Text Box: Bismillah-ir-Rahman-ir-Rahim KHUTBA JUMMAH HAZRAT AMIR’UL MOMENEEN MUHYI-UD-DIN AL KHALIFATULLAH MUNIR AHMAD AZIM 05 Septembre 2008 RAMADHAN 2008 (Résumé du Khutba Jummah) Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine récite le verset suivant: Ch.2 V.184  Yaa-ayyu-hallaziina aamanuu kutiba alay-kumus siyaamu kamaa kutiba alallaziina qablikum la-allakum tattaquun. O ou ki ena la foi, jeûner (Roza) fine prescrire pou ou, couma li ti prescrire pou dimoune avant ou, afin ki ou marche dans chemin Allah. (Ch.2 V.184) Le jeûne li ene pratique kot dimoune évite prend manger complètement ou partiellement pou ene certain période. Li ene ancien pratique ki trouver dans la plupart de bane religions dans le monde. Bane récents recherches scientifiques ine suggéré ki le jeûne li bien bon pour la santé (et par la grâce d’Allah mo fine fini explique couma li bon pour la santé la semaine dernière dans mo Khutba). Si bane dimounes suivent li couma bizin, le jeûne capave réhausse zot capacité de conscience et de sensibilité. Dans ene base traditionnel, le jeûne (Roza) li ene pratique ki bien populaire pour la purification ou diminution de bane péchés et bane mauvais actions. La plupart de bane religions choisir certain jours ou saisons pour bane périodes de jeûne pou zot bane suivants. La prière li supposé présent pendant période de jeûne dans la plupart de bane réligions. Le jeûne li aussi ene excellent forme d’entraînement pou développement physique, morale et spirituel dans nous la vie. Malgré le fait ki le Roza existé en différent formes dans plusieurs religions entier le monde, zis la foi Islamique ki attache beaucoup l’importance pour observe le jeûne. D’après Quran, avant l’Islam, Allah ti commande bane les autres religions pou garde le jeûne. Alors nous bizin conné ki ça bane les autres réligions là et couma le jeûne li pratiquer en Islam comparé à bane les autres religions !  « O zot ki croire ! Le jeûne fine prescrire pou zot couma li ti prescrire pou bane les autres avant zot, pou ki zot capave prend garde contre le mal. » (Quran Ch.2 V.184) Le Jeûne dans le Christianisme : Le sujet du jeûne dans le Christianisme li bien difficile pou expliqué, simplement parceki le Christianisme en entier péna assez de bane la loi réligieux. En plus de ça, ena ene désaccord fondamentale parmi bane savants si vraiment Jésus (a.s) ti commande pou observe le jeûne. Li apparent ki le jeûne dans Christianisme ine changer avec le temps et ki li affecter par bane facteurs sociales, politiques et économiques. Le Carême li ene période de jeûne pendant 40 jours et li ene moyen de pénitence ki observer traditionnellement par bane Chrétiens avant fête Pâques. Ça 40 jours là ena ene signification ki remonte dépi lontemps, à l’époque de bane Prophètes Moussa et Elias (a.s) ki ti pé approche Allah seulement le jour de Sinaï et Horeb après ki zot fine purifier zot pendant 40 jours. (Exodes 24 :18, Kings 19 :18) Jésus (a.s) ti pé garde le Roza pendant 40 jours (Mattieu 4 :2) avant ki li commence prêcher (faire dawa). Li ti pou aussi garde le Roza le jour de ‘l’atonement’ (répentir) ki ti ene pratique établi dans le Judaïsme. Ena beaucoup traditions ki extrêment différents concernant le Carême dans bane pays kot bane Chrétiens rester. Ena Chrétiens ki pas mange la viande tandis ki bane lézot pas mange poisson. Ena dimounes zot pas mange aussi fruits, dizéf ou bane manger riches ; ena dimounes zot selment garde Carême avec dipain diblé. Li permettre pou boire pendant le Carême (par example, de l’eau, jus etc.) Le jeûne dans Christianisme li particulièrement connecté avec ene envie d’ene dimoune pou humilier li même en répentance. (1 Kings 21 :27, Psaume 35 :13) Le jeûne li aussi connecté avec la prière. (Mattieu 17 :21) spécialement si ene dimoune oulé rode so Seigneur. Bane Chrétiens aussi prend le jeûne couma ene période de temptation (Mattieu 4 :1) et par consékan ene période de testes avec ene but pour gagne ene pli grand la force. La Bible aussi mette en garde contre bane mauvais côté de Carême, d’après bane l’opinion de bane dimounes. Ena capave considère le Carême comme ene moyen pou gagne bane zaffaires dépi Bondié (Isaïe 58:3) et li capave vine nek ene simple convention ou obligation (Zacharie 7:5). Si faire le Carême dans ene mauvais façon bane dimounes capave prend ça couma ene parade de religions ou simplement ene moyen pou montrer lizié dimounes. (Mattieu 6 : 16-18), ki jamais réflecter au fait vrai l’intention de aucaine de bane Carêmes (Roza). Le Jeûne dans le Judaïsme : Yom Kippur (Jour de Répentir) li le jour le plus sacré dans calendrier Juif. Yom Kippur li ene jour de dénonciation de soi-même. (Leviticus 23-27) pou ki bane Juifs capave répentir de zot bane péchés. Li observer 8 jours après le Rosh Hashanah (commencement calendrier Juif). Bane là croire ki le jour de Rosh Hashanah, Allah inscrire tous bane noms de bane Juifs dans bane « livres » et ki jour Yom Kippur jugement ki Allah fine rentrer dans ça bane livres là li scellé. Yom Kippur li essentiellement ene dernier chance pou bane Juifs pou démontrer zot répentance et par consékan, change jugement là. Yom Kippur, li le seul jour de jeûne mentionné dans Tauraat. Li ene complet de 25 heures temps de jeûne kot li commencer avec le couché du soleil avant Yom Kippur et li terminer après le coucher du soleil le jour de Yom Kippur. Bane Juifs zot supposé pas manger et pas prend aucaine boire. Li ene jour pour faire l’âme di tort afin ki capave répentir pou bane péchés ki fine commette pendant l’année ki fine passé. Jour Yom Kippur l’emphase metté lor l’élévation spirituel. Ene façon pour faire ça, faudé ki zot pas manger, pas travaille, pas garde bane posséssion matérielles et pas prend bane plaisirs superficiels. Pli spécifiquement, ena 5 activités physiques ki li défanne jour Yom Kippur ; c’est : pas manger et boire, pas gagne relations entre mari et femme, pas laver, pas mette soulier en cuir/ en la peau et pas mette bane lotions (parfum et la crème). D’après le Talmud, kan manger jour avant Yom Kippur li ene bénédictions ki égale à bénédictions de ça jeûne le jour de Yom Kippur. Ça grand repas ki zot prend avant ça jeûne là, li le « Seudah Mafsékat » (le dernier repas). La viande pas consommer pendant ça repas là, mais bane dimounes capave mange poule. Li dans tradition pou boire la soupe, mais li important ki bizin mette ene tiguitte disél et assaizonnement dans ça la soupe là ki possible. La plupart de bane Juifs zot casse carême avec bane produits laitiers (ki faire avec di lait). Bane familles et camarades zot casse le jeûne souvent ensemble kot ene lotte dimoune so la caze. Le Jeûne dans Buddhisme, Jaïnisme et l’Hindouisme: Buddhisme et Jaïnisme zot tous les deux fine fondé vers 500 avant Jésus en Inde et zot capave être identifié couma bane religions dérivatif de l’hindouisme. Alors, le jeûne (Roza) dans ça trois religions là li bien ressembler. Le jeûne dans l’hindouisme indique bane besoins physique ki le corps refusé pou gagne bane gains spiriuels. D’après bane écritures (livres) hindous, le jeûne aide pou créer ene sorte de pacte de paix avec bane Bondiés (statues) en établissant ene relation harmonieux entre lécorps et l’âme. C’est ça pensée là ki bien important pour le bien-être de ça dimoune là kan li nourri so bane besoins physiques et spirituels. Bane Hindous croire ki li pas facile pou poursuivre le chemin de la spiritualité dans ene dimoune so la vie de tous les jours. Bane zaffaires mondaines pas laisse bane hindous concentré lor la Réalization (l’illumination) dans le chemin spirituel. Alors bane adorateurs zot bizin faire beaucoup zéfforts pou impose bane limites lor zot même pou capave concentrer zot l’esprit, et ene façon pour faire ça c’est le jeûne. Mais le jeûne li pas seulement forme parti de l’adoration mais li aussi ene grand instrument pou ki dimounes capave ena displine entre zot-même. Li ene entraînement de l’esprit et lécorps pou enduré et fortifié zot-même de tous bane difficultés et pou pas découragé. D’après philosophie hindou, manzé veut dire gratification de bane senses et le fait ki ça bane senses là pas gagne contact avec manger li aide zot pour élever zot-même dans contemplation. L’hindouisme enseigne ki kan l’estoma plein, ene dimoune so l’intéllect commence alle dormi, la sagesse vine muet et bane parti lécorps pas faire bane bonnes actions. Bane Hindous zot observe le jeûne certains jours du mois couma « Purnima » (pleine lune) et « Ekadasi » (le 11ème jour dans ene période de 2 semaines). Ena bane certains jours de la semaine ki fine marquer pour le jeûne ; ça dépend de choix de bane dimounes et sakaine zot Bondié préféré. Dans Samedi, dimoune observe le jeûne pour appaize bondié de ça jour là, Shani ou Saturne. Ena dimoune ki observe le jeûne dans Mardi, ça jour spéciale pou Hanuman, bondié zako. Dans Vendredi bane disciples bondié Santoshi Mata pas prend bane manger aigres. Le jeûne pendant bane festivals li commun. Bane Hindous entier l’Inde et aussi Maurice observe le jeûne pour bane fête couma Shivrati et Karwa Chauth. Navaratri li ene fête kot dimounes garde jeûne pendant 9 jours. Bane hindous dans Bengali Ouest zot jeûner kan Ashtamivini ; c’est-à-dire le 8ème jour de Durga Pooja. Le jeûne dans l’hindouisme li capave veut dire aussi abstenir pou prend bane zaffaires soit pou bane raisons religieux ou pour cause de santé. Par example, ena dimounes zot pas prend disél dans bane jours particulier. Li ene constat commun ki disél li cause hypértension. Ene lotte type jeûne (le ‘phalahar’) li empêche dimounes prend bane céréales ; zot capave zis prend bane fruits. Principle derrière le jeûne ki sous-entendu dans l’hindouisme li trouve dans Ayurveda. Ça ancient système médicale Indien là, li dire ki bane causes premières de bane différents maladies li l’accumulation de bane matières toxiques dans le système digestif. Bane nétoiyazes réguliers de ça système digestif là permette ene kikaine reste en bonne santé. En jeûnant bane organes digestifs zot gagne répos et tous bane mécanismes dans lécorps zot vine propres et révine correct. Ene jeûne complet li bon pour la santé. En plus de ça, couma expliquer dans Ayurveda, lécorps humain li composé de 80% liquide et 20% solide, couma la terre, la force gravitionelle de la lune affecté bane fluïdes ki ena dans lécorps. Ça cause bane débalances émotionelles dans lécorps. C’est pourquoi ki faire bane dimounes vine nerveux, irritable et violent. Le jeûne li aide pou baisse le taux d’acides ki trouve dans lécorp et ça aide bane dimounes pou retenir zot sanités. Pou bane pratiques diététiques, le jeûne ine vine ene instrument bien utile pour le contrôle de la société. Li ene fome de protestation non-violent (et Gandhi ti habitué jeûné couma ene moyen de prostestation de paix). Ene la grêve la faim capave attire l’attention lor ene problème et ça capave aide bane dimounes pou trouve ene solution. Bane douleurs de la faim ki ene kikaine expériencer pendant le jeûne faire ça dimounes là réfléchi et envoye so sympathie lor bane ki pauvres ki bien souvent passe beaucoup jours sans manzé. Dans ça contexte là, bane fonctions du jeûne li ene gain pour la société – li bénéfique – et bane dimounes partage sakaine zot l’opinion et zot réssenti ensemble la faim. Le jeûne donne ene opportunité pour bane séki riches pour donne manger à bane lézot dimounes ki pas possédé (riches) couma zot. Le Jeûne dans la Religion Sikh – Le Sikhisme : Bane Sikhs pas participe dans aucaine forme de jeûne parceki zot trouve ça couma ene zaffaire inutile et sans aucaine l’avantages. Li bien important cependant pou spécifier ki le fondateur du Sikhisme, Guru Nanak li ti ene Musulman, et li ti pé garde le Roza régulièrement. C’est kan le 10ème succésseur de bane Sikhs ti vine à la tête en 1675 ki le jeûne fine mette de côté dans bane pratique Sikhisme. Bane Comparaisons du Jeûne (Roza) en Islam : L’Islam fine prend le dessus lor le réforme de l’institution du jeûne. Ça ti ene réfome radicale dans signification règles et l’objectif de Roza. Ça fine permette le jeûne pou vine plus facile, naturel, et éfficace. Le Carême ti ene symbole de tristesse, deuil et répentance pour bane péchés, ene rappel de bane désastres et aussi bien ene démonstration d’abstinence dans le Judaïsme et le Christianisme ; ene tel démonstration d’abstinence ki zot-même zot prive zot par zot propre volonté de bane plaisirs de ça la vie là, et zot inflige lor zot même la peine lor la peine. L’Islam fine apporte ene changement complète à signification du jeûne et fine démontrer ki façon ki bane les autres religions à travers le temps fine garde le jeûne fine apporte bane la peine et difficulté au lieu de la lumière de la purification de l’âme ki li (l’Islam) fine améné. Le mois de Ramadhan – mois de jeûne – li ene mois de prières ki bane croyants Musulmans accueillir chaque l’année avec empressement et la joie. Ça l’atmosphère du jeûne dans le mois de Ramadhan li très à l’opposé de ça l’atmosphère de deuil ki l’image ki bane les autres religions donné lor le jeûne. Bane la lois Islamiques (Shariah) concernant le jeûne zot justes et universel. Par example, le jeûne ti pou bane classes spécifique de bane dimounes dans bane religions. Pour le secte « Brahmin » dans la religion Hindouisme, le jeûne li nécessaire pour bane prêtres de la haute société. Dans certains parties de bane religions latin, c’est zis bane madames ki ti bizin observe le jeûne et pour ça péna aucaine exceptions. Islam fine faire le jeûne pour tous adultes, irrespectifs de zot classes ou statu sociales. La tradition de Sehri (manger ki prend avant commence Roza) li ene joli l’example de l’Islam ki faire le Roza vine facile pour bane dimounes. Ene dimoune ki pé garde le Roza li gagne droit manger ziska zis 3 minutes avant Fajr ; la prière du matin. Pareillement, kan fine arrive l’heure pou casse le Roza, la loi ki ena c’est ki bizin casse le Roza aussitôt ki le soleil couché sans aucaine délai. Dormi et prend repos zot aussi permette pendant la journée, mais faudé pas dépasse limites kot ena dimounes ene journée zot dormi zot pas faire nannié. Et aussi pendant ça mois là, travaille pas arrêter et bane business zot pas fermé pour le Roza. Dans le Judaisme, travail li défanne pendant ene période de jeûne. Additionellement, ene dimoune ki faire ene faute dans le Roza, li pas puni et si ene kikaine li oublié ki li Roza et li manger, Allah pardonne li. Ena même ene hadith ki dire ki kan ene serviteur d’Allah li oublier ki li Roza et li alle manger, alors c’est tout à fait comme si Allah même ki fine faire li manger.  « … Allah oulé facilité pou zot et Li pas désire difficulté pou zot … » (Ch.2 V.186) Le jeûne dans lézot religions li basé lor le calendrier solaire, tandis ki le mois de jeûne en Islam li basé lor calendrier lunaire. Le jeûne d’après calendrier solaire demande beaucoup connaissances de bane calculations et astronomie pou faire ene tel calendrier. Aussi, ça bane mois là zot fixé dans bane saisons spécifiques ; zot pas varié ou changé. Parcontre calendrier lunaire dans mois de jeûne islamique, li basé d’après l’apparition de la nouvelle lune. Allah dire :  « Zot demande toi à propos de la nouvelle lune. Dire : Zot bane moyens pou mesure létemps, pour dimoune zot convenance en générale … » (Quran Ch.2 V.190) Et ene hadith dire : « Manger ziska zot trouve le commencement du lever du soleil et pas cassé jusqu’à zot trouve le bord du couché du soleil. » (Sahih Muslim) Ça permette bane Musulmans dans tous coins lémonde ; Est, Ouest, Nord et Sud, et tous séki trouver au milieu dans bane villages retiré, lor montagnes, dans bane conditions léttrés ou illéttrés, dans bane la forêt ou déserts ; pou zot tous capave commence et termine le jeûne (Roza) au même moment, sans aucaine difficultés. Ki faire la lune fine être servi comme ene moyen pou observe le jeûne au lieu du soleil ? L’année lunaire li toujours 10 ou 11 jours en moin comparé avec l’année solaire. En consékan, dans l’espace temps de 36 l’année, chaque musulman ti pou jeûner tous les jours de l’année, bane longues jours, bane jour courtes, bane jours chaud et bane jours frais de l’année. Bane musulmans dans différents régions du monde ti pou ena ene totalité égale dans le nombre de jours ki zot garde le Roza et zot ti pou capave gagne bane nombres égales de bane changement dans saisons et dans climat. Zot ti pou gagne ene nombre égale de bane Ramadhan graciales ou bons. Si le Roza li ti basé lors calendrier solaire, bane musulmans dans l’été ti pou gagne Ramadhan pendant bane létemps chauds tous les l’année, pour toujours. Ena musulmans ti pou garde bane longues Roza et bane les autres ti pou garde bane Roza courte, à cause bane mois dans calendrier solaire zot fixé et en place. Le jeûne ki basé lor calendrier lunaire veut aussi dire ki ene kikaine capave manque impé fruits et légumes dans certains saisons, mais à la fin de ça cycle là, ene musulman li pou capave goûte et essaye différents fruits pendant le mois de Ramadhan prescrite tandis ki le jeûne basé lor calendrier solaire ti pou condamne impé fruits pendant Ramadhan, pour tous les temps. C’est pourquoi bane musulmans pas change le mois de Ramadhan, ni zot distorte li en augmentant ou diminuant bane jours, ni zot change li pou différents mois. Conclusion : A travers l’histoire dans pratiquement tous religions dans le monde, le jeûne fine longuement pratiquer couma ene moyen spirituel pou augmente la prière et la foi. Dimounes ine garde le jeûne comme ene obligation envers Allah, et ça ine amène zot vers la spiritualité et ene bon la santé. Roza amène la santé spirituel, mental, émotionel et physique. Le jeûne li maintenant généralement accepté couma ene façon éfficace et sans danger pou désintoxiquer le corps, ene technique ki dimounes ine servi pendant des siècles pour guéri bane malades. Li purifier lécorps de bane saletés et poison toxiques ki fine accumulé. Bane jeûne réguliers aide lécorps répare li-même et aussi ça permette l’esprit et l’âme pou réveillé. Le jeûne li maintenant prouvé médicalement comme ene bon pratique et li offert beaucoup avantages pour nous ; impé ki nous conné et lézot avantages ki nous pas conné aussi. Couma Allah dire :  « … Et le jeûne li bon pou zot si au moin zot ti conné. » (Ch.2 V.185) Kan li pé termine so Khutba, le Khalifatullah fine recevoir ça duah là ; C’est ene duah ki trouve dans Quran Shareef :  « Rabii innii a-uuzu bika an asalaka maa laysa lii bihii ilm. Wa illaa tagir li iwa tarhamnii akum-minal khaasiriin. » O mo Maître, mo demande To protection afin ki mo pas demande Toi kitchose ki mo pas conné. Si To pas pardonne-moi et grâcier moi, mo pou faire la perte. Ameen.