Bismillah-ir-Rahman-ir-Rahim

 

KHUTBA JUMMAH

Vendredi le 17 Août 2007

Bait-ul-Zikr

Nord de Maurice

 

(Par Hazrat Muhyi-ud-Din Munir Ahmad Azim)

 

Après le Tashahhud, Taouz et Surah Al-Fatiha, le Muhyi-uddin fine lire 3 versets de Surah At-Tauba (Ch.9) Ruku 7 V.56-58.

 

“Comme le Khutba Jummah aujourdhui, le 17 Août 2007 dans le Bait-ul-Zikr dans le Nord, couma mo ouvert le Quran Shareef pour mo conné ki Khutba mo pou faire, Allah montré moi ça 3 versets là. Alors ça 3 versets là, li trouve dans Surah At-Taubah,Ch.9 Ruku 7 V. 56,57 & 58.

 

Alors dans V.56, Allah dire coumsa “Zot faire serment lor nom d’Allah ki zot avec ou, zot pas avec ou mais zot peur pour dire ça.” -  Alor, commentant de ça V.56 là, Allah (T.W.A) pé faire compran, ‘guette bane dimounes ki zot lécoeur pas pure, zot péna ene sincérité dans zot iman (la foi), zot bane dimounes ki bluffé, et zot faire serment au nom d’Allah, zot pran le nom d’Allah, zot servi le nom d’Allah pou zot dire ki zot avec ou O le prophète, Hazrat Muhammad (s.a.w). Mais selment ça bane kalité dimounes là zot pas avec le Saint Prophète Hazrat Muhammad (s.a.w). Mais zot peur pou dire ça. Parce ki si ou guette ene verset avant ça verset là, Allah pé conseille  So prophète Hazrat Muhammad (s.a.w), Li pé renforci li, couma li ti pé peiné avec ça bane kalité dimounes là. Et Zot dire ki zot croire dans le prophète, mais kan zot diboute dans la prière (Namaz), zot diboute avec paresse. Zot contribuer sans ene lécoeur content, zot pas pé contribuer ça avec ene lécoeur satisfaizant; que voulez-vous!

 

Mais dans ça verset avant là, kot ene place Allah dans V.55 Li dire, Li pé  dire le Prophète Hazrat Muhammad (s.a.w) ki ‘Ça bane kalité dimounes là, pas laisse zot richesses et zot zenfants ébloui toi’ – c-à-d, avec zot richesses, zot l’argent ki zot possédé et zot bane zenfants ki zot ena, alor pas laisse ça chagrine toi et fatigue toi, parce ki l’intention Allah c’est vraiment pou servi ça pou puni zot-même dans ça la vie lor la terre là. L’intention Allah, c’est ça même Li donne bane là pli boucou richesses, Li donne zot zenfants plisse et Li mette zot à l’aise, ‘et toi le Prophète to contigné dans ça bane persecutions là, to contigné dans ça bane épreuves là, dans bane difficultés, pena manger, pena boire, to bizin attache roches lor to ventre, ene repas to manger, ene repas to pas manger, et lotte koté kan to guette ça bane lézot là, to trouve zot ena boucou de l’argent, mais kan to guette zot pé dibouté pé faire Namaz derrière toi, zot dibouté avec paresse. Kan zot pé contribué aussi, zot pas pé contribué avec ene lécoeur content.’ Mais Allah dire, ‘Mo conne zot l’intention. Zot l’intention Mo conne très bien.’ Alor Allah donne zot ça bane richesses là, donne zot bane zenfants pour couma dire ki zot dire: ‘Voilà nous ki dans bien’. Zot zot pran ça comme ene grand faveur d’Allah. Mais kan ou lire le Quran Shareef, le plus grand faveur d’Allah kan ou trouver kot bane prophètes (a.s) et couma Nabi-Kareem (s.a.w) et tous bane lézot prophètes couma fine passé par bane persecutions, par bane épreuves pou montrer bane lézot. Et ça c’est ene teste pou bane les autres kan Allah pé donne zot bane richesses et kan pé donne zot zenfants. Et ici Allah dire coumsa, ‘Allah So l’intention Li – personne pas conne Allah So l’intention. Allah So l’intention ki Li ena – Li donne ça bane là richesses et zenfants là et en même temps Li pou servi zot bane richesses même et zot zenfants ki pou servi ça comme ene punition pou zot dans ça la vie lor la terre là. C-à-d, à travers zot richesses et zot zenfants même ki zot pou gagne zot punition et zot pou gagne ene tel punition ki ça punition là li pou lor ça la terre là-même, ki bane dimounes pou trouve ça, pou témoigne ça et zot pou souffert de ça. “Et afin ki zot mort de zot infidélité” – Et lor là, Allah pas fine traite zot comme ene croyant là. Allah pé dire coumsa, ça façon ki zot fine agir avec le Prophète Hazrat Muhammad (s.a.w) là, bé en d’autres mots zot fine agir pareil couma bane infidels. Et Allah dire coumsa, ‘Mo laisse zot mort dans zot infidelité’. Lerlà même ki dans ça V.56 là, Allah réconforte So prophète. Li faire descende ça verset là, Li dire: “Ça bane kalité dimounes là zot faire serment lor nom Allah ki zot avec ou” – Zot faire serment lor nom Allah, c-à-d, zot pose zot la main lor so la main (la main du Prophète), ou sois zot causer, zot dire ‘non, nous avec ou nous! Nous à ou koté.’ Zot faire ça bane kalité serments là, zot pran le nom d’Allah.  Allah dire coumsa: ‘Mais en vrai dire … Wa maa hum minkum wa laa kinnahum karmouni yakrakuun … zot pas avec ou. En vrai dire, ça bane kalité dimounes là zot pas avec ou, mais zot peur pou dire ça ki zot pas avec ou. Mais zot pé créer bane circonstances, zot faire bane kitchoses, pareil couma ou pé trouver, de nos jours, ça verset là guette 1429 ans de dela fine révélé. Sak l’époque ça bane versets là pou reste vivant. Et azordi aussi li vivant parce ki Allah pas pé cause pou bane Kafirs (infidels) – bane dimounes ki pas fine accepter Manifestation (d’Allah), bane dimounes ki pas croire, ine ridiculizer – Non! Allah pé cause pou ça bane dimounes ki fine faire serment lor nom d’Allah ki zot avec le Prophète, mais après zot peur pou dire ki zot pas avec ou.

 

V.57, Allah dire coumsa, “Si zot trouve ene place pou cassiette ou bien bane la cave ou ene place pou rentré, zot tourne vers ça, et dépécher couma bane fou” – Alor kan zot trouve le prophète Hazrat Muhammad (s.a.w) et pou zot évite le prophète – zot pas capave faire face avec le prophète Hazrat Muhammad (s.a.w) – Alor ki zot faire? Zot rode ene place pou rode cassiette zot figure. Si zot trouve ene la cave zot rentre dans ça la cave là, zot rentré pou zot cassiette zot figure et zot rentre dans ene tel façon ki zot rentré pou zot cassiette couma bane fou. Zot dépécher – Allah dire coumsa, zot tourne vers ça la cave là et zot dépécher couma bane fou pou zot cassiette zot figure.

 

V.58 Allah dire coumsa, “ena parmi zot ki critique toi à propos (là Allah pé addresse Hazrat Muhammad (s.a.w) particulièrement et aussi ça li attribué en générale à bane lézot prophètes aussi) to façon ki to distribuer bane sadaqa. Si donne zot ene partie zot content, mais si to pas donne zot, alor zot en colère.” – Li dire ‘Voilà ena ene bande encore ki zot faire bane critique lor toi kan to faire bane distributions, couma dire ça distribution là c’est zot bane haqt (droit) ça, c’est pou zot ça, zot héritiers de ça, couma dire c’est bane zaffaire ki pou zot ça. Alor kan to pé faire bane distributions de bane sadaqa – ici mentionne le mot “sadaqa” – Sadaqa: Kan ti ena la guerre avec bane incroyants, bane butins ki ti gagner dans ça la guerre là, alor tous ça là fine vine pou bane Musulmans parce ki bane là zot ti batte bane Musulmans et zot ti pran tous pou bane Musulmans. Mais kan bane Musulmans ti gagne la victoire, (et ça aussi zis ene ti groupe ki ti la guerre. Bane lézot là ti cassiétte par derrière!), mais kan fine gagner, zot fine vine divant divant et kan to pé faire distribution, to pé donne bane ki mériter, alor zot trouve pou faire bane critiques lor toi couma dire, zot fine donne zot la vie, zot fine donne tous, zot fine donne zot la vie, zot l’honneur, zot dibiens, zot dignité, zot fine sacrifié zot dans le chemin d’Allah, mais bane dimounes ki avec toi kan to pé distribuer saki Allah fine faire zot gagner, alor ça bane là zot critique le prophète Hazrat Muhammad (s.a.w). Alor Allah dire le prophète Hazrat Muhammad (s.a.w), ‘si donne zot ene partie, là zot pou bien content. Nek donne zot ene boute là, zot pou extra content. Kan ena pou vine travail pou vine la guerre dans le chemin d’Allah, pou avec le prophète, zot cassiette zot figure, zot rode bane place pou cassiette, zot rentre dans bane la cave kan zot trouve le prophète. Zot pas conné couma zot pou sauver! Et zot faire serment lor nom d’Allah ki zot dire ki zot avec le prophète mais en vrai dire ti seulement lor la lèvres. Li pas ti dans lécoeur! Couma Allah dire, “Zot pas avec ou mais selment zot peur pou dire ça” – Alor ici aussi, Allah pé dire coumsa, ‘Kan ça bane kalité dimounes là ou donne zot ene partie, là zot content mais si ou pas donne zot …Ala zot manifesté zot bane colère. Là zot commence en colère, zot commence blame le prophète Hazrat Muhammad (s.a.w).

 

Dans Surah At-Tauba, ene Surah extraordinaire avec bane messages ki ena là-dans. Mo dire ou ki c’est ene grace, ene faveur ki Allah ine faire, comment mo ouvert le Quran Shareef, Allah nek montrer moi ça bane versets là. Eski ça li ene coincidence dans la vie ki nous pé vivre aujourd’hui dans ça l’époque là, dans ça bane situation ki pé passé là. Et guette Allah pareil couma Li ti réconforte So messager Hazrat Muhammad (s.a.w), étant donné ki ça bane versets là fine fini descende, et ça pou reste vivant jusqu’à le Qiyaamat, Allah pas pou capave faire ça bane versets là ré-descende, ré-vine ene Quran Shareef! C-à-d, Allah même So la main même ki ouvert ça et Li montrer ou ça verset là, pou ki pareil couma dans l’époque de Hazrat Muhammad (s.a.w) ti ena ça bane kalité dimounes là mais voilà pou ena toujours ça bane kalités (dimounes) là et ça pou contigné allé.

 

Et dans V.62 de Surah At-Tauba, Allah dire coumsa: “Zot faire serment avec nom Allah, afin ki pou faire ou plaisir” – Allah dire ‘Zot faire bel bel serment avec nom Allah, couma dire pou faire ou plaisir, mais c’est Allah et So prophète ki mérite plisse ki zot faire plaisir si vraiment zot ena la foi.’ Allah dire, ‘zot pé faire bane serments kot zot pran le nom d’Allah, sois-disant voilà zot pé faire tel travail, zot là, zot dans l’Islam, zot aussi bane Musulmans, zot pé pran le nom d’Allah.’ Mais Allah dire coumsa, ‘Non! Avec la bouche ki ou dire ki ou dans Islam ou sois ki ou dans ene tel Jamaat, ou sois ou fine croire dans tel signe, dans tel manifestation, nek zis avec ou la bouche ki ou dire ça zis pou faire plaisir’, mais Allah dire, ‘pas coumsa ça! Mais c’est Allah et So prophète ki mérite plisse considération.’ – c-à-d, Allah kan li envoye So prophète, So Rassool, ou bizin faire pli boucou plaisir à Allah et So prophète. Couma pou faire ça plaisir là? C’est ki Allah fine dire ou faire, ou pas agir hypocritement. Séki Allah fine enseigne So prophète Hazrat Muhammad (s.a.w), fine enseigne So prophète, fine donne li bane l’instructions, fine donne li bane signes et bane dimounes fine témoigne ça, et bane commandements, bane l’instructions fine vini. Alor, Li donne zot ça bane l’instructions là  pou ki zot obéir ça. C’est ça ki Allah pé dire. ‘C’est Allah et So prophète ki mérite plisse ki zot bizin faire plaisir’. “Plaisir” ici veut dire ki zot bizin montrer zot l’obéissance lor bane commandements d’Allah, lor bane l’instructions ki vine de koté d’Allah, ‘si vraiment ou ena la foi’.

 

Si vraiment ou ena la foi, abé définitivement ou bizin obéir Allah et ou bizin obéir Allah So prophète, avec séki Allah fine élévé comme prophète et ki li (le prophète) pé vini, li pé vine donne ou bane messages ki vine de koté d’Allah.

 

Ou contigné ou vini dans Surah At-Tauba même, dans V.63, Allah dire coumsa, “Estce ki zot pas conné ki celui ki combatte Allah et So prophète pou gagne difé l’enfer et pou reste là-dans pou toujours?” – Ça même pli grand déshonneur pour ça bane là. Allah dire coumsa, ‘eski ça bane dimounes là zot pas pensé kan zot pé agir coumsa zot pé laguerre, zot pé combatte, zot pé tourne lédos avec Allah et So prophète zot pé agir mal envers Allah et So prophète. ‘Eski zot pas conné ki Allah pou faire zot gagne difé l’enfer et zot pou brûlé dans ça difé l’enfer là et zot pou reste là-dans pou toujours parce ki kan zot fine vire lédos contre Allah et So prophète et zot même zot fine prête serment lor nom Allah, zot fine dire avec le prophète ‘mo avec ou’ et kan le moment vini bizin reste ferme, reste fidèle avec Allah avec So prophète zot tourne lédos et zot montrer zot vrai visage.

 

Et voilà, mais selment zot pas capave dire ki zot pas avec ou, zot peur pou dire ça. Zot pena ça courage pou zot dire ça là. Au contraire ‘kan zot trouve ou O le prophète’, Allah pé dire dans le Quran Shareef, ‘couma zot trouve ou, zot rode ene place pou zot cachiette zot, zot renferme zot, si zot trouve ene la cave, zot rentre dans ça la cave là, zot tourne vers ça, zot dépêcher couma bane fou ki pé rentrer. Zot pas capave montrer zot visage. Et ici Allah dire coumsa, ‘bane couma dire zot rode la guerre contre Mo prophète, c-à-d, zot pé la guerre contre Allah et So prophète, bé pensé ki Allah pas fine reserve nennié pou zot; excepté fine reserve difé de l’enfer et zot pou reste là-dans pou toujours. Ça même le plus grand déshonneur ki zot pou gagner devant Allah (Tabaarak Wa Ta’ala).

 

Alor ça c’est bane versets ki faire nous compran couma Allah (T.W.A) Li fine faire nous compran. Et ça c’est ene verset vraiment extraordinaire. Si couma dire si ou ti pou alle rode ça verset là kot ça sa li trouver, bé c’est avec difficulté ki ou ti pou capave réussi conné kot ça verset là trouver, mais ene sel coup la main d’Allah fine ouvert ça Quran là et voilà couma dire Li montrer ça bane versets là à So prophète. Et voilà kot li le prophète, li, li bizin pran boucou de patience. Alor le prophète li pran boucou de patience et Allah dire li coumsa ki ‘Voilà, ça c’est bane dimounes ki guette zot mentalité! Bane dimounes ki zot dire ki zot avec toi ça, zot fine faire bane serments lor le nom d’Allah ki zot avec toi, mais en vrai dire zot peur pou dire ça ki zot pas avec toi. Et kan zot ena pou faire bane désordre et ça même bane dimounes to pou fini rémarque zot, zot bane dimounes kan zot trouve le prophète d’Allah alor zot sauver zot alle cassiette zot, zot alle rentre dans bane la cave et zot tourné couma bane fou et lor là ena parmi zot ki critique toi et bane kitchoses ki pas concerne zot et ça li appartenir pou le prophète et bane dimounes ki fine la guerre dans le chemin d’Allah. Et lor distribution de ça, là aussi si couma dire pas donne zot là zot en colère, zot manifesté, mais si donne zot, zot bien content. Zot bien content ça bane zaffaire là. Alor ça c’est bane dimounes ki pena Iman ditout, bane dimounes ki fine vire lédos complètement.

 

Et Allah contigné causer, Li dire ‘Ça bane hypocrites là …’ Allah traite zot de bane hypocrites. Li dire, ‘Bane hypocrites ki peur ki ene Surah (ene chapitre Quran) capave descende ki concerne zot et ki raconte tous séki ena dans zot lécoeur. Allah dire zot, ‘Contigné dans zot façon de faire, contigné ridiculizé, contigné moqué, Allah pou faire paraîte séki zot pé pran precaution.

 

Allah dire coumsa ki si to questionne zot, zot pou dire, nous ti pé simplement blaguer, nous ti pé badiner ça. Allah dire, dire zot, Eski c’est Allah So versets et So prophète ki zot pé vine badiner, zot pé vine blaguer, zot pé moquer?’

 

Après Allah dire dans verset 66, (ene verset très important pour bane croyants): Allah dire coumsa, “Laa ta’-taziruu qad kafartum ba-‘da ‘iimaa-nikum. ‘In-na’-fu-‘antaaa-ifatim-minkum nu’azzib taaa’ifatam bi annahum kaanuu mujri miin.” – Allah dire coumsa: “Pas faire excuse – Pas tire bane prétextes. Ou fine rejette la foi –astère pas vini pas vine tire bane prétextes et dire tel tel zaffaires. Ou fine vine ene quelqu’un ki fine rejette la foi complètement, après ki ou fine déjà accepter li. Kan ou fine fini accepter le message d’Allah, ou fine fini trouve bane signes d’Allah, après ou vini ou vine tire bane prétextes kan ou fine fini rejette la foi, après ki ti fini déja accepter ça bane manifestations là, après ki ti fini accepter la foi. Alors Si Nous pardonne ene partie parmi ou, ena ene partie ki Nous pou puni, parce ki zot persister dans faire péchés.

 

Après ça boute là toujours dans Surah Taubah Verset 67 (zis ça boute là mo pou dire): Allah dire, ‘bane hypocrites; bane hypocrites hommes et femmes, zot camarades ene à l’autre ça. – Bane hypocrites zot pou reste parmi bane hypocrites même; hommes et femmes. Zot pou agir hypocrites parce ki Allah ça même mette zot dans même panier, parce ki zot bane hypocrites et zot pou camarades ene à l’autre. Zot pou rode protège zot camarades parce ki zot bane hypocrites. Zot ordonne séki empêcher et empêche séki fine permette. – Séki Allah fine empêcher pou faire, zot zot dire, zot bizin faire ça. Et séki Allah fine permette pou faire, zot empêche bane dimounes faire ça. Et zot la main serer, zot avare, zot kamjusse – zamais zot ena même. Zot oubliyer Allah et Allah aussi oublier zot.

 

Ici, ‘zot oubliyer Allah’ veut dire, zot tourne les dos avec Allah, zot manifester zot bane mauvaises kalités de avares et des hypocrites et zot rode combatte Allah et So prophète. Allah dire: ‘Moi aussi Mo oubliyer ça bane kalités dimounes là” – C’est bane hypocrites ki pran chemin travers. C’est pas bane dimounes Muttaki ki pran ça bane chemin travers là. Bane hypocrites ki pran chemin travers. Bane bon dimounes, bane dimounes ki ena Deen, bane dimounes ki Muttaki, bane dimounes ki pieux, bane dimounes ki ena la crainte d’Allah dans zot les coeurs, bane dimounes ki ena le Taqwa et ki fine croire dans Allah et So prophète, zot zot pas pou pran le chemin travers zot. Zot au contraire, arrive séki arriver, zot pou reste dans le chemin d’Allah mais seulement c’est bane hypocrites ki tourne les dos avec le chemin d’Allah; zot pran bane chemin travers.

 

Voilà c’est comme le Khutba Jummah aujourd’hui. Bane versets ki Allah Li montré nous et aussi si mo pé alle lor ça Khutba Jummah là et kot mo fine lire ça 3 versets là, Allah pé continié montrer moi encore bane versets du Quran kot Allah pé dire coumsa: ‘Yaaa-ayyuhan Nabiyyu jaahidil-kuffaara wal-Munaafiqiina wag-luz ‘alayhim. Wa ma’-waahum Jahannam : Wa bi-‘sal-masiir.” Li dire: “O le Prophète, combatte bane infidels et bane hypocrites toi (pas side de zot côté, pas ena pitié pour zot. To bizin combatte avec zot ça bane infidels là avec ça bane hypocrites là), et tini ferme contre zot (Pas agir mou – molo molo avec zot. C-à-d, tini ferme, tini avec ene dureté, avec ene fermeté. Bé là ki bane dimounes pou dire à travers ça verset Quran là? Kot Allah Li, Li pé dire le Prophète, combatte contre bane infidels et bane hypocrites et tini bien ferme contre zot, façon ki zot fine agir envers le prophète et envers Allah. Allah Li ki pé donne instruction So prophète, ki tini bien ferme avec ça bane là, et combatte zot – ça bane là c’est bane infidels et bane hypocrites et Allah continié dire coumsa “Wa ma’-waahum Jahannam : Wa bi-‘sal-masiir.”  . Zot la case, c’est l’enfer. Ki mauvais destination ça! – Allah pé fini prepare ça bane kalité dimounes là zot la caze et zot la caze c’est l’enfer. Ki mauvais destination pou ena pou zot ça.

 

Alors, faire duah ki Allah donne nous le Tawfiq, la grâce, ki Allah faire nous reste ferme dans le Tauhid (l’unicité d’Allah), Malgré des épreuves, Malgré les difficultés, Malgré toutes sortes de kalité problèmes, toutes sortes kalité difficulté vini, nous pou reste toujours ferme à Allah avec So prophète. Nous pou reste toujours ferme, attrape la corde d’Allah “La-Ilaaha Illallah” et nous dire pareil couma Hazrat Ibrahim (a.s), ‘Nous oulé selment ki Allah vine tire nous dans nous bane épreuves, nous bane difficultés. Nous pas oulé personne autre ki vini – zot penser ki couma dire zot pé faire ene faveur lor nous kan zot pé montrer ki zot ensam avec nous. Non! Nous pas oulé ça bane kalité là! Ça bane kalité faveurs, nous pas oulé bane “faveurs show”, bane faveurs ki pé montrer dimounes, pé faire show, pé faire dimounes compran ki péna nannié. Non, ça bane zaffaire là nous pas oulé. Nous oulé bane vrai faveurs, ki Allah envoye lor bane dimounes ki pé soif la vérité, bane dimounes ki zot ena ene lécoeur pur, bane dimounes ki zot sincères, zot sincères dans zot Imaan, ki Allah faire zot reste là, et Allah enlève bane épreuves et bane difficultés et faire So bane banda, So bane serviteurs reste toujours la tête haute, kot nous passer, nous la tête haute. Et bane les autres kan zot guetter, Malgré derrière nous les dos zot cause toute sortes kalité causer, mais kan zot guette nous, zot pas capave assizer, zot pas capave reste en place. Zot pas capave diboute, zot pas capave reste dans bane même bande ki bane dimounes ki vine de côté d’Allah, bane dimounes ki sinceres. Et ou trouver ça, ki zot mal à l’aise pou assize parmi bane dimounes ki de côté d’Allah, bane dimounes ki ferme et ça bane là zot sauver! Alors nous nous dire, ‘O Allah, donne nous ça faveur là et enlève nous bane épreuves, nous bane difficultés, nous bane problèmes, et donne nous courage, donne nous la santé et pas faire nous affecter avec n’importe ki kalité kitchoses ki vine lor nous. Pareil couma To fine consolide, To fine renforci To Rassool-é-Kareem (s.a.w) par bane revelations, par bane versets Quran, kot To fine dire To Rassool, ‘Pas chagrine toi à cause de séki zot pé  faire. Pas laisse to lécoeur serer de séki zot pé faire. Pas laisse toi affecter de bane complots ki zot pé faire. Alors, combatte avec zot et tini bien bien ferme et sévère envers zot couma Allah fine dire dans ça verset là.” Faudé pas être mou-mou avec zot ou sois tire les dents avec zot, reste bien ferme. Reste dans to position dans le “Siraatwal Mustakeem” (chemin droit) et to pou trouver kan zot zot pou trouve toi zot pas pou capave même guette toi. Zot pou bizin baisse zot la tête et vire zot les dos. Zot pou bizin baisse zot lizié, ou même ou pou trouver zot pou faire ene riyé ki ou pou fini remarquer couma zot riyé (bane hypocrites).

 

Alors ki Allah donne nous le Tawfiq, et Allah envoye So grace et So benedictions lor nous et enlève tous nous bane problèmes, nous bane difficultés, et illumine nous par So la Lumière, par So grace, par So benedictions, et Allah faire nous reste ene sel couma ene sel famille pour faire le travail de Deen – Pareil couma Allah Li Un – Pour propage l’unicité d’Allah Li faire nous vine couma ene sel famille pour propage So l’unicité. Insha-Allah. Ki Allah donne nous ça Tawfiq là, éloigne nous de tous ça bane épreuves là, ça bane obstacles là, ça bane difficultés là, éclairci nous chemin, illumine nous chemin, et nous réussi dans nous travail de Deen, parce ki Allah fine envoye nous seul lor la terre, et nous pou rétourne vers Allah seul et nous demande Allah pou protège nous et kot nous aller Li faire nous Mobarak, Li beni nous, Li illumine nous par So la Lumière, et toujours So l’ombrage lor nous. Et Li épargne nous de toutes sortes kalité difficultés, problèmes et toutes sortes kalité l’attaques, et toutes sortes kalités complots, et toutes sortes kalité kitchoses ki capave faire nous du tort. Alors ki Allah protége nous et c’est Allah Li même nous meilleur Protecteur, Li même nous meilleur Aide et Li vine à nous côté et Li reste toujours à nous côté et nous demande Allah, ‘O Allah pas abandonne nous et reste toujours à nous côté”. Ameen, Souma Ameen Ya Rabboul Aalameen.