Text Box: بسم الله الرحمن الرحيم KHUTBA JUMMAH HAZRAT AMIR’UL MOMENEEN MUHYI-UD-DIN AL KHALIFATULLAH MUNIR AHMAD AZIM 19 Juin 2009 (Résumé du Khutba Jummah) Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine lire ça verset Quran suivant là: CH. 17 BANI ISRAEL V.32  Wa laa taqtuluuu awlaadakum khashayata ‘imlaaq: Nahnu narzuquhum wa ‘iyyaakum. Inna qatlahum kaana khit-‘ankabiiraa. « Pas touye ou zenfant, par peur de pauvreté. Nous pou donne zotte provision pareil couma Nous donne ou. Touye zot, ça ène grand péché. » (17 : 32) A la lumière de ça verset Quran ki mo fine lire devant ou là, mo pour consacré mo Khutba azordi lors l’avortement. Beaucoup dimounes à Maurice, et même le gouvernement et aussi bane médias pé analyse bane l’opinion public pour amène ene la loi « Légalize l’avortement ». C’est ki triste là-dans, mo fine tende beaucoup l’opinion de bane musulmans, ki so madames, filles ou, bane monsieurs, ki zot pour (accepter ki ena) l’avortement. Ça donne ou ene l’idée kot Allah et So Rassool (saw), So commandement et l’instruction fine allé. Li malheureux pour trouvé ki ça bane kalité soi-disant musulmans là fine piétine l’enseignement d’Allah et So Rassool (saw). Azordi jour ena beaucoup cas de l’avortement ki pé faire en cachiette. L’avortement en li-même c’est ene crime ki pas permette ditout en Islam. Allah fine faire nous comprend ça bien dans ça verset ki mo fek lire devant zot. Si ou lire Quran Shariff ena encore verset kot Allah (swt) fine donne ene sévère avertissement, ki pas tire la vie ki Allah fine rende sacré. Dans Surah Bani Israel Chapitre 17 Verset 34 kot Allah pé dire :  « Pas tire la vie qui Allah fine rende sacré excepté par la justice » (17:34) Et dans le même chapitre, Verset 32, Allah pé dire :  « Pas touye ou zenfant, par peur de pauvreté. Nous pou donne zotte provision pareil couma Nous donne ou. Touye zot, ça ène grand péché. » (17:32) A la lumière de ça bane versets là, li claire pour chaque musulman ki l’avortement pas permette dans l’Islam. Et si jamais ou tourne ou le dos avec ça bane versets ki Allah (swt) fine révèle nous à travers So bien-aimé prophète (saw) et ki li dans le Kitaabul-Muneer – ene livre ki pou illumine ou et retire ou dans l’obscurité pour amène ou vers le chemin ki pour amène ou vers Allah (swt) et kot ou pour gagne le salut, la paix, tranquillité, et ene récompense de côté ou Créateur. Mais si là aussi, kan ou fine tende ça bane versets là, ou faire séki ou la tête dire ou faire, ou suivre, le pas de Shaytaan, pense ou consékance et compte ki ou pou ena pour render kot Allah (swt). Pour moi personellement, kan pé cause légalize l’avortement dans Maurice, c’est ki en d’autres mots pé légalize la prostitution. Sakaine ena ene l’opinion lors ça sujet là. Nous respecter sakaine so l’opinion personnel, mais nous en tant ki musulmans nous bizin mette nous l’opinion ene côté et guette ki Allah fine dire nous dans Quran Shariff. L’instruction et commandements divine bizin passe avant tous, même nous propre l’opinion. C’est Allah (swt) So l’instructions et So prophète so bane conseils et l’exemple ki fine donne nous ki bizin sorti victorieux. Concernant légalize l’avortement, ena beaucoup l’opinion dehors, vu ki beaucoup madame pé alle faire l’avortement en cachiette et ene gros chiffre alle l’hôpital après bane complications médicale ; alors zot dire ki faire pas légalize l’avortement et lerlà pour ena moins risque. Ça kalité raisonnement là c’est ene raisonnement péna aucaine sense, et zot pas tendé ki zot causer. Zot causer sans réfléchi et sans guetter ki bane livres sacrés dire concernant ça sujet là. N’importe ki religion ou été, pas alle faire kitchose kot ça ti l’île Maurice là alle attire la colère d’Allah kot Allah Le Tout-Puissant capave envoye ene punition divine lors nous bane Mauriciens kot nous détruire par ene malédiction divine, couma ou pé trouver dans bane les autres pays et ki péna so réparation, ni so guérison, ni aucaine gouvernement pas pour trouve ene solution pour évite ça punition divine là. L’avortement c’est ene kitchose ki pas bon, ki Allah (swt) même fine empêcher pour faire ça kalité travail là. Kan nous Créateur faire nous comprend ki li pas bon, nous bizin accepter toute suite ki li pas bon du tout, ki li ouvertement ou ki li en cachiette li pas bon du tout devant lizié d’Allah. Kan mo pé dire ouvertement, séki mo pé envie dire, même si le pays et le gouvernement légalize l’avortement, mais ou bizin garde l’honneur de l’Islam en mettant en pratique bane instructions et commandements d’Allah lors ça kalité la loi ki gouvernement pé envie amène ça dans l’assemblée pour « légalize l’avortement ». Nous en tant ki musulmans et nous croyance dans l’unicité d’Allah, et dans So bane prophètes et le plus grand de bane prophètes Hazrat Muhammad (saw) et nous Livre parfait ki ene guide pour tous l’humanité et surtout pour nous bane musulmans. Si jamais ene telle la loi passé, à cause ene vote à l’unanimité, mais nous, nous bizin donne la loi d’Allah priorité ki tous bane les autres la loi mondaines. Mo penser ki sak musulman bizin comprend ça bien, au moin li bizin conne so religion (l’Islam) et cultive ça dans ou, faire ça vine ene obligation lors ou, ki ou lire le Saint Coran avec so traduction tous les jours, kot ça pour aide ou, pour évite tombe dans bane pièges satanique et lors là ou pé commette ene grand péché ki so punition devant Allah pour ene très grand punition. Comprend ça aussi bien ki l’avortement c’est ene crime. Ou commette ene crime en cachiette ou ouvertement, c’est ene crime ! Pas penser ki ou pé faire ene tel crime en cachiette, personne pas pé trouve ou. Pense bien le Créateur de ça l’univers là pé trouve ou très bien. Li-même Li Celui ki fine créer ou, Celui dans ki ou la vie, ou la mort, ou l’honneur, ou même ou punition trouve dans So la main. Si Li envoye ene punition, péna personne ki pou capave sape ou avec ça punition là. Alors pas faire ça kalité crime là, pas rende crime légale. Pas capave dire ene dimoune kan ou ena pour faire ene crime, vine faire li ouvertement. A ce moment-là nous vote ene la loi kot crime permette ouvertement. Ki kalité la loi ça ? Kot la logique dans ça kalité raisonnement là ? Pli ou moin ti ena ça la frayeur là kan ene dimoune envie alle faire l’avortement. Astaire si ou invite dimoune pour vine faire ça sans aucaine la loi, à ce moment là c’est ene danger pour nous société. Nous bizin montrer nous désaccord lors légalization de l’avortement. Pour moi personellement, mo pas trouve aucaine religion « pour l’avortement » et même fine mentionner dans bane les autres livres religieuses aparte le Quran Shareef. Mo pensé ki tous bane les autres religions, zot ena même l’enseignement ki le Quran Shareef fine enseigner. Si jamais ena ene dimoune vini avec kit livre sacré révélé par Allah (swt) aparte le Quran Shareef ki fine enseigne ou pou « pour (légalise) l’avortement » et légalise li, ou même fine dire ki l’avortement pas ene crime, et capave faire li (l’avortement), alors si ena li, mo invite ça dimoune là pour challenge moi et montrer moi dans ki livre sacré li trouvé, ki so référence, so page, chapitre et so commentaire. O bane dimounes ! Si jamais légalize l’avortement, c’est couma dire pé invite vers la prostitution. C’est couma dire pé ouvert la porte de la prostitution et de sexe libre. Si ou lire journal, ou écoute l’information lors radio privé, ou alle conné commié tifilles l’école et bane ki travail dans l’usine alle vers ça kitchose-là en cachiette. Comprend moi bien, mo pas pé blame tous tifille ki alle l’école, ou tous ki travail dans l’usine ou n’importe kot zot travail, mais toujours ena ene partie là-dans. Kan pour légalize l’avortement, kot ene action coumsa ki pou dénigrer la femme, eski ça ki ou appelle liberté ? L’avortement couma nous fine faire ressortir, li amène vers la prostitution kot ene femme vende so le corps et l’honneur. Kan ene femme alle faire la prostitution, eski ça faire l’honneur à ça femme là ? L’avortement amène vers liberté sexuelle. Et dans la société actuelle nous conné ki ravage ça question sex là pé faire. Et nous conné commié maladies sexuelles transmissible ena, sans oublier SIDA. Dans ene société kot dimoune ki ena à cœur le bien être de so prochain pas capave légalise l’avortement. Aucaine gouvernement ki ena ene sense de moralité pas capave légalise l’avortement. Pas à cause certain pé faire kitchose ki pas bon alors bizin légalize ça kitchose là et c’est ene moyen pour invite les autres vers ça kitchose là. A ce moment là, ça nombre le mal là pour augmenter. Kot ena raisonnement dans ça kitchose là ? Invite vers le mal, encourage le mal. Eski ça c’est ene moyen pour contrôle naissance. CRIME ! Eski kan nous légalize l’avortement ki nous pour donne la femme so dignité ? Parfois en voulant trop de liberté (ki l’Islam fine fini donne la femme), bane madames fini par être ene l’objet à la merci de ça société là. Kan mo trouve bane mouvement libération pour bane madame, mo demande mo-même ki pour libéré ? Libère bane madame pour alle vers le mal ? Libère bane madames ki les autres exploite zot ? Libère bane madames pour ki zot vine ene l’objet dans la main bane exploiteurs ? Libère bane madames pour ki zot délaisse le toit conjugal ? Ki pour libérer ? Ena ene l’autre kitchose ki pé passé dans ça le monde là et aussi dans nous ti l’île Maurice ; pé faire l’opération pour rende ene madame stérile. Alors ça kitchose là définitivement li pas permette. Li pas permette pour faire ene telle kitchose avec but pour empêche la procréation. Ça kitchose là li justifié seulement dans cas kot ene madame so la vie en jeu en cas li pour gagne ene zenfant. Li capave joindre la mort si li arriver enceinte et péna aucaine moyen ki capave donne li garanti, alors à ce moment-là pour sauve so la vie li capave pense dans ça direction là. Concernant l’avortement, ena exception, kot pour sauve la vie ene maman, ki l’Islam fine préconiser concernant ça kalité kitchose, kot capave sape la vie ene maman. Insha-Allah, faute de temps, mo obligé arrête le Khutba là-même. Ki Allah Ta’ala donne moi ça Tawfiq là pour baze mo prochain Khutba lor ki l’Islam fine enseigner ki bizin faire pour sauve la vie ene maman. Ki Allah aide sakaine parmi nous pour comprend ça sujet là bien. Ameen...