Text Box: Bismillah-ir-Rahman-ir-Rahim KHUTBA JUMMAH HAZRAT AMIR’UL MOMENEEN MUHYI-UD-DIN AL KHALIFATULLAH MUNIR AHMAD AZIM 12 Septembre 2008 RAMADHAN 2008 (Résumé du Khutba Jummah) Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine récite le verset suivant: Ch.2 V.184  Yaa-ayyu-hallaziina aamanuu kutiba alay-kumus siyaamu kamaa kutiba alallaziina qablikum la-allakum tattaquun. O ou ki ena la foi, jeûner (Roza) fine prescrire pou ou, couma li ti prescrire pou dimoune avant ou, afin ki ou marche dans chemin Allah. Dans ça verset là, Allah (swt) pé faire nous comprend ki tous banes peuples avant, zot ti gagne banes avertisseurs, et ça banes avertisseurs là, zot aussi, zot ti prêche le message du jeûne. Ça banes messagers là, zot ti dire à zot peuples garde le carême, c.à.d le Roza. Pena ene messager ki fine vini dans ça l’univers ki pas fine dire so peuple, ki pas bizin garde Roza. Tous messagers ti garde Roza et aussi zot ti dire à zot bane peuples, observe le jeûne. Par exemple : Dans nous petit l’Ile Maurice, nous trouve boucou communautés, de différent religions, de différents la foi. Et dans ça banes religions là, ou trouve zot garde le carême, ki ce soi dans n’importe ki façon, mais zot pé garde li. Et zot dire ou ki zot garde ça pou Bon Dieu, ki ce soi zot croyance. Enfin c’est Allah ki juge la foi d’ene dimoune. Mais c’est ki nous, nous capave dire, c’est ki zot aussi zot pé jeûner. Mais étant donné, ki la religion l’islam, c’est ene religion finale, ki pas pou ena aucaine religion, ki pou vine après l’islam, comme la plus grande religion, et ki pas pou ena de plus grand prophète ki pou vini après Hazrat Mohammad (saw) ; ki li-même fine vini pou accomplir mission de tous banes prophètes ki fine vini dans le passé. Et c’est li même à travers ki, Allah fine envoye tous So banes commandements, l’instructions, dans ene livre parfait, ki appelle le Quran Shariff. Et ça Quran là ti prend 23 ans pou révéler. Et chaque verset ti marque ene l’événement dans la vie du prophète (saw), ki ti très important. Et ça fine compilé jusqu'à ki le Quran fine complètement révéler. Et ça livre là, li aussi connu par le nom « Kitab-ul-Mubiin », ki veut dire ene livre très claire. Puisque ça livre la, li englobe tous banes commandement de tous banes religions précédant, alors le Quran Shareef, c’est ene livre universel, pou tous religions. Et ça c’est vraiment ene grand Grâce ki vine de coté d’Allah, le Grand, le Majestueux. Et ene l’autre grand faveur, c’est ki pas pou ena ene l’autre religion pli grand ki l’islam et pas pou ena ene l’autre prophète ki pou plus grand ki le prophète (saw) et pas pou ena ene l’autre livre sacré, ki pou pli grand ki le Quran Shariff. Jusqu'à le jour du Qayamat, pou ena banes prophètes, et ça banes prophète la, zot pou bizin trouve dans la religion l’islam. Et quand ça bane prophètes là zot pou vini, zot pou faire revivre l’enseignement ki Allah ti révéler au prophète (saw). Parceki avec le temps, banes dimounes commence oublier l’instructions d’Allah et zot commence alle dans l’obscurité, c.à.d égaré, dévier. Malgré ki ça banes commandement la, livre là li là, mais pratique de ça livre la, li zéro. Alors c’est pou ça ki ça banes messagers la vini et zot faire dimoune rappel séki Allah fine envoyer dans le passé, et faire zot mieux comprend ça livre la. Parceki nous l’homme chacaine comprend ene zaffaire différent. Alors Allah envoye ça banes avertisseurs la, ki pli éclairci zot compréhension pou mieux comprend ça banes versets et chapitre pou ki l’homme marche lors chemin droite, et afin ki ça banes dimounes la zot pli comprend le Quran et zot pratique ça banes l’enseignement Divine la. Mais aujourd’hui, malgré ki tous banes musulmans nous possède le Quran, nous trouve nous dans ene religion parfait et nous ena le plus grand prophète so l’example, pourtant nous tous nous trouve nous dans ene seul religion, mais nous même nous divisée, en banes sectes. Dans banes différent groupe chacaine prend li pli supérieur et pli conner ki so banes le zot frères de même la foi. Guette la le mois de Ramadhan, tous banes musulmans pé garde Roza, et nous tous nous alle Jummah dans Masjid. Mais pourtant nous pas unifié, nous ‘allag allag’ (appart, appart). Mais ki faire ?? Ce parseki dimounes fine oubliyer l’enseignement du Quran. Chacaine pé prend zot pli meilleur ki lotte là là. Alor aujourd’hui ki pé arriver ? Nous pé trouve chacaine pé la guerre avec lotte et chacaine pé prend zot pli meilleur. Quand nous tous nous trouve dans la même religion. Eski ou pas trouve ça idiot ki tous musulman ine trouve même la lune, ine garde le même Roza mais seulement dans différent sectes. Et ki zot pas d’accord envers zot frères de même foi. Ki ce soi li ene Borah, Shia ou bien li dans Sunnat Jamaat, Tabligh Jamaat, Jamaat Ahmadiyya etc. Tous ça la pareil ça (nous tous nous croire dans Allah et So Rassool (s.a.w) et So Livre Parfait – Le Quran Shariff), mais seulment zot pas rode unir zot, pou vine ene seul. 1) Mais ena aussi banes musulman, ki ou appelle zot ene musulman que de nom, mais zot pas pratique banes commandement dans l’islam. Alors zot, zot trouve le mois de Ramadhan couma ene fardeau, zot même pas garde Roza, ni faire namaz, ni lire Quran et encore pas paye le zakaat, pas donne manger banes pauvres. Ça c’est ene catégorie dimounes. 2) Ena ene lotte catégorie dimounes, quand Ramadhan vini, oui garde Roza, après pas faire Zikr narien ; nek dormi jusqu'à l’heure Iftaar. Et zot lire Quran vite vite fini, faire namaz, oui ! Couma poule pé bek maiye ! Comme si zot faire ça bane actes d’Ibaadat là, ki à faire !!! En d’autres mots, seulement comme ene routine. 3) Ena ene lotte catégorie dimoune, ki zot, zot faire namaz, zot garde Roza, zot lire le Quran tous. Mais seulment zot encore tricher dans zot business, faire banes zaffaire illégales et zot cause menti boucou. Tous ça la banes musulmans pé encore faire. C’est ki pé bizin analyzer, si pas mois de Ramadhan la pé profite (banes musulmans) dans tous so aspect spirituel couma Allah oulé de nous ? Ramadhan vini, ene mois rempli de grâce, de Miséricorde et plein de bénédiction. Ki ça Grâce là ça ? C’est quand profite de ça mois là pou faire doah avec Allah et repentir. Ou tourne ou complètement vers Allah, c.à.d ou pas pou occupe ou dans manger, ou pas pou bizin faire Nashta (Petit-Déjeuner), ni déjeuner, ou gagne ene la journée nette pou approche ou avec Allah. C.à.d ou faire namaz, ou lire Quran, ou faire Zikr, ou repentir pou ou banes péchés et erreurs ki nous l’homme nous faire etc… Et pou banes dimounes ki alle travaille, alor trouve ene moment pou faire namaz dans ene ti place ou alle masjid. Zot aussi zot capave faire banes Zikr, et zot trouve létemps pour zot réussi pour faire ça bane bonnes actions là. En effet ou pas pou content, ki ou fine faire ene tel sacrifice ki ou lever gramatin, ou garde le Roza. Bé ou pas pou content ki ou Roza pas accepter par Allah définitivement ! Alors ou pou prend banes précaution. Pou ou Roza reste entier, pou li pas fêler. Alors quand ou prend banes précaution pendant ou Roza alors, ou pé protège aussi ou la foi. Et ou trouve aussi dans le mois sacré, ou trouve la simplicité, et pas ena gaspillage de nourriture, ni de l’argent. Par example; ene dimoune ki fumer, alors pendant le mois sacré ça pou ene grand l’économie, pou li en même temps li pas gaspille so l’argent ni li gatte so la sante. Et ça bane l’argents là pé rester, kot zot capave mette ça dans le chemin d’Allah. (Paye zot Zakat, Fitra, Fidya, tire Sadqah, beaucoup.) Alors la philosophie de Roza, l’importance de Roza, li très très important et ena beaucoup bienfaits là-dans. Pas ena désavantages, à part ou gagne un peu faim, faiblesse, malade la tête. Mais tous ça la c’est bane sacrifices ki ou faire pou Allah. Normalement pour ou gagne Allah même comme récompense, ou bizin passe dans difficulté aussi. Aster la, si ene dimoune pas pé capave faire ene sacrifice de malade la tête ou de faim ; alors si demain arrive l’heure pou sacrifié so la vie pour l’Islam, alors ki li pou faire ? C’est ça ki nous bizin réfléchi ! Alors li très grave, si juste à cause ene manger, ene boire li pas pé capave contrôle so nafs, li pé toujours commette bane zaffaires ki pas bizin. Ou soit pé triké dans Roza. Alors li bien malheureux pou ça bane kalité dimounes la. Si dans mois Ramazane là, tous encore pareil alors couma ça mois là pou capave profite nous spirituellement et nous prend ene bain spirituel, pour tous bane saleté ki nous fine salir nous l’âme et lecorps pendant ça 11 mois. Alors nous bizin purifier nous l’âme et nous lécorps même en premier pour ki nous capave prêche bane messages ki pou amène lézot dimounes dans le droit chemin et vers l’unicité d’Allah. Et pou enseigne zot séki le Messie Promis (as), bane messages ki li fine donne nous et pour partage ça avec nous bane le zot frères et sœurs musulmans et bane dimounes de bane lézot communautés ki pas fine encore recevoir ça message là. Couma ou pou capave prêche le message de Hazrat Massih Maoud (as) kan ou même ou pé encore juge la foi de bane lézot et créer la haine dans lécoeur dimounes? C’est en approchant vers zot ; non plus ou reste ene distance, ou faire ene tas critique, ou faire ça ene tabou ; ki pas bizin alle faire namaz dans Masjid, pas rentre dans zot masjid, alle zot marriage, mange zot brianni, mais pas lève la main pou faire doah, ou sois alle ene la mort mais pas faire le namaz Janazah ! Eski ou pas trouve ça très idiot et ou rendre ou pli imbécile, et ça c’est pas séki Allah, So prophète (saw) et Hazrat Massih Maoud (as) fine enseigne nous. C’est pas comme ça, quand tandis ki bane questions ti déjà vine devant le Messie Promis (as). Et li fine faire comprend ki si ou conner ki sa dimoune là pé zoure le Messie Promis, pé critique li alors pareil couma Quran dire, ou lever et ou pas associer ou avec bane tel dimounes à moins zot change zot conversation. Pour ça kalité dimounes là, li défende pou ou, pou ou alle faire namaz derrière li ! Parski li pas ena même Taqwa (la piété) dans li, l’islam pas fine enseigne la haine dans lecoeur bane dimounes ; au contraire l’islam fine enseigne la paix et soumission totale envers Allah. Personne pas là pou juge la foi ene dimoune, c’est pour ça bane kalité dimoune ki na pas ena Taqwa et pé cause menti, et pé zoure le Messie Promis (as), alors derrière ça kalité dimoune là ki pas bizin faire namaz et péna aucaine l’importance pour donne zot parski zot lécoeur fine vine noir avec la haine! Mais si dimoune la pas fine dire narien lor le Messie Promis (as), li ene dimoune neutre, alors ou capave faire le namaz, alors faudé pas nous faire ça vine ene tabou ! Au contraire nous bizin approche vers zot et donne ça bane dimounes là, de l’eau de la spiritualité. C’est coume ça ki ou capave réforme le Oummat de Hazrat Muhammad (s.a.w) avec rempli d’amour kot ou capave converti zot la haine pour Ahmadiyyat en l’amour pour Allah So Messie et lerlà ou pour capave faire ou dawa avec zot. Alors avant réforme lézot ou bizin réforme ou-même et mette en pratique séki Allah et So prophète (saw) fine dire, ler là ou pou capave réforme bane lézot à même niveau couma Allah oulé : ene vrai Dai’Illallah. Ou pas montrer aucaine l’arrogance ou supériorité lor bane lézo ; au contraire avec toute humilité et sympathie et l’amour ki ou ena pou le Oummat de Hazrat Muhammad (saw), ou bizin ena ene souffrance au fond de ou lécoeur et ça pour faire ou tourne vers Allah plisse pou faire boucou doah pour Allah aide ou et donne ou courage, connaissance (Ilm) pou ou capave corrige bane l’enseignements ki fine bafoué, par ça bane sois disant Mullah la, et ou faire tout ou zeffort ensam avec doah ou amène ça bane dimounes la dans le chemin de ‘Siratwal Al Moustakim’. Alors dans ça verset ki mo fine lire là haut là, Allah pé adresse aux croyants, bane dimounes ki fine amène Iman, bizin amène bane lézot dimounes dans le chemin droite, bane dimounes ki fine croire dans Allah et So prophète sincèrement ; Allah pé dire zot ki le Roza (jeûne) fine prescrire pou ou couma ti prescrire pou bane peuples ki ti vine avant ou. Alors comme-ci ça li ene commandement pou bane ki suive l’instruction divine et pé trouve zot dans le Oummah de Hazrat Muhammad (saw). Et Allah dire ki ça Roza là pou aide zot, afin ki zot marche lor le chemin droit, ça Roza la aussi amène bane frères et sœurs pou pas garde la haine envers zot, pou pas la guerre entre zot, reste en paix et soumette zot à la volonté d’Allah. Et sa verset révélé au prophète (saw) ki trouve dans Quran Shareef, alors ça montrer ou ki pas pou ena ene pli grand Roza (jeûne) ki ça, kot ene dimoune li lève tôt le matin et mange quelque chose (malgré ki pas l’heure de so repas) mais li garde so Roza et li respecter tout condition ki fine metté pou ene dimoune ki garde Roza et li mette li en pratique sincèrement pour l’amour de so Créateur et li reste ene journée sans manger et sans boire et suive bane l’instructions ki so Créateur fine donne li kan li garde Roza et kan soleil couché li rompe so Roza ; kot li prend quelques chose et li alle faire la prière Masjeed ensuite rentre so lacaze, li prend so diner après li ré-retourne Masjeed pou alle adore so Créateur unique. Et li dormi moins, mange moins, cause moins, mais tourne vers so Créateur beaucoup plisse ki bane lézot 11 mois. Le Roza li le troisième pilier de l’islam, càd ki li obligatoire pou tous musulmans hommes et femmes, mais li pas obligatoire pour bane ki malades, pou bane madames enceintes, pou bane ki allaite zot bébé, bane ki dans zot périodes, bane ki en voyages, et bane dimounes vieux, mais seulement li obligatoire pou zot pou paye le Fidya, et donne ça à bane pauvres. Ça li obligatoire pour zot pour accompli et si zot pas accompli ça, zot montrer ene désobéissance totale envers Allah. Et pendant ça mois la, ena bane doah et zikr spécial ki bizin faire kot ça pou aide ou pou rapproche avec Allah plisse et marche lor le droit chemin. Insha’Allah ki Allah donne chacaine parmi nous le courage, la santé, l’amour et rétire tout la haine dans nous lécoeur ki fine collé couma coltard et nous néttoye nous lécoeur et faire li vine ene mirroir propre kot l’amour et la lumière d’Allah réflécter dans nous lécoeur pour Allah, pour So bane messagers, pour bane croyants sincères et pour tous l’humanité en générale sans distinction, et nous montrer nous humilité et nous faire nous vine ene ti-Muhammad (saw) avec l’aide d’Allah ki chaque dimoune ki nous trouver nous le premier pour faire le Salaam, non pas pour mette aucaine boycott et ni réponde zot pas « alaikum ». En observant ça troisième pillier de l’islam là, ça pou donne nous ene grand l’entrainement pou obéir bane commandement d’Allah et aussi pou surveille nous Roza et nous la foi. Ki Allah béni nous afin ki nous capave protège nous Roza et nous la foi, et kan nous pé protège nous Roza et nous la foi c’est ki nous pé faire nous vine ferme et sincère dans le chemin ki fine traçer par nous Créateur. Et si nous réussi accompli tout ça la, alors couma nous bien-aimé prophète (saw) fine dire ; ki ene Rozédaar chaque bonne action ki li faire li multiplié par 10 fois. Pli li faire bane bonnes actions, pli so récompense multiplier et li gagne Allah même comme récompense couma nous AKa Hazrat Muhammad (saw) fine faire nous comprend. Alors, pas laisse ou piégé par bane dimounes ki pas ena Taqwa dans zot lécoeur, kot zot soif pouvoir de ça lémonde là, kot zot cause bane grand grand causer lor mimbar, et faire ou gagne peur de zot pour ki ou donne zot ene pli grand respect au lieu d’Allah et So prophète (saw). Alors, pour ene croyant sincère, ki pé profite ça mois béni de Ramazane là, ki pé lire et étudier le Quran – so bane commandements ki Allah fine metté là-dans – et si li suivre ça bane commandements là, li pou ena la crainte d’Allah seulement dans so lécoeur et non pas la crainte de ça bane « soi-disant chefs » là ! Alors, chacaine parmi nous, nous profite ça mois Ramazane là le maximum kot nous capave gagne Allah même comme récompense, Celui ki control tout séki ena dans ça l’univers là et dans Akhérat et aussi kot nous la vie, manger, boire, l’honneur etc., tout trouve dans So la main et pas trouve dans la main aucaine créatures. Alors Insha-Allah ki Allah béni nous, donne nous Tawfiq, pou mette tout ça bane commandements là en pratique dans ça mois béni là. Ameen !