Text Box: Bismillah-ir-Rahman-ir-Rahim KHUTBA JUMMAH HAZRAT AMIR’UL MOMENEEN MUHYI-UD-DIN AL KHALIFATULLAH MUNIR AHMAD AZIM 04 Juillet 2008 (Résumé du Khutba Jummah) Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine lire ça bane versets suivants là :  Was Saabiriina fil-ba-saaa-i wazz-arraaa-i-wa hiinal-bas. Ulaa-ikallaziina sadaqou: Wa’ulaaa-ika humul-mutta’quun. (Ch.2 V.178) Supporter dans la peine, dans Malheur et dans des moments difficiles. Ça bane là, zot vivre dans la vérité et dans chemin Allah. Kan ene malheur arrive nous, c’est vrai li bien, bien dur pour ça dimoune ki passe dans ça malheurs là et so la famille entier et même le Jamaat en générale. Alors, dans ça moment difficile là Allah fine dire nous prend patience, supporter dans la peine. Dans deux places dans Quran, Allah (swt) fine faire nous comprend ki toute âme pour goûte la mort et couma Allah Li-même fine dire dans le Quran Shariff, Surah Al-Imran V.146 : « Personne pas capave mort sans permission Allah. » Longueur nous la vie fine déjà marqué et dans Surah Al-Imran V.186 kot Allah pé dire : « Kullu nafsin zaaa-iqatul Mawt. Wa innama tu-waffaw-na ujuurakum yawmal-Qiyamaah. » Tout dimoune pou goutte la mort et seulement le jour du Jugement ki ou pour gagne ou récompense en entier. Et dans Surah Al-Ankabout (V.58) Allah dire : « Kullu nafsin-zaa-iqatul Mawt : Summa ilaynaa turjauun » Tout nâme pour goûte la mort. Ensuite pour faire ou retourne vers Nous. HADITH : Ibn Mas’ud raconter ki le Saint Prophète (s.a.w) fine dire : « Sakaine d’entre zot li préparer pour prend naissance dans matrice so maman quarante jours dans l’état d’ene sperme, quarante jours couma ene cayo (caillot), et quarante jours couma ene masse la chair ; après ene ange vini pour souffler et donne li so l’âme avec l’ordre pour note quatre kitchoses ki concerne li : 1. so provision, 2. la durée de so l’existence, 3. so conduite, 4. et si li pou malheureux ou dans bien. Alors par Celui en dehors de ki personne pas digne d’être adoré, li arriver ki ene d’entre zot agir couma bane dimounes du Paradis, ziska ki ene moment arriver kot li séparer avec Paradis zis par larzaire ene la main, et alors seki ti écrire contre so nom pour surprendre li, et li commence agir couma bane dimounes du Paradis, ziska ki finalement li rentre dans Paradis. (Bukhari & Muslim) Si nous analyse ça deux versets là et ça hadith là bien, nous pour comprend aussi ça ki Hazrat Massih Maoud (a.s) fine faire nous comprend et nous comprend aussi seki bane recherche montré ki le corps li maman l’âme. L’âme pas tombe dans matrice ene madame enceinte dépi là-haut. Li ene qualité la lumière ki trouvé dans sperme, même et ki commence briller ensemble avec développement fœtus. Bane révélations saint ki Allah donne nous, aide nous pour comprend ki l’âme li développer dans l’embryon ki formé avec sperme dans l’utérus. Couma Allah fine faire comprend dans Quran, ki Nous transforme ça le corps là, ki fine préparer dans l’utérus, en ene nouveau création et Nous faire li gagne ene nouveau forme l’existence, ki Nous appelle l’âme. En vérité Allah Li la Source beaucoup bénédiction et Li ene tel Créateur ki péna ene l’autre pareil couma Li. L’Islam enseigne nous ça dans ene façon extraordinaire, ki chaque l’âme gagne ene qualité le corps après so la mort ki permette li goûte le plaisir de so bane bonnes actions ki li fine faire lor la terre ou li gagne le tourment pour so bane désobéissance envers so Créateur. Mais ça le corps ki gagner après la mort là, nous pas capave décrire exactement et en ce ki concerne nous le corps ki nous ena lor ça la terre là, li népli exister après la mort. Donc, c’est nous croyance ça ki nous obliger croire ki ene mort kan li revivre li prend ene forme ki nous pas trouver. Très probablement ça le corps spirituel là li composé avec bane kitchose bien raffiné ki sorti dans nous le corps matériels. Kan ça l’âme là fine gagne ene le corps, li recommence senti bane kitchose couma ene humain. Parce ki ça nouveau le corps là pli raffiné et pli céleste en nature ; li ena possibilité gagne beaucoup plisse vision et révélation. C’est ça kan Allah dans Quran Li adresse So bane serviteurs croyants ; kot Allah dire : « Yaa ibaadiyallaziina aamanuu inna arzii waasiatunfa-iyyaaya fa-buduun ! » O Mo serviteurs croyants, Mo la terre vaste. Adore Moi et Moi seulement. Et Allah pé adresse ça à bane ki ena la foi et faire du bien, Nous pou installe zot dans bane places hautes dans Paradis, avec bane la rivière ki couler au milieu. Zot pour reste éternellement là-dans. Couma ene bon récompense pour bane ki faire bane bonnes actions et du bien lor ça la terre là. Couma nous tous conné ki ça Quran là, fine révéler pour tous dimounes sans distinction et Allah fine montrer nous couma nous bizin amène nous la vie tanque ki nous vivant lor ça la terre là. Mais, si nous obéir seki Allah fine dire nous faire et nous faire, bé définitivement, nous pour gagne so récompense et si nous rejette so bane commandements et nous faire bane kitchoses ki Allah fine empêche nous pour faire et nous rejette So bane signes et So bane manifestation divine, bé définitivement, couma Allah dire Li-même : « Wa inna jahannama la muhiitatum bil-kaafiriin » Sans aucaine doute l’enfer pour entoure bane sans la foi. Et l’heure là zot pour trouver ça jour kot punition là pour enveloppe zot et li pour enveloppe zot en haut, sous zot lipié, et l’heure là Allah pour dire zot : « Wa yaquulu zuuquu maa kuntum ta-maluun » Goûte seki ou ti pé faire. Et Allah même fine faire nous comprend ça bien dans Quran, ça la vie lor la terre là, li seulement ene amusement et ene jeu. C’est la vie future ki vrai la vie, si seulement zot ti conner. Et c’est ça ki Allah (swt) fine dire bane ki fine amène Imaan (la foi) : « Fa-subhaanallahi hiina tumsuuna wa hiina tusbuhuun. » Alors faire lounages Allah, soir et matin. « Wa Huwal Aziizur Rahim » Allah Le Grand, Le Miséricordieux. Et aussi Li ena tous pouvoir, tous pouvoir trouve dans So la main. Allah li : « Yansuru mayy yashaaa » Li secoure seki Li oulé et Allah dire pour bane ki ena la foi, et ki pas rejette so signe et ki zot croire ki zot pour rencontre ene l’autre la vie après la mort et zot pour faire du bien, Allah pour donne zot ene récompense kot zot pour jouir dans le jardin. Et Allah fine donne ene avertissement aussi pour bane ki rejette et démenti Nous signes et pas croire ki zot pour rencontre ene l’autre la vie après la mort, « Fil-zaabi muhzaruun » - Zot punition pour exposer. L’Islam comme ene religion parfait, fine honore l’homme de so vivant même, et même après so la mort. Le Prophète (s.a.w) fine enseigne nous cinq obligations vis-à-vis bane croyants (Musulmans). Ça c’est bane droits ene Musulman lor les autres Musulmans. (1) Retourne Salaam ; (2) Visite celui ki malade ; (3) Suivre le Mayyat (la procession funéraire) ; (4) Accepter ene invitation ; (5) Repondre celui ki pé éternuer (dire : ‘Yarhamuk Allah’) HADITHS : Dans ene hadith rapporté par Abu Saïd Al-Kudri (r.a) pé raconté ki le Prophète (s.a.w) fine dire : « Kan le corps fine metter dans cercueil (Janaza) – kan funéraille fine paré – et bane z’hommes emporte li lor zot z’épaules, si ça dimoune mort là ti ene bon dimoune, li pour dire : « Amène moi (vite) » et si li pas ti ene bon dimoune li pour dire : « Maudit li (moi), kot zot pé amène li (moi) ». so la voix pé tendé par tout kitchose excepter l’homme ki pas entendre ça et si l’homme ti entende ça, li ti pou tombe sans connaissance. (Bukhari) Hazrat Abu Huraira rapporter ki Hazrat Muhammad (s.a.w) fine dire : « Faire vite avec le corps mort parce ki si li ti bon ou pé amène li dans ene bon place et sinon alors ou pé débarasse ene mauvais kitchose dépi lor ou z’épaules. » (Bukhari) Hazrat Abu Huraira rapporter ki Hazrat Muhammad (s.a.w) fine dire : « Celui ki present dans ene procession funéraille jusqu’à li offert Namaz Janaza pour ça (mort là) pour gagne ene récompense égale à ene Qiraat et celui ki accompagne li jusqu’à enterré pour recevoir ene récompense égale à deux Qiraat. » Fine demandé : « Qui été deux Qiraat ? » Li (Hazrat Muhammad – s.a.w) fine réponde : « Comme deux montagnes bien grands. » Abdullah fine raconté ki le Prophète Hazrat Muhammad (s.a.w) fine dire : « La vraie patience c’est au moment au premier coup ene calamité (mosibat) frappé. » Ene l’autre hadith mentioné ki Hazrat Muhammad (s.a.w) fine dire bane membres de la famille d’ene mort, bizin lire ça duah là : « Allahoummagh firlee wa lahu wa aquibnee minhou uqbann hasanah. » - O Allah, pardonne moi et pardonne li et accorde moi ene meilleur récompense. (Muslim) Pour bane ki fine apprane nouvel la mort, zot bizin dire : « Inna lillaahi wa inna ilayhi raajeeoune. » - Sans doute nous pou Allah et nous ena pou retourne vers Li. (Tirmidhi) SEID AHMAD fils de Sadr Saheba Ummoul Momeneen Fazli Amena fine quitte nous triste et chagrin le 4 Juillet 2003, ene Vendredi même, après Jummah, et so l’enterrement (Janaza) fine faire Samedi le 5 Juillet 2003 à 11.00 a.m et li fine enterré dans Cimitière ‘Saint-Martin’. So la mort, fine être ene grand perte pour nous tous ki à l’époque ti trouve dans la Jamaat Ahmadiyya Al Mouslemeen. Li ti ene de bane disciples très fidèle du Amir’ul Momeneen Muhyi-ud-Din. Li ti ena beaucoup de bane excellents qualités dans li. Li ti accepter pour l’amour d’Allah et de so Messager pour sacrifier so letemps pour le travail de Deen-é-Islam. Kan ti pé confier ene travail, li ti pé faire li dans la meilleure façon et li ti pé faire so travail avec l’amour et dévotion. Li ti le pionnier du Majlis é Amla et li ti pé occupe « Sami Basri » (Audio Recording) et sonorization jusqu’à so la mort. Li pas ti pé arrêter aussi longtemps ki li pas accompli so bane travail avec succès et pour ça, li ti pé travail jusqu’à fort tard dans la nuite, pour ki li pas perdi ça bane faveurs et bénédictions ki Allah faire tomber kan Li fine envoye ene So Représentant lor la terre. Mo ena comme l’example de so bane travails telle bane recordings de Khutba Jummah, Study Circles, et bane Revelations ki Allah ti pé déverser lor So humble Serviteur. Kot mo ti pé aller, li ti pé suivre Moi pour enregistrer tous bane révélations ki mo recevoir. Mo rappelle ene fois, kan ti ena pour faire le logo du Jamaat de l’époque, dans ene vision mo fine trouve ene Ka’aba et deux minaret. Alors mo fine confier ça Seid Ahmad, et li pas fine perdi letemps pour alle prépare ene design logo d’après vision ki mo ti gagner et li fine joindre le nom d’Allah ensemble dans ça logo là. Aujourd’hui ça logo et so bane les autres travail pour reste gravé dans l’histoire de la Manifestation Divine, et aussi dans la Jamaat Ul Sahih Al Islam ene telle l’example de dévotion et d’amour pour Allah So bane travails. So bane dernier moments kot li reconnaître la Manifestation Divine et li témoigne la révélation et li croire avec fermeté dans la révélation, li accepter quitte tous so bane camarades et so bane jouer pétanque et li concentrer plisse lor la spiritualité et li commence faire so Dawa dans so travail (mondaine) avec so bane camarade et par la grâce d’Allah, mo fine gagne l’occasion zoine so bane camarde le jour de so la mort dans cimitière et zot fine raconte moi couma Seid Ahmad ti faire so Dawa et fine explique zot lor la Manifestation et Révélation et c’est zis après so la mort ki mo fine alle conné à travers so bane camarade couma li ti pé amène zot vers Allah. Seid Ahmad ti ene garçon tous le temps ti ena ene sourire lor so la lèvres et li ti content aide dimounes ki dans difficulté. Li ene vrai porte flambeau de l’Islam, et ene vrai Sahib-é-Alam et Sahib-Al-Faraj. Ki Allah aide chaque Sahib-Al-Faraj de par le monde entier pour suivre so pas. Ameen. O Seid Ahmad ! Do jahan ké daataa hé zaat bémisaali hé. O Seid Ahmad! To le bienfaiteur de tout le monde et to personnalité li incomparable. Rahégaa younhin ounkaa charchaa rahégaa. To nom vénéré li pour prononcer dans tous les temps pour l’éternité. « Allahoummagh firli Seid Ahmad (nom de sa dimoune ki fine mort là) warfa darajatahu fil mahdeeyeena wakhlufhou fee aquibihee fil ghabhireena waghfirlana wa lahu ya Rabbal Alameen wafsah lahu fee quabrihee wanawwir lahu feeh. » O Allah pardonne Seid Ahmad donne li ene rang elever parmi bane seki To fine guider et vine chef de ça bane ki li fine quitter là. O Maître de l’Univers ! Pardonne nous et pardonne li et élargi so tombe et mette la lumière là-dans. Ya Rabbé ! Rizwan Seid Ahmad téri janaat ko. O mo Rab ! Transporte Seid Ahmad au Paradis. Ameen. Kan personne pas capave lutter contre so destin et au contraire nous bizin accepter la volonté d’Allah le Très-Haut. Ki Allah garde Seid Ahmad sous l’ombrelle de So protection et Allah accorde li So pardon et admette li dans Jannatul Firdaus. Amîne. Ki Allah donne Hazrat Ummoul Momeneen Sadr Saheba Fazli Amena le courage, patience, ene bon la santé et ene longue la vie. “Ya Ummoul Momeneen Sadr Saheba Fazli Amena ! Allaziina sabaruu wa alaa Rabbihim yatawakkaluun.” O Ummoul Momeneen Sadr Saheba Fazli Amena! Supporte avec patience et mette ou confiance dans ou Maître ! Insha-Allah. Amîne.