Text Box: بسم الله الرحمن الرحيم KHUTBA JUMMAH HAZRAT AMIR’UL MOMENEEN MUHYI-UD-DIN AL KHALIFATULLAH MUNIR AHMAD AZIM 12 Juin 2009 (Résumé du Khutba Jummah) Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine lire ça verset Quran suivant là:  Fabimaa Rahmatim-minallaahi lina lahum. Wa law kunta fazzan galiizal-qalbi lanfazzuu min haw-lik : Fa-fu anhum wastagfir lahum wa shaawirhum fil amr. Fa-izza azamta fatawakkal alallah. Innallaha yuhibbul-mutawakkiliin. (O Prophète) C’est par la grâce d’Allah ki to traite zot avec douceur. Si to ti traite zot avec ene lécoeur dur, zot ti pou quitte to l’encourage bien vite. Alors pardonne zot et demande Allah zot grâce. Et même prend zot conseil lors ça question là. Mais kan to fine prend décision, mette to confiance en Allah. Allah content bane ki mette zot confiance en Li. (Chapitre 3 Al’ Imraan Verset 160) Ça verset ki mo fine récite devant zot là c’est ça même verset ki mo fine récité dans mo Khutba Vendredi passé le 05 Juin 2009. Concernant ça verset ki mo fine réciter là, mo Khutba lors ça verset là pas fine terminer, c’est pour ça raison là même, ki mo fine récite ça verset là encore azordi pour contigne mo Khutba Jummah. A la lumière de ça verset ki mo fine réciter là, mo pou cite ene Hadith kot ene compagnon (Sahabi) dire ki Hazrat Muhammad (saw) fine dire : « Si dimoune ki Allah fine établir comme gardien et responsable lors le zot montrer quique manquement dans so responsabilité envers bane dimounes et li pas fine prend compte zot bien-être, après so la mort Allah pas pour faire li rentre dans paradis et pas pour pardonne li. » Dans ene lotte Hadith Hazrat Ibné Umar rapporter ki Hazrat Muhammad (saw) fine dire: « Chacun d’entre ou ene gardien et pour questionne li lors so responsabilité ki li ti ena lors bane dimoune. Ene Amir, li ene gardien, ene responsable pour bane ki en bas li, ene homme li ene gardien lors so famille et ene madame li gardien lors la caze de so mari, et so bane zenfants. Donc chacun d’entre ou ene gardien et Allah pour questionne li comment li fine accompli so responsabilité envers bane dimounes. » Dans Jamaat Ul Sahih Al Islam ena comité centrale et bane organisations auxiliaires. Pense bien ki chaque office-bearers zot bane gardiens dans cercle ki zot été. Si chaque office-bearer dans Jamaat Ul Sahih Al Islam pas pé faire so travail couma bizin ou sois li pas pé prend aucaine l’importance dans travail Allah, alors prend compte ça Hadith ki mo fine mette devant ou là, ene avertissement ki Hazrat Muhammad (saw) fine donner : ki Allah (swt) pour questionne ou lors ou responsabilité si ou pas fine accompli ça comment bizin. Ou pou deboute devant Allah et pour reponne de ou acte ; ça même faire gagne peur ! Mais ici pas fine dire ki pou questionner et ki ena chance ki traite ou avec douceur et ki ou la vie pour sapper. Non ! Au contraire Hazrat Muhammad (saw) dire ki paradis pour Haraam pour ça kalité dimoune là. C’est ene zaffaire bien effrayant ki Allah donne l’occasion à chaque office-bearer pour accompli zot responsabilité. Mo pou cite ene l’autre Hadith kot tous bane comité centrale et bane l’organisation auxiliaires kot capave mette en pratique ça Hadith là, kot Hazrat Aisha (ra) dire ki Hazrat Muhammad (saw) fine dire : « Faire tout zeffort possible pour sappe bane musulmans depuis punitions. Si capave gagne ene chemin de sortie alors fini problème là en place. Li meilleur pour ene Imaam pour pardonner par erreur et au lieu ki li puni par erreur. » Si chacaine parmi nous réfléchi lors ça Hadith là, moin ene erreur ki ene chef faire kot li applique so l’autorité, par so l’arrogance et so la haine ki li ena, guette ki dégât ça faire et sans li réfléchi, li pas trouver ki li pou responsable devant Allah pour ça action ki li fine faire là. Au lieu ki li résoudre problème là, à l’amiable, li enflamme ça ti la braize là avec pétrole pour faire ça flambé mais si li faire kitchose de bon sans complique bane zaffaires là et li résoudre problème là li même, alors li aussi li sappé avec la punition d’Allah et li sappe so bane frères musulmans avec punition d’Allah. Ena ene lotte Hadith rapporter par Hazrat Ibné Abbas (ra) kot Hazrat Muhammad (saw) fine dire : « Allah pas pour complète besoins et objectifs d’ene dimoune ki responsable de bane affaire commun de bane musulmans, tant ki ça dimoune là pas accompli besoin de bane dimounes. » Ça Hadith là attire l’attention de bane comité centrale avec so bane office-bearers et bane organisations auxiliaires ki ena grand responsabilité lors zot. Donc pas bizin penser ki kan ou ene office-bearer, ou nek ena pour assizer dans comité, causer ene tas, action zéro. Ou pensé travail pour marché, ou sois bane problèmes, bane disputes entre bane dimounes pour résoudre si necque assizer dans comité, causer grand, grand causer. Mo fine trouvé ça bane qualité dimoune ki dans comité centrale causer beaucoup, mais action zéro et zot même bane pli grand paresse, et zot zis bon pour donne l’ordre. Dans zot paresse, zot pas pour faire nannié zot, mais kan zot camarade travail, zot là pour faire toute sorte kalité critique. Ça bane kalité dimoune là, c’est bane folie de grandeur, ene l’arrogance prend zot, kot zot ena ene maladie, maladie de paresse et maladie critiquer. Mo pé faire ene l’appelle avec tous bane les autres pays ki si tous bane office-bearers faire zot travail avec taqwa (crainte d’Allah) sans critique bane les autres, et sakaine prend compte de so responsabilité et travail ki li fine gagner pour faire, zot tous pou vine actif et le travail pour faire dans ene discipline, l’amour, et avec beaucoup de humilité. L’heure là même ou pour trouve le niveau de la spiritualité aussi pour augmenter. Alors ça Hadith ki mo fine mette devant ou, séki pé faire comprend, bizin accompli ou responsabilité dans ene meilleur façon. Kan tout bane office-bearers pour comprend bien ça bane Hadiths là et pour mette zot en pratique, alors tous travail pour vine facile et aussi ou pou accompli ou responsabilité, kot tous bane dimounes pour respecté ou. L’heure là c’est pas ou ki bizin dire dimoune « respecté moi » ou sois « kan mo pé rentrer, zot tous mette zot déboute » ; séki mo pé dire ou là, c’est ene réalité ça ! Péna aucaine mensonge lors là ! C’est ene zaffaire mo même mo fine témoigner à Maurice dans Jamaat Ahmadiyya kan le soi-disant Amir pé rentrer, programme arrêter et tous dimounes dibouté, laisse monsieur là passer et assizer. Si ou fine reste assizer, c’est-à-dire ou pas fine montré aucaine respect pour le soi-disant Amir. Ça c’est bane qualité dimoune ki soif pouvoir, l’honneur et zot autoritaire, faire dimoune peur. L’honneur c’est Allah ki donné. Li honnore séki Li oulé et Li déshonnore séki Li oulé. Ça kalité dimoune là pas seulement soif l’honneur, pouvoir, l’autorité, mais aussi zot double langage, double visages et zot zis faire palabre pour passe zot bon. Allah (swt) fine donne ene longue lé temps pour zot repentir et faire Istigfaar ; Allah pas pé presser are zot. Allah pé donne zot ticoup, ticoup, mais zot pas pé prend compte. Gagne peur ça jour kot Allah (swt) pour attrapé là kot personne pas pou capave plaide ou sape so camarade. Ene dimoune ki pé travail pour Allah So Deen, li bizin ena beaucoup de humilité, ena ene bon tarbiyyat et li bizin créer ene telle l’esprit spirituel dans la tête bane dimounes kot ça bane dimounes là accepter séki li dire facilement, et zot pas senti ça comme ene fardeau pour zot. C’est à cause ça même ki Quran supérieur à bane les autres livres sacrés. Bane les autres livres sacrés là dire, faire ça et pas faire sanlà. Tandique ki Quran Shareef li dire ene kitchose et li donne bane raisons. Quran pas donne l’ordre dans vide, mais li créer ene désir dans le cœur de bane dimoune pour ki zot accompli ça l’ordre là. Ene façon pour gagne le succès c’est ki ou bizin faire bane dimounes comprend avec beaucoup l’amour et humilité, pas avec l’arrogance. Kan ou donne ene l’ordre, donne li avec l’amour et beaucoup de humilité et faire zot comprend. La modération et parole de sagesse c’est ça deux zaffaires là ki faire ene communauté progresser. Ene parole de sagesse c’est ene parole ki kan les zot tender, zot dire ki c’est ça même ki ti nous désir. Kan ça bane dimounes là fine créer ene telle l’esprit dans zot, c’est là ki zot pour commence faire progrès. Bane présidents du Jamaat ou bane les autres ofice-bearers bizin conne problèmes de nous bane frères et sœurs aussi, n’importe ki problème zot faire face, faudé pas nous dire ça pas concerne nous ça, ça so problème. Pour alle ramasse l’argent chanda ou Jalsa Salana, ou conne alle devant zot la porte et faire zot comprend ki zot bizin paye chanda ou Jalsa Salana Fund et ena bane frères ou sœurs, zot dans bane situations difficiles kot bane présidents ou trésoriers pas comprend zot problème, force zot pour paye plisse ki zot capacité. Ou bizin conne problème dimoune là aussi avec bane situations ki bien difficiles, travail péna, crise économique et bane les autres kitchose cher. Ena bizin paye fees l’examen zot zenfants ki bien cher. Bane office bearers zot conne zis zot problème, et zot pour explique zot problème, zot situation et bizin comprend zot, mais zot, zot pas oulé comprend bane les autres membres du Jamaat et ça créer ene problème, ene clash dans Jamaat. En même temps, mo attire l’attention de bane présidents, trésoriers, faudé pas nous tombe dans même bassesses et l’arrogance ki bane les autres fine faire. Par la grâce d’Allah, pas encore arrive li. Mo faire duah ki ça pas arriver dans Jamaat Ul Sahih Al Islam. Si ene dimoune travail kot ou, ou même travail dans Jamaat, bane présidents, et trésoriers bizin surveiller, guetter, si bane travailleurs Jamaat fine gagne zot salaire (l’argent) et même bane membres Jamaat Ul Sahih Al Islam, si ene dimoune travail kot ou, n’importe ki so la foi ou religion, bizin paye li so salaire couma bizin et jamais cokain salaire ene travailleur, so conséquence bien grave devant lizié d’Allah. Mo pou conseil tous bane office-bearers ki trouve dans Jamaat Ul Sahih Al Islam dans Maurice et dans bane les autres pays, ki sakaine parmi nous bizin examine nous niveau de Taqwa. Pour faire comprend ça bien, mo pou cite ene Hadith kot Hazrat Mu’az bin Jabbar rapporter ki Hazrat Muhammad (saw) fine dire : « N’importe kot ou été adopter le Taqwa d’Allah. Si ou fine faire quique mauvais travail alors faire ene bon travail après ça. Ça bon action là pour efface ça mauvais action là. Et traite bane dimounes dans ene bon façon. » Abou Burda (ra) rapporter ki Hazrat Muhammad (saw) fine envoye Abu Musa et Mu’az bin Jabbar chacun dans ene partie du Yémen. Ensuite li fine conseil zot : « Créer facilité pour bane dimoune et pas créer difficulté pour zot. Répandre l’amour et contentement et pas répandre la haine. » Hazrat Aisha (ra) rapporter ki Hazrat Muhammad (saw) fine dire : « O Allah si celui ki pé dirige mo peuple pé maltraite zot, alors Toi aussi faire même traitement avec li. Et si celui ki pé dirige mo peuple pé traite zot avec douceur, alors Toi aussi traite zot avec douceur. » Donc travail de bane présidents, office-bearers et autres c’est ki tout d’abord zot bizin créer ene respect et l’amour dans tous bane membres Jamaat Ul Sahih Al Islam, et ensuite créer ça même sentiment là dans le cœur de bane dimoune. Ene président ou office-bearer, pas fine confier zot ça bane responsabilité mondaine là et ou penser ki ou fine vine le Maître de tout pouvoir. Pareil ene président bizin respecter so bane membres comité (secrétaires) et donne zot valeur zot suggestions et réfléchir lors là. Mo fine rappelle ene Hadith et laisse mo cite li devant zot, kot ça capave aide sakaine parmi nous et pour comprend ki dans Islam, prend responsabilité travail ou envie vine ene chef, ou office-bearer, comment l’Islam condamne ene tel attitude. La religion et politique, deux zaffaires ki bien différent. Travail pour la religion d’Allah, péna nannié bane zaffaires mondaines ki ou gagner, ni l’argent, ni ou vine riche, et ou bizin travail nuit et jour en suivant le Shariah (la loi islamique) et si ou fail là-dans, ou pour responsable devant Allah et c’est bane travail propre, pure et sacré (pour la Religion d’Allah). Par contre la politique, politicien pas conné couma zot pou vine au pouvoir pou rempli zot poche, cause menti, embête le peuple, faire bane fausses promesses, sème l’argent pour gagne élection, pour vine au pouvoir pour faire bane travail malpropre, sale et zot péna aucaine pudeur, ni la crainte d’Allah dans zot le cœur ; pour responsabilité ki le peuple vine donne zot, mette zot là pour travail pour tous la nation, le pays entier, là aussi zot trahir le peuple. Tandique bane office-bearers ki travail pour la religion d’Allah zot différent, kot zot faire beaucoup sacrifices zot le temps, zot l’argent et persévéré dans ça travail noble là. Dans tous Jamaat li coumsa (surtout dans l’Islam) aucaine office-bearers (ki ena la crainte d’Allah dans so lécoeur) pas ena le désir pour occupe tel ou tel poste dans l’Islam. Mais kan zot gagne ene responsabilité zot peur ki zot pas pour capave accompli ça responsabilité là et récompense pour ene office-bearer sincère, ki ena Taqwa dans so le cœur et faire so travail seulement pour le plaisir d’Allah. Allah donne li ene grand récompense dans ça la vie là et dans Aakhérat. Mo pou cite zot ça Hadith ki mo fine rappelle là et ça Hadith là bizin garde ça en vue kot Hazrat Abou Musa (ra) dire ki li ti alle kot Hazrat Muhammad (saw) avec so deux cousins. Ene dans ça bane cousins là fine dire : « O Prophète d’Allah faire moi vine Amir d’ene bane pays ki Allah fine donne ou. » Et lotte cousin là fine dire la même chose. Hazrat Muhammad (saw) fine réponne : « Par Allah, nous pas confier personne ene responsabilité ki li envie gagner. » Ensuite Abdur Rahman bin Thamura rapporter ki Hazrat Muhammad (saw) fine dire : « O Abdur Rahman pas demande aucaine poste, parce ki si donne toi la responsabilité ki to fine demander là, so fardeau pour lors toi. Et si to gagne ça responsabilité sans ki to fine demander, l’aide d’Allah pour avec toi. » Mo bien rappelle kan mo ti pé travail pour l’Association Ahmadiyya et kan ti ena Majlis-é-Shura et Élection Général, mo ti pé remarque certain dimoune ti ena l’habitude pour vini juste pour ki les autre trouve zot et vote zot pour zot gagne quique poste et même ena ti pé faire canvassing pour dire ki vote li ou vote un tel. Li malheureux pour trouve ça dans Jamaat Hazrat Massih Ma’oud (as), parce ki ça bane kalité dimounes ki soif pouvoir là, ou pou gagne kit poste dans Jamaat, pour zot gagne l’honneur sans ki zot pou faire le travail de Deen, nek seulement donne l’ordre, kan ena ene fonction zot même divant divant avec costume, cravate, et zot travail c’est zis donne l’ordre, et assize lors podium. Ena kan rentrer, couma dire bane chefs d’états fine rentrer, bane caméramen divant divant pour tire zot photo, filmer zot. Ça bane kalité dimoune là zot ene malédiction pour zot peuple (Jamaat) et pour zot même. C’est pour ça bane dimoune là-même ki Allah fine dire :  « Malheur à celui ki prier, mais ki néglige so la prière, bane ki envie montrer (lizié) les autres. » (Ch.107 Al-Mâ’ûn V.5-7) Zot nek envie montré dimoune, zot péna aucaine désire pour travail. Bane volontaire bizin travail en toute sincérité. Ça désire pour vine populaire là li ene désir ki gâte ene dimoune. A cause de ça désir là-même ki beaucoup dimounes fine gâter complètement. Ça fine arriver et pour continuer arriver. Gagne peur Allah. Et garde ça en vue ki ou pour faire So travail afin ki ou gagne So plaisir et So récompense. Ou pas pé rode louange de bane dimounes. Ki Allah faire ki nous faire So travail juste pour Li. Ki Allah gagne pitié lors ou et lors moi aussi. Ameen.