Text Box: بسم الله الرحمن الرحيم KHUTBA JUMMAH HAZRAT AMIR’UL MOMENEEN MUHYI-UD-DIN AL KHALIFATULLAH MUNIR AHMAD AZIM 07 Août 2009 (Résumé du Khutba Jummah) Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine lire ça verset Quran suivant là:  “Qul inniii ‘umirtu an ‘a’-budullaaha mukhlisal-lahuddin; Wa ‘umirtu li-‘an ‘akuuna ‘awwalal-Muslimiin”. « Dire: ‘Mo fine gagne l’ordre pou adore Allah, et réserve tout adoration pou Li. Et mo fine gagne l’ordre pou être le premier pou soumette (à Allah)’. » (Ch. 39 Az-Zumar V.12 & 13) Ça verset qui mo fine réciter montrer nous ki la soumission à Allah (Islam) li marcher côte à côte avec Imaan. Celui qui soumette à Allah complètement avec sincérité, Allah déverse lors li la Lumière de la foi (imaan). Anou analyse un peu séki veut dire “Imaan” et couma l’homme li gagne Imaan en Allah et li reste ferme dans so la foi. Tout musulman bizin enan ene connaissance de bane kalimas qui exister en Islam car la connaissance de bane croyances en Islam raffermi ene dimoune qui dire li croire en Allah et so Rassool, Hazrat Muhammad (s.a.w). Ene croyance de la foi c’est le “Imaan Mofassal”:  “Amantu billaahi wa malaa-ikatihi wa kutubihi wa rusulihi wa yawmil aakhiri wa qadri khairihi wa sharrihi minal-laahi ta’ala wal ba’çi ba’dal mawt” Alors ça croyance de la foi là clairement démontré ki ene mouslemeen (croyant en l’unicité d’Allah) li bizin croire en Allah, en so bane anges, so bane prophètes, so bane livres, le dernier jour (c-à-d, le jour du jugement), le destin (takdir) et la vie après la mort. Ici dans ça verset qui mo fine dire au commencement, Allah pé address so Bien-Aimé Prophète, Hazrat Muhammad (s.a.w), et pé donne li instruction pour ki li passe le message à bane croyants et incroyants lors so croyance ferme en Allah et le fait ki li recevoir la revelation de côté d’Allah pour amène l’humanité vers Allah (swt). L’Islam li ene façon de vivre et non ene religion apart. La vie de nous bien-aimé prophète Hazrat Muhammad (s.a.w) clairement montrer nous ki li pas ti pé vivre Islam comme ene religion mais en fait li ti pé vivre Islam tout simplement – c.à.d, li ti pé soumette complètement à la volonté d’Allah dans ene telle façon ki quand nous guette le Quran nous pou trouve la vie du Saint Prophète (s.a.w) et quand nous guette la vie du Saint Prophète (s.a.w), nous pou trouve le Quran en pratique. Imaan ki ene prophète gagner li vraiment exceptionnelle, car c’est Allah même qui dirige li vers li-même. Le Saint Prophète (s.a.w) ti gagne l’ordre avec Allah pour dire qui li-même li le premier pour soumette à Allah. Imaan qui li fine gagner, c’est Allah ki fine montrer li couma gagne ça imaan là en obeissant so bane commandements. Allah li l’Etre Suprême et péna ene l’autre couma li. C’est Li qui fine établir bane la loi pour qui l’homme adore Li (Allah) tousel et pour qui li pas dépasse bane limites. Mais comment nous croire dans le bien qui Allah donne nous, nous bizin croire aussi dans le mal qui representer par Shaytan. Pas seulement bane versets Quran témoigne de so l’existence mais aussi bane hadiths du Saint Prophète (s.a.w). Éna ene Hadith ki rapporter par Hazrat Aisha (r.a) kot le Messager d’Allah (s.a.w) fine dire: “Bane anges fine creer avec la Lumière, bane jinns fine créer d’ene difé sans la fumée, et Adam (fine créer) d’après séki fine déjà décrire” (Muslim) Ene de bane principes de l’Islam couma nous fine comprend par l’exemple du Saint Prophète (s.a.w) c’est ki parole bizin marcher avec action: parole de nous le Cœur et de la langue, et action ki le Coeur prend, ainsi ki la langue et bane sens. La foi li gagne so valeur par l’Islam parski l’Islam c’est ça l’obeissance parfait ki nous ena en nous Créateur et li affaiblit par ene désobéissance pour soumettre à la volonté d’Allah. Dans plusieurs place dans Quran Allah faire la comparaison entre bane vrai musulmans, bane hypocrites et bane ki pas croire du tout en so l’Unicité et bane les autres articles de la foi couma So bane prophètes, livres, anges, destin etc... Allah, couma décrire par so attribut “Al-Ghafoor” (Le Très-Pardonneur), li certainement pardonne so bane créatures parski Li conner ki zotte faible et ki souvent des fois zot capave pencher vers le mal. De ce fait, Li faire comprend ki Li prêt pour pardonner, mais faudé so bane serviteurs vine vers Li avec ene le Cœur vraiment rempli avec regrets et ki zot pas approche avec ça mal ki zot fine commette encore. Dans Quran Ch.39 (Az-Zumar) V.54, Allah commande le Saint Prophète (s.a.w) pour dire:  “O mo bane serviteurs, ou qui fine commette bane excès contre ou même, pas désespérer de la miséricorde d’Allah, parceki Allah pardonne tout faute, et c’est Li le Pardonneur, le Miséricordieux”.  “Mais celui qui préfère la vie future et faire zéffort dans ça but là, et li en même temps ena la foi, so zéffort pou récompenser” (Ch.17 Bani Israël V.20) Mais pour celui ki reste ferme dans so la foi, Allah li pas tarder pour mentionner dans le Quran dans plusieurs place ki pour celui ki croire, li pour gagne bane jardins kot pour ena bane la rivières qui pou couler au milieu. Allah dire: “Yaa ayyuhal lazinaaa aamanuu” – O ou ki fine amène Imaan (O ou ki croire). Le mot croire qui Allah servi dans Quran li bien profond. Pas tout dimounes ki capave gagne ça la foi ferme ki Allah envie ki so serviteur gagné, malgré tout bane épreuves de la vie. La foi li bien fragile. Li bien facile pour dire qui “ mo fine gagne la foi” mais pour suivre bane principes de la foi li bien difficile et souvent bane dimounes zot tombe dans le desespoir kot zot laisse zot tenter par bane attractions de ça le monde matériel là plisse ki Allah. Allah dire dans Ch.10 Yoonus V.8-9 :  “Bane ki refuse croire qui (ene jour) zot bizin joine Nous, et qui gagne plaisir dans la vie lor la terre et qui satisfait avec ça, et bane qui pas prend compte de Nous signes, ça bane là, zot la case c’est difé parcequi zot ti travaille pour ça”. Plus devant dans V.10, Allah dire:  “Mais bane qui ena la foi et faire de bonnes actions, zot Maître pou guide zot à cause de zot la foi, et cote zot lipié bane la rivière pou couler, dans bane jardins avec tout confort”. Par ça bane versets là, nous trouver ki le Paradis et l’Enfer, zot ene réalité qui ene croyant pas capave dénié (refuse croire). Si li dire li ene croyant, li bizin croire en tout bane choses ki Allah fine dire li bizin croire. Mais so Islam li seulement envers Allah et so Imaan li envers tout séki li fine gagne commandement pour croire. Ça la terre là li bien temporaire. Séki éternel et garantie pour celui ki croire et faire bane bons actions, c’est bane récompenses ki l’homme même pas capave imaziner. So l’esprit li arrêter seulement avec ça le monde ki nous pé vivre là. Bane choses de l’invisible, zot bel et bien exister mais l’esprit pas pou capave mette ene z’imaze lors zot. Sel guidance ki nous ena de l’invisible c’est bane guides et avant-goût ki Allah donne nous dans le Quran. Nous pas capave trouve avec nous lizié physiques bane bienfait du paradis, ni trouve bane atrocités de l’enfer, mais à travers bane descriptions ki Allah mentionner dans Quran, nous capave imaginer couma li capave été. La notion de l’enfer et paradis zot capave aussi réfère à l’enfer et paradis qui ene dimoune capave vivre lors la terre. Hadiths: Hazrat Ubada (r.a) rapporter ki le Messager d’Allah (s.a.w) fine dire: “Si ene dimoune testifier ki pena nennier pou adorer aparte Allah tousèl, ki péna aucaine partenaire et ki Muhammad (s.a.w) li So serviteur et so Messager et ki Jesus (a.s) li le serviteur d’Allah et So prophète et So parole ki Li (Allah) fine donne Mariam (r.a) et li (Jesus) ene l’âme ki vine de Lui (Allah), et qui paradis et l’enfer vrai, Allah pour admette li dans Paradis avec bane actions ki li fine faire, même si so bane actions zot bien tiguite”. (Bukhari) Dans ça siècle qui nous pé vivre là, nous Paradis c’est Allah et la révélation qui Li pé faire dessane par le Ruh-il-Qouddouss (le Saint Esprit). L’enfer nous capave trouve li en la forme de bane calamite et atrocités qui bane dimounes qui fine dépasse limites lors la terre pé faire face. Tanque ki nous reste attacher avec Allah nous pou trouve ça Paradis là malgré le fait ki nous capave pé passé par bane épreuves. La force d’ene croyant c’est kan li reste ferme envers tout bane commandements de so Seigneur et li faire li ene devoir pour mette zot en pratique et invite les autres à suivre ça l’exemple là. Hadiths: Hadhrat Sufyan ibn Abdullah (r.a) fine rapporter: “Mo fine dire: ‘O Messager d’Allah, donne moi bane telle guidance à propos Islam ki bien claire ki mo pas pou bizin demande aucaine les autres dimounes”. Le Saint Prophète (s.a.w) fine réponne, “Dire: ‘Mo croire en Allah’ et après to reste ferme (lors là)”. (Muslim). Dans Ch. 49 Al-Hujurat V. 11, Allah dire:  “Bane croyants zot vraiment bane frères. Alors faire la paix entre ou deux frères, et craindre Allah, pou qui ou gagne So miséricorde”. Celui ki aide et content so prochain pour l’amour d’Allah et So Rassool (s.a.w), alors Allah en retour pour content li. Tout bénédiction ki ene croyant li gagner li gagne li seulement par la permission d’Allah. Hadiths: Hazrat Anas rapporter ki le Messager d’Allah (s.a.w) fine dire: “Personne d’entre ou pou gagne la foi excepter si li content moi plisse ki so papa, z’enfants et tout l’humanité.” (Bukhari) Imaan (La foi) c’est ça la clé qui ouvert la porte de la paix pour ene croyant malgré bane difficultés de la vie. Quoique l’homme li faible par so nature, mais si li dire li croire en Allah, alors li bizin faire ene z’éffort dans le chemin d’Allah. Avec chaque z’éffort ki li faire, et li pas renonce à so la foi malgré tous bane difé ki li passé, alors Allah vine près avec ça dimoune là et Li aide ça croyant là pour raffermir so la foi et gagne ene la paix qui li pas ti pou gagner si li ti tourne le dos. Hadith: Hazrat Zayd ibn Khalid al-Juhaniyya (r.a) fine rapporter ki : Le Messager d’Allah (s.a.w) fine dirige la prière du matin en congrégation à al-Hudaybiyah après ki ene la pluie fine tomber pendant la nuite. Quand le Prophète (s.a.w) fine fini, li fine faire face à bane dimounes et li fine dire: “Estcequi zot conner ki zot Rab fine dire?” Zot fine réponne: “Allah et So Messager plus conner ki nous.” Li dire (ki Allah fine dire): ‘Azordi ene de Mo bane serviteurs fine vine ene croyant en Moi et ene l’autre (fine vine) ene incroyant. Pour celui ki fine dire: ‘Nous fine gagne la pluie par faveur d’Allah et so Miséricorde’, ça dimoune là li croire dans Moi et li pas croire dans (pouvoir) bane z’étoiles, et l’incroyant c’est celui ki fine dire: ‘Nous fine recevoir la pluie par tel ou tel z’étoile, ça dimoune là li pas croire dans Moi, mais li ene croyant en bane z’étoiles”. (Bukhari, Malik, an-Nasaï) Le croyant c’est celui ki ena confiance en Allah, confiance ki Allah ena le pouvoir pou pardonne li so bane faiblesses et so bane péchés. Li répentir sincèrement pour so bane mauvais actions et li ena l’espoir de bane bienfaits venant d’Allah et li peur le jour ki li pour zoine so Seigneur. Hadith: Hadhrat Anas (r.a) raconté ki le Messager d’Allah (s.a.w) ene jour fine alle visite ene jeune homme ki ti près pou mort. Le Prophète (s.a.w) fine demande li, “Dans ki l’état to été astaire là?” Ça jeune homme là reponne "O Messager d’Allah! Mo l’état c’est ki mo ena l’espoir pour gagne la miséricorde d’Allah, mais, en même temps, ena ene crainte d’ene punition pour bane péchés (ki mo fine faire).” Le Prophète (s.a.w) fine dire, “Croire (séki mo pé dire ou), celui ki so le Coeur ena ça deux sentiments de l’espoir et la crainte au moment de la mort, Allah pour en vérité accorde li séki li fermement attane de So Miséricorde et préserve li de ça punition ki li pé gagne peur là.” (Tirmidhi) Ena plusieurs branches dans la foi. Ena le plus haut degré de la foi et le plus simple. Hadith: Hadhrat Abu Huraira (r.a) fine rapporter ki le Messager d’Allah (s.a.w) fine dire: "La foi ena plisse ki 70 branches, et le plus excellent c’est la déclaration qui péna aucaine les autres Bondié aparte Allah, et le plus humble (parmi ça bane degrés là) c’est kan (ene dimoune) retire ene kitchose qui pour blesse ene dimoune lors la rue. Et la modestie li ene branche de la foi.” (Bukhari et Muslim) Ça hadith là montré ki le degré de Imaan li varié avec bane actions ki le croyant li faire dans le chemin d’Allah. Pour tous bane bons actions ki li faire, li pou gagne so récompenses auprès d’Allah et ça bane actions là aussi démontré, si li ena ene le Cœur pur, le degré de la foi ki so le Cœur contenir envers Allah. Mais le plus parfait de bane degré de la foi, li clairement démontré en l’exemple parfait de nous bien-aimé aka Hazrat Muhammad (s.a.w). Ki teste li pas fine passé de côté d’Allah pour prouve so sincérité et so fidélité à Allah et so la foi en Allah et séki Allah fine donne li en révélation pour prêche l’humanité? Ça hadith ki mo pou mentionné là, montré ki kalité Imaan le plus noble des prophètes ti ena en Allah (swt): Hadith: Hadrat Jabir bin Abdullah (r.a) fine rapporté: Nous ti alle avec le Messager d’Allah (s.a.w) lors ene expédition vers Najd et le Messager d’Allah (s.a.w) fine trouve nous ene vallée kot ti ena ene tas pié rempli avec piquants. Le Messager d’Allah (s.a.w) fine alle reposer enba ene pié et li fine apendant so l’épée lors ene de bane branches de ça pié kot li ti pé alle reposer. Bane dimounes fine éparpiller dans ça vallée là et zot aussi fine alle prend repos dans l’ombrage de bane piés. Et le Messager d’Allah (s.a.w) fine dire: “Ene dimoune ti vine vers moi pendant ki mo ti pé dormi et li fine prend ça l’épée là. Mo fine léver et mo fine trouve li pé deboute kot mo la tête et mo pas ti encore vine tout à fait conscient ki l’épée là ti dans so la main. Et li (dimoune là) fine dire: Ki sanla capave protège toi contre moi? Mo fine dire: Allah. Li redire: Ki sanla capave protège toi contre moi? Mo dire: Allah. Alors ça dimoune là fine remette l’épée là dans so fourreau (et zot capave trouve) ça dimoune là pé assizer là. Le Messager d’Allah en aucaine cas pas fine touche li.” (Muslim) Alors nous tous bane Mouslemeen, nous pas seulement bizin dire nous croire en Allah mais nous bizin aussi mettre en pratique bane principes de l’Islam couma Allah fine commande nous afin ki nous vine ene vrai croyant. Et nous ena l’exemple parfait de nous bien-aimé prophète (s.a.w) pour guide nous vers nous but pour gagne ene Imaan solide en Allah arrive séki arrive.  “Wa maa lahum-bihii min ‘ilm. Iny-yattabi-uuna ‘illaz-zaan; wa ‘inna-zanna laa yugnii minal-Haqqi shay-‘aa. Fa-‘a’-riz ‘amman-tawallaa ‘an-zikrinaa wa lam yurid ‘illal hayaatad-dunyaa”. (Zot pas ena aucaine connaissance lor là. Zot pé simplement suive zot propre suppositions; mais suppositions pas profite narien, vis à vis la vérité. Alors écarte toi avec celui qui tourné le dos à Nous message, et qui content seulement la vie lors la terre) Qui Allah raffermi nous tous nous la foi en Li et Li donne nous le courage pour assume nous Islam dans la meilleure façon ki exister. Ameen. Soumma Allahoumma Ameen.