بسم الله الرحمن الرحيم

 

KHUTBA JUMMAH

 

HAZRAT AMIR’UL MOMENEEN MUHYI-UD-DIN

AL KHALIFATULLAH

 

MUNIR AHMAD AZIM

 

18 Septembre 2009

 

JUMMAH-UL-WIDA

(RAMADHAN)

 

(Résumé du Khutba Jummah)

 

Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine lire ça verset Quran suivant là (Une continuation du sermon de la semaine dernière) :

 

 

Allah, Celui ki possède la Gloire et la Majesté fine dire :

 

 

« Bane anges dessane ainsi ki l’Esprit (Ange Jibreel) pendant ça la Nuit là avec permission de zot Seigneur (et Créateur) et zot apporte le Message partout. La paix partout: li persister ziska le lever du soleil. » (97:5-6)

 

Bane anges et le Ruhil Qouddouss aussi dessane kan ene Messager d’Allah vini et appelle bane dimounes vers l’adoration d’Allah. Allah faire ça bane anges là et le Ruhil Qoudouss dessane lor le cœur et l’âme de ça Messager là pou ki zot donne li bane mangé spirituel ki vine du ciel ; ene telle mangé ki li ena pou distribué à so l’entourage, c-à-d, so bane disciples ki autour de li et l’humanité en générale.

 

Ça bane anges là aussi dessane couma ene la lumière bien brillant lor l’âme de bane croyants, et rassure zot pou zot fermeté dans la vérité parski zot fine accepté bane révélations de côté d’Allah comme étant vrai. Ça bane dimounes spéciales là zot gagne pou ressenti ça la lumière ki bane anges émette.

 

En plisse de ça, le Messager d’Allah ki fine choisi par Allah pou réunir l’humanité sous ene seul bannière : « Laa Ilaaha Illallah » li gagne bane révélations divine ki ça ene vérité bien solide ki pou rester tout au long de so la vie. La lumière éclairant de bane anges vine ene partie bien important de so l’être ; la lumière de bane anges li reflecté à travers so figire, so caractère, so façon pou deal avec bane situations et so bane façons ki li causer et passe le message d’Allah. Ça la lumière spéciale ki vine de côté d’Allah, et ki vini à travers le Ruhil Qoudouss et bane anges de la révélation, li l’essence même de l’existence de ça Messager d’Allah là, parski c’est à travers ça la lumière ki pénétrer dans li là ki li réussi prêche bane messages divines à bane dimounes. Bane anges agir couma bane messager ki apporte bon nouvelle pou le Messager d’Allah, et zot assure li de zot dévotion envers li couma Allah oulé. Ça bane anges de la révélations là zot vine bane soldats de la miséricorde ki sincères dans l’armée du Messager d’Allah. Zot agir d’après so commandement à travers l’ordre d’Allah Qui dirige zot pou obéir So Messager. Zot ene source de joie, parski kan révélation dessane lors Allah So Serviteur Choisi, Allah manifesté Li et déclaré ki Li (Allah) Li toujours présent avec So Messager, et Allah guide li dans so travail noble, aidé par bane anges et bane suivants sincères de ça Messager là.

 

Dans ça siècle là, Allah fine envoye So humble serviteur comme So Messager, comme le Muhyi-ud-Din et So Khalifa. Si nous guette bien, la vie même d’ene Messager d’Allah and période le temps ki Allah faire li reste lor la terre pou prêche So message li en li-même ene « Laila tul Qadr ».

 

Le « Laila tul Qadr » ki ene croyant faire zefforts pou gagner dans ene mois Ramadhan couma tous les ans, li pas pareil couma « Laila tul Qadr » ki ene croyant recevoir dans mois Ramadhan kot ene Messager d’Allah li présent. Ça sacrifice ki ça croyant là li faire pou propage le message d’Allah (ensam avec le Messager d’Allah), et l’intérêt ki li montré pou plaire Allah et So Messager, et par so l’obéissance à Allah et So Rassool, alors ça amène ene transformation positif dans la vie de ça croyant là. Li gagne pou bénéficié de bane bénédictions de Roza, et de tous bane sacrifices ki li fine faire dans le mois de Ramadhan. So la vie complètement uni avec la vie du Messager d’Allah, kot li accepté pou sacrifié so le temps dans le travail de Deen et li dédié so la vie pou promouvoir la grandeur de l’Islam et de so fondateur, le prophète noble, Hazrat Muhammad (saw).

 

Ene telle l’époque dans l’histoire fine existé et ki fine passé des siècles de cela, kan nous bien-aimé prophète Hazrat Muhammad (saw) fine vini lors ça la terre là dans l’Arabie pou prêche so message. Sak compagnon sincère ki fine prend le Baiat dans so la main fine espérer et fine mort dans l’Islam. Ça ti le vrai « Laila tul Qadr » de zot la vie, parski zot fine témoigne l’arrivée du Messager d’Allah ki pli grand, et ki pli noble, et ki li le bien-aimé de nous le cœur, le roi de bane pieux et ki li le plus humble : Hazrat Muhammad (saw).

 

Li ti vini pou enseigne nous sak aspé de l’Islam, ki ti réfléction de so propre la vie. Durant le mois de Ramadhan, li ti ena l’habitude pou enseigne bane croyants bane duahs et Namaz pou ki Allah capave gagne pitié lor zot tous, et admette zot dans So grace et l’amour, et ouvert pou zot la porte « Ar-Rayaan » ; la porte par quoi bane Rozédaar pou passé pou rentre dans paradis.

 

Hadith: rapporté par Abu Salama bin Abdur-Rahman: « Mo fine demande Abu Said Al-Khudri «Eski to fine entende le Messager d’Allah (saw) raconte à propos Laila tul Qadr ? » Li fine reponde par l’affirmatif et fine dire : « Ene fois nous ti dans Itikaf avec le Messager d’Allah (saw) dans 10 jours du milieu (de Ramadhan) et nous fine sorti (dépi Itikaf) le matin du 20ème, et le Messager d’Allah (saw) fine faire ene Khutba le 20ème (de Ramadhan) et fine dire : « Mo fine être informé (de la date) de Laila tul Qadr (dans mo rêve) mais mo fine oublier li. Alors rode li dans bane la nuite impairs dans 10 derniers la nuite du mois de Ramadhan. Mo fine trouve moi prosterné dans la boue et de l’eau dans ça la nuite là (comme ene signe de Laila tul Qadr). Alors, celui ki ti dans Itikaf avec le Messager d’Allah bizin retourne à ça (Itikaf là). » Bane dimounes fine retourne Masjeed (pou Itikaf). Pas ti ena aucaine trace nuages dans le ciel. Mais nek ene coup ene nuage fine vini et fine commence gagne la pluie. Alors fine commence faire Namaz (tous bane disciples fine lever pou Namaz) et le Messager d’Allah fine prosterner dans la boue et de l’eau et mo fine trouve la boue lors front et néné du Prophète (saw). »

 

Allah fine promette le bien pour celui ki garde Roza seulement pour gagne So plaisir, pou rode Li (Allah) tout sél comme so récompense. Dans ça l’époque là, bane compagnons du Saint Prophète Muhammad (saw) fine sacrifier avec contentement tout séki zot possédé pour la cause d’Allah et de So prophète béni (saw). Bane jours de Ramadhan ti pou zot ti pou zot ene opportunité pou faire plisse zéfforts pou gagne le pardon et la miséricorde d’Allah encore plisse, pou purifié zot et pou ki zot arrive à zot but, c-à-d, pou gagne Allah.

 

Hadith: Rapporté par Hazrat Aisha (ra) : « Avec le début de 10 derniers jours de Ramadhan, le prophète (saw) ti ena l’habitude pou serre so ceinture (c-à-d, travail dure) et li ti pé prier toute la nuit, et li ti pé faire tout so la famille reste éveillé pour Namaz. »

 

Hazrat Aisha (ra) fine dire : « Mo fine demande le Messager d’Allah (saw) : « Si mo trouve Laila tul Qadr, alors ki mo bizin faire ? » Li (saw) fine réponde : « Récite ça duah là : « Allahumma innaka A’fuwwun tohib’bul afwa fa’afu anni. » (O Allah, To Celui ki Bien-Pardonnant, et To content pardonner, alors pardonne-moi. » (Tirmidhi)

 

Hazrat Ummoul Momeneen Aisha (ra) fine aussi rapporté ki sak l’année ziska so la mort, Hazrat Muhammad (saw) ti ena l’habitude alle faire Itikaf (ene retraite spirituel) dans Masjeed pendant ça bane 10 jours et nuits de Ramadhan, et ça pratique là fine continuer par so bane madames, ki li pendant so vivant et après la mort du Saint Prophète (saw). Ça retraite là « l’Itikaf » commencé après Namaz Fajr du 20ème Ramadhan. Li permette pou ene dimoune ki observe l’Itikaf pou alle en dehors Masjeed pou Jummah ou so toilette personnel, mais li bizin à tout prix reste dans bane limites ki l’Islam fine precrire, et essaye bénéficier au maximum de ça bane jours et nuits là à travers la prière, duahs et Zikr Allah dans l’espoir ki li pou témoigne bane signes d’Allah dans ça la nuite béni là ki vaut 1000 mois.

 

Kan à celui ki gagne pou témoigne la venue d’ene Messager d’Allah, et li béni par so présence, so « Laila tul Qadr » li pas temporal ditout, si li sincère et obéissant à Allah et à So Messager. Allah pou béni li avec bane telle signes et favours ki zamais avant li fine témoigné. So la vie vine ene trésor, ene l’exemple pou bane générations future, pariel couma la vie de bane compagnons du Saint Prophète (saw) ki ene l’exemple de pureté et de sacrifice pou nous azordi.

 

O mo bane frères, sœurs et zenfants, et O bane ki assoiffé de la vérité de ça « Laila tul Qadr » ki duré tout au long de la vie de ça Messager de ça siècle là, pas réfléchi d’avantage, et vine vite vers la fontaine d’amour et de miséricorde ki Allah fine améné pou zot, pou ki zot capave boire de so de l’eau, afin pou purifier zot et en même temps ressenti la lumière d’Allah ki pénétré zot comme ene faveur dans zot la vie, ki li dans ça le monde là et dans Aakhérat.

 

Ki Allah envoye lors zot tout So bane bénédictions immense, et faire zot témoigne encore plisse bane vrai rêves, visions et révélations ki vine de côté d’Allah comme ene signe de So présence parmi nous et kot nous ressenti So la main ki aide nous et élève nous spirituellement dans le ciel à travers So bienfait et l’amour. Ki Allah reste toujours mo aide pou passe zot So bane message pure et eternel pou faire zot vine pli bon en tant ki bane soldats d’Allah et de So Messager dans ça siècle présent là. Ki Allah accorde zot So pardon et vision et faire zot Mubarak kot zot été ensam avec so humble Messager de ça siècle là. Ameen.