بسم الله الرحمن الرحيم

 

Khutba Jummah

 

HAZRAT AMIR’UL MOMENEEN MUHYI-UD-DIN

AL KHALIFATULLAH

 

Munir Ahmad Azim

 

 

18 Décembre 2009

 

(Résumé du Khutba Jummah)

 

 

Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine dire:

 

 

La fin Décembre pé costé, l’atmosphere fine commence changer. Tous dimounes pé paraître joyeux, chacun pé prépare li pour fêter. Ene grand l’évènement kot li pé prépare li pour fêter. Ene grand l’évènement ki pé attane par beaucoup parmi nous. Ene grand l’occasion pour amizé par beaucoup parmi nous. Bane zenfants pé extra content pour gagne cadeaux avec bonhommes Noël. Pétards tous couleur, tous grosseur pé monte vers le ciel. Postcard pé touyé avec acteurs et actrices. C’est tout ene changement ki pé ena pour réflète l’ambiance la fin l’année, dans bane la rue de l’Ile Maurice...

 

Ou pour trouve bane soi-disant grand défenseurs de l’Islam, grands défenseurs Nizam-é-Jamaat, grands défenseurs Khalifa même couma pour dépense par miller des roupies avec toutes sortes qualité pétard pour sonné pour Noël et l’année ; belle, belle jouets pour acheter pour donne zenfants. Ena pour même mette l’arbre de Noël avec so décoration dans la caze pour fête Noêl et même ena pour marché jusqu’à minuit pour assister la Messe minuit, bane ti cannes la bières dans la main, cigarette en travers dans la bouche, pour tire la fumée comme l’échappement camion. Zot pé fêter zot, sans prend conscience ki la fête Noêl, li vraiment ene insulte pour la religion l’Islam. C’est ça bane défenseurs là-même ki pour trouve zot divant divant dans bane magasins jouets pour acheter jouets et aussi pétards pour donne zot bane zenfants pour sonner et zot aussi, zot pou sonner. Zot pou passe le temps fort tard dans la nuit avec l’amusement, grillade et mo sûre Namaz Tahajjud pas pour ena, Namaz Fajr, gramatin pas pou lever dans l’heure pas pour faire ; le lendemain pour dormi dépi tard, après lever tard souhaite joyeux Noël, prépare bane bons bons mangé, alle amuser la mer, ena pour alle plisse ki ça encore, kot zot pour tellement amuser, ki pour senti ki vraiment zot fine vraiment amuser kot zot prend bane la boisson alcolic avec camarades, boire, déguelé (vomi), tomber craze zot fanal, ou même lerlà ou trouve zot rode la guerre avec les autres et faire vilain, gâte ça joli l’enseignement de l’Islam là.

 

Comme ene Khalifatullah Muhyi-ud-Din de ça l’époque là, mo envie pose ene question à tous bane frères et sœurs en Islam, sans distinction, que ce sois ou Aqeedah. Avant tout, tous Musulmans croire dans « Laa Ilaaha Illallah » et « Muhammadur Rassoulloullah », tourne vers même Qibla, faire Namaz, lire le même Quran ki Allah (swt) ti envoye lors nous bien-aimé prophète (saw), nous garde Roza pareil dans le mois de Ramadhan, alle faire Hajj à Makkah. Ou pas trouve ene partie de bane Musulmans alle faire Hajj dans Makkah, et en même temps, ene l’autre groupe Musulman pé alle Jérusalem ou lors bane grand Dargah dans l’Inde. Que ce soit so Aqeedah, différence de l’opinion, mais Hajj alle faire dans Makkah. Alors, mo question c’est ki :

 

O bane frères et sœurs en Islam, eski ça l’année là aussi ou pou continuer pareil couma bane l’années précédents ; eski ou pour faire fête la fin décembre pareil couma tous les autres religions faire ? Eski pas fine l’heure pour ou prend compte ki ou pé faire avec ou la vie ? Eski ou pas pé réfléchi un peu, ki pou arrive nous ene coup, si Allah prend nous la vie et ki compte nous pour alle rende kot Allah (swt) ? Eski ou pas réfléchi ki la mort péna l’âge ?

 

Satan pé tente ou avec toutes sortes kalités kitchose et pé faire tous paraître joli pour ou, pour ki so nombre augmenter dans l’enfer. Combien de temps ou pour continuer suivre le pas de Satan et délaisse Allah et So Rassool Hazrat Muhammad (saw). C’est Allah et So Rassool (saw) zot l’enseignements ki pou amène nous dans ene droit chemin, kot nous pour gagne la paix et tranquillité d’esprit et ene meilleur récompense dans Akhérat ; ene récompense éternel non pas temporel couma dans ça la vie ici-bas là. Eski pas fine l’heure ou remercier Allah pour bane faveurs ki Li fine faire lors ou par donne ou même l’Islam comme religion. Pas fine arrive l’heure pour ou faire Sijdah, remercier Allah pour séki Li fine faire pour ou ? Certainement ou fine être parmi bane ki fine choisir pou lire le Kalima Tawheed ki ça même la clef bane la portes Jannat ? C’est coumsa ki ou remercier celui devant ki nous pour débouter pour rende compte chaque instant ki nous fine vivre lors ça la terre là ?

 

Prend compte bane frères et sœurs en Islam avant ki li trop tard. Réagir pour pas provoque colère de Celui ki par So grâce ou encore vivant. Conner ki Allah oulé du bien pou ou. Dans ça l’époque aujourd’hui, ou ena la chance ki Allah fine envoye So Khalifa (ene Khalifatullah), Muhyi-ud-Din, kot à travers ça humble serviteur là, Allah pé envoye ou so bane avertissements et aussi bane bons nouvelles.

 

Ça Khutba Jummah azordi là faire ou réalizé de séki ou pé faire et faire bane réflexions O bane frères et sœurs ki fine choisir Allah comme Ilaah et fine choisir Islam comme mode de vie. Alors prend compte de ça Khutba Jummah azordi là, écoute bien et réagir en tant ki bane Mu’min (bane ki ena croyance en Allah) couma Allah décrire ou dans Quran Shareef. Allah dire :

 

« Seule réaction de bane croyants, kan invite zot vers Allah et So Messager pour juger entre zot, c’est ki zot dire : ‘Nous fine entendé, nous fine obéir.’ Ça bane là vraiment c’est bane ki fine gagne succès. » (Ch.24 An-Nur V.52)

 

L’Islam c’est ene façon de vivre complète et parfait, ki Créateur bane dimoune fine préparé Li-même comme ene faveur pour nous. Allah dire :

 

« Aujourd’hui Mo fine complète pour zot zot religion, et Mo fine parfaire Mo faveur lors zot, et Mo fine choisir l’Islam comme religion pour zot. » (Ch.5 Al-Maida V.4)

 

Pena doute ki c’est Allah ki conné plus bien ki manière nous bizin vivre lors ça la terre là afin ki nous réussi et ki nous atteindre So satisfaction. Si ou fine accepter l’Islam, c’est pas seulement ou nom ki bizin ena ene origine arabe, mais c’est ki ou bizin fine soumette complètement à Allah, ou fine accepter tout séki Li fine décréter, et ou fine d’accord pour vive dans So l’obéissance complète. Rappel ene ‘deal’ ki Allah fine faire avec bane ki ena Imaan (la foi), et rappelle promesse ki Allah fine faire en retour :

 

« Allah fine acheter depuis bane croyants (bane Mumi’n ki ena la foi) zot le corps et zot l’argent, ki en retour zot pour gagne Jannat... » (Ch.9 At-Taubah V.112)

 

Pena doute ki nous bizin accepter sans réticence bane l’ordres ki Allah fine metté. C’est ça même définition d’ene Musulman ; ene ki fine soumette avec Allah. Kitchose ki Allah fine ordonne nous pour faire, nous faire li avec ene plaisir, et kitchose ki Allah fine défende nou pour faire, nous bizin montré nous soumission, et rejette ça bane pratiques là instantanément. Même si nous ti habitué faire ça bane pratiques là tous les l’années, même si tous nous famille ti habitué faire li, et même si tous dimounes pé faire li. Rappelle couma Allah décrire réaction de bane Mu’min, et rappelle promesse Allah. Pena doute promesse Allah Li toujours vrai.

 

Laisse nous faire ene réflexion lors Jour Jugement dernier. Ene jour ki tout pour dévire emba la-haut, ene jour ki dimounes pour relever. Allah décrire bane dimounes ça jours là :

 

« Ena figure pour éclairée, et pou guette vers zot Rabb. » (Ch.75 Al-Qiyama V.23-24)

 

« Et ena figure pour rempli avec tristesse et désespoir, ayant connaissance ki ene calamité énorme près pour tombé. » (Ch.75 Al-Qiyama V.25-26)

 

Ça jour là, bane dimounes pour procéder en groupes et zot pour recevoir zot livres ki fine enregistré tout saki zot fine faire pendant zot séjour lors ça la terre là. Ena pour recevoir zot livre dans la main droite, et ena pour recevoir dans la main gauche. Imagine ou, si ça jour là ou lever ensemble avec bane ki zot figure rempli avec noirté, avec tristesse et désespoir ! Imagine ou ça jour là ou vine parmi bane ki en détresse, pé tracé pour cherche ene bon action, pas pé conné ki pé arrivé. Bane ki Allah décrire ça bane dimoune là :

 

« Dimoune pour dire ça jour là : ‘Kot chemin sauver ?’ » (Ch.75 Al-Qiyama V.11)

 

Imagine ou ça jour là ou relever avec bane ki fine prier la croix, bane ki faire Shirk, bane ki fine blasphème Allah et So prophète (saw). Eh bien conné ki celui ki Allah fine faire li trouve paradis et l’enfer, le Saint Prophète Muhammad (saw) fine dire : « Celui ki imite ene peuple, li ene parmi zot. » (Ahmad & Abu Dawud)

 

Pena doute, célébrer Noël et l’année c’est imite bane Kuffaar, bane l’ennemi de l’Islam. Amène sapin Noël dans la caze ene Musulman, c’est purement adopter ene pratique autre ki l’Islam. Embête bane zenfants avec bonhomme Noël, c’est contradiction totale avec bane l’enseignements du Saint Prophète Muhammad (saw), fête réveillon, donne cadeaux, sonne pétard pour commémore Noël et l’année, c’est ki nous vendre nous l’Islam et vine parmi bane Chrétiens. Prend compte parole du Prophète Muhammad (saw) ki fine bien mettre l’emphase lors différencier nous avec bane Kaafir, jusqu’à ene juif fine dire : « Ça dimoune là – le Saint Prophète (saw) – li pas oulé quitte nannié de nous religion excepté ki li contredire nous là-dans. » (Muslim)

 

Conné ki Allah fine faire li claire ki :

 

« Pour nous, nous façon vivre, et pour zot, zot façon vivre. » (Ch.109 Al-Kaafiruun V.7)

 

Ene Hadith rapporté par Abdullah ibn Umar dire ki Hazrat Muhammad (saw) fine dire : « Celui ki reste dans pays de bane étrangers et ki célébrer zot nouvel an (zot bane fêtes) et agir couma zot jusqu’à ki li mort, li pour lever avec zot le jour de la rétribution. » (Baihaqi)

 

Mo raconte ene évènement pendant la vie de Hazrat Muhammad (saw) : Kan le prophète (saw) ti émigré vers Madina, li ti trouve bane Ansar (bane habitants de Madina) célébrer deux fêtes ki zot ti hérité depuis l’époque de jahiliyyah (l’époque de l’ignorance – avant l’Islam). Hazrat Muhammad (saw) fine dire : Allah l’Exalté fine remplace ça bane jours là avec bane jours meilleurs ki ça : jour ki Roza terminé (Eid-ul-Fitr) et le jour du sacrifice (Eid-ul-Adha).

 

O bane frères et sœurs en l’Islam, Noël et l’année li pas ene l’enseignement ki trouve dans Quran et hadith, ni bane Sahaba Karaam ti pé fêter, ni même bane génération après et jamais aussi le Saint Prophète (saw) fine encourage bane tel fêtes coumsa. A contraire c’est bane innovations (bidat) – pas rentre dans ça kalité l’attrape là, kot Allah (swt) même pour tourne le dos avec ou. Eski nous fine trouve religion l’Islam incomplète, manque fête, manque distractions ? Ki ou pé bizin tourne vers bane bidat (innovations) de bane les autres ki pas attache zot avec l’unicité d’Allah. Eski ou pour ré-affirmer ki Allah fine manque kitchose pour mettre dans ça religion ki appelle l’Islam là, ki nous bizin prend depuis bane l’ennemi de l’Islam ?

 

A cause faute de temps, mo arrête mo Khutba Jummah là-même pour azordi. Ki Allah donne moi Taufeeq pour continuer ça Khutba Jummah là la semaine prochaine, le 25 Décembre 2009, Insha-Allah.