Text Box: Bismillah-ir-Rahman-ir-Rahim KHUTBA JUMMAH HAZRAT AMIR’UL MOMENEEN MUHYI-UD-DIN AL KHALIFATULLAH MUNIR AHMAD AZIM 05 Décembre 2008 (Résumé du Khutba Jummah) Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine cause lors qualité d’ene: CROYANT ENE CROYANT BESOIN TOLÉRANT Ene croyant besoin ena ene l’attitude tolérant. Li besoin pas développe sa mentalité pou rende le mal pou le mal. La tolérance et le pardon c’est ene grand qualité dans qualité ene croyant. Jamais le Saint Prophète Muhammad (s.a.w) fine lève so la main pou batte ene dimoune sauf dans Jihaad. Quand dimoune ti pé offense li, li pas ti pé cherche pou venger. Dans ene Hadith ki trouve dans Sahih Bukhari et Sahih Muslim, Anas (r.a) pé rapporte : « Mo ti pé marche avec le Prophète (s.a.w) et li ti pé porte ene manteau Najrani avec ene colle dur. Ene bedoin fine vini et fine saisit li brutalement et mo fine guette z’épaule du Prophète (s.a.w) et mo fine trouve bane marque ki fine faire par so colle par sa approche brutale la. Ensuite bédouin là fine dire : « O Muhammad (s.a.w)! Donne l’ordre, pou donne moi certain richesse ki to ena. »  Le Saint Prophète (s.a.w) tourne vers li et sourire ensuite li fine ordonne, donne li quelque chose. » Dans la question de tolérance, le Saint Prophète (s.a.w) ti extrêmement tolérant. Dans ene narration ki trouve dans Sahih Bukhari et Sahih Muslim pé faire mention concernant ene juive ki ti oulé empoizonne le Saint Prophète (s.a.w). Li et so bane compagnons fine commence manger et puis le Saint Prophète (s.a.w) fine commence manger et puis le Saint Prophète (s.a.w) fine dire : « Arrête manger, li empoizonner. » Fine amène madame là kot le Saint Prophète (s.a.w) et li fine demande li : « Ki faire to fine faire sa ? » Li fine dire : « Mo ti envie conner si vraiment to ene Prophète et dans sa cas là, Allah pou averti toi et poison là pas pou faire toi du tort. Si to pas ti ene Prophète alors nous ti pou débarrasse toi. » Bane compagnons fine demander : « Est ce qui nous touille li ? » Li fine dire : « Non », et li fine pardonne li. Le Saint Prophète (s.a.w) c’est ene bénédiction pou l’humanité. Le Prophète (s.a.w) pas fine vine là pou donne malédiction. Quand tribu Daws ti révolté et refuse pou suivre bane commandements Allah et so Messager. Al Tufayl Ibn Amral Daws fine vine kot le Saint Prophète (s.a.w) et fine dire : « Tribu Daws fine révolté alors prié Allah contre zot. » Le Saint Prophète (s.a.w) fine faire face Qibla et li fine lève so la main et bane dimounes fine dire : « Zot pou fini ». Mais le Saint Prophète (s.a.w) ki ti ena pitié et tolérant et Li pas oulé trouve punition Allah tombe lors zot, li fine faire Doah pou Tribu Daws en disant : « O Allah, guide Daws et amène zot là. O Allah, guide Daws et amène zot là. O Allah, guide Daws et amène zot là. » Voila ki qualité tolérant nous pou bizin été. C’est sa nous l’example. Nous suivre sa l’example parfait là. ENE CROYANT BESOIN ENA ENE VISAGE SOURIANT Visage ene croyant bizin pas couma ene boxeur. Li bizin ena ene sourire lors so visage quand li joindre so prochain. Nous vivre dans ene société trop matérialiste ki parfois nous péna le temps pou lève la tête pou guette ene frère ki pé passé à coté de nous. Pas même ene salaam ni ene sourire. Le Saint Prophète Muhammad (s.a.w) fine dire : « Pas pense bas lors n’importe ki bon action même si juste joindre ou frère avec ene sourire. » (Sahih Muslim) Jarir Ibn Abdullah fine rapporté ki après so conversion à l’Islam, à chaque fois ki le Saint Prophète (s.a.w) trouve li, li faire ene sourire avec li. (Sahih Bukhari & Sahih Muslim) ENE CROYANT BESOIN ENA PATIENCE Ene croyant besoin cultive la patience dans li. Li bizin pas en colère. Ene homme solide c’est pas quelqu’un ki ena muscle mais c’est celui ki capave contrôle li dans moment de colère. Le Saint Prophète (s.a.w) fine dire ki l’homme fort c’est celui ki capave contrôle li au moment de colère. (Sahih Bukhari & Sahih Muslim) Si nous en colère, nous en colère pou la cause d’Allah. Si quelqu’un pé transgresse la loi Allah, nous pas pou accepter ça. Mo cite ene l’example kot le Saint Prophète (s.a.w) ti en colère. Ene fois en retour dépi ene voyage, li fine trouve ene rideau avec photo lors la dans la caze Aisha (r.a). So visage fine vine rouge et li fine dire : « O Aisha ! Dimoune ki pou plis puni le jour de la résurrection pou être bane ki imite bane créations d’Allah. » (Sahih Bukhari & Sahih Muslim). Ena ene l’autre cas kot le Saint Prophète (s.a.w) ki en colére concernant madame ki ti coquin. Ene Sahabi ti oulé cause avec le Saint Prophète Muhammad (s.a.w) en faveur sa madame là. Hazrat Muhammad (s.a.w) fine dire li avec colère. Est-ce qui to pé intercède pou arrête l’application la loi Allah. Et le Saint Prophète (s.a.w) fine faire remarque suivante : « Bane dimoune ki ti avant zot fine détruit parceki quand ene noble parmi zot li coquin, zot ti pé laisse li, mais quand ene pauvre parmi zot ti fine coquin, alors zot ti pé puni li. Par Allah, si Fatima, la fille de Muhammad (s.a.w) ti pou coquin, mo ti pou coupe so la main. » (Sahih Bukhari & Sahih Muslim) Pou ene oui ou pou ene non nek faire colère alors sa pas qualité ene croyant. ENE CROYANT BESOIN ÉVITE DONNE MALÉDICTION Ene musulman besoin évite donne malédiction. Abu Mas’ud (r.a) fine dire : « Le Prophète (s.a.w) fine dire : « Maudire ene musulman c’est ene péché et tuer li c’est Kufr » (Sahih Bukhari & Sahih Muslim) Anas (r.a) pé rapporter ki le Saint Prophète (s.a.w) jamais ti pé servi vilain langage ou donne malédiction ou faire serment. Quand li ti ena pou réprimande quelqu’un li pou dire : « Ki pas bon avec li, ki so front couvert avec la poussier. » (Sahih Bukhari) Alors, le Prophète (s.a.w) ti pé réprimande li dans ene ene sens parabole, mais bane dimounes ça l’époque là ti pé comprend ça parole du Prophète (s.a.w). en d’autres mots, veut dire ki faudé pas servi bane mauvais qualité ki fine mentionner là. Abu Hurairah (r.a) pé rapporter ki li fine dire : « O Messager d’Allah ! Faire doah contre bane Mushrikeen ! Li fine dire : « Mo pas fine être envoyer comme ene ki maudit (bane dimounes) mais comme ene bénédiction (pour tous dimounes). » (Sahih Muslim) Abu Hurairah (r.a) pé dire : « Ene homme fine boire du vin alors fine amène li kot le Prophète (s.a.w) et li fine dire dimoune pou batte li. Quelques-un parmi nous fine commence batte li avec nous la main, nous soulier ou nous manteau. Quand dimoune la fine aller, quelques dimoune fine dire « ki Allah mette toi dans la honte. » Le Prophète (s.a.w) fine dire : « Pas dire sa, pas aide Satan contre li. » (Sahih Bukhari) ENE CROYANT BESOIN PAS DÉVOILE SO PÉCHÉ EN PUBLIQUE Ene croyant faudrait pas li faire publicité de so péché ki li fine faire en cachiette. Li garde so défaut avec li même. Le Saint Prophète Muhammad (s.a.w) fine dire : « Chaque membre de mo Ummah correct excepter bane ki fane nouvelle bane péché. Ene l’example de cela c’est ene dimoune ki fine faire quelque chose le soir puis le matin quand Allah fine cachiette so péché, li dire un tel, un tel, mo fine faire tel kitchose, tel kitchose la nuit dernier. So péché fine être cacher toute la nuit par so Rab mais le matin li expose saki Allah fine cachiette. » (Sahih Bukhari & Sahih Muslim) ENE CROYANT BESOIN PAS DÉVOILE PÉCHÉ SO PROCHAIN. Li pas qualité ene croyant pou mette péché les autres dehors quand nous essaye approche li pou apporte certaine changement non pas nous faire scandale avec sa. Dans ene Hadith ki trouve dans Sahih Muslim, le Saint Prophète (s.a.w) fine dire : « Celui ki cachiette péché ene l’autre dans ça le monde la, Allah pou cachiette pou li le jour de la résurrection. » Dans ene l’autre Hadith ki trouve dans Sahih Bukhari pé rapporter : « Quelque dimoune fine vine kot Uqbah Ibn Amir et li fine dire : « Nous ena bane voisins ki boire et faire tel chose, tel chose. Est-ce qui nous besoin dire chefs (de ça village là) à propos de zot ? » Li fine dire : « Non parceki mo fine tende le Messager d’Allah (s.a.w) dire : « Celui ki trouve défaut ene musulman et li cachiette li, c’est pareil couma dire li fine amène vivant ene bébé fille ki fine enterrer vivant. » Alors faudrait pas alle cherche défauts les autres car cela pou faire pli beaucoup du tort ki du bien dans la société. Plito cherche ou propre défaut ou-même et corrige ou bane défauts en cherchant l’aide avec Allah. Celui ki dévoile péché les autres, tende encore saki le Saint Prophète Muhammad (s.a.w) fine dire à so l’égard : « Celui ki expose défauts so frère musulman, Allah pou cherche à expose so bane fautes et pou expose li même si li cachiette dans place pli fond de so la caze. » (Ahmad) ENE CROYANT BESOIN PAS METTE SO NÉ NEZ DANS ZAFFAIRE LES AUTRES Ene bon musulman faudrait pas li mette so ne nez dans la vie privé les autres. Li pas veille zaffaire ki pas concerne li. Fine rapporter dans Tabarani le Hadith suivant : « Signes ki ene personne li ene bon musulman saki li besoin quitte à part, saki pas concerne li. » ENE CROYANT BESOIN PAS FAIRE RIBAT Ene bon musulman faudrait pas li faire ribat so prochain. Allah mette nous en garde contre sa péché la.  « O bane croyants ! Reste loin beaucoup dépi doute. Certes certain doute li péché. Et pas espionner et pas médire (cause derrière les dos) les uns des autres. Est-ce qui ene parmi zot ti à content mange la chaire de so frère mort, zot ti pou trouve li horrible. Ena la frayeur d’Allah. Allah li pardonner et li miséricordieux. » (49 : 12). Nous rappelle nous même ki faudrait pas nous la langue faire nous même du tort ou faire les autres du tort. Quand ti fine demande le Saint Prophète Muhammad (s.a.w) ki pli bon musulman. Li ti fine répond : « Celui ki bane musulmans en sécurité dépi so la langue et so la main. » (Sahih Bukhari & Sahih Muslim) ENE CROYANT BESOIN PAS PROPAGE RUMEUR (BANE CAUSER SA KI PAS VRAI) Ene croyant faudrait pas li fane fausse rumeur ou bane causer désordre entre camarade ou les autres. Asma Bin Yazid (r.a) pé rapporter ki le Saint Prophète (s.a.w) fine dire : « Est ce qui zot pas oulé ki mo informe zot ki sane la meilleur parmi zot ? Zot fine dire bien sur, O Messager d’Allah. » Li fine dire : « Bane ki quand guette zot, mazine Allah (zot pieux) ». Ensuite li fine dire : « Est ce qui zot pas oulé ki mo dire zot bane ki pli pire parmi zot ? » Bane ki fane causer menti pou cause désordre entre camarades et cherche péché les autres. » (Ahmad) Le Saint Prophète (s.a.w) fine mette bien en garde contre sa mauvais qualité la : « Celui ki persister dans fane rumeur pas pou rentre dans paradis. » (Sahih Bukhari & Sahih Muslim) ENE CROYANT BESOIN PAS DONNE FAUSSE TÉMOIGNAGE Ene croyant faudrait pas li donne fausse témoignage. Sa kitchose là bien defend en Islam. Nous pas capave témoigne contre kitchose ki nous pas fine trouver. Le Saint Prophète Muhammad (s.a.w) fine dire : « Est ce qui zot pas oulé mo dire zot bane péché graves parmi bane grand péché ? » Li fine dire : « Associer les autres kitchoses avec Allah et désobéir parents ». Li ti pé allonger kan li ti pé dire ça mais après toutesuite li fine assizer et Hazrat Muhammad (s.a.w) fine dire: « Et donne fausse témoignage » et li fine continue répéter sa jusqu'à nous ti souhaite ki li arrêter. ENE CROYANT BESOIN PAS DOUTÉ Ene croyant faudrait pas li pense mauvais lors les autres, faudrait pas ena bane mauvais doute. Allah mette nous en garde contre sa péché la.  « O bane croyants ! Reste loin beaucoup dépi doutes. Certes certains doutes li péché. » (49 : 13) Ene croyant bizin pèse so parole bien. Ene mot capave faire li beaucoup du bien couma capave faire li beaucoup du tort. Le Saint Prophète (s.a.w) fine dire : « Ene homme capave prononce ene mot ki plaire Allah et li pas réalise so bane conséquence car Allah capave décrète ki Li satisfait avec li à cause de sa jusqu'à le jour ki li joindre Li. Pareillement ene homme capave prononce ene mot ki faire Allah en colère et li pas réalise bane conséquences de ça, car Allah capave décrété ki Li en colère avec li à cause de sa jusqu'à Jour de la Résurrection. ENE CROYANT BESOIN GARDE SECRET Ene qualité ki ene croyant besoin ena saki li pas dévoile bane secret ki fine confier li. Garde secret c’est qualité ene bon caractère. Laisse nous guette l’example de bane Sahaba, couma zot ti pé garde secrets. Dans ene Hadith ki trouve dans Sahih Bukhari, Umar (r.a) pé raconte l’événement concernant mariage so ti fille Hafsa ki ti veuve. Mo fine joindre Uthmah Ibn Affan (r.a) et mo fine offert li la main de Hafsa en mariage. Mo fine dire : « Si to oulé mo pou marier Hafsa avec toi. » Li fine répond : « Mo pou penser lors la. » Quelques jours fine passer ensuite li fine joindre moi et li fine dire : « Mo penser ki mo pas désire marier maintenant. » Ensuite mo fine joindre Abu Bakr Siddique (r.a) et mo fine dire : « Si to oulé, mo marié Hafsa Bint Umar à toi. » Abu Bakr fine reste tranquille et pas fine faire moi aucaine réponse et mo ti pli bouleverser avec li ki Uthman. Quelque jours fine passer le Prophète (s.a.w) fine demande pour marier avec Hafsa et mo fine accepter ça proposition de mariage avec Hafsa là au Prophète (s.a.w). Abu Bakr fine joindre moi et fine dire : « Peut être to ti en colère avec moi quand to fine offert moi la main Hafsa et mo pas fine répond. » Mo fine dire : « oui ». Li fine dire : « Narien pas ti empêche moi répond toi excepter ki mo ti conné ki le Prophète (s.a.w) ti fine faire mention de li et mo pas capave dévoile secret du Prophète (s.a.w). Si li ti pou décide pas marier avec li, lerla mo ti pou marier avec li. » Pas tous kitchose besoin dire. Ena kitchose ki vraiment li besoin reste secret. Mais quand dire secret, secret c’est sa qualité ene croyant, prend ene example saki le Saint Prophète (s.a.w) pé dire : « Les pires de bane hommes devant Allah le jour du jugement pou être sa homme ki ti intime avec so madame ensuite alle dehors et raconte les autres (madame là) so secrets. (Sahih Muslim) ENE CROYANT BESOIN PAS AGIR INPOLI Si trois dimounes ensembles, faudrait pas ki deux dimounes parmi ça trois là avancer et alle causer appart, alors sa manière là li pas correct. Ene croyant faudrait pas li faire ça kalité là. Ibn Mas’ud (r.a) pé rapporte ki le Saint Prophète (s.a.w) fine dire : « Si zot à trois, deux bizin pas converse à part en excluant l’autre jusqu'à plisse dimoune joindre zot parceki sa pou faire li triste. » (Sahih Bukhari & Sahih Muslim) Si jamais obligatoirement ena deux personne bizin causer, alors demande la permission au troisième et faire vite ré- retourner dans groupe la. ENE CROYANT BESOIN PAS ARROGANT Dans le cœur ene croyant faudrait pas ki l’arrogance rentré. Bizin pas arrogant. Ki utilité déclare grand noir et puis pou retourne dans la terre. L’arrogance c’est ene qualité satanique. C’est à cause de l’arrogance ki ena dans li, ki Satan pou trouve so place dans l’enfer. Le Saint Prophète Muhammad (s.a.w) mette nous en garde contre sa kitchose la : « Personne pas pou rentre dans paradis si li ena poids ene atome de l’arrogance (fierté) dans so le cœur. » Dans ene Hadith ki trouve dans Sahih Muslim, le Saint Prophète (s.a.w) fine dire : « Le jour de la résurrection, Allah pas pou guette bane ki zot vêtement traîne lors le terre par l’arrogance. » Dans ene Hadith ki trouve dans Sahih Muslim, le Saint Prophète (s.a.w) pé dire : « Ena trois (dimounes) ki Allah pas pou cause avec zot ou faire zot éloge ou guette zot le jour de la résurrection et zot pou gagne ene punition sévère. Ene vieux dimoune ki commette l’adultère, ene le roi ki cause menti et ene personne pauvre ki arrogant. » Le Saint Prophète Muhammad (s.a.w) mette so Ummat en garde contre l’arrogance en ces termes : « Celui ki pense haut en li-même ou bien marche avec ene attitude arrogant, li pou rencontre Allah quand Li (Allah) en colère avec li. (Sahih Bukhari) Ki Allah donne nous tous le Tawfiq pour réforme nous-même afin ki nous tous létemps être considéré comme ene bon croyant devant lizié d’Allah. Pour ça, tous les temps nous pou bizin l’aide d’Allah. Alors, nous tous ki présents et aussi mo bane frères et sœurs ki pé suive moi dans les différents pays du monde, anou tous prend résolution afin ki Allah purifier nous complètement, par nous bane bon l’intention et actions dans So chemin. Ki Allah accepté nous bane bons travail. Insha-Allah. Ameen.