Bismillah-ir-Rahman-ir-Rahim

 

KHUTBA JUMMAH

 

HAZRAT AMIR’UL MOMENEEN MUHYI-UD-DIN

AL KHALIFATULLAH

 

MUNIR AHMAD AZIM

 

13 Février 2009

 

(Résumé du Khutba Jummah lors Zikr Allah)

 

Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine lire ça verset Quran suivant là:

 

 

 

« Celui ki détourne dépi Zikr so Rab, li (Allah) amène li vers ene punition sévère. » (Ch. 72 Al-Jinn V.18)

 

Mo pé continue mo Khutba Jummah lors Zikr Allah ki mo ti faire Vendredi passé. Dans sa verse Quran ki mo fine lire là, Allah (swt) pé donne ene sévère avertissement pou banes dimounes ki détourne zot dépi Zikr de nous Rab et zot pas même faire le Zikr Allah et Allah (swt) dire ki sa banes qualité dimounes la, Mo pou amène zot vers ene punition sévère.

 

Si ou analyse sa verse là bien, Allah (swt) pé enseigne nous (l’homme) ene kitchose, pou nous propre bien être, et bane mots ki Allah (swt) fine mentionner dans sa verse là,  « Celui ki détourne dépi Zikr so Rab » 

 

« Zikr so Rab » ; ici Allah pé faire référence indirectement et malgré ki Allah pas fine mentionne sa ici, c’est ki Allah (swt) pé faire référence à « Laa Ilâha Illallah » - Ki péna aucaine Bon Dieu à part Allah, le Créateur de l’univers ki possède tous pouvoir et le Tout Puissant.

 

Tout kitchose ena ene moyen pou nettoye nous et aussi purifier. Ene l’exemple pou lave ene linge ki sale ou bizin ena savon pou retire sa bane saleté dans linge là, et pou nettoye ou le corps propre physiquement, ou pou prend de l’eau ensemble avec bane shampooin ou savonnette parfumer, pou ki ou ressenti ou propre et parfumer avec sa bane zaffaire ki ou prend pou mettre ou le corps propre et ki pas reste aucaine saleté.

 

Comme sa même, sa kitchose ki pou nettoye ou le cœur et purifier sa le coeur là, péna narien ki pli efficace ki le « Zikr Allah » et sa Zikrullah là, sa même ki pou lave tout bane kitchose ki fine salir nous le cœur et pou faire li vine propre de tous bane péchés et bane mauvais kitchose ki ti ena dans nous le cœur et aussi le Zikr Allah pou protège nous contre punition Allah.

 

Ene madame ou ene fille dans so bane moment de période (règle) ou so bane moment accouchement ki pendant ene semaine li pas faire Salaat, séki li bizin engage li dans faire le Zikr Allah. Physiquement so le corps sale, c’est Allah (swt) ki fine crée le sex féminin coumsa et zot bizin passe là-dans. Alors faudrait pas ene madame ou ene fille musulmane pendant zot période ou même accouchement, zot senti zot libre, ene semaine ou un mois de congé. Ki faire zot pas faire li ? Parski li pas permettre dans ene telle situation pareil pour zot faire Namaz, Telawat Quran, prend Quran dans la main lire avec traduction.

 

Nous conner ki Allah (swt) fine mentionne sa dans le Quran Shariff aussi, mais sa n’empêche pas ki ou reste dans moment de Zikr dans chaque minute ki ou gagner pou ki ou nettoye et purifier ou l’ame spirituellement ; ou le corps pas propre physiquement malgré ou prend bane bain pou nettoye et garde ou physiquement propre à cause de sa saignement ki à chaque moment sa di sang impure là pou déssane. C’est sa ki Allah (swt) fine dire pas approche avec Namaz, garde Roza ou sois prend le Quran dans ou la main pou faire le Telawat Quran. Sa c’est de coté ou le corps physique, mais ou l’ame, li demande sa purification là li, pas avec de l’eau, ni savonnette ou bane lézot parfumerie, l’âme la so purification dans sa bane période là, c’est « Zikr Allah ».

 

Zikr c’est ene moyen pou purifié l’âme, le cœur spirituelle et dans sa bane moments là aussi à travers le Zikr, ou pas pou reste loin avec Allah et toujours ou pou sous protection Allah (swt), physiquement et spirituellement.

 

Sa Zikr ki ou pou faire la, appelle sa Zikr Qalbi (Zikr dans le cœur) ki veut dire ki le cœur là en permanence communique avec Allah Ta’ala. Emplace ki dans sa bane moment de congé la, ou reste sans aucaine Ibaadat, bé définitivement shaytaan pou risse ou vers li plisse et éloigne ou dépi ou Créateur. 

 

Allah (swt) même dans Quran Shariff Ch.31 Luqman V. 34 kot Li pé dire :

 

 

« Pas laisse la vie lor la terre trompe ou et pas laisse le grand trompeur (Satan) embête ou à propos Allah. »

 

C’est-à-dire, pas laisse Shaytan embête zot, et pas laisse Shaytan incite zot pou faire péchés et kot Allah (swt) capave encolère avec ou. Ki faire ?

 

Parceki ou fine penser ki dans sa bane moment de saignement là, ou en congé avec Namaz, Telawat Quran, Roza etc… et peut être ou penser ki Zikr aussi pas bizin faire, ki sa aussi congé ; non !

 

Ça c’est pas vraie. Au contraire ene croyante li bizin en permanence reste en contact avec so Créateur et li pé remplace tous bane acte Ibaadat la par ene l’autre Ibaadat : « le Zikr »

 

Donc dans sa bane moment là le « Zikr Qalbi » li très nécessaire et nous bizin péna doute la-dans ki le « Zikr Qalbi » arrive à ene niveau spirituel pareil couma bane lézot Ibaadat ki ou ena l’habitude faire dans bane lézot jours, et par le « Zikr Qalbi » péna aucaine Ibaadat ki négliger ki li niveau l’ame ou le cœur ; au contraire ou l’ame et ou le cœur attache plisse dans soumission totale envers L’Etre Aimé (Allah) avec ki ou l’âme et le cœur fine attacher.

 

Alors pas à cause bane situation coumsa, ou délaisse tous bane bon travail et même le « Zikr Allah ». Pense bien ki Allah (swt) même fine dire : « Wa Laa Zikrullahi Akbar » - Certainement Zikr Allah pli grand.

 

Ena ene Hadith rapporté par Abu Saïd Khudri (r.a) fine rapporté ki Hazrat Muhammad (s.a.w) fine dire : « Ena beaucoup dimounes ki faire Zikr Allah, allonger confortablement lors zot lili bien mous et pou sa Allah pou donne zot bane rangs très élevés dans Jannat. » (Tirmidhi).

 

Et dans ene l’autre place, Hazrat Mohammad (s.a.w) fine dire : « Si zot reste occuper dans faire Zikr Allah tout létemps, bane Anges pou faire Musaafah (accolade) avec zot, et pou serre zot la main même zot lors zot lili.

 

Ene fois, Hazrat Muhammad (s.a.w) fine dire : « Bane Muffarridin fine dépasse zot tout ». Bane Sahaba (r.a) fine demander « Qui sa bane dimoune là sa ? »

 

Hazrat Mohammad (s.a.w) fine réponne :

 

« Bane ki reste toujours dévoué dans Zikr Allah. »

 

Quand ou faire Zikr Allah, dans aucaine façon ou pas perdi. Faire Zikr Allah dans moment prospérité et contentement, sa pou vine aussi ene aide pou ou dans moment difficultés et la peine. Pou faire bien comprend saki mo fine dire ou là :

 

Salman Farsi (r.a.) rapporté ki le Saint Prophète (s.a.w) fine dire: « Si ene dimoune faire Zikr Allah dans bane moments tranquilité, contentement, et prospérité, alors à chaque fois ki sa dimoune là dans ene problème ou dans difficultés, bane Anges dire : ‘C’est ene la voix ki nous connais ki vine dépi ene serviteur en difficultés sa’ – Alors sa bane Anges là plaide pou li en so faveur devant Allah, mais, par contre quand ene dimoune ki pas faire Zikr Allah dans prospérité ou contentement, alors si arrive li ene malheur et l’heure là li pense Allah, bane Anges dire : ‘Ça c’est ene la voix bien drôle’, et zot pas plaide pou sa dimoune là, devant Allah. »

 

Dans ene l’autre Hadith Ibné Abbas (r.a) dire : « Jannat ena huit la portes ; ena ene là-dans, ki réserver spécialement pou bane Zaakiriin. » Et fine continuer dire ki celui ki reste occuper dans Zikr Allah pas pou ena l’hypocrisie et Allah Ta’ala pou content sa dimoune là. 

 

Ene fois pendant ki Hazrat Muhammad (s.a.w) pé retourner dépi ene voyage vers Madina, Hazrat Muhammad (s.a.w) fine arrête dans ene l’endroit et li fine demander : « Kot bane dimoune ki fine dépasse tout lézot ? »

 

Bane Sahaba (r.a.) fine répond: « Bane ki voyage vite fine dépasse tout lézot » Hazrat Muhammad (s.a.w) fine dire : « Bane dimounes ki toujours occupés et dévoué dans Zikr Allah. Celui ki envie goute tout plaisir Jannat bizin faire Zikr Allah beaucoup. »

 

Dans ene l’autre Hadith, Abu Moussa (r.a) rapporté ki Rassouloullah (s.a.w) fine dire : « Comparaison entre celui ki faire Zikr Allah et ene l’autre ki pas faire Zikr Allah pareil couma différence ki ena entre ene vivant et ene mort. » (Bukhari et Muslim)

 

Tout dimounes content la vie et gagne peur la mort. Hazrat Muhammad (s.a.w) pé envie dire ici ki ene dimoune ki pas faire Zikr Allah, malgré ki li vivant physiquement, mais spirituellement li mort et so la vie péna aucaine valeur.

 

Alors, mo termine sa Khutba là là-même avec ça parole là  zordi. Ça la vie (solitude) ki mo pé amené pas mériter pou appelle la vie ; vivant c’est celui ki reste en contact permanent avec so Bien Aimé !