Text Box: بسم الله الرحمن الرحيم   Khutba Jummah   HAZRAT AMIR’UL MOMENEEN MUHYI-UD-DIN AL KHALIFATULLAH   Munir Ahmad Azim     09 Octobre 2009   (Résumé du Khutba Jummah)     Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine lire ça verset Quran suivant là:        Wastagfirillaah; innal-laaha kaana Gafuurar Rahiimaa.   Demande pardon Allah, parceki Allah rempli de pardon et de pitié. (Chapitre 4 An-Nisa Verset 107)   Le pardon (dans contexte de la religion) veut dire gagne protection d’Allah dépi bane mauvais conséquences de nous bane mauvais actions et aussi le fait ki Allah cachiette ça bane mauvais actions là, kot Li mette ene parda lor là. En vérité Allah ena capacité pou faire ça parski c’est Li le Tout-Puissant, rempli de pitié et de miséricorde pour So bane créatures.   Le répentir et le pardon zot alle ensam. Le répentir (Istigfaar et Tauba) c’est kot nous reste réalise nous bane erreurs et nous éloigne nous de bane mauvais actions, ki li avec nous le cœur et aussi avec nous le corps. Allah content ça dimoune ki implore Li pou So pardon et li répentir sincèrement pour so bane péchés et erreurs et ena l’espoir ki Allah pou pardonne li et pou admette li dans So miséricorde. Alors, Tauba (rode le pardon d’Allah) li bien souvent associé avec le fait ki demande pardon d’Allah avec nous la langue ; pas zis ça, mais aussi avec nous le cœur et nous l’âme. Demande pardon avec Allah li pareil couma supplier Allah, et si Allah oulé, Li capave réponne à l’appel de ça dimoune ki pé rode So pardon et en dernier Li décide pou pardonne li. Tous ça là dépanne d’Allah. Ça li ene vérité spécialement si ça supplication là li sorti directement de le cœur de ça serviteur là, dans ene telle façon ki ça dimoune là li troublé par so bane mauvaises actions et envie avec tout so le cœur ki Allah pardonne li. En plus de ça, si ça serviteur faire ça bane supplications là dans bane l’heure kot Allah accepter bane supplications et bane demande de pardon, alors Allah pou pardonne li. Ça bane l’heure là, li trouve spécialement dans bane moments avant lever du soleil, pendant le Tahajjud ou juste après (ziska Fajr).   Le Messie Promis Hazrat Mirza Ghulam Ahmad (as) fine compare le Tauba (la demande de pardon avec Allah) à bane racines d’ene pié, ki aussi longtemps ki li dans la terre, ena l’espoir ki li produire bane feuilles verts. Pou li aussi ene vrai répentir li pas zis dans bane paroles, mais ça répentir là bizin réflecter en pratique, kot ça serviteur là li faire bane bonnes actions pou remplace ça bane mauvais ki li fine faire là et pou montrer à travers ça so désire pou réforme li. Alors kan ene serviteur d’Allah li répentir et li demande pardon, li faire bane telles bonnes actions ki embellir so répentir. So répentir à Allah li rempli avec humilité, et de ça humilité du cœur là, li gagne ene nouvo la vie, ki faire li vine pli près avec Allah.   Ene serviteur d’Allah bizin gagne l’habitude pou trempe so la langue dans Istigfaar, kot li demande Allah : « O Allah, pardonne-moi » parski li pas conné aussi dans ki moment, ki l’heure, ki séconde, Allah capave réponne so l’appel et pardonne li. Alors sakaine parmi nous bizin demande Allah pardon tous le jours de nous la vie, pareil couma nous Aka Hazrat Muhammad (saw) fine montrer nous. Partout kot nous été, dans bane travails ki nous faire etc., nou demande Allah pardon parski nous pas conné, Allah capave accepter nous répentir dans ça bane moments là, couma Li content.   Hazrat Abu Hurairah (ra) fine rapporté ki le Saint Prophète Muhammad (saw) fine dire, « Mo fer serment lor Allah ki mo supplié Allah pour So pardon et mo tourne vers Li en repentance plisse ki 70 fois par jour. » (Bukhari)   Shaddad ibn Aws (ra) fine rapporté ki Hazrat Muhammad (saw) fine dire:   « Façon pli supérieur pou demande Allah pardon c’est :       “Allahumma anta Rabbi laa ilaaha illa, anta khalaqtani wa ana abduka, wa ana ‘ala ahdika wa wa’dika mastata’tu, A’udhu bika min Sharri ma sana’tu, abu’u Laka bini’matika ‘alaiya, wa Abu’u bidhanbi faghfirli innahu la yaghfiru adhdhunuba illa anta.” O Allah, to mo Maître. Personne pas mériter d’être adore aparte Toi. To fine créer moi et mo To esclave, et mo reste ferme avec To pacte et To promise d’après mo capacité. Mo cherche refuge dans Toi contre bane mauvais ki mo fine commette. Mo reconnaite To bane faveurs/bénédictions lors moi et mo admette mo péché, car en vérité, péna personne ki capave pardonner excepté Toi.   Le Prophète (saw) fine ajouté: « Si kikaine récite ça pendant le jour avec ene la foi ferme là-dans, et arriver mort même jour avant la nuit, li pou parmi bane dimounes du Paradis ; et si kikaine récite li à soir avec la foi ferme là-dans, et arriver mort avant lizour, li pou parmi bane dimounes du Paradis. » (Bukhari)   Kan nous commette ene péché, fine prescrire quatre témoins contre nous. En premier, ena ça lieu kot nous fine faire crime là, couma le Quran Shareef dire : « Ça jour là, la terre pou révèle tous so bane sécrets. » (Chapitre 99 Verset 5)   En deuxième lieu, ena ça membre de nous lécorps ki fine commette ça péché là. Ça fine décrire dans le Quran en forme de ça verset là : « Kan zot zoreilles, zot lizié, zot la peau pou témoigné contre zot. » (Chapitre 41 Verset 22) et « Ça jour là Nous pou scelle zot la bouche, et zot la main pou causer et zot lipié pou témoigné de tous saki zot fine faire. » (Chapitre 36 Verset 66)   Ensuite, Allah mentionne le fait ki ena bane anges ki enregistré tous bane actions de So bane serviteurs. « Bane Scribes honorés conné séki ou faire. » (Chapitre 82 Verset 12) « Nous enregistrer saki zot envoyer devant zot, et zot bane pas, et tous kitchoses Nous garde dans ene registre clair. » (Chapitre 36 Verset 13) Allah conne tout, Li conne tous séki passer et Li trouve tous nous bane actions, ki li bon ou pas bon. Le moment ki ene serviteur d’Allah regretter de so bane mauvais actions et so le cœur humilié par ça regret là, alors li dirige so la langue, so le cœur et so l’âme pou demande pardon Allah pou so bane mauvais actions. Alors à ça moment là Allah vine so Protection contre so bane mauvais actions, pareil couma ene avocat intelligent ki défende so bane clients, mais Allah Li li défanne so bane serviteurs plisse ki ça et Li accepter so bane répentir.    Hadith: Hazrat Abu Huraira (ra) fine dire: “Mo fine entende le Messager d’Allah (saw) dire, « Ene serviteur fine commette ene péché et li fine dire : « O Allah, mo fine commette ene péché, alors pardonne-moi. » Allah fine dire : « Eski mo serviteur conné ki li ena ene Maître ki pardonne péchés et ki aide li ? Mo pardonne Mo serviteur. » Après quelques temps, ça dimoune là fine faire ene lotte péché, alors li dire : « O mo Maître, mo fine commette ene lotte péché, alors pardonne-moi. So Maître fine dire : « Eski Mo serviteur conné ki li ena ene Maître ki pardonne péchés et ki aide li ? O serviteur, faire séki to envie. Mo fine pardonne toi. » (Bukhari) Hazrat Anas (ra), kan à li fine rapporté : « Mo fine entende le Messager d’Allah (saw) dire :   Allah (twa) fine dire :   « O garçon Adam, aussi longtemps ki to appelle Moi et demande Moi, Mo pou pardonne toi pou séki to fine faire, et Mo pas pou casse la tête avec ça. O garçon Adam, même si to bane péchés arrive hauteur bane nuages dans le ciel et si to demande Moi pardon, Mo pou pardonne toi. O garçon Adam, si to vine vers Moi avec péchés ki capave rempli ça la terre là, et arriver to faire ena pou vine devant Moi, sans associé personne avec Moi, Mo pou accorde toi le pardon aussi grand ki ça (la terre là). » (Tirmidhi)   Alors Allah Li bien Pardonnant, excepté pou ene seul grand péché ki Li detesté et ki jamais Li pas pou pardonner, c-à-d, si ene dimoune faire le Shirk (Allah pas pou pardonne li). Mais nous bizin garde à l’esprit ki ça applique pou nous bane Musulmans et à bane les autres dimounes ki fine consacrer zot la vie adore les autres kitchoses excepté Allah ou sois donne ene lotte kitchoses plisse l’importance ki Allah. Mais pour celui ki répenti sincèrement à Allah et accepter so bane erreurs et soumette li complètement à Allah, alors Allah lave li de tous so bane péchés et faire li vine aussi pure ki ene nouvo-né, couma dire li fine gagne ene nouvo la vie, ene nouvo départ.   Ubada ibn As-Samit (ra) rapporté ki le Saint Prophète (saw) fine dire :   Celui ki lévé à soir et dire :   « Péna personne à être adoré aparte Allah. Li tousel, sans aucaine partenaire. Li ena la royauté et tout gloire pou Li. Li puissant lor tous kitchoses. Toutes louanges pou Allah. Tous gloire pou Allah. Personne pas mériter être adoré excepté Allah, et Allah Li pli grand et péna ni force ni puissance excepté en Allah. » Et après li dire : « O Allah ! Pardonne-moi. » ou bien li invoke Allah, alors Allah pou réponne so l’appel et si li faire Wuzu (et faire Namaz), so Namaz pou accepter. » (Bukhari)   Islam guide nous encore plisse vers le salut avec plusieurs supplications pou nous capave faire pou demande Allah pardon. Bane l’examples de bane telles supplications nous trouve li dans le Quran comme suite :      Rabbana la tu’akhidhna in-nasina aw akhta’na. Rabbana wala tahmil alayna isran kama hamaltahu ‘alal-ladheena min qablina. Rabbana wala tuhammilna ma la taqata lana bihi wa’fu anna waghfir lana wairhamna anta mawlana fansurna ‘alal-qawmil kafireen.   « O nous Maitre, pas attrape nous si nous fine oublier quique chose, ou bien si nous fine faire ène faute. O nous Maitre, pas faire nous charier ène fardeau couma To ti mette lor dimoune avant nous. O nous Maitre, pas faire nous charier ce qui nous pas éna la force pou charier. Passe lor nous fautes, pardonne nous, gagne pitié pou nous. Toi nous protecteur. Aide nous contre banne sans la foi. » (Chapitre 2 Al-Baqara Verset 287)   Allah content nous repentir; ki nous supplier Li pou pardonne nous. Li content kan So bane serviteurs bizin Li et supplier Li pou accorde zot zot nécéssité et pou pardonne zot, parski bane humains fine être créer faibles. Nous, dans la Jamaat Ul Sahih Al Islam nous bizin tous les temps reste absorbé dans Istigfaar, pour supplier Allah pou accorde nous le pardon pou tous nous bane faiblesses ki nous capave ena. L’homme comme ene bébé, li fine né pure mais so l’environnement ki faire li plongé dans bane erreurs et bane péchés. Zis nous le cœur repentant et nous Tauba avec ene le cœur sincère ki pou capave efface nous bane faiblesses, nous bane manquements. Et nous bizin faire li ene l’habitude, spécialement dans siècle ki nous pé vive pou demande le pardon d’Allah pareil couma nous modèle Hazrat Muhammad (saw) ti faire car c’est à travers ça kalité répentir là ki nous pou réussi faire face à bane difficultés ki le chemin de l’Islam renfermer. Mais laisse moi rassure zot, O mo bane chers compagnons ki zot le temps et travail dur pour la cause d’Allah zamais pas pou ignorer par Allah. Ou sans aucaine doute bane bien-aimés d’Allah et So bane chers serviteurs. Alors faire encore plisse zefforts et pas hésiter pou dévide zot le cœur devant zot Rab ; recherche So pardon pou sakaine de zot erreurs, pou sak kitchoses ki zot penser zot fine faire mal. Allah content bane ki reconnaite zot fautes et repentir, et demande avec li (pour tous zaffaire). Alors jamais pas fatiguer pou demande pardon à Allah. Allah Li, Li pas fatiguer pou entende bane supplications et bane la peines de So bane serviteurs. Nous tous nous pas parfait, et nous ena beaucoup faiblesses tandis ki Allah Li parfait et infaillible.   Alors, après nous repentance et demande Allah pardon, nous bizin reforme nous-mêmes et nous bane actions et nous pas bizin retourne lors nous pas et vine bane victims de satan. Comme Allah Li miséricordieux envers nous, nous bizin montrer nous gentil envers bane lezot dimounes, nous bane frères, sœurs et zenfants. Nous bizin apprane pou pardonner et pou oublier et prier pour bane les autres dimounes ; kan nous le cœur pou rempli avec ça sentiment de miséricorde là, Allah pou montrer Li miséricordieux envers nous. Mais si nous cruel envers les autres, et nous renier zot zot droit pou gagne nous pardon, Allah pas pou montrer Li miséricordieux envers nous. Nous bizin cultive So attribut de pardon dans nous, pou ki nous capave expect (attane) ki Allah pou montrer Li miséricordieux envers nous et accorde nous So pitié. Allah Li en vérité nous Maître. Allah Li pardonnant, mais Li puni aussi si nécéssaire, surtout dans l’époque ki nous pé vive kot le monde fine tombe dans marré noir, kot l’unicité d’Allah fine perdi so valeur dans le cœur de l’humanité.       Rabbana zalamna anfusina wa il lam taghfir lana wa tarhamna lana kuna minal-khasireen « O nous Maître, nous (accepter) nous fine faire du tort à nous-même. Si To pas pardonne nous et donne nous To grace, surement nous pou alle dans la perte. » (Chapitre 7 Al-Arraf Verset 24)