Text Box: بسم الله الرحمن الرحيم KHUTBA JUMMAH HAZRAT AMIR’UL MOMENEEN MUHYI-UD-DIN AL KHALIFATULLAH MUNIR AHMAD AZIM 14 Août 2009 (Résumé du Khutba Jummah) Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine lire ça verset Quran suivant là:  “Alam ya’-ni lillaziina ‘aamanuuu ‘an-takh-sha-‘a quluubuhum lizikrillaahi wa maa nazala minal Haqq” Est-ce ki le moment pas fine arriver pou bane croyants, pou ki zot le cœur courber divant Allah et la vérité ki fine déssane? (Ch.57 Al-Hadid V.17) Aujourd’hui mo pou cause un peu lors l’humilité ki ene Momin (croyant) bizin ena divant so Rab, Allah Ta’ala. Parmi tous bane stages de zikr, l’humilité li très important; ki li dans Namaz, Zikr-é-Ilàhi, Tilawaté Quran et autres formes de Zikr; ene dimoune pas pou réussi atteindre la perfection d’Ibaadat si li péna ene l’humilité profond ki attache li permanent avec so Créateur. En commentant ça verset ki mo fine fek cité, Ibn Massood (r.a) [ene de bane compagnons du Saint Prophète (s.a.w) ki fine embrasse l’Islam depuis so bane débuts] dire: “Ti ena pas même 4 ans dépi létemps ki nous fine embrasse l’Islam et létemps ki ça révélation (de ça verset là) fine dessane, ki Allah fine questionne nous”. Hazrat Ibn Abbas (r.a) aussi fine dire concernant ça verset là: “Allah fine trouver ki le cœur de bane croyants pas ti encore vine assez solide, alors Li (Allah) fine questionne zot (à ce propos) dans 13ème l’année après manifestation de bane révélations”. Dans ene l’autre verset, Allah félicite bane croyants pou zot humilité:  “Qad ‘aflahal-muminuun; Allaziina hum fii salaati-him khaa-shi’uun” (Bane ki ena la foi pou sûr gagne la Victoire; bane ki dans zot la prière soumette complètement (à Allah) (Ch.23 Al-Mouminoon V.2-3) Le mot arabe “Khushoo” li englobe le stage d’humilité et d’attention ki ene Momin li gagner. L’humilité ki ene Momin gagner dans Namaz li basé lors so la foi et la façon ki li approche so Créateur dans Ibaadat (la prière). La soumission envers Allah, le Créateur de bane léciels et la terre li essential pour ki “Khushoo” prend l’existence. Li prend racine dans la crainte extraordinaire d’Allah (swt). Ene Momin li bizin toujours conscient ki so Créateur pé guette li et conné ki ena dans so lé cœur au profond. Kan li realise ça fait là, li développe ça crainte d’Allah là et li médite lors so propre existence et so but lors ça la terre là. Kan l’homme croyant li développe petit à petit ça la crainte là et aussi ene l’amour extra fort pour so Créateur, alors so le cœur même incline vers ça Vérité là. L’humilité le plus profond li pas trouvé explicitement lors façon physique ki l’homme courber vers so Créateur, mais essentiellement avant tout, li bizin faire so le coeur vine humble (humilié) envers so Créateur, Allah (swt). L’humilité li décrire comme suite par Hazrat Umar Ibn Al Khattab (r.a): Ene jour Hazrat Umar (r.a) fine trouve ene missié ki ti pé courbe so licou kan li ti pé faire Namaz. Alors li fine dire: “O toi avec ene licou, ré-lève to licou, parski Khushoo (l’humilité) li pas trouve dans bane licou, mais li trouve dans bane le cœurs”. Dans ene hadith, le Saint Prophète (s.a.w) fine dire: “La piété trouve ici” et li montré direction so le coeur et li fine montré et répète ça parole là 3 fois. (Muslim) Couma mo fine déjà expliker dans ene de mo bane Khutba Jummah lors prosternation dans Namaz, bane actions de nous lécorps physique zot important mais si ene dimoune li pas faire so lécoeur aussi courber et prosterner devant Allah; alors ene telle action de prosternation physique de nous lécorps li sans valeur. Action physique li lié avec l’état de nous le cœur. Ceki Allah guetter c’est l’état de nous le cœur. Ene le cœur humble ki courber totalement à la volonté d’Allah, ki pieux et mazine Allah à cinquaine de so battement, li ene le cœur éternel et c’est ça même le cœur ki Allah bizin ki bane ki dire zot “muslemeen”, ena. Fine rapporté dans l’histoire ki même bane compagnons du Saint Prophète (s.a.w) ti détesté bane show excessif de l’humilité physique (ki manifester par le corps) sans ki ça corresponde par ene piété du cœur. Chakaine de nous bizin prend compte l’état de nous le cœur. A chaque moment nous bizin faire attention avec l’humilité ki masqué l’hypocrisie. Ça l’état là c’est kan le corps manifester l’humilité sans ki le cœur vine humble. L’humilité c’est aussi ene soumission à la vérité et à la réalité d’Allah (swt). C’est ene de bane causes de l’humilité et kot, si ene dimoune au commencement li oppose par rapport à certains réserves ki li ena et si li laisse li attirer avec la vérité, sans mette doute dans bane vérités ki Allah fine manifester et li accueille et accepter ça vérité là, alors ça dimoune là li mette li-même dans le chemin de “Khushoo”. Ene croyant pour être vraiment humble et sincère envers Allah (swt) et So bane prophètes, li bizin mette dans so la tête et senti avec so le cœur ki la main d’Allah li lors toutes choses. Surtout azordi nous pé vivre ene l’époque exceptionnelle kot Allah pé envoye So bane instructions et pé faire revivre le Quran et kot Li fine faire descende So Ruhil Qouddous, alors li primordial ki le croyant li mette so confiance en Allah et en So bane messagers. Ceki Allah faire, li pour le meilleur. Si le cœur d’ene croyant li affecté par bane maladie, le seul remède ki rester c’est la repentance. Et kan la repentance (le répentir) exister, “Khushoo” manifesté li encore ene fois kot le regret et la crainte d’Allah ré-vini avec ene la force extraordinaire. “Celui ki Allah guider, personne pas pou capave égarer, et celui ki Allah laisse égarer, personne pas pou capave guider”. C’est Allah ki juge l’état d’ene le cœur. Nous, bane frères et sœurs dans l’Islam et la Jamaat Ul Sahih Al Islam, nous bizin maziner bien ki c’est Allah ki juge nous. Li guette nous le cœur avant tout. Ene action, quoiqui li paraitre bon pour lizié dimoune, mais si li pas fine accomplir avec la sincérité du cœur, ça action là sans valeur. Bane ki dire zot ena la foi en Allah (swt), en So bane prophètes, So bane anges, livres, le destin, le jour du jugement, paradis et l’enfer bizin maziner ki zot bizin avant toute chose accepter séki Allah fine décréter pour li lors ça la terre là. Si ene bien touche li, li dire Alhamdolillah et si ene mal touche li, li dire aussi Alhamdolillah et li redoubler so z’éfforts pour gagne l’amour d’Allah (swt) et So protection. L’humilité so place li trouve dans le cœur, mais so bane fruits zot prend l’existence lors le corps physique. Bane postures de Namaz li ene l’exemple d’ene soumission complète envers Allah kan li accompagné d’ene soumission du cœur. C’est pour cela ki Namaz li très important et faudé pas à aucaine moment (et tanque ki possible) pas faire bane actions pendant Namaz ki contraire avec ene démonstration d’humilité. Par exemple, ene croyant dans Namaz faudé pas li craque so les doigts, jouer avec so la barbe (et moustache), bouger excessivement et ki faire bane les autres actions ki pas démontrer l’humilité envers Allah (swt). Hadith: Hazrat Ibn Abbas (r.a) fine rapporter ki le Saint Prophète (s.a.w) fine dire: “Péna nannié pour ou dans ou Namaz (Salaat) excepter séki ou comprend de ça”. (Ahmad) Allah fine donne la bonne nouvelle du succès à bane croyants ki faire zot Namaz régulièrement (couma Surah Al-Mouminoon V. 2 – 3 mentionner) mais ça Victoire là li limiter seulement à bane ki possède l’humilité et l’attention ki bizin kan observe Namaz et dans toute forme d’Ibaadat. Le Khushoo (l’humilité) li bizin existé (pour toujours) dans le cœur d’ene croyant. Le Khushoo amène l’homme croyant vers ene vrai ascétisme [ene dévouement complet envers Allah kot le Musulman croyant li soumette li complètement à la volonté d’Allah et li reste dans la contemplation d’Allah (Zikré Ilaahi) kot so le cœur (le “sirr”) li realise Allah]. Ene l’exemple d’ene ascète (Nussak) c’est Hazrat Umar (r.a). Ene jour, Hazrat Ummoul Momeneen Aisha (r.a) fine trouve ene ti groupe jeunes hommes ki ti pé marché dans ene façon bizarre. Alors li fine demande renseignements lors zot. Alors réponse fine vini ki c’est bane ascètes (ki pratique l’ascétisme) [Nussak]. Alors Hazrat Aisha (r.a) fine dire: “Kan Umar Ibn Al Khattab ti pé marché, li ti pé marché vite, kan li ti pé causer, li ti pé causer dans ene façon li les autres tende li bien, kan li ti pé batté (la guerre), li ti pé faire (bane adversaires) du mal et kan li ti pé nourri (bane dimounes – so familles et bane pauvres) li ti pé nourri zot bien – et li ti vraiment ene ascète (nussak)”. ‘Khushoo’ li accompagner d’ene totale acceptation de bane commandements et bane prohibitions d’Allah. Li aussi veut dire accepter guidance ki vine de côté d’Allah sans mette aucaine doute dans le cœur, attention le cœur perdi so innocence et so humilité et li vine malade. Ça malade là li causé par Shaytane ki là pour sème le trouble dans le cœur de bane croyants. Alors nous bizin mette nous confiance en Allah et faire nous le cœur fleuri avec l’humilité et la crainte d’Allah. C’est mo doah ki la Jamaat Ul Sahih Al Islam et tous bane musulmans de par le monde en entier zot soumette zot complètement avec Allah avec ene le cœur sincère. C’est ça sincérité là et la piété du cœur ki amène l’humilité et c’est l’humilité ki pour élève le stage de l’homme devant lizié du Créateur. Tous l’Univers li soumette à Allah et zot montré ene l’humilité complète envers zot Créateur. Qui Allah illumine nous le cœur éternellement avec le “Khushoo” (humilité) et Li faire nous soumette complètement à So Volonté – Ameen Soumma Allahoumma Ameen.