Text Box: Bismillah-ir-Rahman-ir-Rahim KHUTBA JUMMAH HAZRAT AMIR’UL MOMENEEN MUHYI-UD-DIN AL KHALIFATULLAH MUNIR AHMAD AZIM 11 Juillet 2008 (Résumé du Khutba Jummah lor le Tawheed) Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine lire ça bane versets suivants là :  « Allah pas pour pardonner, si donne Li bane associés. Mais Li pardonné à part ça à bane ki Li oulé. Celui ki donne bane associés à Allah, li sûr li fine fabrique ene grand péché. » (Ch.4 V.49) A la lumière de ça verset Quran là, le Khutba ki mo fine choisir azordi c’est pour cause lor l’Unicité d’Allah « Tawheed ». Par l’ignorance nous pas même conné ki veut dire « Tawheed ». Tous prophètes ki Allah fine envoyé fine prêche « Tawheed », c’est-à-dire, l’unicité d’Allah, ki ena ene seul Allah. Seki veut dire tout Musulman sans distinction bizin croire dans Tawheed. C’est la base même de Imaan (la foi); croire dans Tawheed li pas propriété juste ene groupe dimoune. Pena doute tout Musulman ki ena dans le monde bizin pé prêche Tawheed, car c’est par la même ki tout prophètes fine commence zot mission. Qui sanlà capave prend la responsabilité pour dire ene so frère musulman ki li pas croire dans Tawheed. Ça ki ena dans le cœur ene dimoune seulement Allah ki conné. Chaque musulman bizin faire Dua ki so croyance reste lor Tawheed et ki li mort avec ça kalité croyance là et ki Allah protège-li, pas laisse li tombe dans Chirk. Ki veut dire Chirk ? Littéralement kan nous cause Deen, Chirk veut dire prié les autres ensemble avec Allah. Mais en sus de ça nous pou essaye étudier bane les autres implications de Chirk afin ki nous capave comprend li bien, Insha-Allah. Allah pé faire nous conné dans Surah 31, Verset 13 ki pli grand l’injustice ki l’homme capave commette envers so Créateur c’est Chirk.  « Certes, Chirk c’est ene grand Zouloum » Ch.31 V.14 Zouloum en li-même li ene l’injustice mais pou mette pli l’emphase lor ça question Chirk là, pou montrer gravité, ki kantité li grave, Allah fine servi l’adjectif « Azim » après le mot « Zouloum ». « Azim » veut dire Énorme, Grand. Et devant mot Chirk Allah fine servi « Inna », ça aussi c’est ene l’autre mot pou mette l’emphase. Allah pé dire « certes », pena doute ça kitchose ki appelle Chirk là, c’est ene très grand péché. Pena nul doute ki tout péché c’est péché. Mais parmi ena ki mineur et ena ki majeur. Parmi ça bane ki majeur là ena la question de Chirk. Dans ene Hadith ki trouve dans Sahih Al Bukhari, récité par Abu Huraira (r.a) ki le Prophète d’Allah (s.a.w) pé dire (à so bane compagnons) : « Est-ce ki mo informe zot concernant pli grand péché ? » Zot fine dire : « Bien sûr O prophète d’Allah. » Li fine dire : « Faire Chirk avec Allah et pas traite parents avec bonté. » Dans ene l’autre Hadith raconté par Abu Huraira (r.a) ki le prophète d’Allah (s.a.w) fine dire : « Reste loin avec sept destructions (grands péchés). » Zot fine dire : « O prophète d’Allah, ki été ça ? » Li fine dire : « Faire Chirk avec Allah, faire sorcellerie, touille ene dimoune ki Allah fine faire Haram excepté dans cas kot exécution permettre, mange l’intérêt, mange l’argent orphelin, tourne le dos lors champs de bataille dans point chaud et mette tâche lor bane femmes croyantes sans défauts, et celui ki attacher avec Duniya (le monde ici-bas). » N’importe ki péché ki ene dimoune capave commette lor la terre, li ena l’espoir ki Allah capave pardonne li mais excepté Chirk. Si ene dimoune fine mort dans Chirk, pena pardon pou li. Kan même ki kantité bon action li fine faire, mais li pou trouve so place dans l’enfer. Car Allah considère Chirk comme ene crime immense. Crime en li-même li ene kitchose barbare. Et crime ki kalité crime li été ki Allah même considère ça, comme ene grand crime. Lors la terre si ene dimoune possède ene kitchose par example ene terrain ou ene l’auto etc., li dire ki li propriétaire ça kitchose là. Et si ene l’autre vini et dire ki li aussi li propriétaire, définitivement le vrai propriétaire pou objecter. Li pou la guerre so droit. Li pas pou content ki les autres fine associé dans kitchose ki pou li. Eh bien, ça Insaan (l’homme) so réaction envers Insaan couma li, li trouve ça intolérable. Li pas capave supporté ; li révolté ; li crié l’injustice. Li senti so droit pé enlever. Li oulé ki la justice condamne ça dimoune là. Maintenant nous essaye servi nous l’esprit, nous essaye raisonné, nous essaye guette la réalité en face de nous. Si toi l’homme to pas pé capave resté kan les autres pé prend to droit, to pé révolté, alors couma to capave ena le courage pou associé les autres avec Allah, Celui ki fine créer toi. Ça c’est ene pli grand l’injustice, c’est intolérable. Ça c’est ene égarement profond. To fine perdi le vrai chemin. Allah pas pou pardonne toi pou ça façon d’agir là.  « Allah pas pardonner kan donne li bane associés. Mais Li pardonne à celui ki Li oulé pour les autres péchés ki ça. Celui ki donne bane associés à Allah, li sûrement fine égarer, loin du bon chemin. » (Ch.4 V.117) Si ene dimoune fine mort dans Chirk et li pas fine répentir alors pou ça dimoune là ena ene seul destination ki pé attane li ; c’est l’enfer. Car pour ça kalité dimoune là, Allah fine faire paradis Haram (interdit). Alors dans le Quran Shariff Allah (TWA) fine dire :  « Bane ki donne bane associés à Allah, Allah fine ferme paradis pour zot et zot la caze pour du feu et bane ki faire du tort pas pour gagne aide. » (Ch.5 V.73) Ça dimoune ki fine mort dans Chirk là, pena personne pou capave sauve li contre du feu l’enfer même si so papa ti ene prophète. Nous ena bane l’example claire ki fine mentionner dans Quran. Tel couma le cas du prophète Nuh (a.s), so garçon ki ti fine mort dans l’infidélité ou bien encore le papa du prophète Ibrahim (a.s) ki ti ene fabricateur d’idoles et ki ti fine mort dans l’idolâtrie (Chirk). Abu Mas’ud (r.a) pé raconté ki le prophète (s.a.w) fine dire : « Celui ki mort et li invoque avec Allah ene partenaire (associé) li pou rentre dans l’enfer. » (Sahih Al Bukhari) Dans ene l’autre Hadith récité par Jabir (r.a), le prophète d’Allah (s.a.w) fine dire : « Celui ki joindre Allah et li pas associé personne avec li, li pou rentre dans paradis et celui ki joindre li et li fine associé quelque chose avec li, li pou rentre dans l’enfer. » (Sahih Muslim) Allah pé faire nous conné dans Surah Luqman ki premier conseil Luqman, le Sage, ki ti donne so garçon ; c’est pas approche avec le Chirk. Nous pou trouve ça dans Quran Shareef kot Luqman pé dire so garçon :  « Et Luqman dire à so garçon, tout en donne li conseil : ‘O mo garçon, pas donne bane associés à Allah. Certes Chirk c’est ene très grand péché. » (Ch.31 V.14) Pena nul doute le péché ‘Chirk’ c’est ene grand péché ki fine faire Luqman place ça comme premier conseil parmi tant des conseils ki li ti pé donne so zenfant. C’est ki avant tout bizin consolide Imaan (la foi). L’example de Luqman c’est ene leçon pour tout bane parents. Ki kantité zot bizin prend soin pou guette Imaan zot zenfant afin ki pas tombe dans Chirk. Li devoir ene parent pou veillé ki so zenfant gagne ene bon l’éducation islamique. L’Islam fine donne bane parents zot valeur ki zot mérité, fine enseigne nous ki kalité nous bizin agir avec zot. Mais kan ça parent là ordonne nous pour faire kitchose ki déplaire le Créateur, à ce moment là nous bizin pas obéir zot. C'est-à-dire, l’obéissance ena ene certain limite ki bizin pas dépasser, kot Allah même dans Quran Shareef dire :  « Si zot (parents) force toi donne Moi (Allah) bane associés ki to pas ena aucaine connaissances, pas obéir zot. » (Ch.31 V.16) Parfois nous laisse nous sentiment alle un peu trop loin pour ki nous pas faire nous parent so le cœur faire mal, alors nous faire saki zot dire nous faire, kan même li ‘Chirk’. Alors ça kalité raisonnement là pas pou capave justifié devant Allah, parce ki l’Islam pas fine enseigne déplaire Créateur pour faire créature plaisir. Kan même ki kantité nous capave content nous maman ou papa mais ena ene limite couma nous conné. Bane ki dire Issa (a.s) Allah so garcon, alors pena nul doute zot fine égaré ; zot fine commette Chirk. Zot fine commette ene grand l’injustice envers le Créateur. Allah pena zenfant ni Li zenfant kikaine.  « Dire : ‘Li Allah, Li unique. Allah Li indépendant et nous dépende lor Li pour tous nous nécessaire. Li pas ena zenfants et personne pas fine donne li naissance. Et pas ena personne semblable à Li. » (Ch.112 V.2-5) Allah pé faire nous conné ki bane Chrétiens fine égarer kan zot fine prend Issa (a.s) comme fils d’Allah. Tout comme Allah dire dans le Quran Shareef :  « Bane Juifs dire : ‘Uzair garçon Allah’ et bane Chrétiens dire : ‘Jesus Christ garçon d’Allah’. Ça c’est ene parole ki sorti de zot la bouche. Zot imite parole bane avant zot, ki pas ti ena la foi ; Malédiction Allah lor zot ! Ki manière zot capave accepter ene fausseté pareille ! » « Zot prend zot grands prêtres et zot moines et Jésus Christ, garçon Mariam comme zot maître, au lieu de Allah. L’ordre ki zot ti gagner, c’est adore ene seul Bondié. Pas ena ene l’autre bondié à part Li (Allah). Gloire à Li. (Li bien loin) de ça bane associés ki zot donne Li là. » (Ch.9 V.31-32) Alors ene l’autre place dans Quran Shareef Allah pé adresse l’humanité en générale, kot Li pé dire :  « O bane dimounes ! Fine donne ou ene l’example. Bane ki ou invoquer à la place d’Allah jamais pour capave créer (même) ene mouche. Meme si zot, zot pas capave reprend ça de li. Ni celui ki demander, ni celui à ki zot faire zot demande, ena aucaine la force. » (Ch.22 V.74) Maintenant penser oû meme, si ene musulman li alle prier ene statue alors li pé commette Chirk. Bien souvent dans bane moments difficiles de la vie, nous bouleverser, saki dimoune dire nous, nous faire. Nous pas guetter si pas Chirk ou non. Par example kan malade, dimoune dire nous alle quitte ene paquet fleur ou allume des trois la bougies, alors ou pou bien. C’est Chirk. Bane statue la zot même zot pas nannié. Zot pas tendé, zot pas causer, zot pas reponne ou, zot pas trouver. Mouche pose lor zot, idole là pas capave pousse mouche là. Idole pena capacité pour guéri, ou même pou faire du tort. C’est kitchose ki l’homme fine fabriquer avec so la main. A Maurice chaque communauté ena droit prier saki li envie. Les autres libre pou prier saki li envie mais Musulman ena so Deen (religion) ki complète en li-même pena lieu pour alle vers les autres cultures. Si ene Musulman alle kot ene la crèche et prier, c’est Chirk. D’ailleurs ça kitchose là couma nous fine dire pena aucaine pouvoir. Allah Li même dire le Prophète (s.a.w) :  « Dire zot : ‘Prier seki ou prétend être (bane bondiés) à part Allah. Zot pas possède poids ene petit fourmi dans bane le ciels et lor la terre. Zot na pas ena aucaine part là-dans et li pas prend aucaine aide de zot. » (Ch.34 V.23) Dans ene lotte place Allah (TWA) dire :  « Zot adore, dans place Allah, seki pas capave faire zot ni du tort ni du bien et zot dire : ‘ Ça bane là pour plaide pour nous avec Allah kitchose ki li pas conné lor bane le ciels et la terre ? Gloire à Li. Li bien plus haut ki ça bane associés ki zot donne li là. » (Ch.10 V.19) Bien souvent ena dimoune commette Chirk dans zot invocation, sans zot rendre compte de saki zot pé faire, li bien grave. Si ene dimoune dans so Duah li nek dire : « Ya Allah ! Ya Muhammad ! Aide moi. » Ça suffit pour ki ene dimoune fine commette Chirk. Seul Allah ki faudré pas nous oublier ki le prophète Muhammad (s.a.w) ti ene prophète, et tout le temps li fine demande Allah et jamais Li pas fine demande avec l’autre ki Allah et jamais li pas fine demande avec l’autre ki Allah et c’est nous devoir pour suivre le prophète Muhammad (s.a.w). Faudé pas nous lève créature au même niveau ki Créateur, couma azordi nous pé trouver ki dans Jamaat Ahmadiyya zot pé éleve Khalifa et honore li plisse ki Allah et So Rassool (s.a.w). Allah pé mette nous en garde contre ça bane kalité kitchose-là, parce ki ça aussi ene Chirk. Pas zis alle prier idole ki veut dire Chirk. Donne ene créature plisse l’importance ki Allah ou sois ena la crainte de créatures plisse ki Allah, alors c’est purement ene Chirk, kot Allah pé dire le prophète (s.a.w) :  « Dire zot : ‘Mo seulement ene homme pareil couma zot. Mo fine gagne révélation ki zot Bondié Li ene seul alors celui ki espère joindre so Maître, li bizin faire du bien et pas associé personne avec li kan li adore so Maître. » (Ch.18 V.111) Alors ça verset là li claire pou bane ki exagère zot l’amour même pour le prophète (s.a.w). Tout kitchose kan ou alle trop dans l’extrême li condamné par Allah (TWA). Tous musulman bizin ena l’amour du prophète (s.a.w), li bizin content le prophète (s.a.w) plisse ki li content li même ou so papa ou so maman. Mais pas tombe dans l’exagération, kot le Chirk prend place dans so le cœur. Kan tandique ki le prophète (s.a.w) fine bien enseigne nous ça et Allah aussi fine faire nous comprend ça bien à travers le premier credo de l’Islam. Pas oublier ki bane Chrétiens si temps zot ti soi-disant content Hazrat Issa (a.s), zot fine faire li vine zot bondié et zot fine égarer. Alors nous bizin tire ene leçon lor là si nous éleve ene créature plisse ki le Créateur, définitivement nous pou alle vers nous l’égarement. Alors faire bien attention O bane Musulman. Bane musulman zot l’amour pour le prophète (s.a.w) fine alle tellement à l’extrême, ki zot fine devié et zot fine divisé en plusieurs groupe et sakaine pé prend zot pli supérieur et pli conné ki tout. Et nous conné ki l’Islam li ça même religion ki pli parfait kot Allah dire dans Quran :  « Azordi Mo fine rende ou religion parfait et Mo fine complète Mo faveur lor ou et li faire Moi plaisir donne ou l’Islam comme religion. » (Ch.5 V.4) Ça même Ummah plisse parfait comparé avec bane les autres Ummah. Pour Allah continuer préserve le Ummah de Hazrat Muhammad (s.a.w), dans chaque siècle fine ena bane Mujaddid (Refomateurs) pour apporte ene réforme dans la religion de l’Islam, non pas pour falsifier l’enseignement d’Allah et So Rassool (s.a.w). Et Hazrat Muhammad (s.a.w) même fine dire ki à la tête de chaque siècle pour ena bane Mujaddid ki pour vini, et après pour ena le Messie ki pour paraître. Et voilà Allah fine envoye Hazrat Massih Maoud (a.s) pour faire dimoune conne zot Créateur, tellement l’enseignement de l’Islam fine baffoué. Hazrat Massih Maoud (a.s) fine vini pour faire revivre le vrai enseignement de l’Islam ki ti enseigné par nous bien-aimé prophète (s.a.w). Azordi l’histoire li répété dans le Jamaat Ahmadiyya, ki fine croire dans Hazrat Massih Maoud (a.s) et nous sous bannière le Khilafat, ki ou trouvé azordi bane Ahmadis aussi fine dévié pareil couma les autres. Zot fine alle tellement à l’extrême ki zot fine complètement dévié seki Quran fine dire, seki Hazrat Muhammad (s.a.w) fine dire et seki Hazrat Massih Maoud (a.s) fine dire, même zot fine arriver tire bane l’affiche dans bane l’années précédents kot zot dire « Khilafat nous la vie ». Penser ki stage zot fine arriver et ki stage zot ti bizin été azordi. Si nous fine hérite tant de faveurs d’Allah, c-à-d, nous ena Quran, l’example du Prophète (s.a.w) et bane Khalifa après li ; nous ena seki Hazrat Massih Maoud (a.s) fine dire et bane Khalifa après li (a.s). Nous Imaan ti bizin bazé lor le Taqwa plisse ki bane les autres et nous ti bizin attache nous plisse ferme ki les autres, avec le Tawheed. Ou trouver ki Allah pas pou laisse ça situation là empirer coumsa. Dans So pouvoir et capacité Li faire seki Li oulé, avant ene lumière teigne complètement, Li manifester ene l’autre lumière, faudé ça lumière fine manifester pour azordi, oû ki là azordi, ou fine témoigner ki kantité Chirk ena dans le Jamaat Ahmadiyya, ou fine entende bane soi-disant grand grand ténor dans Jamaat zot réaction concernant la révélation et couma zot fine ridiculise le signe d’Allah. Zot donne préférence seki créature pé dire, non pas seki Créateur pé dire. Zot fine arrive à ene telle bassesse, dernier degré, et zot prétend, ki c’est zot bane défenseurs du Jamaat, défenseur du Khilafat et ou pas pou entende zot dire ki ‘nous défenseur du Ummah (s.a.w), nous défenseur du Créateur (le Tawheed)’. Ou ti pou penser, ene siècle passé ki Jamaat Ahmadiyya, ene telle Chirk fine encré dans zot. Voilà pourquoi la Manifestation, ki faire révélation kot Allah Li manifester Li par So Humble Serviteur. Allah jamais change So parole. L’homme capave change parole, mais Allah non. Allah dire dans Quran, si zot pas faire couma Allah et So prophète (s.a.w) fine dire, Li pour rasse ça Li pour donne ça ene l’autre peuple. Dimoune pas manquer pour Allah. Dans So la cour pas manque dimoune pour Li donne ça faveur là. Li donné seki Li oulé et Li faire seki Li oulé. Ou pas capave pose li question, mais li pour pose ou question ki ou fine faire kan Li fine envoye ou So Messager avec bane signes et révélations ki claires. Si Allah envie allume ene l’autre lumière, dans présence de ça la lumière ki vine sombré là, alors ki sanlà capave empêche Allah, si Li envie faire So la lumière change so trajectoire. Ki sanlà capave empêche Li ? Li faire ce qu’Il veut ; personne pas héritier Ummah (s.a.w) ni héritier Jamaat Hazrat Massih Maoud (a.s). Couma Hazrat Muhammad (s.a.w) ti vini comme ene prophète universel, so message universel et le Messie (a.s) aussi universel et c’est ene Jamaat d’Allah pour tous les peuples ki envie vine joindre ça Jamaat là pour li conne so Créateur, pour ki li attacher avec le Tawheed. Ena bane Musulmans zot alle cherche guérison avec l’autre ki Allah ; c’est Chirk. Bane Chrétien, zot rode montrer ki Jésus li grand et fils de Dieu pour dire ki Jésus fine faire beaucoup miracles, fine guéri dimoune malade. Avec permission Allah, Jésus fils de Marie, prophète d’Allah, fine guéri dimoune malade et fine faire miracle. Mais tout les temps li donne l’enseignement droit, sincère, vrai, et li ordonne bane dimounes pour adore ene seul Dieu et demande avec Allah la guérison car c’est Li le Créateur. Jamais Jesu fine dire ki li fine prend place du Créateur. Donc, kan ena pour demande guérison ou n’importe ki kitchose bizin demande avec Allah. Pena aucaine groupe dimounes religieux ou sorcié, riche ou pauvre, pieux ou pervers, ni même bane médecins ni aucaine médicament ki capave donne guérison. Guérison seulement trouve dans la main d’Allah. Couma li défende pour prié dimoune vivant de la même façon li défende pour prié dimoune mort. A Maurice, surtout ça coutume (Haram) là, alle dans bane cimitière kot ena Darga et alle prier ça dimoune mort là pé prend ene l’ampleur extraordinaire surtout parmi bane madames. Ena kabarastan (cimitière) musulman kot ena bane tombes ki fine vine Darga. Lor là bane dimounes alle faire Chirk dans forme Tawaf, Dua, et même jusqu’à faire sijda. Li clair si pas ti ena ene construction coumsa bane dimounes pas ti pour alle faire Chirk. Chirk là fine propager parceki fine ena Darga, ene groupe dimoune fine fanne propagande Chirk, et ziska ena encore pé faire li. Lerlà malheureusement nombres de bane dimounes ki alle lor Darga (ki faire Chirk) augmenter. Chacaine parmi nous bizin prend bien compte surtout bane responsable. Ki compte nous pou alle render kot Allah ? Le prophète (s.a.w) fine dire : « Malédiction Allah lor bane Juifs et bane Chrétiens, zot fine prend tombes zot bane prophètes comme lieux de prières » (Sahih Al Bukhari & Muslim) Imam Malik pé raconté dans Muwatta ki le Prophète d’Allah (s.a.w) fine dire : « O Allah, pas faire Mo Qabar (tombe) vine ene idole pour être adorer; colère Allah sévère lor ene peuple ki prend tombes zot prophètes comme lieux de prières. » Maintenant ena ça bane Dargah ki ouvert zot la porte plus particulièrement pendant le mois de Muharram, kot ena ene kantité la lampe la terre. Est-ce ki ça ene place pour celui ki lire Kalima « La Ilaaha Illallah Muhammadur Rassoullullah » pour fréquenter ? Ene Musulman bizin honteux pour mette so lipié dans ça bane l’endroit coumsa là. Li bizin ena la crainte d’Allah dans so le coeur. Pas en donnant la toile rouge ou sois vert ki li pou gagne so la santé. Dargah c’est ene place de business, par moyen Chirk pendant saison « Ghoon ». Pena personne prouver ki Dargah ti ena so place dans l’époque du prophète (s.a.w) ou bien même ki l’Islam préconise ça kitchose là. Pena aucaine mention dans Quran et Hadith. Bizin bien réfléchi, estce ki ene dimoune mort pour donne ou guérison ? Li même li pas conné ki Allah fine réserver pour li. Li même li pas conné couma li pour défende li ; astère li pou défende ou ? Ene Musulman dans n’importe ki problème ki li été, li bizin tourne vers so Rab, Allah. Malheur ou Bonheur vine depi Li tousel ! Ki Allah donne nous le Tawfiq pour comprend ça sujet de Tawheed là bien et nous faire duah ki Allah faire nous reste attacher fermement avec le Tawheed. Insha-Allah, Ameen.