Text Box: بسم الله الرحمن الرحيم Khutba Jummah HAZRAT AMIR’UL MOMENEEN MUHYI-UD-DIN AL KHALIFATULLAH Munir Ahmad Azim 11 Decembre 2009 (Résumé du Khutba Jummah) Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine lire ça verset Quran suivant là:  Wa izaa balagal-atfaalu min-kumul-huluma falyasa-‘ zinuu... Mais kan ou zenfants fine vine jeune fille ou jeune homme (c’est-à-dire, arrive l’âge de puberté)... Dans la vie de l’homme, la jeunesse li ene l’étape très important. C’est dans ça stage jeunesse là ki so intélligence fortifié et par so bane réfléction et analyse ki pou faire li comprend la vie pratique. Si dans so jeunesse li pas fine gagne ene bon formation saine, alors li pou gaspille so jeunesse dans bane kitchoses inutile et mauvais et ça pour vine ene grand danger pour li parski so la vie en entier pour alle dans ene mauvais tournure (direction). Mais, si dans l’âge de jeunesse même, ça ti jeunesse là, li prépare li pour suive le Sunna du Saint Prophète (saw) et li pé faire ene préparation vers so propre responsabilité, alors li capave convertir ene nation mort en ene nation vivant, par so bane bonne conduite et so volonté de travail pour vraiment exemplaire (pour les autres dimounes). Mais l’histoire pour faire mention de ça bane jeune ki fine servi l’humanité tout entier parski ça bane jeunes là fine comprend zot rôle dans la vie et zot fine améliore l’avenir de la nation par zot conduite, zot courage et zot dévouement au travail. Zot fine aussi capave contrôle zot l’esprit pour pas faire la violence et de brigandage (parski dans ene l’âge tendre, ça l’âge là, beaucoup gagne tendance pour amusé ou pour suivre bane les autres séki pé faire). Alors, l’histoire montré nous, nannié pas accompli sans sacrifice, parski l’esprit de sacrifice li trouve dans l’homme même ça (c’est so caractère) et ça caractère là, li formé par ene formation de base. Ene fois ki ça jeune là, li bien formé et bien embelli par de hautes qualités d’esprit et de corps, li pour sacrifié tous, même jusqu’à so la vie, pour atteindre so bane buts de prospérité et de stabilité de so pays. A ce moment là, ça jeune là, li digne pour appelle li jeune. Ene jeune li vraiment l’architecte de l’édifice national. Alors li bien important ki ça jeune là faire ene travail, li faire li avec discipline, avec sacrifice, avec vigueur, avec patience et surtout couma pour faire li (travail là). Eski ou conné couma appelle ene la caze ki fine construire en bloc de ciment ? Ene l’autre avec dibois ? Eski ou capave donne ene l’autre nom ki la caze en béton ou la caze en bois. Alors comment ou pou appelle ene édifice national ki fine construire lors l’ignorance, lors le mensonge, et lors la malhonnêteté ? Alors tous ça là dépanne lors bane matériel ki fourni. Puisque li pas facile pour atteindre ene stage pareil, ene jeune mérite ene bon l’entrainement. Comme baze, ça jeune là bizin préserve ene vigueur physique et li pas gaspillé bêtement dans bane plaisirs ki pas bizin (cigarette, la boisson alcolique, dansé, jeu de hasard – lotteries, lécourse, parié lors cheval, etc. – passe la nuit dans bane clubs, disco etc.) Tellement ena bane kitchose à dire ki dans ene Khutba Jummah pas pou capave fini dire tous. Séki faire moi beaucoup triste et chagrin, kan mo guette bane jeunesse Musulmans dans ki l’état de dégradation la religion parfait (Islam) fine arrivé. Même bane parents aussi pas prend compte de ça l’enseignement divine là (Quran Shareef) et ça modèle parfait là (Hazrat Muhammad (saw)). Pas bizin guette loin de nous, nous guette bane kitchose ki pé passé tous les jours dans nous la vie ici-même (c’est-à-dire, à Maurice). Après ki bane jeunesse fine tombe dans la drogue, l’amusement, toute sortes qualité vice et maintenant pé encourage dimounes pou noye dans immoralité, tel couma légalise la prostitution, la sodomie, et aussi encourage dimounes, surtout bane jeunes pou vine zougadère. Beaucoup Musulmans, z’hommes, femmes et zenfants et surtout bane jeunesses pé tombe dans jouer l’argent Haraam (illicite) et guette ki pé arrivé dans ça pays là, kot crime, vol, viole, suicide, la drogue, la boisson alcolizé fine vine ene zaffaire normale de tous les jours. Dimounes pé boire toute sortes de boissons alcolizé couma la bière, rhum, du vin kot ça détourne complètement zot l’esprit de la moralité et la décence. La vie pé vine de plus en plus dure et difficile avec bane prix de bane kitchoses ki pé monté couma flèche (et ça faire moi pense bane révélations ki Allah fine donne moi à plusieurs reprises depuis l’année 1999 jusqu’à maintenant ki Maurice et bane lézot pays pou arrive ene telle situation de crises, kot tous bane prix pou monté...) Mais malgré ki bane prix pé monté, mais nous bane frères, sœurs et zenfants Musulmans pas pé prend ene leçon de ça. Au contraire, zot pé faire plisse l’étalage de zot richesses, et même si zot pas riches, zot faire bane l’étalages et toutes sortes de gaspillage à tout les niveaux (pas seulement l’argent). Malheureusement séki pé passé dans le Ummah de Hazrat Muhammad (saw) li bien bien triste ; plus grave encore séki pé passé dans le Jamaat de Hazrat Massih Maoud (as), kot bane soi-disant grands défenseurs de l’Islam fine réduire en cendres so bane l’enseignements sublimes – bane tels l’enseignements ki ti ene revivification de bane l’enseignements de l’Islam, du Quran Shareef. Eski ou pou croire ça ki dans Jamaat Hazrat Massih Maoud (as) ki kalité l’étalage ena dans bane fiançailles, mariage et Walima. Ena fine faire fiançailles dans l’hotel, avec la musique slow et tous bane soi-disant défenseurs du Jamaat de Hazrat Massih Maoud (as) ti pé assizé avec ene la joie et contentement, kot zot soi-disant Amir là été, l’ordre fine gagné pas invite Munir, ni bane ki suivre li. Si trouve zot nous alors, quitte mariage ou fiançailles, ou Walima ! Mais la musique jouer, ça bane dimounes zot être encourager pou assizé et concentré dans la musique. La musique fine vine plus important ki bane dimounes ki fine reconnaître la Manifestation Divine – et ou fine trouvé ça ene fiançaille kot fine faire bél bél l’étalage avec so diner plisse ki 200 dimounes invité. Kot l’enseignement de l’Islam fine allé – disparaître complètement, fine bafoué. Eski Allah (swt) pas bizin envoye So serviteur Choisi avant ki Li envoye So punition, eski ene Avertisseur pas bizin vini de côté d’Allah ? Malheureux ça, malheureux pour trouve l’enseignement de l’islam piétiner en bas lipié ça bane soi-disant Amir ou grand défenseurs de l’Islam. Alle faire tarbiyyat et classe de Tarbiyyat de bane jeunesse ki trouve dans le Jamaat, en place veille zaffaires les autres dimounes, faire palabres (Ribat), créer la haine dans le cœur lézot dimounes ki envie suivre le droit chemin. Alors le jeune, celui ki fine prend ene engagement pou marié, li bizin prend so disposition aussi, et amène so parents pou comprend l’importance pou faire sois ene ti fiançailles simple et ene mariage encore plus simple, ki rempli avec barakat Allah et faveurs divines. Le jeune bizin prend de l’avant pour construire so l’avenir. Faudé pas li laisse so Deen-é-Islam, ki trouve dans li-même mort. Pour so travail li bizin ena volonté, bizin ene jeune ki bane les autres capave faire li confiance. Li bizin ena ene l’esprit de sacrifice, et li bizin ena la piété. Li bizin évite cause menti. Tous ça là li bien essentiel dans ene bon formation de caractère, sans quoi l’édifice futur li pou menacé. Avec ça, li pour couma ene construction en blocs (béton) ki pou servi comme ene modèle. Le Saint Prophète (saw) fine dire : Ou pas pou réussi dans ou bane travail, même avec ou bane richesses ki ou possédé, mais ou pou réussi dans ou bane travail par ou bane bon qualités ki ou pou ena. Kan ou fine réussi inculqué ça bane bons qualités là dans ou et aussi ou pé faire bane les autres jeunes ki avec ou pratique ça bane bon qualité là, lerlà nous pour capave ena ene grand l’espoir lors l’intérêt national collectif et aussi l’intérêt individuel. C’est dans l’état d’esprit ki capave change le destin d’ene nation. Pour gagne ene l’esprit de sacrifice, li pas vine coumsa même ; bizin ena ene grand l’entrainement et derrière l’esprit de sacrifice bizin ena la force morale et spirituelle, bonne conduite et l’honnêteté, lerlà aucaine épreuve au monde pas pou affecté ou. Bane jeunes ki fine montré ça bane l’exemple parfait là, fine laisse zot l’empreinte comme ene lumière bien éclairé pour bane générations futur. Maintenant, chaque jeune du Jamaat Ul Sahih Al Islam bizin faire ene zéffort pour établir l’unicité d’Allah lors la terre. Bizin être bon et miséricordieux envers bane créatures d’Allah. Ni avec ou la langue ou pas dire bane kitchoses de mal, et ni avec ou la main ou pas faire ditort personne. Pas persécute personne, mais essaye faire ou mieux pour faire du bien. Pas cause bane causé d’orgueil et pas blesse personne, même si li ou serviteur, ou sois ene dimoune ki travail sous ou responsabilité. Pas embête personne, même si kikaine fine embête ou. Marche lors la terre avec humilité, douceur et sympathise avec bane dimounes ki dans problèmes, afin ki Allah content avec ou. Ena beaucoup, ki à l’extérieur zot paraître gentil, mais en-bas zot rempli de rancune, jalousie, ena la haine dans zot lékaire, rempli de méchanceté pour faire les autres du tort. Ena aussi ene majorité ki kan ou guette zot à l’extérieur, zot doux, mais zot ena ene nature de serpent avec zot. Allah pas pour accepté ou tanque ki ou lékaire pas conforme avec ou la langue. Reforme-ou et place ou confiance seulement lors Allah. Ou bizin vine ça kalité jeunesse là, ki rare trouvé, lever dans la nuit pour faire Namaz Tahajjud, ene jeunesse ki occupe li seulement avec Allah. A ce moment là, li pour vine ene jeunesse kot li pour faire bane joli rêves et aussi li pour gagne révélations, Insha-Allah. Nous bane aînés, fine atteindre ene rang de bane Abdâls – c’est ki grâce à zot bane supplications, zot fine établi ene relation avec Allah et la lumière divine réflété lors zot et zot vine ene guide pour l’humanité. Kan à zot bane jeunes, vine bane Abdâls. C’est par zot bane la prières avec beaucoup de dévotion, ki zot pou gagne la faveur divine. Ene Abdâl li ene modèle de la vertu. Faire bane grand grand zéffort pour rapproche ou plus avec Allah jusqu’à bane les autres dimounes conné ki ou bane la prières, Allah exaucées, et ça bane dimounes là pour galoupe vers ou, Insha-Allah, pour demande ou pour faire duah pour zot. O bane jeunes, à partir azordi, sakaine parmi nous, analyse nous propre conscience. Eski nous fine illumine nous propre la vie avec tous bane bons qualités ? Eski nous fine réussi rassembler nous-mêmes, nous sens du devoir et de la responsabilité, ene l’esprit pour servir les autres et aussi pour sacrifier pour le peuple ? Eski nous pé mette réellement en pratique bane belles qualités du Saint Prophète Muhammad (saw) dans nous la vie de tous les jours ? Avec tous ça bane questions là, si ou réponse li oui, pense bien ki avec ça bane belles qualités pratiqué individuellement et collectivement li rende ou agréable non seulement dans ou propre la vie, mais encore ou pour créer la paix, la tranquilité et la stabilité dans ou l’entourage, dans ou la ville (ou village) ; en bref dans le pays entier. Ene jeune bizin vine ene bon serviteur d’Allah. Ene bon serviteur c’est ene quelqu’un ki établi ene « Ta’alloup » (contacte) spéciale et privilégié avec so Rab. Ene contacte semblable, li réalisé kan le serviteur pratique entièrement le Deen, avec entier so le corps dans tous bane circonstances. Bane récompenses et cadeaux ki Allah Ta’ala fine promette dans Quran-é-Kareem et ki Rassoulloullah (saw) fine annoncé dans bane Hadiths, li applique pour ene serviteur pareil. Pratique seulement ene parti kitchose dans Deen ou bien avec ene parti le corps, ou bien dans ene certaine l’endroit pour ene certaine l’époque, li pas ene gaspillage, mais nous bizin reconnaite ki li pas suffit. Et surtout kan nous conné ene ti trou dans fond ene bateau capave provoque ene grand naufrage. Acoze ça nous pas bizin sous-estime aucaine péché parski ene péché c’est ene péché ki ena le potentiel pou détruire l’avenir ene dimoune. Le vrai goût pou vive dans le plaisir Allah Ta’ala li trouve dans vive entièrement nous Deen, avec entier nous le corps, tout le temps et partout. O bane jeunes, pense bien, kan ene dimoune faire péché. Allah Ta’ala prive li de connaissance de Deen parski connaissance de Deen c’est ene lumière ki pas capave resté brillé dans présence péché. Commette péché li développe ene mépris et ene dégoût pou bane ki pratique Deen et li pas content reste dans compagnie, bane bons dimounes. Et ça faire li perdi bane bienfaits dans ça dunya là. Péna réussite pour ene dimoune ki reste engagé dans péché et péché li noirci lékaire et ça paraître lors visage la personne aussi. Dans ene Hadith rapporté par Hazrat Abdullah bin Abbas (ra) le Saint Prophète (saw) fine dire : A travers ene bon action ene dimoune li gagne ene Noor (la lumière) lors so visage et dans so lékaire. Li gagne barakat dans so Rozi, la force dans so le corps et bane dimounes content li. Et kan ene dimoune commette péché, ena noirté lors so figure et dans so lékaire. Et dans Qabar aussi pour ena noirté. Li senti la paresse, péna barakat dans so Rozi et normalement bane dimounes pas content li. Nous bane jeunes, bizin conné ki, ki faveur Allah fine faire lors li et li bizin remercier Allah beaucoup. Dans ki façon Nous bizin remercier Allah Ta’ala ? Nous bizin remercier Allah Ta’ala pour tout séki Li fine accorde nous. Na péna nannié ki nous fine gagne li avec kikaine aparte Allah Ta’ala. Nous ena tellement Allah Ta’ala So faveur lors nous, ki li impossible pour nous compte li. Donc, Allah Ta’ala li pli nécéssite ki nous reconnaissant envers Li et nous remercier Li. Nous bizin remercier li dans trois façons : 1. Avec nous la bouche : Par exemple, nous reconnaite avec nous la bouche et nous exprime li ki c’est Allah Ta’ala même ki fine accorde nous tout séki nous ena. 2. Avec nous lékaire : C’est-à-dire, li pas suffit ki nous dire quelque chose ou bien nous lire kit formule ou duah pour remercier Allah Ta’ala. Nous bizin senti ça reconnaissance-là dans nous lékaire aussi. 3. Avec nous le corps entier. C’est-à-dire nous engage entier nous le corps dans bane activités ki Allah Ta’ala content. Nous pas servi nannié là-dans, dans ene façon ki pas plaire Allah Ta’ala. Nous pas guette nannié, écoute nannié, cause nannié ki Allah Ta’ala pas content. Et coumsa même nous garde tous nous membres dans nous le corps loin avec bane kitchoses ki Allah Ta’ala fine interdit. Normalement séki l’essentiel c’est ki nous bizin ena reconnaissance pour Allah Ta’ala dans nous lékaire, entier nous le corps pou reste dans l’obéissance Allah Ta’ala. Ça veut dire si kikaine li reste engagé dans bane kitchoses ki Allah Ta’ala pas content, alors li péna reconnaissance dans so le cœur. Allah Ta’ala dire : « Si ou éna reconaissance, sans doute Mo pou donne ou encore. Et si ou montré l’ingratitude (alors conné) ki Mo punition li bien sévère. » (Ch.14 V.8) Kan nous pou ena reconnaissance pour Allah Ta’ala dans nous lékaire, nous pou exprime li avec nous la bouche et automatiquement ça pour manifesté dans tous nous bane comportements, nous façons d’agir et nous bane activités. Et c’est ça même ki pour garanti nous salut dans ça le monde-là et dans Aakhirat. « O Allah aide nous pour faire To Zikr, To Shoukr et la bonne façon pou faire To Ibaadat. » Ameen