: « Quatre (mois) là-dans (Zil-Qadah, Zil-Hijjah, Muharram et Rajab) zot sacré » (Ch.9 V.36) Parmi ça quatre mois sacré là, Muharram ena certain vertu spécifiques : Le Saint Prophète (s.a.w) fine dire : « Bane meilleurs jeûnes (Roza) en dehors du mois de Ramadhan c’est bane Roza dans le mois de Muharram » (Muslim) Dans ene l’autre Hadith, Hazrat Ibn Abbas (r.a) fine rapporté ki le Saint Prophète (s.a.w) fine dire : « Celui ki garde ene Roza dans le mois de Muharram pou recevoir la récompense de trente Roza pour sak Roza (dans ça mois sacré là). » (Tabraani) Malgré le fait ki bane Roza dans ça mois là zot pas obligatoire, bane ki garde Roza pendant ça bane jours là par so propre gré pour le plaisir d’Allah pour être récompensé par Allah. Ça Hadith ki mo fine fek cité là aussi pé faire comprend, ki parmi tous bane Roza Nafil, bane Roza Nafil dans mois de Muharram pour être plisse récompensé par Allah. Ça pas veut dire aussi, ki nous bizin reste Roza pendant ene mois Muharram full. Non ! Mais ena so récompense si ene croyant li reste Roza quelques jours de Muharram, en vue de so grand récompense. Mais de nos jours li malheureux ki bane Musulmans pas assez prend compte l’Année Islamique. Zot donne plisse l’importance l’Année Chrétienne. Dans ene certain respect, nous bizin suivre ça bane dates et mois là, à cause de pays dans ki nous été, kot nous bizin respecter la norme, mais faudé pas nous complètement oublier nous l’Année Islamique ki Allah fine donne nous, à partir Hijrat de Hazrat Muhammad (s.a.w) dépi Makka pour vine Madina et ki mentionner dans Allah même So Livre Sacré, le Quran Shareef ki Li ti révélé à So bien-aimé prophète Hazrat Muhammad (s.a.w), et si vraiment nous ena ene l’amour sincère pour Allah, pour So prophète, et pour So Kitaab (c’est-à-dire, le Quran Shareef), nous, bane Musulmans, nous, nous l’année, c’est le premier jour de Muharram, kot nous célébrer li dans bane Ibaadat, Zikré-Ilaahi, Telawat Quran, Sadqua, et Roza Nawafil. Guette ça différence ki ena entre nous l’année Islamique et ça l’année ki zot pé célébrer le 31 Décembre et so réveillon et le 1er Janvier avec bane pratiques condamnable par Allah et ki non-Islamique. Li malheureux pour trouve bane Musulmans en entier, et surtout bane grands défenseurs de Nizam-é-Jamaat couma zot pé célébrer l’année Chrétienne et pé donne ça plisse valeur ki l’année Islamique ki nous Rab même fine mentionné dans Quran Shareef. Li pas ene péché, ni ene innovation, si ou pé souhaite ou voisin, camarade et famille ene Salaam et Naya Saal Mubarak (bonne année) et bane bons paroles ki Allah garde zot bien ça l’année là, et retire zot la peine et faire zot faire progrès dans domaines zot travail, l’éducation et aussi sans oublier dans domaine spiritualité. Mais pas dépasse limite ki pas bizin, ki alle à l’encontre Allah (swt) So l’enseignement et bane paroles et pratiques de nous bien-aimé prophète (s.a.w). Le cœur faire mal, pou trouve bane musulmans et aussi bane Ahmadis (banes grand défenseur du Khalifat), le 31 Décembre pé faire bél bél révélions. Assizé, manger, boire ziska minuit, et dans la main bane zenfants ena pétard ki pé sonné. Ene groupe famille réserve l’hôtel pou faire révélions, ena groupe famille alle la plage avec plusieurs qualité manger lors la table, grillade poulet ou agneaux, et zot tous regroupé. Ena capave fine lever dépi gramatin pas fine faire so bane Namaz ditout, ni même fine lire ene Ruku, chapitre dans Quran Shariff. Pé plutôt occuper avec bane préparations manger, boire, désert, alle faire bane shopping, jolie linge, banes cadeaux, pétard, feux d’artifices, rockets, et banes la boisson pou faire réveillon. Est-ce qui ça ki Allah (swt) fine enseigne nous, c’est sa l’enseignement Islamique ? Quand nous conner ki dans Islam c’est ene gaspillage et ou bizin conne gravité d’ene telle pratique coumsa. Tous bane ki faire bane extravagance inutile et gaspillage, zot bane frère Shaytan (satan le maudit). Ici quand dimoune pé gagne révélation décoté d’Allah, zot ridiculise li, bouffonne li et dire li pé gagne révélation satanic. Nawzobillah min zalik. Qui sanla pli satan là, entre ene dimoune ki pé tourne vers Allah et Allah pé donne li révélation ou sois ene dimoune ki pé alle contre l’enseignement de l’Islam et So prophète ? Allah (swt) même donne ça bane qualité soi- disant défenseur là même zot réponse ; lire dans Quran Surah Al-Isra (Bani Israel) Verset 27-28 : Donne bane proches parents, bane pauvres et bane voyageurs zot droits, mais pas sème ou l’argent bon à vini ; Bane ki dépense bon à vini, zot bane frères satan, et satan li bien ingrat envers so Maître. Prend la nuit du 31 Décembre ziska minuit et après minuit le 1er Janvier combien des milliards d’argent pé gaspiller dans le monde en entier et par contre dans bane les zot pays pauvre ena bane zenfants, maman, papa péna manger et boire et ena aussi pé mort à cause marque de nourriture. Bane ki pé faire révélions pas conne sa douleur là zot, faudré zot passe dans sa situation là, lerlà zot pou conne zot propre souffrance et lerlà avec tous dimoune zot pou plainye zot propre souffrance. Pas bizin alle en dehors nous pays pou conne ki qualité gaspillage l’argent pé faire, pou fête l’année. Dans Maurice, banes travailleurs fine gagne zot salaire et 13ème mois et ena gagne dépi 14ème mois etc. Guette couma zot gaspille sa bane l’argent la avec réveillon dans l’hôtel, lors la plage, dans la case, kot tous famille réuni ensemble ziska fort tard dans la nuit ; manger, boire, et ena so ghibat (palabre) aussi là-dans, veille zaffaire zot camarade. Déjà zot pé faire ene péché ki Allah condamné et zot ajoute ene l’autre pli grand pécher kot faire palabre, critique les autres dimounes, et tous là pé donne bane zenfant l’argent en grande quantité pour acheter pétard, feux d’artifice, rockets, etc. Dans quelque seconde combien l’argent pé brûlé sans ki zot pé rende compte zot même. Sonne pétard et d’autres choses encore sévèrement condamnées du point de vue de la Shariah. D’après la Shariah comment nous pou caractérise sa condamnation sévère de sonne pétard là? A bane musulman (grand défenseurs de l’Islam), à bane Ahmadis ki zot bane grand défenseur du Khilafat. Alors, banes membres Ahmadiyya fine célébré centenaire Khilafat ça l’année 2008 là. Mo pé demande zot, est-ce qui zot fine sonne pétard, feux d’artifices, rockets etc., prend dépi le 27 Mai 2008 ziska le 31 Décembre 2008 ? Si ou pas fine sonne pétard, bé kot ou l’amour pou Khilafat ? Moi, mo trouver ki ou l’amour pou Noël et l’année plus fort et plus grand ki ou l’amour pou Khalifa. Zot pé bluffé alors ?!! Zot dire, ki zot, ki bane grands défenseur Khilafat, pendant cent (100) ans Khilafat fine durée dans Ahmadiyya ziska zordi et ou pé tourne ou plisse vers ou Khalifa et aussi ou sois disant représentant Khalifat dans Maurice (séki li pé dire ou). Alors ou pas sonne pétard, canon, feu d’artifices, amuser fort tard dans la nuit concernant centenaire Khilafat. Alors pou Noël et l’Année, ça ou pou dépense des milliers de l’argent lor ça bane zaffaires là. Bé ça montrer ki ou l’amour pour Noël et l’Année li pli fort ki Khilafat… Alors pour sa pas alle pli longue ki sa, mo retourne lors mo question ki mo fine mettre de l’avant, ki faire sonne pétards li condamnable dans l’Islam ? Tout d’abord, pétards, feux d’artifice, rockets etc., li ene gaspillage de nous l’argent Halal ki Allah (swt) fine donne nous, et quand nous lire le Quran Shariff, nous trouver couma Allah (swt) fine défendre tous kitchose ki pou amène nous vers nous propre destruction, physiquement, moralement et spirituellement. Comme l’exemple : tel couma jeu du hasard, la boisson alcoolisée, faire extravagance dans séki Allah (swt) fine donne ou et faire bane gaspillage couma dans plusieurs place dans Quran Shariff kot Allah (swt) fine montré nous l’extravagance et gaspillage zot gravité dans l’Islam et aussi Li fine définir sa bane qualité dimounes là comme frère de satan, le maudit. En plus de sa quand ou pé faire révélions et pé sonne pétards pou Noël et l’année, alors ou pé imite bane principe et pratique anti-Islamiques. Par contre Allah (swt) fine enseigne nous dans Quran Shariff pou contredire (condamne) fermement bane principes des banes idolâtres et banes infidèles. Faire révélions le 31 Décembre, sonne pétard, li pas travail ene bon Mouslemeen (musulman). Parceki ene bon Mouslemeen c’est ene dimoune ki amène so la vie d’après commandement Allah Ta’ala. Faire révélions, sonne pétard li ene façon pou casse bane l’ordre Allah Ta’ala, ki Li fine mettre dans Quran Shariff et en plis de ça bane ki pas bon Mouslemeen pé amène innovation dans l’Islam. Quand ene dimoune casse ene commandement (l’ordre) d’Allah Ta’ala li pas reste comme ene bon musulman. Celui ki faire révélions et sonne pétard, li pé rallié li même avec Shaytan ; celui ki rallié li avec Shaytan li éloigner li avec Allah Ta’ala. Péna kitchose pli mauvais ki ene dimoune, li éloigner avec Allah Ta’ala !!! Pense bien celui ki préfère jouissance lor ça la terre là, Allah fine dire dans Quran Shariff dire, Nous accorde ça en vitesse pour li, et après ça jouissance temporaire là, Nous fine mette l’enfer pou li, kot Allah (swt) pou griller li là-dans et li pou condamné éternellement. Si ene bon Mouslemeen ki attacher avec l’unicité d’Allah, li pou plito préfère la vie future et li pou faire bane zefforts pou toujours reste dans la bonne voie, et li pou garde so la foi dans Allah et So prophète bien solide, et so zeffort définitivement pour récompenser par Allah (swt). Alors celui ki laisse li bien guider dans le chemin d’Allah, so guidance pou profite li-même, mais celui ki laisse li attirer avec bane attractions de ça lémonde là, et li complet li complètement égarer dépi bane enseignements divines, alors li égarer contre so propre l’âme. Personne pas pou charrier fardeau ene l’autre, et Allah (twa) fine réserve ene grand punition pour ça bane kalité dimounes ki fine alle à l’encontre de So commandements. Ça bane kalité dimounes là, sans ki zot réaliser, par sonne pétard, ene dimoune li fatigue so prochain, et indispose celui ki déjà dans la peine. Ça empêche banes dimoune reposé (surtout bane dimoune malade, ki souffert de bane maladies, ena ki ena malade lécœur). Ene dimoune ki fatigue so prochain li vine ene Zaalim. Ene Zaalim li expose li à la colère divine. Eski ena ene la vie pli misérable ki vivre dans la colère divine ? D’après ene Hadith, Rassoulloullah (s.a.w) fine dire ki ene vrai musulman c’est celui ki pas faire bane les autres musulmans du tort et ni so prochain aussi du tort. Alors par sonne pétard, faire révélions, ene dimoune, li pé disqualifier li même comme ene véritable Mouslemeen (musulman). Parceki sa li dérange banes frères et sœurs couma li. Péna aucun utilité dans révélions et sonne pétard à part nuire la vie dimoune et brûle ou l’argent ki ou capave fine gagne li avec tant de sacrifice. Ki conné avec ça ene ti l’argent ki ou pé teigne la flamme de ou désir injustifié, kot ou ti capave soulage kikaine dans so souffrance, sans doute sa bane qualité dimoune ki dans souffrance, problème, dans la peine, li pli mérite sa l’argent ki ou pé brûlé là dans sonne pétard et révélions. Par ene ti sacrifice ki ou faire par résisté contre sa mauvais désir la, ou pou ranne ou même et ou la famille heureux, ici dans ça le monde la et dans Akherat. Insha-Allah. Révélions et sonne pétard, c’est jouissance éphémère (temporaire) et trompeuse et zot bane inspirations de satan ki embellir l’homme, pou faire l’homme dérouter dans la bonne voie. Satan faire l’homme faire tous ça la, soi disant pou gagne ene la joie dans le cœur, ene plaisir éphémère kot sa donne satan la victoire lors bane bon l’enseignement d’Allah. Sans ki ou pé réaliser ki so conséquence pou été, 1er (premier), c’est ene perte de temps et d’énergie, gaspillage de l’argent et sa même pou faire l’objet du questionnement le jour de la Résurrection. Finalement ou pas pé prend en considération banes danger potentiel ki pétard représenté pou nous banes zenfants et aussi pou nous banes aînés. Mo fine donne plutôt ene bref aperçus dans le Khutba Jummah pou faire tous bane frères et sœurs, zenfants musulmans et Ahmadis réfléchi lor bane inconvénients innombrables ki li lors niveau spirituel, économique, social ou individuel ; alors chacaine parmi nous réfléchi, amène nous à réfléchir et chacaine prend so propre responsabilité, pas dépasse banes limite ki Allah (swt) fine mettre lors nous et si quicaine dépasse sa banes limites la, so conséquence devant lizié d’Allah pou bien grave. Couma dans Quran Allah (swt) dire : « Pas galoupe derrière séki pas concerne toi parski to z’oreilles, to lizié, to lécoeur, tout ça pou bizin rendre compte. » (Ch.17 Bani Israel, V.37) D’après ça verset Quran là, Allah fine mette nous tous en garde ; si ou prend ça verset Quran là en considération, alors li pou profite ou-même spirituellement et de côté mondaine, mais si par ou l’arrogance, ou vantardise, et par ou l’ignorance ou rejette ça verset ki mo fine cité là, bé pense bien ki Allah pou mette lor zot lécoeur ene couverture de sorte ki zot na pas pou comprend nannié, et zot z’oreilles pou vine sourde. Et kan la punition d’Allah pou tombe lor ou en désobéissant So l’ordre et paroles, péna aucaine pouvoir lor ça la terre là pou enlève ça punition terrible là. Et pense bien, ki Allah fine dire : Satan li clairement ene l’ennemi pou dimounes, et li là pou li dévié ou, lor le chemin d’Allah, pour ki ou prend so chemin. Mais, couma Allah fine dire dans Quran Shariff, « Lor Mo bane bons serviteurs, toi (Satan) to pas pou gagne aucaine l’autorité. » Alors, pas reste sourde et aveugle kan ou fine tende ça verset Quran là. Celui ki reste sourde et aveugle malgré ki li fine tende ça verset Quran là, li pou reste toujours sourde et aveugle lor ça la terre là et dans l’autre la vie aussi, et li pou bien plus égarer encore de So chemin. En même temps, mo pé adresse zot tous ki l’année 2009, pour ene l’année extra difficile économiquement, problème alimentaire, chômage et finance. Conne dépense zot l’argent, kot bizin dépenser; pas faire extravagance et tous kitchose pour monté couma flèche. Bane Gouvernement Jouisseur, irresponsable pour craze le peuple, pour zot augmente zot richesse et pour zot génération et pour ou, zot dire ou serre ceinture et zot pour envoye ça blâme là lors crise financier au niveau mondiale, kan zot, zot fine fini rempli zot poche, ou confort pour zot et pour zot génération. Pour ena corruption à gogo dans tous secteurs et ministères. Seul kitchose ki pou rapproche ou avec Allah et ki Allah pou content avec ou, c’est ki ou soumettre ou complètement à banes commandement d’Allah et So banes enseignement prophétique ki capave garantie succès d’ene vrai Mouslemeen dans sa le monde là, et dans l’au-delà. Alors dépense ou l’argent kot bizin dépenser et dépense dans le chemin d’Allah et aussi dépense ou l’énergie kot bizin dépenser. Kot banes infidèles pé faire révélions, chieste avec zot verre la boisson alcoolisée et pé termine sa l’année là et pé accueil Nouvel An avec banes pétard de toute sorte variété (pé brûler), ça moment là, ou, comme ene bon et vrai musulman, ou prend tout ou la familles ou faire ou banes Namaz Nawafil, duah et Namaz Tahajjud – ou tombe devant la porte d’Allah avec ene le cœur lourd et lizié remplie de larmes, ou faire duah avec Allah, ki Allah garde ou et ou la famille tous le temps en bonne santé et donne zot tout ene longue la vie pou zot continuer servi Allah so Deen et retire tous banes malheurs, difficultés, problèmes, obstacles ki capave vine dans zot chemin dans ça l’année ki pé commencer là. Et rempli ou le cœur avec seulement le Tawheed et retire tous saki n’est pas Dieu dans ou le cœur et faire sa l’année là apporte ene la paix, bonheur, prospérité dans tous so aspect et surtout dans domaine spirituel Ameen. Ki Allah accepté nous banes duah. En terminant le Khutba, mo pé faire banes frères, sœurs et zenfants ki pas conne ditout séki fine passer le 01 Janvier 2001 kot ene sois disant Amir magouille avec so banes alentours, de zot banes complots ki zot ti faire depuis l’an 2000. Tous dimounes dans Ahmadiyya ti conner ki nous fine alle en dehors Nizamé Jamaat à cause pé dire Allah (swt) fine donne moi révélation et le feu 4ème Khalifa ti appelle ça « so-called révélation » et nous pé crée Fitna (désordre) dans Jamaat Ahmadiyya. Pense bien ki mo pé dire zot, pas à cause nous fine faire révélions ou sois nous fine sonne pétard ki nous fine alle en dehors Jamaat. A cause seulement pé dire pé gagne révélation dépi kot Allah, Le Créateur de l’Univers! Parcontre bane ki pé sonne pétard, faire Noël, mette pié sapin dans la caze, faire l’Année, amuser bien – ça bane dimounes là, zot encore bane Ahmadis ?!!! – Pour zot, d’après le 4ème Khalifa et le soi-disant Amir, zot capave faire tout ki alle à l’encontre de l’Islam et l’enseignement de Hazrat Massih Maoud (a.s), pourvi zot pas croire dans Révélation Divines de Munir Azim. Si zot croire dans Munir Azim so révélations ki li pé recevoir, toute suite mette li en dehors Jamaat, et dire li ki li bizin demande « papi » pardon ! Ki li bizin confessé devant « papi » !!! Ala kot le Jamaat Ahmadiyya fine arrivé ! A cause ça même Allah fine change trajectoire de So la lumière divine pour envoye ça, dans ene ti pays couma Maurice et formant partie du Continent Africain. Pas pou nannié Hazrat Bilal (r.a) so disang fine coulé lor disable chaud, et li pas fine rénié so la foi dans Allah et SO prophète (s.a.w), malgré bane persécutions sévères pour li rénié, mais so la foi fine vine pli solide encore, kot li pé persécuter sévèrement, li dire : « Ahad, Ahad, Ahad.. » O bane frères, sœurs et zenfants ki zot là aujourd’hui et ki pé suivre le Khutba en directe, et ça faire huit ans kot fine passe dans ene situation bien bien difficile kot zot pas conné, mo pé donne zot ene bref aperçu lor séki fine passer la fin Décembre 2000 et le 1er Janvier 2001, comité lor comité, meetings dans tous Masjeed kot zot fine humilier ene dimoune ki pé dire ki Allah pé donne li révélations. Insha-Allah, mo pou vine plisse en détail lor là pou explik zot parski zot pas conné couma ça fine passer et couma la haine et la jalousie fine pénétrer dans lécoeur de bane Munaafiq (hypocrites) kot zot fine humilier le Récipiendaire de la Révélation dans tous zot bane fonctions et programmes, parski ça ti farz (obligatoire) pour zot pour humilier moi. Pas tracasser le soi-disant Amir et so bane Alentours ; Allah (swt) pas pressé Li, et le 01 Janvier fine faire huit ans déjà, pas tracasser « Diamant pou coupe Diamant ». Pou zot Jalsa centenaire zot fine kimer et toi aussi to fine kimer couma sa bane politicien là, et ensemble avec to banes soi-disant grand savants ki fine vini de Londres. Zot kimer derrière lédos dimounes, pé mange la chair dimounes kan dimounes là encore vivant. Ki faire zot pas ti vine face à face comme ene vrai défenseur du Khalifa ; coumsa beaucoup dimounes ti ava conné kot la vérité été, et kot Léroi Mensonges été !!! Mo dire zot : Attend, moi aussi mo attend ensemble avec zot. Allah pou faire So travail Insha-Allah. Mo termine avec ça duah là :  Rabbana laa tajalnaa fitnatal-lil-qawmiz Zaalimiin; wa najjinaa bi Rahmatika minal qawmil Kaafirrin. O nous Maître, pas laisse nous gagne misère dans la main bane malfaiteurs et sape nous, par to grâce, avec bane ki refuse gagne la foi. Ameen