Text Box: بسم الله الرحمن الرحيم Khutba Jummah HAZRAT AMIR’UL MOMENEEN MUHYI-UD-DIN AL KHALIFATULLAH Munir Ahmad Azim 06 Novembre 2009 (Résumé du Khutba Jummah) Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine lire ça verset Quran suivant là:  Yaaa – ‘ayyuhan naasut-taquu Rabbakumullazii khalaqakum min-Nafsinw waahida – tinw – wa khalaqal minhaa zaw – jahaa wa bassa minhumaa ri –jaalan – kasiiranw – wa nisaaa – ‘aa. Wattaqullaa hallazii ta – saaa ‘aluuna bihii wal – ‘arhaam: ‘innallaaha kaana ‘alay-kum Raqiibaa. (Ch.4 An-Nisah V.2) O dimoune, suive chemin ou Maitre qui fine créer ou à partir ène seul personne et fine créer ène compagne pou li à partir sa personne lâ-même, et Li fine répande (lor la terre) à partir sa deux personnes là boucou zommes avec femmes. Suive chemin Allah, car c’est par So grâce qui ou faire des demandes l’un à l’autre. Respecter banne liens disang (c-à-d ou proche parent). Allah surveille ou tout létemps. Le statut li représente le prestige, puissance, liberté, position et rang ki ene dimoune ena en relation avec les autres dans ene société ou ene communauté. Le statut d’ene missié ou ene madame li déterminé par bane facteurs biologique, so religion et bane visions ki li ena et ki li envie accompli dans le future. Dans ene la religion, le statut li déterminé par le but de création de l’homme, bane faculté ki zot ena et le rôle et fonctions, ki li bizin faire dans ça le monde là. Islam montré ki l’objectif de création de l’homme c’est pou apporte à l’existence de bane dimounes, bane facultés ki pou permette zot vine bane bon serviteurs d’Allah et pou ki zot manifesté bane attributs d’Allah dans zot-même. Le Saint Coran dire nous ki bane missiés et madames fine être créer depuis ene seul l’âme (nafsan wahidatun) et ki ça même meilleur création (ahsané taqweem) et zot ena droit pou faire concurrence avec les autres lors bane bon actions (fastabiqoul khairat) et ça même bizin vine zot but et aspiration dans zot la vie. Alors, le respect de soi-même, le but et aspiration d’ene la vie li dépanne lors capacité ene dimoune. D’après Quran, missiés et madames ena le même statut et rôle. Astaire nous guetter ki été l’ordre morale ? L’ordre morale li représente ene kitchose pure et chaste dans la société. L’Islam dire ki l’ordre morale pas capave ena sans ki tout les deux sex pas co-opérer et pas assime zot responsabilités bien. Le Saint Coran dire ki « aide to prochain ki pieux et juste. » (Wataawanno allal birray wat-taqwa) et ki bane missiés et madames bizin observe ene certaine distance pour sauvegarde zot chasteté. L’Islam ine mette bane mesures de protection pou madames contre bane mauvais regard, contre bane dimounes ki envie faire zot du tort et abuse et zot, ki li physiquement, moralement et ki li de côté la religion ; kan zot prive ça bane madames là de zot droits pou pratique zot religion pleinement. L’Islam enseigné ki l’éducation bane missiés et madames bizin égale. Le Saint Coran dire ki l’éducation li péna prix et li dire ki zis bane dimounes « Ulul al Baab » (intelligents) ki pou capave comprend bane signes d’Allah et zot l’importance et pou ki capave approche Allah. Le Saint Prophète Muhammad (saw) ine dire ki le devoir de sak musulman, ki li missié ou madame c’est pou apprane (alle cherche la connaissance). La spiritualité, le droit pou accède à la connaissance divine li fondamental ki pou missié, ki pou madames aussi. Le rôle de la femme li pas juste de côté mondaine, dans la caze, mais li bizin intégré li entièrement dans faire plaisir Allah, et li pou arrive faire ça kan li prend compte so droit en tant ki servantes d’Allah et tourne li vers bane travails de Deen kot ça capave amène ene changement dans so comportement, kot li accède à la piété et la spiritualité. De plus, ça madame là li plonger dans le Zikr-é-Ilaahi kot li accède à ene le monde de secret entre li et so Rab. L’espèce humaine ena ça faculté là de côté d’Allah, et Allah fine promette bane missiés et madames l’honneur si zot conne prend le chemin ki mène vers Li et reste ferme lors ça chemin là, arrive séki arrive. La vie, l’honneur et dibien, ça même trois kitchoses important ki bizin dans ene société moderne. Le Saint Coran ine mette bane mesures pou sauvegarde la vie, l’honneur et dibien ene madame de la même façon couma Li fine mette bane mesures pour sauvegarde la vie, l’honneur et dibien d’ene missié. Le Saint Prophète (saw) fine dire dans so discours adieu lors d’ene pèlerinage (Hajj) ki : « Ou êtres (c’est-à-dire, ou propre personne), ou dibiens et ou l’honneur, li sacré couma la sainteté du jour du pèlerinage dans le mois de Hajj et ça l’endroit là, li la caze Allah. Pas laisse li perdi. Islam reconnaite ki l’argent li indépendant et zot tous rode ça pou zot sécurité, car li essentiel pou liberté de bane actions. Le Saint Coran donne nous droit pou prend ene l’héritage d’ene homme ou d’ene madame. En plisse de ça, droit pou hérite dibiens d’ene parent, d’ene famille proche ou de so mari, ene madame so Mohr li fixé d’après salaire ki so mari gagné à l’heure de zot mariage (Nikah). Ça Mohr ki ça madame musulmane là gagner, li so propre dibiens et missié là péna aucaine droit lors ça (Mohr là). Dans ene société, la famille li fondamental. Islam montré nous ki la joie ene famille c’est kot ene mari li vive bien avec so madame et vice-versa. Li donne so madame tout so droits et respecté so madame et madame là aussi réconnaite bane droits ki so mari ena lors li. Le Saint Coran dire « bane mari bizin ena bon traitement avec zot madame, traite li avec gentillesse (Wa asheruhunna bil maaroofay). Bane madames pieuse bizin obéissante (envers zot mari) et sauvegarde l’honneur zot mari avec l’aide d’Allah et connaissance ki zot ena, zot bizin partage ça entre zot-même, entre zot camarades. Le Saint Prophète (saw) ine dire avec bane missiés ki meilleur parmi zot c’est celui ki traite zot madame bien et moi mo meilleur parmi zot tous lors bon traitement envers mo famille. Le Saint Prophète (saw) ine dire avec bane madames avec autorité ki zot bizin juré au nom d’Allah dans ki la vie de Muhammad (saw) trouver, ki aucaine madame pas bizin considère ki zot fine servi (la religion) Allah, si zot pas fine occupe zot mari bien. Lerlà droit conjugal entre ene femme musulmane et ene missié musulman arrive ene haut niveau kot mari là traite so madame bien et li capave dire ki li ena ene moral excellent aux yeux d’Allah. Et de l’autre côté li pé accompli le droit d’ene mari pour le plaisir d’Allah. Dans l’Islam, la baze de la vie conjugal c’est l’affection entre les deux. Ene missié li le Qawaamoum (gardien) de so madame, kot li faire tout pou protège so madame et accorde li so bane nécéssité. De lotte côté, ça madame là bizin ena grand respect pou so mari, garde secret so la caze, occupe so bane zenfants – tous ça là lors so charge. Le Saint Prophète Muhammad (saw) dire ki le divorce li pli détestable aux yeux d’Allah. Kan l’Islam trouvé ki ene mariage pé cassé, c-à-d, kot le couple zot ménage pas pé marche bien, pas capave faire nannié ou bien pas ena aucaine réconciliation ; kot ena beaucoup dispute sans trouve aucaine solutions. Dans ça cas là Islam donne le droit de Talaq à ene mari et le droit de Khula à ene madame. Le Saint Coran ordonne ki le divorce ou Khula bizin faire dans ene bon façon et ki ni l’homme, ni la femme bizin tracassé lors aucaine prétexte. Dans l’Islam, le mariage li ene engagement sacré. Ou coupable si ou faire ene offense, ou bien faire insignifiant avec ou madame. Dans l’Islam, ene madame li partage même statut ki ene missié, but de so création, so devoirs envers Allah et so responsabilité envers les autres, li pareil couma ene missié. Dans l’époque du Saint Prophète (saw) et so bane Successeurs, bane madames musulmanes ti pé aller Masjid, faire bane pèlerinages, observe le Roza et donne charité de zot propre dibiens et revenue pou la cause d’Allah. Zot ti pé accompagne bane missié lors terrain de guerre et ti pé donne de l’eau et occupe bane blessé. Ena ti pé meme prend part dans la guerre. Bane madames bizin ena ene grand reconnaissance et ene grand merci pou le Saint Prophète (saw) de l’Islam, ki avec so grand cœur sensible fine senti et reconnaite la vie misérable d’ene madame et ki avec so gentillesse et bon cœur, li donne instruction à travers bane révélations de la loi d’Allah et fine donne bane madames ene droit égale et pli beaucoup respect ki ene missié. Ça ti faire quatorze cent trente ans de cela et ça l’époque là aucaine madame dans le monde ti capave lève la voix contre ça situation critique là. Mais de nos jours nous trouver ki bane madames fine tombe dans bane pièges de l’ignorance de ça la vie moderne là et pas conne vrai valeur de zot droit. Azordi, Insha-Allah à travers l’apparition de ça humble serviteur là et la Jamaat Ul Sahih Al Islam, Allah pou faire revivre bane vraies statuts de la femme et amène zot vers la spiritualité, et mo bizin dire, même plisse ki bane missiés. Ki Allah aide sakaine d’entre zot, hommes et femmes, pou réfléchi lor ça ki mo fine dire zot azordi, et prend en charge zot droits islamiques ki pou faire zot briller dans ça la vie ici-bas là et dans Aakhérat aussi. Bane madames faudé pas dépasse limites aussi, et bane missiés aussi. Tout bizin faire d’après instructions ki Allah fine établir pou zot. Insha-Allah ki zot respecté vrais valeurs du Quran, et zot devoirs envers Allah et zot épouses/époux. Ameen.