بسم الله الرحمن الرحيم

 

KHUTBA JUMMAH

 

À RODRIGUES

 

HAZRAT AMIR’UL MOMENEEN MUHYI-UD-DIN

AL KHALIFATULLAH

 

MUNIR AHMAD AZIM

 

17 Avril 2009

 

(Résumé du deuxième Khutba Jummah à Rodrigues)

 

Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine lire ça verset Quran suivant là:

 

SURAH AL-IMRAN VERSET 104

 

 

Wa A`taşimū Bi ĥablillāhi Jamī`āan Wa Lā Tafarraqū Wa Adhkurū Ni`matallāhi `Alaykum 'Idh Kuntum 'A`dā'an Fa'allafa Bayna Qulūbikum Fa'aşbaĥtum Bini`matihi 'Ikhwānāan Wa Kuntum `Alaá Shafā Ĥufratin Minan-Nāri Fa'anqadhakum Minhā Kadhālika Yubayyinullāhu Lakum 'Āyātihi La`allakum Tahtadūn.

 

Attrape la corde Allah ferme, tout dimoune ensemble, et pas cause division parmi ou. Rappler faveur qui Allah fine accorde ou. Ou ti ennemis et Allah fine mette l’acorité dans ou lécoeur et ou fine vine frères par So grâce. Ou ti lor bord difé et Li fine sape ou depuis làdans. Comme ça Allah explique ou So verset, afin qui ou trouve bon chemin.

 

Mo pé continuer faire mo Khutba Jummah ki mo ti faire Vendredi passé, ici même à Rodrigues.

 

Attrape la corde d’Allah fermement et collectivement et aussi Allah dire dans ça verset là, pas bizin diviser entre zot et rappelle la grâce d’Allah lor zot.

 

Li claire, kan ene quelqu’un vine de côté d’Allah, li vini pou amène zot tous ensemble, sans aucaine division et guide zot tous vers l’unicité d’Allah, c’est-à-dire, le Tawheed.

 

Azordi jour commié division ena dans l’Islam, ene groupe pas d’accord avec l’autre groupe. Ena pé traite lézot Kafir (infidèle) et si ou guette séki pé passé dans le monde en entier couma bane Musulmans pé diviser et pé la guerre entre zot même et zot tous pé dire nous Musulman et pé lire même Kalima, lire le même Quran, faire Namaz, tourne vers le même Qibla ; Joli joli Masjid pé construire, mais li vide de la foi. Plûto la haine fine encré dans le cœur plisse, ki l’amour pour zot frères et sœurs Musulmans ki ena même la foi et mette bane même pratique ki Allah et So Prophète fine enseigne nous. Donc, c’est ene zaffaire ki bizin arrivé, parce ki nous bien-aimé Prophète Muhammad (saw) fine déjà prophétizé et ça bizin réalisé. Maintenant réfléchi, dans tous ça bane groupes ki ena là, parmi zot ki sanlà ki pou regroupe tous ça bane Musulmans ki fine divisé et zot fine vine l’ennemies. Nous ti pé penser ki Jamaat Ahmadiyya ki pou amène zot tous vers « Laa Ilaaha Illallah » et aparte le Quran, Sunnah du Saint Prophète (saw) et en plus de ça Jamaat Ahmadiyya fine accepté Hazrat Massih Maoud (a.s). Li ti bizin ene modèle parfait dans la pratique et l’enseignement de l’Islam, mais malheureusement séki Hazrat Massih Maoud (as) fine enseigner, zot fine piétine tous ça bane l’enseignements là. Le Jamaat Ahmadiyya so tabligh tous les temps fine bazé lors l’unicité d’Allah et ki Allah encore causer couma Li ti causer dans le passé, et Hazrat Massih Maoud (as) fine écrire longuement lor là ; ça même la vie d’ene Jamaat, kot Allah (swt) cause directement avec So serviteur. Tanque ki Jamaat Ahmadiyya ti lor ça chemin là, Allah (swt) fine toujours être le Soutien et Protecteur du Jamaat Ahmadiyya. Mais kan l’idole du Khilafat fine encré dans zot lé cœur plisse ki « Laa Ilaaha Illallah », le trajectoire de la lumière divine  fine change tout so direction, et voilà kot Allah donne So faveur, Grâce à ki Il veut – Li dessane So révélation lor ene So humble serviteur – voilà ki zot tous tourne le dos avec ça et même le 4^ème Khalifa fine traite ça  de « so-called revelation » et fine dire ki pour ena ene fearful end lor nous, et pourtant li-même fine écrire ene livre concernant révélation et sans li écoute révélation là et sans li écoute mo même et mo ti pé travail ici dans Rodrigues en l’an 2000 et voilà complot de bane Jaloux et Hypocrites fine faire contre nous et fine envoye ça Londres kot le Khalifa – ça l’époque là ti le 4^ème Khalifa ki ti là. Couma ou pou explique ça, mo encore pé travail dans le Jamaat Ahmadiyya et mo ici même dans Rodrigues, mo fine fini en dehors. Tous bane les autres dimounes fine conné, mais nous, nous pas conné. Pas fine alle en dehors Jamaat à cause sipa fraude, ou sois fine faire kitchose contre le règlement du Jamaat, Non ! A cause seulement Allah pé donne révélation à So humble serviteur. Après ça nous fine trouve zot vrai visage de Jalousie, d’hypocrisie, couma zot fine kimé lor mimbar dans Jummah et dans tous zot bane programme ki ti pé faire. Zot le cœur fine vine noir. Ou capave trouve ça lor zot figure même et ça la haine ki zot montré là, et mette boycott lor nous et lor tous bane ki fine croire dans la manifestation divine.

 

Monsieur là donne l’ordre pour pas invite nous dans mariages, même ou proche famille et fine arrivé kot ena parmi nous ti gagne carte mariage, fine faire alle rasse ça. En plus de ça, fine donne l’ordre pou pas faire nous Salaam. Ena, ki moi personnellement mo fine faire li salaam et aussi par oubli mo fine donne li la main, li fine retire so la main. Est-ce ki ça bane qualité dimounes ki pou régroupe tous bane les autres frères et sœurs de même la foi Islamique ensam ? Le Jamaat Ahmadiyya à Maurice surtout kot à la tête ena ene soi-disant Amir, pas zis zot fine piétine l’enseignement Quran, Sunnah et aussi l’enseignements de Hazrat Massih Maoud (as) et fine mette la haine dans le cœur de tous bane dimounes à Maurice, ki dans Rodrigues aussi et aussi dans bane les autres pays ki mo fine travail. Et kan ou passe kot le Centre Ahmadiyya à Maurice, ou trouve bél bél pancarte kot écrire « L’Amour pour tous, La Haine pour personne ». Mo dire zot, ça pas faire publicité ça pour montrer lizié dimounes. Bizin cultive ça l’amour là dans ou le cœur premier et cultive ça dans bane les autres, zot lé cœur et pas sème la haine dans le cœur dimoune. A cause ou penser ki ou pé assize lor chaise de l’autorité, c’est pour deux jours ça ! Séki l’homme voté mette là, li pour quelques temps ça ! Après ou pou sauter couma bouchon, tandique séki Allah mette là, l’homme pas pou d’accord avec li, mais li pou honoré par Allah lor ça la terre là et dans Akhérat.

 

Mo pé averti tous bane opposants du Jamaat Ul Sahih Al Islam, mo pé toujours averti zot. Zot pas pé trouve bane anges d’Allah. Ça même bane anges ki Hazrat Massih Maoud (as) ti trouver là et nous aussi nous pé trouver. Zot, zot pas pé trouve ça. Li pas possible ki ça bane anges là faire ene bon traitement avec zot, lor façon ki fine tourne le dos avec Allah So bane signes et Manifestations.

 

Certainement maintenant aussi ça bane anges là pou écoute l’ordre ki vine de côté d’Allah. Ki pou arrivé ? Allah conne mieux. Mais en donnant bane avertissements, mo envie réveille le Jamaat Ahmadiyya. Zot fine intoxiquer par zot puissance, zot penser ki zot ça kalité puissant là et couma Allah capave attrape zot ? C’est dans ça condition là même ki bane grand grand puissance du monde zot trouve zot. Guette l’Amérique et bane Juifs ki kalité puissance ki zot fine acquérir dans le monde. Zot pas ti penser même couma Allah capave change ça situation là et kot Allah fine amène zot vers zot destruction doucement doucement.

 

Allah conne mieux ki si pas nous pou trouver ça jour là ou si Allah pou appelle nous avant ça. Li certain ça, pas bizin ene seconde aussi de doute lor là, ki ça promesse d’Allah là li pou accompli. Certainement li pou arrivé. Li impossible ki ça promesse là li pas accompli. Comment li pour accompli ? C’est zis Allah ki conné kan ça pou accompli. Nous (la Jamaat Ul Sahih Al Islam) soumette à la volonté d’Allah, mais pas pou capave ena obstacle dans ça promesse là.

 

Aucaine puissance du monde pas pou capave penser ki Allah et So serviteur choisi pas pou gagne le dessus. Si dans le cœur de n’importe ki dimoune ena ene ti doute lor là, bé so la foi fine gagne cogner et pas fine reste nannié de so la foi.

 

Après ki mo fine écoute zot, zot ki présent là et pé écoute le Khutba azordi, zot même, zot fine raconte moi dépi l’année 2001 ki kalité campagne mensongère ene soi-disant Amir et so bane alentours ki fine vine travail là, ki kalité menti zot fine causer, kot la crainte pou Allah fine fini dans zot le cœur. Et Allah aussi fine rétire So la lumière dépi dans zot le cœur. Guette ki campagne zot fine améner contre nous ici, et voilà, mo fine surpris pou trouver commié fine quitte le Jamaat Ahmadiyya et fine retourne dans zot ancien religion et parmi ti ena ki ti conne Islam et Ahmadiyyat très bien. Au lieu faire progrès, amène dimounes vers l’unicité d’Allah, mo fine trouve tous le contraire. Pas zis ici dans Rodrigues fine arrive ça, mais dans bane les autres pays aussi.

 

Alors, pas capave ignore ça promesse d’Allah là. C’est parole d’Allah ça. Personne pas capave change ça et ça bane Zaalim là pé attane nous « Fearful destiny ». Pou zot, zot pas pé guetté, ki compte zot pou alle rendé devant Allah, le jour ki zot pou présente devant Allah et couma zot fine bafoué So l’enseignement.

 

Ça kalité mensonge et déception là ki aucaine dimoune ki ena sense pas pou capave accepter ça pour ene seconde aussi. Mais bane dimounes ki oppose bane serviteurs d’Allah zot en fait fine perdi tout zot raisonnement. Zot fine perdi tout zot raisonnement à cause zot l’égoïsme. Zot religion c’est seulement pou gagner et atteindre zot propre objectif ; à part ça, rien d’autres. Et kan à travers bane moyens mondaines zot pas réussi atteindre zot objectif, bé à ce moment là, zot galoupe vers zot bane idoles.

 

En ce ki concerne bane vrai serviteurs d’Allah, zot passe par bane tests, par bane cyclones, mais kan zot supporte ça avec patience, bé Allah accompli tout zot bane désires. Donc, O bane membres du Jamaat Ul Sahih Al Islam de Rodrigues, si ou trouve bane tests, bane problèmes, pas bizin ou tracasser. Ou passe ça bane tests là avec patience et ensuite ou pou réussi dans tous ou bane l’objectifs. Allah fine faire ça système là pou ou même afin ki ou vine ene côté et ou séparer de ça bane dimounes matérialistes là, bane ki nék adore bane zaffaires mondaines et ki fine prend zot idole comme dieu. C’est ça la sagesse ki bane vrai serviteurs d’Allah bizin passe par bane tests. Allah envie montrer ki guette ene coup couma Mo serviteur choisi li courageux et brave. Même si li gagne le monde oppose li, là aussi li-même li gagne le dessus.

 

Ki Allah (swt) donne sakaine parmi nous ici, ça détermination là, ça courage là pou faire face avec bane épreuves ki pou vini et nous pou reste ferme dans nous croyance pour tous les temps. Insha-Allah. Ameen.