Text Box: Bismillah-ir-Rahman-ir-Rahim Khutba Jummah Hazrat Amir’ul Momeneen Muhyi-ud-Din Munir Ahmad Azim (Ene Résumé de Khutba Jummah) 13 Juin 2008 Après ki Hazrat Muhyi-ud-Din Al-Khalifatullah fine souhaite zot tout le salaam, li fine lire, Tashahhud, Taouz et ensuite li fine lire Surah Al Fatiha du Quran Shareef et li fine dire: Ch.3 Al Imran V.73 Ene partie Juifs et Chrétiens dire: Faire semblant accepter message ki fine envoyer lor bane Musulmans au commencement de la journée, mais rejette li à la fin de la journée. Peut-être ki (bane Musulmans zot aussi) va retourne à zot (ancien) religion. Mo fine choisir ça bane versets Quran là pour le Khutba Jummah d’aujourd’hui, parce ki d’après moi la majorité partie de ça bane versets là pé applique pour la situation actuelle. Premièrement dans l’époque de Hazrat Muhammad (s.a.w) li ti ene tradition ça ki bane hypocrites pour ki zot embête bane nouveau Musulmans, zot ti pé faire zot bane dimounes rentre la-dans, c’est-à-dire, rentre Musulmans. Et zot ti pé dire ‘amène Imaan (la foi) le matin et l’après-midi dire ki nous pas fine amène Imaan’. Ça li pas juste ene tradition de ça l’époque d’avant là, mais aujourd’hui jour aussi ena li. Et d’après Quran nous trouver ki en vérité pas capave embête bane vrai croyants. « Yokha déounallaha wallazina amanu wama yaghdanna illa anfossahum. » Zot embête zot même mais zot pas capave embête Allah et So bane dimounes. Donc, vine ça bane dimoune d’Allah là, ki pas rentre dans zot piége. Ça même affaire ti ena dans l’époque de Hazrat Muhammad (s.a.w), ene groupe de bane gens du Livre fine dire ki amène Imaan lor premier partie de ça livre là ki fine révéler dans la journée, et rejette bane ki fine révéler dans dernier partie de la journée là. C’est ki mérite réflexion là-dans, c’est ki dans ça déception là, zot pas réussi embête bane vrai croyants. Kan fine découvert ça bane imbécile là, et zot pas réussi dans zot plan, bé à ce moment là, dans zot indécence zot dire n’importe comment bizin arrête ça enseignements là. Dans ça verset là, ena parmi bane Chrétiens et bane Juifs fine dire ki alle amène Imaan lor le Quran le matin et l’après-midi continuer retourne lor ou propre religion. Faire comme ça afin ki créer de doute dans bane dimounes et pour ki zot abandonne Islam. Dans prochain verset Allah pé dire : « Yaghtassu bérahmatéhi mayn yashaao wallaho zul Fazlul Azim » Li répandre So la grâce lor celui ki li envie et Allah Li bien Gracieux. (Ch.3 V.74) Kan ou entende ça verset là, bé tout de suite ou attention li alle vers le Surah Jummah, le verset kot Allah dire, « Zaleka Fazlullahé yotihi mayn yasshaao wallahu zul fazlul Azim ». Ça c’est la grâce d’Allah ça ; Li donne à celui ki Li envie. Ça verset là aussi en fait Li pé applique lor la situation d’aujourd’hui dans ene tel façon, ki Allah pé envoye So grâce lor celui ki Li fine choisir pour envoyé et bane les zot jaloux de ça. Et zot pas penser ki dans le Surah Jummah, c’est ça même prophétie ki ti ena, ki Allah Li choisir celui ki Li envie pour Li envoye So la grâce et zot pas pour capave arrête ça. Zot capave faire seki zot envie, jamais zot pas pour capave réussi dans zot bane plans. Maintenant dans ça bane versets là, fine mentionne la situation de l’époque d’avant aussi et l’époque d’aujourd’hui aussi fine dire ki parmi bane gens du Livre ena celui ki même si ou quitte ene grand trésors avec li, bé li pour certainement retourne ou ça. Mais ena aussi celui ki même si ou donne li ene roupie, ene sous ou ene dinar aussi, là aussi li pas pour retourner excepter ki ou continuer rappel li. Ça c’est parce ki zot dire ki pena aucaine blâme lor zot en ce qui concerne bane ignorants, bane illettré et zot cause menti au nom d’Allah kan pourtant zot conne ça zaffaire là très bien. Dans ça l’époque là, seki bane Juifs ti pé habituer faire avec bane Musulmans, c’est ene image de ça même ki fine mentionner. Mais dans sanne l’époque là aussi bizin ena bane Juifs et d’après bane prophétie de Hazrat Muhammad (s.a.w), ça bane Juifs de ça l’époque là ti ena pour prend naissance dans so Ummah même. Aujourd’hui jour bane Ulemas ena tendance pour ignore ça, mais en fait ça bane prophétie de Hazrat Muhammad (s.a.w) fine accompli mot pour mot, et pas nécessaire pour alle dehors, nek guette situation ici même ki Hazrat Muhammad (s.a.w) fine dire ki zot pour tellement suive bane façons et bane habitudes de zot bane peuples d’avant pareil couma ene plat la main pour ene lotte plat la main et zot pour suive zot, pouce par pouce jusqu’à ki si, zot alle dans bane précipice bé zot aussi pour suivre zot. Bane Sahaba fine demander, O prophète d’Allah, est ce ki ou ouler dire bane Juifs et Chrétiens ? Hazrat Muhammad (s.a.w)) fine dire pour ki d’autre ? Dans Tirmidhi, Hazrat Abdullah bin Amar (r.a) rapporter ki Hazrat Muhammad (s.a.w) fine dire, ki ‘Lor mo peuple aussi pour ena ça situation ki ti arrive lor Bani-Israel, dans lequel pour ena bane tel similarité pareil couma ene soulier d’ene lipié, li ressembler soulier de lotte lipié là’. Après dans ene Hadith de Kanzulmal, Hazrat Muhammad (s.a.w) fine dire ki pour ena ene tel l’époque d’anxiété ki pour vini pour mo peuple ; bane dimounes pour alle vers zot bane Ulemas avec l’espoir pour gagne guide. Pour ena ene période de tracasseries, pour ena désordres et bane dimounes pour diviser en plusieurs sectes. A ce moment là bane dimounes pour peur pour galoupe vers zot bane Ulemas. Hazrat Muhammad (s.a.w) dire ki bane dimounes là pour trouve zot bane Ulemas couma bane zako et bane cochons. Maintenant dans Quran aussi fine mentione à propos de bane zako et cochons et c’est commentaires de ça même ça. Kan pé mentionne ça bane dimounes là, Eski ou penser ki ça ti pé arriver dans bane l’époque avant ? Eski maintenant pas capave arrive ça bane zaffaires là ? Mais aujourd’hui jour, pareil comment li ti été dans l’époque avant, dans sanne l’époque là aussi pareil. C’est-à-dire ki zot pas ti vine bane vrai zako et vrai cochons mais zot ti adopter bane mauvais manières de bane zako et bane cochons. Et cochons dans ene sens zot écrase et déshonore bane champs de Hazrat Muhammad (s.a.w). Tous bane champs ki Hazrat Muhammad (s.a.w) fine planter, ça bane cochons là gâte ça bane champs là et pas laisse zot fleuri et pousser. Après dans Tirmizi, à propos de ça bane dimounes là même, ena ene Hadith kot Hazrat Ali (r.a) rapporter ki Hazrat Muhammad (s.a.w) fine dire ki ene tel l’époque pour vini, kot l’Islam pour rester que de nom seulement. Et Quran pour rester zis en forme de mots et nannié plisse ki ça. C’est-à-dire ki apparemment Islam pour ena beaucoup groupes, chaque fois pour cause Islam mais seulement que de nom, et pour lire le Quran beaucoup mais seulement superficiellement, comme ene décoration seulement. En fait bane dimounes pas pour au courant de vrai esprit, vrai l’âme de Quran. Ensuite fine dire dans ça l’époque là, apparemment bane Masjid pour paraître bien rempli, bien fréquenter, mais zot pour vide de bane guide spirituel. Maintenant guette ene coup comment bane Masjid rempli avec bane la force sous bane menace etc. Mais zot tout vide de bane guide. Ki faire ? Parce ki zot Ulemas pour bane pires créatures ki exister sous ça leciel là. Maintenant, ça expression là li pas de moi, mais c’est bane paroles de Hazrat Muhammad (s.a.w) dans kot ça bane mots là même li fine explique situation de bane Mullah pour bane l’époque après. Pour ena bane révoltes ki zot pou créer entre zot même, et ça pour retourne avec zot même. Maintenant kan même combien zot essaye saper avec ça, zot pas capave même donne so vrai réponse. Si zot dire ki ‘Ça bane mullah là, pas nous ça’, mais Hazrat Muhammad (s.a.w) continuer dire ki pour ena ene l’époque pli pire ki pour vini. Mais en effet pas capave ena pli pire insulte à Islam ki ça ! Plus pire ki zot ? Pour ça bane Mullah là, ena pou penser ki ça pas capave appliquer pour zot ; ki Ça pas possible ! Alors bane vrai Mouslemeen (Vrai Musulmans croyants), nous bizin prend beaucoup de tracas et de pitié pour le futur de l’Islam et fini ça zaffaire là lor zot même – c’est-à-dire, bane ki pé créer desordres et sème la haine entre zot-mêmes et surtout ça bane Mullahs là, zot pareil couma ça deux zanimo ki fine mentionner là, kot zot pé déracine tous bane plantes ki Hazrat Muhammad (s.a.w) fine planter. Zot pé empêche ça fleuri et grandi et rapporte so fruits. C’est ça meme ki ena de mieux pour Islam, ki nous bizin dévoué nous physiquement et spirituellement et concentise nous bane zenfants lor l’enseignements lor nous bien-aimé prophète (s.a.w) ki li fine apporter sous l’instructions divines (révélations). Ça même bane Mullahs de ça l’époque là kot partout zot pé la guerre entre zot-mêmes, l’affiches coller partout, pour dire ki sanlà Musulmans et ki sanlà li pas Musulmans, et zot dire ki Hazrat Muhammad (s.a.w) li le dernier prophète, et ki après li pas pou ena prophète ki pou vini ;comme-ci dirai Allah ti bizin demande ça bane Ulemas là, sipa Li ti bizin demande zot « Si pas Mo bizin élève quelqu’un comme Mo Prophète et donne li révélations. » Lor ça point là, zot pé kimé lor mimbar de Hazrat Muhammad (s.a.w) pour mette la haine dans lecoeur de bane les autres frères et sœurs pour ki zot prend ça bane là comme pas Musulmans ; ki zot bane Kaafirs. Couma dire donne Imaan (la foi) trouve dans zot la main ça, tant tandique ki Imaan ine fini dans zot la main et zot népli ene bon Imaam. Zot ferme la porte l’apostolat, et zot dire pena prophète ki pou vini après Hazrat Muhammad (s.a.w). Et dans Quran Allah fine mette ça claire ki Li pou préserve So bane l’enseignements jusqu’à le Jour du Qayamat et pas pour ena ene doute là-dans et ki li pou ene guide seulement pour bane dimounes pieux. C’est vrai ! Seulement bane dimounes pieux ki pour comprend bane versets du Quran Shareef, couma Allah Li pou préserve So l’enseignements jusqu’au Jour du Qayamat. Alors fine ena tant de versets ki Allah fine révèle à Hazrat Muhammad (s.a.w) ki li pas pou possible pour moi pour mo cite ça bane versets là aujourd’hui. Quel Ironie de la part de bane Mullahs de ça l’époque là, kot zot pé prend zot comme bane grand défenseurs de l’Islam et zot pé traite les autres de Kaafirs et empêche zot alle faire Hajj ; Kan tandique ça bane Mullahs là, zot fine piétine l’enseignements Quran Shareef et l’enseignements de Hazrat Muhammad (s.a.w). Dans ki bassesses ça bane Mullahs là ine rentrer, ki zot ferme la porte l’apostolat, et zot dire ki pas pour ena Nabi ki pour vini, et jusqu’à aujourd’hui zot encore pé attane Hazrat Issa (a.s) pour dessane lor léciel. Et d’après ça bane Mullahs là, Jésus (Hazrat Issa) a.s ti bizin fini paraître la fin 13ème Siècle ou commencement 14ème Siècle, et kan pas pé trouver même ki Hazrat Issa (a.s) pé dessane lor léciel, alors ena fine commence proclame li même comme Réformateur du 15ème siècle. Là encore commié temps ça bane Mullahs là pour donne l’espoir bane frères et sœurs Musulmans ki Issa (a.s) pou dessane là ! Pour vini là ! Parce ki zot fine vine Dieu lor la terre. Pour zot même zot Imaan zot pas pé capave contrôler, astère zot même zot juge Imaan dimounes, ki sanlà Musulmans ou pas, kan tandique ki dans Quran Allah dire : « Pena aucaine contrainte dans la religion ! » et dans Surah Al-Kaafiroun Allah fine dire le prophète pour dire : « A toi ta religion et à moi ma religion ». Ala ça hadith ki mo fine mentionner là, kot Hazrat Muhammad (s.a.w) fine mentionne ki pou arrive So Ummah, et dans ki bassesses bane Ulemas pour rentrer et couma ça deux zanimeaux là li applicable pour ça bane kalité Ulemas là. Aujourd’hui jour bane Ulemas ena tendance pour ignore ça, mais en fait ça bane prophétie de Hazrat Muhammad (s.a.w) fine accompli mot pour mot, et pas nécessaire pour alle dehors pour conne ça. Nek guette situation ici même ! Hazrat Massih Maoud (a.s) fine dire, dans so bane extraits : « O Bane ki cherche la pureté, si zot envie marche lor la terre avec ene le cœur pure et bane anges faire accolade avec zot, bé cherche le chemin de la certitude. Et si zot pas trouve ça destination là, bé attrape linge de ça dimoune ki fine trouve Allah avec so lizié de certitude. Et parski trouve Allah avec ene lizié de certitude, bé so reponse, c’est ki meme si quelqu’un envie entende li de moi ou li pas envie, mais moi, mo pour dire ça meme, ki façon pour gagne ça certitude là, c’est Allah So enseignements vivant, So parole vivant ki garde ça signe vivant là dans li et avec li. » Maintenant si ou guette le Quran, bé l’enseignement vivant dans ça aspé là, ki jusqu’à aujourd’hui li pé servi nous, li pé guide nous. Bane zaffaires de ça l’époque là fine mentionner avec bane tel explications et avec bane tel détails ki pas ti capave penser meme ki 1429 ans de cela, Hazrat Muhammad (s.a.w) ti fini dire ça bane zaffaires là. Et avec bane tel détail, ça prophète là (Hazrat Muhammad – s.a.w) fine dire bane tel zaffaire ki ena connection avec bane secrets profond de la science. Et bane secrets ki maintenant pé dévoiler dans le monde, pena aucaine là-dans ki pas fine mentionner dans le Quran. Et ena encore beaucoup bane secrets ki pour dévoiler, parce ki c’est Allah So façon ça, ki doucement doucement Li pé faire bane zaffaire invisible vine visible. Et ça pé continuer aller même, le monde invisible, li beaucoup plus ki le monde visible. Jusqu’à maintenant bane changement de invisible fine vine visible, ena encore plisse ki ça ! Et dans Quran nous trouver ki Allah So bane paroles Li tellement beaucoup ki pas capave imaginer même ki kantité. Si la mer vine l’encre et gagne encore bane la mer ki vine l’encre, bé là aussi ça l’encre là pour peu pour écrire Allah So bane paroles ; pour reste encore bane paroles pour écrire. Guette ene coup avec ene pot l’encre combien ou capave écrire, et si ou trempe plume dans ene la mer de l’encre bé ou pas capave imaginer même ki kalité sujet capave préparer. Capave prépare ene sujet de milliers d’années. Allah So bane enseignements vivant, ki garde So bane signes vivant avec Li, et parmi ça bane signes vivant là la révélation et manifestation et bane épreuve même ene signe vivant. C’est ça bane signe vivant ki devant ou azordi. Personne pas capave dire ki bane enseignements Islamiques fine vine vieux, ti bane zistoires ça, maintenant pé ré-amène ça bane zistoires là dans le monde réel. Kot ça bane grands grands Mullah là été ki pé colle laffiche partout partout, pé juge la foi dimounes, pé traite bane les autres Kaafirs – Zot ki pé prétend être bane grands défenseurs de l’Islam, bé eski pas faire conférence, faire laffiche lor là, pour réfute Ali Sina kot li pé blasphème l’Islam et Hazrat Muhammad (s.a.w) et li pé cause toute sorte kalité malpropres lor Allah et So Rassool (s.a.w). Kot zot été ça bane Mullah là ? Zot reste tranquille sanlà, zot pas dire nannié ? Et jusqu’à l’heure ene dimoune ki zot kalifié li comme Kaafir, li fine dibouté et li fine challenge Ali Sina dans ene Mubahila. Et lor là bane ignorants dans l’Islam fine préfère side de côté Ali Sina plîtôt ki aide ça dimoune là kot li pé défendre Allah et So Rassool (s.a.w). Ou pas trouver ki Hazrat Muhammad (s.a.w) so bane prophéties lor ça bane Mullahs là pé réalizer azordi ? Eski Allah pas bizin envoye So guide spirituel, So Choisi, pour tire bane morts depuis dans tombe et redonne zot la vie spirituelle. Car c’est ça bane Mullahs là-même ki fine faire zot morts spirituellement et fine mette zot dans tombe de l’obscurité. Alors le Jamaat de Hazrat Massih Maoud (a.s), c’est ene Jamaat ki pour défraîchi tous bane mauvais arbres et bane mauvais herbes ki fine pousser dans le champs de Hazrat Muhammad (s.a.w), et pour empêche ça deux zanimeaux ki mo fine mentionner (ki trouve dans Quran et Hadith) pour détruire ça bane plantes ki le Saint Prophète (s.a.w) fine planter. Mais malheureusement, bane Ahmadies pas fine conne suivre ça l’enseignement de Hazrat Massih Maoud (a.s) pour empêche bane les autres mauvais arbres et mauvais l’herbe pousser pour touye ça vrai l’enseignement de l’Islam là. Et pense bien ki Hazrat Massih Maoud (a.s) ti vine de côté d’Allah et li ti pé recevoir bane révélation divine de côté d’Allah et li ti pé faire so bane travail d’après l’instruction ki Allah donne li. Ki kalité caricatures, blâmes, accusations, persécutions et boycott zot pas fine mette lor li et so Jamaat. Et Hazrat Massih Maoud (a.s) tout comme Hazrat Muhammad (s.a.w) ti gagne beaucoup tracas et chagrin ki pour arriver dans l’avenir kan pour ena bane chefs à la tête ki pas gère l’argent sacrifice dans le chemin d’Allah, et aussi zot pou piétine l’enseignants du Quran, Sunnah de Hazrat Muhammad (s.a.w), et Hazrat Massih Maoud (a.s). et kot zot pou donne les autres plisse l’importance ki Allah ; et ça c’est ene Shirk totale ki Allah condamner dans Quran Shareef. Pour mo pas alle pli longue lor là, mo espérer ki chacaine ki pou lire ça Khutba Jummah là, si zot prend li en considération, li pou ene bien-être pour zot-même kot zot pou revivre spirituellement après ki zot fine morts spirituellement. Si ou rejette li, bé c’est ou ki pou alle réponde devant Allah (TWA). Faire bien attention avant ki ou ridiculiser, faire bane bouffonerie, moquries, faire toute sorte kalité commentaires imbéciles ; mo fini averti zot d’avance ki so conséquences pour BIEN BIEN GRAVE ! Pas seulement Hazrat Massih Maoud (a.s) ki dans so la vie fine vivre ça bane signes d’Allah là – et li ti pé faire beaucoup duahs pour ki les autres dans so Jamaat zot aussi zot vivre ça bane signes d’Allah là. Alors, bane bon Ahmadi ki bane suivants de Hazrat Massih Maoud (a.s), dans zot la vie aussi, ena beaucoup bane signes vivant. Si ou analysé, ou pou trouver ki chacaine ki parmi nous ici, Allah fine montrer So signe, acceptation de bane duah, etc. C’est bane enseignements vivant d’Allah ki ena avec Li (Allah) et aussi bane signes vivant. Kan Li dessane depuis le ciel bé li comment dire li pé tire bane morts de zot tombes. Par dessane depuis le ciel, li veut dire ki celui ki so lecoeur vine pure auprès d’Allah, Allah manifester lor ça kalité le cœur là. Et pli grand signe c’est ça. Donc, mo espérer ki tout le temps le Jamaat pour suivre ça bane conseils vivant là et zot pour trouver ki avec zot zefforts, zot duahs, bane morts de plusieurs siècles pour sorti de zot tombes, et pour vine vivant. Ki Allah faire ki li comme ça même, et mo pé trouver ki ça pour arriver, Insha-Allah.