Text Box: Bismillah-ir-Rahman-ir-Rahim KHUTBA JUMMAH HAZRAT AMIR’UL MOMENEEN MUHYI-UD-DIN AL KHALIFATULLAH MUNIR AHMAD AZIM 12 Décembre 2008 (Résumé du Khutba Jummah de 1½ temps) Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine continuer cause lors qualité d’ene: CROYANT ENE CROYANT BESOIN HUMBLE Ene croyant faudrait pas li arrogant couma nous fine dire mais li besoin humble. Dans ene l’autre Hadith ki trouve dans Sahih Muslim, le Saint Prophète (s.a.w) fine dire : « Celui ki humble pou la cause Allah, Allah pou élève so rang. » Le Saint Prophète Muhammad (s.a.w) ti bien humble dans so la vie. Li ti tellement modeste ki l’histoire pas fine faire ene deuxième mention couma li. ENE CROYANT BESOIN PAS RIDICULISE, MOQUE, TIRE DÉFAUTS AVEC LES AUTRES Ene croyant faudrait pas li bouffonne les autres ou ridiculise les autres. Quran claire lors sa sujet là :  « O bane croyant ! Ki ene group pas moque ene l’autre groupe. Possible ki sanlà meilleur ki l’autre groupe là. Pas laisse bane madame moque les autres madames. Possible ki second groupe la meilleur ki premier groupe la. » (Ch.49 Al Hujurat V.11) ENE CROYANT BESOIN RESPECTER BANE VIEUX ET ENA PITIE POU BANE PETITS Islam enseigne nous pou respecter bane vieux personne et ena pitié pou bane petits. L’enseignement Islamique besoin refléter lors caractère ene croyant. Saki veut dire dans caractère ene croyant, bizin ena respect pou bane personnes âgées et agir bien envers bane petits. Le Saint Prophète (s.a.w) fine dire : « Zot pas appartenir à mo Ummah bane ki pas respecter bane vieux, pas montrer pitié pou nous bane petits et pas respecter nous bane savants. » ENE CROYANT BESOIN CHERCHE BANE BON CAMARADES Ene croyant li besoin cherche quelqu’un ki ena bon caractère et ki ena Deen-é-Islam (Religion de l’Islam) dans li pou faire camarade. Le Saint Prophète (s.a.w) fine donne la comparaison d’ene bon camarade et de mauvais camarade. « Ene bon camarade li couma parfum musk tandis ki ene mauvais camarade li couma ene forgeron kot là ena la poussière et du feu et ki li capave brule toi. » ENE CROYANT BESOIN ENLEVE OBSTACLES DANS CHEMIN Comme ene croyant nous pas capave mette obstacles dans chemin les autres mais aussi si nous trouve ene obstacle nous besoin enlève li. Ça c’est ene qualité d’ene croyant. Dans ene Hadith ki trouve dans Sahih Muslim, le Saint Prophète (s.a.w) pé dire : « Mo fine trouve ene homme ki ti pé profite de luxe de paradis parceki li fine enlève ene arbre au bord de la route ki ti pé cause di tort bane musulmans. » Abu Barzah fine demande le Saint Prophète (s.a.w) : « O Prophète d’Allah ! Enseigne moi quelque chose ki mo capave bénéficier de toi. » Li fine dire : « Enlève n’importe ki kitchose ki capave cause du tort dans chemin bane musulmans. » (Sahih Muslim) Dans ene l’autre Hadith, Abu Barzah fine dire : « O Messager d’Allah, dire moi ene action ki pou faire moi rentre dans paradis. » Le Prophète (s.a.w) fine dire: « Enlève kitchose ki cause du tort dans chemin bane dimoune. » (Sahih Muslim, Ahmad & Ibné Majah) ENE CROYANT BESOIN VISITE BANE MALADES Ene croyant li besoin trouve ene le temps pou visite bane malades. Dans ene Hadith ki trouve dans Sahih Bukhari, le Saint Prophète Muhammad (s.a.w) fine dire : « Droits ene musulman lors so frères c’est cinq : « Li besoin retourne Salaam, visite malade, alle mayyat, accepter l’invitation et répond ene personne ki éternué. (Sahih Bukhari & Sahih Muslim) Nous trouver ki ene de bane qualité ene croyant saki li alle mayyat (funérailles) d’ene croyant. ENE CROYANT BESOIN RECONNAITRE SAKI LES AUTRES FAIRE POU LI Qualité ene bon croyant saki li reconnaite bane bon kitchoses saki les autres fine faire pou li. Alors saki nous appranne saki quand nous ena reconnaissance envers sa bane dimoune ki fine faire ene du bien pou nous, c’est comme si nous fine ena reconnaissance envers Allah. Dans ene Hadith ki trouve dans Sahih Bukhari, le Saint Prophète (s.a.w) fine dire : « Celui ki péna reconnaissance envers dimounes alors li péna reconnaissance envers Allah. » ENE CROYANT BESOIN PAS FAIRE DOMINAIRE Ene croyant faudrait pas ki li faire dominaire. Li besoin reste loin avec Zulum (dominaire). Le Saint Prophète Muhammad (s.a.w) fine mette en garde contre Zulum, reste loin avec Zulum car Zulum c’est la noirté le jour de la résurrection. » (Sahih Bukhari & Sahih Muslim) ENE CROYANT BESOIN GÉNÉREUX Ene croyant besoin généreux. Li besoin dépensé dans chemin Allah. Li besoin pas avare. Le Saint Prophète Muhammad (s.a.w) fine dire : « Chaque matin ki bane serviteurs Allah léver, deux Anges déssane. Ene dire : « O Allah ! Faire la perte à celui ki avare. » (Sahih Bukhari & Sahih Muslim) Et dans ene Hadith Qudsi, Allah pé dire : « O zenfant Adam ! Dépenser et mo pou dépense lors zot. » (Sahih Bukhari & Sahih Muslim) Ene croyant faudrait pas ki li croire quand li donne la charité, cela pou diminuer so richesse. (Sahih Muslim) ENE CROYANT BESOIN ACCUEILLIR SO L’INVITÉ Quand ene invité vine kot ene croyant, li besoin accueillir li selon bane principes ki l’Islam fine enseigner. Bane croyant zot être connu pou zot l’hospitalité ki zot ena. ENE CROYANT BESOIN RECONCILIER DEUX MUSULMAN KI EN DESACCORD Entant ki croyant si deux musulmans en désaccord, li besoin rentre au milieu pou réconcilier zot. C’est sa rôle ene croyant ; li besoin apporte l’unité dans la communauté.  « Si deux groupes de bane croyant pé la guerre mette l’acorité entre zot. » (Ch.49 Al Hujurat V.10) Ene musulman c’est ene symbole de la paix.  « Certes bane croyant zot frères. Etabli réconciliation entre zot frères. » (Ch.49 Al Hujurat V.11) ENE CROYANT BESOIN INVITE LES AUTRES VERS ISLAM Ene croyant c’est ene représentant Allah lors la terre. Et Allah so représentant lors la terre bizin prêche l’Islam car l’Islam c’est la religion ki Allah fine choisir pou so bane serviteurs. Qualité ene croyant saki li besoin invite les autres vers sa message de la vérité là. Le Saint Prophète Muhammad (s.a.w) pé dire : « Ali (r.a), par Allah ! Si Allah guide ene dimoune à travers toi, li ti pou meilleur pou toi ki bane chameaux rouges. » (Sahih Bukhari & Sahih Muslim) ENE CROYANT BESOIN ORDONNE LE BIEN ET EMPECHE LE MAL Ene croyant dans so caractère bizin ena l’esprit ordonne le bien et empêche le mal. Maintenant ena beaucoup moyen ki l’Islam fine enseigne nous pou ordonne le bien et empêche le mal. Le Saint Prophète Muhammad (s.a.w) fine dire : « Celui parmi zot ki trouve ene mauvais action, ki li change li avec so la main mais si li pas capave faire sa comme sa, alors avec so la langue et si li pas capave faire sa aussi alors avec so le cœur et ça li pli faible partie de Iman (c’est-à-dire, avec lécoeur). » Alors nous trouver ki mission ene croyant ena lors la terre ; c’est ordonne le bien. Et quand li trouve ene mal, li besoin condamne sa kitchose là. ENE CROYANT BESOIN PAS FAIRE KITCHOSE POU MONTRER LI YEUX DIMOUNE Toute action ki nous faire bizin pas pou montrer li yeux dimoune. Mais pou faire juste Allah plaisir. A cause sa Allah dire ;  « Mo pas fine crée djinn et dimoune excepter pou zot prier Moi. » (Ch.51 V.57) ENE CROYANT BESOIN PAS ENA DOUBLE FACE Ene croyant li bizin péna double face. Non pas avec ene bane dimoune li montrer ene visage et avec ene l’autre li montrer ene l’autre. Le Saint Prophète Muhammad (s.a.w) fine condamne sa attitude là. Le Saint Prophète Muhammad (s.a.w) fine dire : « Le pire de bane dimoune c’est bane ki ena double face, ki présente ene face à quelques dimoune et ene l’autre face avec les autres. » (Sahih Bukhari & Sahih Muslim) ENE CROYANT BESOIN GUETTÉ SI LI ENA BANE PRINCIPE ISLAMIQUE DANS LI 1. Ene homme besoin pas porte bague en or ou linge la soie. Le Saint Prophète Muhammad (s.a.w) fine trouve ene homme ki ena ene bague en or. Li fine dire : « Est ce qui ene parmi zot ti a content prend charbon allumer et mette li dans so la main ? » (Sahih Muslim) 2. Ene croyant besoin pas boire dans récipient en or ou l’argent. Le Saint Prophète Muhammad (s.a.w) fine dire : « Sa pou bane ki dans sa le monde là et pou zot pou dans l’au dela. » (Sahih Bukhari & Sahih Muslim) 3. Ene croyant besoin mange avec so la main droite et boire avec la main droite. Le Saint Prophète Muhammad (s.a.w) fine dire : « Quand ene parmi zot manger, ki li mange avec so la main droite et quand li boire, ki li boire avec so la main droite parceki c’est Satan ki mange avec so la main gauche. » (Sahih Muslim) 4. Ene croyant besoin faire Salaam les autres croyants, saki li conner ou saki li pas conner. Abdullah Ibn Amr Ibn Al As (r.a) pé rapporter: « Ene homme fine demande le Saint Prophète (s.a.w) : « Ki sanlà so l’Islam pli bon ? Li fine réponde : « Nourrit bane dimoune et faire Salaam à bane ki zot conner et bane ki zot pas conner. » (Sahih Bukhari & Sahih Muslim) 5. Ene croyant besoin demande permission avant rentre dans la caze les autres. « Abdullah Ibn Busr (r.a) pé dire : « Quand le Prophète (s.a.w) vine kot ene la porte et demande permission pou rentrer li pas diboute en face mais li diboute lors droite ou gauche. Si li fine gagne permission, li pou rentrer sans quoi li pou aller. » (Sahih Bukhari) 6. Ene croyant besoin pas look dans la caze les autres. Le Saint Prophète Muhammad (s.a.w) fine dire : « Celui ki look dans la caze quelqu’un sans permission alors li permettre pou l’occupant pou enlève so li yeux. » (Abu Dawood) 7. Ene croyant bizin pas invite ene madame et ene croyante bizin pas invite ene homme. Ibn Abbas (r.a) fine dire : « Le Messager d’Allah (s.a.w) fine maudit bane homme ki faire couma madame et bane madame ki faire couma homme. » (Sahih Bukhari) Dans ene Hadith ki trouve dans Abu Dawood, Abu Hurairah (r.a) pé dire ki le Messager d’Allah (s.a.w) fine maudit bane homme ki habille couma madame et bane madame ki habille couma homme. Nous bane dimounes ki rempli de faiblesses, après ki nous fine écoute bane paroles de nous Aka Hazrat Muhammad (s.a.w) et so bane pratiques, et séki Allah Tabarak Wa Ta’ala fine dire dans Quran, ki nous cherche aide avec Allah même, ki Allah même donne nous Tawfiq pour élimine nous bane faiblesses ki nous ena, ki nous commette chaque seconde, chaque minute, chaque jour, chaque mois, chaque l’année et Allah pardonne nous pour tous nous bane péchés ki fine mentionner dans ça Khutba là, ki nous vine ene bon croyant, kot Allah content avec nous dans ça lémonde ici-bas là et dans Aakhérat et li réserve en bon place dans Aakhérat pour nous parmi So bane bons serviteurs ki Li bien content. Ki Allah content avec nous aussi. O Allah ! Pardonne nous, nous bane péchés. O Allah ! Pardonne nous, nous bane péchés. O Allah ! Pardonne nous, nous bane péchés. Et mette nous lor le droit chemin. Insha-Allah. Ameen.