بسم الله الرحمن الرحيم

 

KHUTBA JUMMAH

 

HAZRAT AMIR’UL MOMENEEN MUHYI-UD-DIN

AL KHALIFATULLAH

 

MUNIR AHMAD AZIM

 

15 Mai 2009

 

(Résumé du Khutba Jummah)

 

 

Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine lire ça verset Quran suivant là:

 

 

 

“Nous fine vraiment créer dimoune dans ene plus joli forme, mais ensuite Nous retourne li dans fond, le plus bas” (Chapitre 95 Verset 5-6)

 

A la lumière de ça bane versets Quran là, nous capave comprend l’Islam dans le sens kot li considère l’homme comme éna ene bon nature.

 

Bane théories politique, zot, zot baze zot lor conception ki dimoune li d’ene mauvais nature. Dans façon ki la politique penser, l’homme concentrer so z’éffort lor so propre l’intérêt et ki li désire pou prend bane kitchoses ki lézot dimounes oulé, et ensuite li mélange tous les deux de so l’objectif ensam. Le fait ki comportement humain li motivé par sak dimoune zot zéffort pou guette so propre l’intérêt, alors le pouvoir de l’état et l’autorité de la loi li justifié à cause ça capave contribué vers la paix et la sécurité de bane dimounes. Sécurité dépanne lor l’existence du gouvernement ki ena le pouvoir pou maintenir la paix et pou applique bane sanctions ki bizin pou arrête bane dimounes zot mauvais inclinations pou faire le mal dans la société !

 

Laisse nous analyse ensam ça verset ki mo fine fék récité devant zot là. Allah Tabaarak Wa Ta’ala fine donne l’homme ene nature bon et pli pure ki bane les autres créatures, mais si malgré ça, ene dimoune li alle suive bane mauvais kitchoses, alors, li pou enforcer dans ene position pli bas et pli misérable ki ena. La mission du Shariah (la loi islamique) li fine établi pou préserve la bonne nature de l’homme et pou empêche li suive mauvais chemin.

 

De ce fait, le système de la vie en Islam li fine faire dans ene tel façon ki ene croyant, si li attache li et suive fermement ça bane commandements divines là, alors li pas pou tombe dans piège de ça bane mauvais kitchoses là.

 

Ici, nous réfère nous à deux kitchoses ki fondamentales dans l’Islam : (1) La Foi ou Croyance dans ene sél Bondié et (2) Faire bane actions, parski ça commandement là « Croire et faire du bien » li trouve partout dans Quran et li forme ene de bane sujets bien important ki Quran enseigné.

 

La croyance dans l’unicité de Dieu li accomplir par ene sens de justice, de fair-play, et ça li clair dans le fait ki ene croyant pas capave ene tyrant, parski, si ça coumsa, li pou agir contraire à ene important attribut d’Allah, ki Allah (Bondié) Li Miséricordieux. En plisse de ça, ça croyant pas pou capave ene menteur, ene kikaine ki decevoir bane les autres par bane mensonges et ni li capave être ene malfaiteur, parski so compte li pou avec Allah ki au courant de tout séki li faire et ki trouve li, et conner séki li cassiette ou laisse voir.

 

Allah Tabaarak Wa Ta’ala dire dans Quran Shareef:

 

 

“Li conner séki éna dans tout lécoeur (dimoune)” (11:6)

 

 

“Ki ou laisse voir séki ena dans ou lécoeur ou bien ou cassiette li, Allah pou demande ou compte pou ça.” (2:285)

 

La croyance dans Allah le Tout Puissant et bane vertus ki vine ensam avec ça croyance là, zot éna ene l’autre fonction, c’est-à-dire, ki zot purifier l’âme de l’homme en profondeur et empêche li tombe dans péché et faire so l’attention attirer vers zis faire bane bons actions. Et là-dans trouve vrai prospérité et succès d’ene dimoune couma Quran Shareef dire :

 

 

“Vraiment celui ki purifier (so nâme) réussi et celui ki corrompe li, alle dans la perte.” (91:10-11)

 

L’âme li le siège, le centre de bane émotions. Et le désire li ça l’émotion ki dirige so l’attention pou possède n’importe ki objet ki li prend comme so plaisir et ki li attane ki li pou gagne plaisir de ça (objet là). Désire li parfois tellement personnel ki si l’homme gagne ene satisfaction complet de ça ki li désirer le plus (dans ça le monde là) ça capave faire li dévié dépi le droit chemin. Alors fine trouver ki li fondamentale, pli important pou contrôle ça bane désires là au lieu contrôle zot satisfaction et ça parole là fine bien dire ki « Li pou pli meilleur pou vine ene dimoune pas satisfait au lieu vine ene cochon satisfait. »

 

La loi islamique avec so bane normes (la loi et règlements) de bon et mauvais, vertu et vice, ena la capacité totale pou contrôle bane telle désires ki normalement capave fini dans corruption ou péché.

 

La nature de l’état li determiné par ene catégorie de bane dimounes ki dominé là-dans. La démocratie li ça l’état ki dominé par bane, ki d’après li, zot bane « païza wala » (ki content kas – l’argent), parski l’argent donne zot tous bane satisfactions de zot bane désires. Alors bane l’états, bane pays kot bane telles dimounes éna plisse pouvoir pou dominer, alors zot pou guette valeur l’argent et pou donne pouvoirs à bane ki fouette dans faire l’argent. D’après la nature de bane l’états, meilleur l’état c’est ça l’état ki dominer par bane philosophes, bane dimounes ki d’après zot ena raizonnement et l’intelligence, ki zot capave très bien contrôle et dirige bane zaffaires de l’état.

 

Ça implique, ça veut dire, ki la raison (raisonnement) li important pou ene « bon » gouvernance tandi ki la raison d’après ça pensée là li capave changé et capave égarer, et vine pas bon. Alors, c’est pas la raison au fait ki compté, mais c’est la Révélation (de côté Allah) ki compté. La loi de l’Islam ki zamais pou chanzé et égarer, li bazé lor révélation d’Allah, ki Li ene Etre ki conne tout et Li bien Sage. Et ça la loi islamique bazé lor révélation divine là li le meilleur système ki pli correcte pour forme ene l’état d’après so bane propres codes de droitures.

 

Alors c’est là-dans ki trouve distinction (différences) entre bane l’états en générales ki zot doit zot l’origine à ene la lutte et la guerre entre l’homme et l’homme et l’état islamique ki ene vrai cadeau d’Allah.

 

Dans bane associations politiques li bien important pou gagne recours à bane la loi impozé, accepté et ki suive par la masse comme li dans nous cas (à Maurice) et bane les autres pays, et aucaine état pas pou capave établir li-même et consolide so contrôle lor ça pays là sans bane telle la loi. Si ça bane la loi là zot approuvé par bane dimounes intelligents et ki ena vision, alors ça gouvernement ki fine établir là li fondé lor la raison (et li servi et guette bien-être temporaire de so peuple).

 

Mais si ça bane la loi là zot imposé par Allah – Dieu, et zot établir par ene dimounes ki vine de côté d’Allah avec la révélation pour donne ça bane peuples là ça bane la loi là et encourage zot pou mette en pratique ça bane la loi là, alors ça forme de gouvernement li fondé lor la religion et li extra bon et apporte beaucoup bienfaits ki li dans ça le monde là et dans l’autre le monde aussi. Li coumsa parski dimounes pas fine être créer seulement pou ça la terre là parski ça le monde là li seulement vanité et futilité, et so la fin c’est la mort et disparation totale. Bane la loi révélé fine être envoyé pou dirige bane dimounes pou observe ene telle bon conduite ki pou amène zot vers le bonheur totale dans la vie future, dans tous zot bane zaffaires, ki li de côté l’adoration (d’ene sel Dieu) ou concernant bane transactions mutuel ou même bane zaffaires d’ene monarchie – ki li ene phenomène naturel dans la société de l’homme – pou ki li capave être dirigé selon bane préceptes de la religion, pou ki le corps (islamique) capave être protézé par la supervision de la Loi Révélé.

 

Alors ene l’état (ou pays) là, ki so la loi li bazé lor violence et la force et ki donne chemin à bane telle mauvais kitchoses couma la tyrannie et l’injustice, et ki dans lizié de la loi li condamnable, li ene jugement dans ki la sagesse politique zot d’accord entre zot-même.

 

En plisse de ça, ça l’état ki so la loi li bazé lor gouvernance rationnelle et so bane principes, mais ki li manque ene supervision de la Loi Révélé, li, li aussi condamnable, parski li le produit de bane spéculations (l’esprit de l’homme) sans ene la lumière ki vine d’Allah Tabaarak Wa Ta’ala. Et aussi parski ça Messager Choisi d’Allah là pour donne et mette en pratique ça bane la loi là, li conne mieux bane zaffaires ki pou dans l’intérêt de bane dimounes en séki concerne tous bane zaffaires ki concerne la vie future, li pas visible pour zot. Bane principes d’ene gouvernement rationnelle so but c’est gagne bane l’intérêts apparent de ça le monde là, tandis ki but de ça Messager Choisi là c’est pour faire dimounes gagne le salut dans la vie future. Li bien nécessaire alors, par la nature de bane la Loi Révélé pou amène tous bane dimounes pou conforme zot à ça bane la loi là dans tous bane zaffaires de ça le monde ici-bas là et de la vie future. Et ça règle là, ça pratique là, ti règle et pratique de tous bane Porteurs de Loi, c’est-à-dire, bane prophètes, et zot bane succésseurs, c’est-à-dire, le Khalifatullah (le Calife d’Allah). 

 

La monarchie (ou bien l’autorité) naturelle, alors, li force bane dimounes pou conforme zot à bane désires privé ki pas capave controler et ki ambitieux de celui ki pé gouverne le pays. Bane gouvernement politiques zot faire zot peuples conforme à bane kitchoses ki l’esprit dire faire. Ki faire zot faire ça ? Pour promouvoir bane l’intérêts mondaines et pou combatte bane mauvais ki ena. Le Khalifatullah (Calife d’Allah) kan à li, li guide bane dimounes pou conforme zot à bane vérités ki ena dans la Loi Révélé (le Quran) parski li prend compte zot l’intérêt, que ce soit zot bane intérêt mondaines et aussi bien ki zot bane l’intérêt ki pou profite zot dans la vie future. Ça li coumsa ça, parski tous bane zaffaires de ça le monde là zot être contrôlé par Celui ki Allah fine élévé (pour enseigne la loi divine) dans la lumière de zot relations à bane l’intérêts de l’autre monde. Alors le poste de Calife, li vraiment ene travail de remplacement de celui ki fine vini avec la Loi Révélé comme ene gardien de la foi et le gouvernement du monde par bane provisions de ça bane la loi divines là !

 

Tous bane systèmes politique ena ene certain conception derrière li et li ena bane idéales de la vie politique ki li bizin atteindre. Pour nous capave trouve ene telle idéale en Islam, nous bizin premièrement étudier en profondeur séki l’Islam été et ki faire nous ti bizin li (c’est-à-dire l’Islam).

 

L’Islam veut dire la Paix, et aussi Soumission à la Volonté d’Allah ; alors l’Islam c’est la paix ki ena dans soumission à Allah. Concernant la soumission, ena beaucoup façon pour atteindre li, mais l’Islam li le chemin droit ki démontré bien clairement dans ça bane paroles là ki paraîte dans verset 6 de Surah Al-Fatiha, le premier Chapitre du Quran : « Guide nous dans le droit chemin », tandis ki verset 7 pé expliqué ki été ça « droit chemin » là, c’est-à-dire, ki li le chemin ki bane lor ki Allah fine déverse So faveurs, et non pas bane dimounes ki fine gagne la colère d’Allah et ki fine égarér (loin avec ça droit chemin là).

 

Séki nous bizin remarquer dans ça bane versets là, c’est ki ti ena déjà bane chemins travers et mauvais avant l’avènement de l’Islam kot le péché et la corruption ti pé faire ravage. Ti ena dézordre et crises partout lor la terre ki bane dimounes ti bizin faire face. Le monde en entier ti plongé dans ene l’obscurité totale. La gloire de la Grèce et so liberté et sagesse ti disparaîte, le fameux système de loi de Rome (en Italie), avec tous so bane l’organisations, et so nationalité universel ti fine plongé dans la boue de bane systèmes de l’église ki ti pé concentré lor l’image extérieur au lieu pou réforme bane dimounes à l’intérieur de zot mêmes. Kan à la Perse li, li ti trouve li-même dans la main de bane dimounes ki fine dédié zot pour reste attaché avec bane luxes de ça le monde ici-bas là. L’Inde li, avec so bane castes et royaumes fine tombe dans ene l’état révolutionnaire (l’anarchie), ki ti prêt pou extermine contrôle de bane léroi dans pays. La Chine li, li ti le cible de bane intoxicants (couma l’alcool etc) et l’Arabie kan à li, li ti vine le Centre de l’Idolâtrie.

 

Fine ena beaucoup Messagers ki fine vini et ki zot noms fine enregistré dans l’histoire de l’humanité et zot messages fine passé dans plusieurs formes, d’après bane moyens ki zot l’époque ti ena et place ki zot ti trouve zot, mais zot noms et zot messages ti être connu dans seulement ene sel place et non pas dans ene l’autre place. Et ena encore bane les autre messagers ki soit zot fine être oublié (dans l’histoire) ou sois zot messages fine falsifié.

 

En consékances de ça falsification de bane messages là, fine ena plusieurs la foi ki fine développer dans le monde, couma dans l’Asie de l’Ouest, l’Afrique du Nord et l’Europe. Fine ena beaucoup conflits entre dimounes ; l’humanité fine vine en boute boute ; la fraternité ki l’humanité ti bizin ena entre zot fine cassé ; bane mals de satan fine repanne partout, et partout ti répanne kot bane tibébé filles ti pé touyé pour nannié. L’égoisme, et l’envie pour gagne plisse ti répanne et ça même zot ti pé récolté ; l’amour et la justice ti piétiné ; exerce la force fine vine pour ça bane kalité dimounes barbares là zot bon façon pour vivre.

 

Alors tous ça bane conditions négatifs du monde là fine donne l’empressement pour ki l’Islam trouve le jour, ene telle religion ki li pou universelle. Alors l’humanité comme ene seul la voix fine faire duah avec Allah « pou montrer zot le droit chemin » et Allah fine exauce zot la prière et fine révèle le Quran et fine dire :

 

 

“Sa Livre là, na pas ena aucaine doute là-dans; li ene guide pou bane ki oulé suivre bon chemin (Allah).” (2:3)

 

Taqwa li sous-entendu dans ça verset là et veut dire la crainte d’Allah ki pé faire compran pou preserve nous-mêmes contre bane mals et ki pé invite vers faire bane bon actions comme ene idéale de la vie islamique, tandis ki la loi islamique li ene constitution d’ene l’état islamique parski li intégré et organize li d’après so bane propres baze éthique (morales) de séki bon ou mauvais, de séki ene vertu ou ene vice. Alors nous (surtout en tant que musulmans) nous bizin conne bane formes et principes de la Loi Islamique. Insha-Allah