Bismillah-ir-Rahman-ir-Rahim

 

KHUTBA JUMMAH

 

HAZRAT AMIR’UL MOMENEEN MUHYI-UD-DIN

AL KHALIFATULLAH

 

MUNIR AHMAD AZIM

 

06 Février 2009

 

(Résumé du Khutba Jummah lors Zikr Allah)

 

Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine lire ça verset Quran suivant là:

 

CH. 13 AR-RAAD V.29

 

 

“Alaa bizikrillahi tatmainnul qulub”

 

Est-ce ki c’est pas dans Zikr Allah ki le cœur gagne tranquillité ?

 

 

Zikr Allah li tellement important, ki mo trouvé ki bizin explique nous bane frères, sœurs et zenfants pour engage zot dans Zikr Allah pour gagne ene tranquillité du cœur et li tellement important même pour faire quelques Khutba seulement lor Zikr Allah, et là aussi nous pas pou fini conne so valeur, bénédiction, contentement et tranquillité dans le cœur kan ou faire Zikr Allah. Ki Allah (swt) donne moi ça ilm (connaissance) là pour mo faire quelques Khutba lors bénéfice de Zikr Allah.

 

Azordi jour, partout dans le monde, dimoune pé faire face tout kalité problème et la majorité lettres et email ki mo recevoir et aussi bane dimounes de tous les communautés ki vine joinde moi, kot zot tous raconte zot bane situation kot zot dans difficultés et dans tracas.

 

Insha-Allah, à travers ça série Khutba ki Allah (swt) de par So grâce, aide et connaissance ki Li pour donne moi, Insha-Allah tous nous bane frères, sœurs et zenfants musulmans et les autres communautés, zot pour gagne ene guérison pour tous zot bane problèmes, difficultés, tracas et maladies et en même temps zot tous ki dévoués et bénies capave tire le maximum bénéfice à travers ça bane série Khutba Jummah ki pour faire lors Zikr Allah so bane vertus et Insha-Allah ena bane dimounes pour gagne ça l’inspiration pour récite nom sacré Allah avec sincérité (Ikhlaas) et ki ça pour profite sakaine parmi zot « bé-amal » là (non-pratiquant de bane mauvaises actions) et dans bane situation kot zis bane bon actions pour sape li avec toutes sortes de problèmes, difficultés et dangers ki capave arrive li. Ki Allah Ta’ala donne sakaine parmi nous ça « Shauq » (enthousiasme) là  pour faire le Zikr et en même temps nous capave réaliser à ki point Zikr vraiment ene très grand trésor. Li pas dans capacité ene simple dimoune couma moi pour faire plusieurs Khutba Jummah détaillé lors Zikr Allah et ni li possible pour moi humainement pour faire justice ene sujet pareil, sans aide de mo Créateur.

 

Ene serviteur Allah pas gagne droit oubliyer so vrai Bienfaiteur ; faveurs et bienfaits ki Allah verser lors nous chaque moment nous la vie tellement nombreux ki li impossible pour compter ou comparer. Li tout à fait normal, donc ki nous bizin rappelle nous Bienfaiteur, pense Li, remercier Li, et montrer nous reconnaissance envers ene Etre aussi Généreux (c’est-à-dire faire Allah Ta’ala So Zikr).

 

A vrai dire, ene seul ayat Quran ou ene seul hadith suffit pour change ene Musulman ki sincère et amène li vers bons actions tandis ki ene l’armoire livres pas pou ena l’effet lors ene dimoune ki pas envie changer ; ça faire nous pense ça bourrique ki ena ene kantité livres lors so lédos, li pas tire aucaine profit, plito li pé saryé ene fardeau lourd.  Couma Allah même dire dans Quran Shariff :

 

 

« …couma ene bourrique qui chargé avec livres… » (Ch.62 V.6)

 

A la lumière de séki mo fine dire zot là, mo pou cite quelques hadiths :

 

Hazrat Abu Hurairah (r.a) rapporté ki Rassoûlullâh (s.a.w) fine dire : « Allah Ta’ala dire : « Mo agir avec Mo serviteur d’après l’espoir ki li ena lor Moi ; Mo ensemble avec li kan li pense Moi. Si li pense Moi dans so lécoeur, Mo pense li dans Mo lécoeur ; si li pense Moi dans ene l’assemblée, Mo pense li dans ene bien meilleur l’assemblée ; si li approche avec Moi distance ene plat la main, Mo approche avec li distance ene coudée ; si li approche avec Moi distance ene coudée, Mo approche avec li distance deux coudée et si li marcher pou vine vers Moi, Mo galouper pour alle vers li. » (Ahmad, Bukhari, Muslim, Tirmidhi, Ibn Majah)

 

Ena plusieurs points ki fine mentionner dans ça Hadith là. Premier là-dans, c’est ki Allah Ta’ala agir avec ene dimoune d’après l’espoir ki ça dimoune là ena lors Allah.

 

Donc ene dimoune bizin toujours garde l’espoir lors faveur et bonté Allah, tous les temps li bizin ena ene confiance absolu kan li faire duah ou Zikr avec Allah et fraudrait pas ki jamais li décourager concernant pardon et faveur Allah. Très certainement, nous tout, nous faire beaucoup péchés et bien sûr nous mérite punition pour nous mauvais actions.

 

Mais faudrait ki jamais nous décourager concernant Allah So miséricorde parski li bien possible ki Allah par So grâce et So bonté pardonne tous nous péchés. Allah Ta’ala dire dans Quran Paak :

 

 

« Certainement, Allah pas pardonné kan nous associer kikaine avec Li.  A part ça (le Shirk) Li pardonne celui ki li envie. » (Ch.4 V.49)

 

Mais ça pas veut dire ki obligatoirement Allah Ta’ala pour pardonne nous. Nous bizin bien comprend ça ki vrai Iman trouve entre l’espoir (So pardon) et la crainte (So punition).

 

Ene fois, Hazrat Muhammad (s.a.w) fine visite ene jeune Sahabi ki ti près pour quitte ça Dunya là. Li (s.a.w) fine demande Sahabi là ki li pé ressenti. Alors Sahabi là fine réponne : « O Messager d’Allah (s.a.w), mo ena l’espoir lors faveur, miséricorde d’Allah et en même temps mo pé gagne peur pou mo péchés. »

 

Hazrat Muhammad (s.a.w) fine dire li : « Kan lécoeur ene croyant rempli avec ça deux sentiments là, l’espoir et la frayeur, Allah Ta’ala accorde li ça ki li espérer et protège li dépi ça ki li gagne peur là. »

 

Fine mentionner dans ene hadith ki ene croyant considère so péchés couma ene montagne ki pé dégringoler lors li tandis ki ene Fassiq (transgresseur) considère so péchés couma ene mouche ki fine pose lors li ki li répousser facilement et en d’autres mots, li prend so péchés couma dire nannié di tout. Alors ça pé faire nous comprend ki ene dimoune bizin gagne toujours peur pour so péchés et en même temps garde l’espoir lors miséricorde d’Allah.

 

Mu’az (r.a) fine mort comme Shaheed avec la peste. Kan li ti près pou quitte Dunya, li ti pé perdi connaissance souvent. A chaque fois ki li ti pé régagne connaissance pendant ene ti moment, li ti pé dire : « O Allah ! To connais ki mo content Toi, par To Gloire et To l’Honneur To conne ça très bien. » Juste avant ki li pousse so dernier soupire, li fine dire : « O la mort, mo content pour accueillir toi, to ene invité béni mais to fine vini dans ene moment kot péna nannié (pour manger) dans la case. » Ensuite li fine dire : « O Allah ! To connaît très bien ki mo ti toujours ena la peur pour Toi et azordi mo pé quitte Dunya avec ene grand l’espoir ki To pardonne moi. O Allah ! Moi, mo fine content la vie ; pas pou fouille canal et cultive jardins, mais pluto pou reste soif dans moments kot faire bien chaud, pour supporte difficulté à cause l’Islam et participer dans l’assemblée ki réuni kot bane croyants sincères absorbés dans To Zikr. » Dans certain Hadith kot Allah fine dire ki Li pou accomplir bane demandes d’après l’espoir ki nous ena lors Allah.

 

2ème point ki mentionner dans ça 1er Hadith mo fine mentionner là, « Mo ensemble avec li kan li pense moi », Allah ensemble avec ça serviteur ki pense Li et aussi longtemps ki la lèvre ene dimoune bouger pour rappelle Allah, Allah dire : « Mo avec li. » En d’autres mots, Allah accorde So l’attention spéciale et verse So bénédiction lors ça dimoune ki pendant tout ça moment ki li pé faire Zikr Allah.

 

3ème point dans ça Hadith là, c’est : « Mo pense Li dans ene meilleure l’assemblée. » En d’autres mots, Allah Ta’ala mentionne avec fierté ça dimoune ki faire So Zikr dans ene l’assemblée ki pli honorable. Donc, c’est pour ça raison là ki Allah Ta’ala faire éloges et montrer So fierté pour actions remarquables de tout celui qui reste occuper dans So Ibaadat et So Zikr malgré ki li pas trouve Allah et ki ti pour arriver si zot ti trouve Jannat, combien Ibaadat, Zikr zot ti pour faire pliss ?

 

4ème point ki fine mentionner dans ça Hadith là, séki si ene dimoune tourne et approche vers Allah, Allah aussi tourne, et rapprocher avec li plisse encore. « Mo rapproché ou sois Mo galoupé vers li » veut dire ki Allah Ta’ala So faveur et So bénédiction pou déssane rapidement lors ça dimoune là, et ça faveur Allah-là désanne lors li en abondance kot ça dimoune là li augmente So Ibaadat et Zikr.

 

Dans ene l’autre Hadith, fine rapporter ki ene dimoune ki ena ça quatre kitchose là vraiment li fine gagne bienfait Dunya et Aakhirat.

 

1. Ene la langue ki reste toujours trempé dans Zikr Allah.

2. Ene le cœur ki rempli avec « Shukr » (réconnaissance).

3. Ene lécorps qui supporte difficultés.

4. Ene madame ki pas trahir fidélité envers so missié et pas gaspille so du bien.

 

Ici l’expression ki fine servi dans ça Hadith là « La langue trempée » (Ratab’ul Lisaan) veut dire « abondance dans Zikrullah » et veut dire aussi « faire éloges et glorifier kikaine excessivement ». D’après mo l’opinion personnel, ça expression là capave ena ene l’autre signification pli directe. En effet, bane dimounes ki fine vraiment découvert l’amour connaît ki proclame juste nom nous bien-aimé suffit pour amène ene douceur dans la bouche, et ça c’est la preuve ki nous content Allah, trouve dans nous l’amour pour So Zikr et l’absence Zikr montrer nous éloignement dépi Allah.

 

Abu Darda (r.a) dire ki bane dimounes ki garde zot la langue trempée dans Zikr Allah, zot pour rentre dans Jannat en souriant.

 

Ki ça bane parole ki nous fine tendé là nous demande duah avec Allah ki Li (Allah) garde nous la langue aussi toujours trempée dans Zikr Allah, Insha-Allah.

 

Mo termine ça 1er partie Khutba lor Zikr Allah là en faisant ça duah là avec nous Rab.

 

« O Allah, laisse nous sacrifié nous pour Toi, Créateur de ça lémonde là, ki combler nous avec bane faveurs illimités, chaque moment de nous la vie. » Ameen, Soumma Ameen.