Text Box: Bismillah-ir-Rahman-ir-Rahim KHUTBA JUMMAH HAZRAT AMIR’UL MOMENEEN MUHYI-UD-DIN AL KHALIFATULLAH MUNIR AHMAD AZIM 19 Septembre 2008 RAMADHAN 2008 (Résumé du Khutba Jummah de 1hr ¾ minutes) Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine récite bane versets suivant: Ch.2 V.187-188  Quand Mo banes serviteurs pose Toi de questions lors Moi (dire zotte) ki Mo près de zotte. Mo reponde zotte l’appelle quand zotte appelle Moi. Zotte aussi bizin écoute Mo l’appelle, et gagne la foi en Moi. Afin ki zotte trouve le bon chemin. Dans sa verse la, Allah pé addresse le prophet (s.a.w), Li pé dire li ki : Quand Mo banes serviteurs pose Toi de questions lors Moi (dire zotte) ki Mo près de zotte. Alors sa c’est ene révélation ki Allah fine envoye le prophet (s.a.w). Et la dans Allah pé dire le prophet (s.a.w) dire à Mo banes « Ibaadi » ki Mo près de zotte. Banes ‘Ibaadi’ c’est banes dimounes ki faire éloges d’Allah, ki glorifier Allah, faire So Ibaadat et obéir tous So banes instructions divine. En résumé c’est bane ‘banda’ et serviteurs d’Allah. Et sa banes dimounes la, zotte là à cause Allah et aussi zotte obéir Allah So Rassool. Et Allah dire zotte « pas tracassé, Mo près are zotte . Et aussi Mo reponde à zotte l’appelle ». C.à.d. tout séki zotte demander, ou demande Moi seul, Mo repond à zotte demande, parseki Mo près de zotte. » Et définitivement Allah pou réponde zotte l’appelle, car zotte soumette zotte à Allah avec boucou de soumission, zotte appelle Allah et zotte tourne vers Li avec patience et avec ene conviction totale ki zotte mette le ‘Tawakal’ lors Allah, c.à.d. zotte place zotte confiance seulement lors Allah. Alors sa banes Ibaadi là quand zotte pou faire même doah, Allah pou écoute zotte. Et Allah dire zotte continuer faire zotte l’appelle. Ena de fois banes dimounes zotte faire même doah, faire même doah aller meme, mais zotte pas trouve zotte doah exaucer. Ler la ki zotte faire ? Zotte arrête faire doah. Mais ena ene zaffaire ki appelle, ene date, ene jour, ene l’heure, ene mois, ene l’année. C.à.d. c’est Allah ki conner quand Li pou exauce sa doah la. Et sa aussi veut dire ki ou bizin prend patience, faire sabr, et ou continuer faire doah. Et quand ou prend sa patience là, Allah pou capave plisse exauce sa dans ene meilleur façon, dans ene façon miraculeuse, ki ou même ou pas attende ! Et Allah mette ene condition, Li accepter ou doah, mais seulement ou bizin obéir Li complètement ; ou bizin écoute Allah So l’appelle c.à.d. ou bizin faire seki Li fine dire ou faire et ou pas bizin faire séki Li fine défanne ou. Ou bizin montrer ene l’obéissance totale envers Li. Quand Li envoye So messager pou prêche So banes messages, ou bizin accepter sa message là et ou bizin obéir Li et mette sa banes l’enseignement là en pratique dans ou la vie de tous les jours. So conclusion c’est ki quand ou écoute Allah, eh bien Allah aussi pou écoute ou. Pas juste sa, Li pou aussi envoye So grâce, bénédiction, et faveurs lors ou. Et faudé pas ou penser quand ou pé obéir Allah et ou pé suivre So messager, ki ena perdition là-dans (ki ou pé penser ki ou pé perdi ou létemps là-dans). Non ! Ou pas pou perdi narien là-dans. Mais c’est juste patience ki ou bizin ena, pareil couma Allah fine dire à banes Ibaadi. « Ki Moi mo toujours là, à coté ou et Mo même Mo pou réponde ou l’appelle, et ou aussi ou bizin suivre Moi. C.à.d. quand Mo pé envoye parmi zotte ene messager, obéir li et suivre Mo banes commandements et l’instructions. Et quand zotte pou faire sa, zotte pou gagne Iman (la foi) dans Moi. Kotte sa Iman là pou augmenter et kotte zotte Iman pou vine ferme, solid et zotte pou reste toujours dans le chemin d’Allah, dans le chemin droite et toujours faire bon action et aussi kotte zotte pou trouve zotte la vie même changer, zotte pou dans ene chemin lumineux et zotte aussi pou changer, zotte pou reste pli ferme avec Allah.  Li permette pendant la nuit Ramadhan ki ou gagne relation avec ou femme, zotte couma ene linge pou ou, et ou couma ene linge pou zotte. Allah ti coner ceki ou ti pé faire en traite, et li fine pardonne et gracier ou. Alors à partir de maintenant, ou capave gagne relation avec zotte et cherche ceki Allah fine prescrire pou ou. Manger et boire jusqu’au moment ki ou capave distingue le fil blanc de l’aube (Fajar) avec so fil noir. Ensuite complète ou carême jusqu’à soleil coucher. Mais pas gagne relation avec zotte (femme) pendant la nuit retraite dans mosquée, sa c’est limite prescrit par Allah. Pas approche trop près avec sa limite la. Coume sa Allah explique dimoune So verset afin ki zotte marche dans So chemin. Allah pé révèle ene commandement dans verset là, Li pé toujours adresse à So banes croyants sincères. Li pé dire zotte, ki maintenent li permette ki pendant la nuit du Ramadhan, ou (c.à.d. banes monsieur) capave gagne relation (sexuelle) avec zotte banes femmes. Ou conne quand ou pé garde le carême, le Roza, ou faire boucou de sacrifice. Par ex : (ou pas manger, ou pas boire, ou sacrifier ou le temps, ou sacrifier ou banes désirs) etc. Et Allah content avec sa banes sacrifices la. Et Allah gracier ou avec ene faveur, et Allah permette ou gagne relation avec ou femmes. Allah donne ou sa permission la, sa montrer ou ki Allah pas mette aucaine fardeau lors banes dimounes, sa montrer ou ki ena boucou flexibilités dans la religion de l’Islam. Et Allah dire, dans lotte partie de sa verset là li dire, ki ou, banes monsieur, ou banes femmes couma ene vêtement pou ou. Et Allah dire ou banes madames, ou monsieur couma dire ene vêtement pou ou, et couma dire ou ene vêtement pou zotte. Ki été ene vêtement ? Ene vêtement c’est ene la toile ki couvert nous nudité et aussi tous défauts ki ena dans nous le corps. Et aussi quand ou mette ene vêtement li protège ou le corps, par ex : contre banes maladies, bactéries, microbes, fraicheur etc. Et quand ou fine mette ene vêtement aucaine dimoune pas pou trouve ou le corps. Et sa vêtement là li rende la personne beau, belle aussi. Alors dans tous so facon « le vêtement » li comme ene bouclier contre tous qualité kitchose, même contre tentation ou excitation aussi, sa meme ki dans Quran Allah dire banes madames ou filles couvert zotte le corps bien, faire pardah. Sa meme ki Allah pé faire comprend ki ene madame li comme ene vêtement pou so monsieur et aussi ene monsieur li ene vêtement pou so madame/s. C.à.d. ene madame li bizin conne couvert défauts de so monsieur et ene monsieur li bizin couvert défauts de so madame/s. Alors sa même ki Allah pé faire comprend. Avant nous faire ene commentaire, nous guette ene coutte ki Allah dire lors la nuit du destin et comment pou cherche li. 1er dans Surah Al-Baqarah, Allah dire ki pendant ou faire le retraite (l’Ittekaaf), dans Masjid, alors dans verset 188, Allah dire à banes croyants ki pendant sa banes moment de retraite la, zotte pas ena droit pou gagne relation (sexuelle) avec zotte banes madames. Et Allah dire sa c’est ene limite ki Allah fine prescrire pou ou. Et pendant sa banes jours de Roza la, tous seki Halal pou ou li vine Haram, mais du moment ou casse le Roza lerla ou capave manger, boire, gagne relations etc. Mais Allah dire pou banes Ittekaaf ; banes dimounes ki reste Ittekaaf dans Masjid, li pou préférable ki zotte pas approche avec zotte banes madames pou pas gagne relations sexuelle et ni pendant sa retraite la li pas bizin alle bazar, sorti, faire l’ouvrage, nettoyer, alle travail… tous sa la non ! Apart sorti alle toilette et prend bain. Li bizin consacrer tous so létemps pou Allah seulment. Et passe so le temps dans ene masjid. Li bizin dormi tiguite, faire boucou doah, et demande pardon Allah. Et fine rapporter ki quand le prophet (s.a.w) ti pé reste Ittekaaf alors li ti pé recite sa doah la : « Allahoummah innakafoun touhibboul afwa fa fouanni. » Oh Allah ! To content pardonner, moi mo ene dimoune ki fine faire boucou péchés, alors pardonne-moi.  Nous revinne lors sa topic de limite ki Allah fine placer. Alors Allah dire pas approche prés avec sa limite la. Alors dans le Ittekaaf, ou bizin détache ou avec banes zaffaire mondaines, ou pas bizin cause l’argent, ni business etc. C.à.d. ena ene grand principe philosophique derrière le mot Ittekaaf et couma pou reste (Ittekaaf). Ittekaaf en générale c’est oublier sa le monde là, oublier tous et mazine seulment Allah. Comme si ou juste avec Allah tous seul. Et vraiment quand ou alle dans masjid ou barrer avec drap blanc quatre coté et dormi en bas, comme si comme ene mendiant devant la porte d’Allah. Maintenant la question se pose, à bé ki faire ou faire tous sa là, ki ou chercher ? La réponse li simple, c’est ceki ou pé cherche le pardon et plaisir d’Allah et ou envie vine pure pareil couma sa drap blanc là ki péna aucaine saleté, aucaine tâche, et ou pé envie purifier ou de ou bane péché kot ou vine propre pareil couma sa drap blanc là. Ena ene hadith rapporter, dans l’époque de nous bien-aimé prophet (s.a.w) : « Abdullah ibn Oumar, pé raconté, ki le prophet (s.a.w) ti ene l’habitude reste Ittekaaf pendant le dix derniers jours du Ramadhan. » c.à.d. le prophet ti pé faire sa pou l’amour ki li ti ena pou Allah, demande le pardon et aussi cherche Lailat-Ul-Qadr juste pou le plaisir d’Allah, et kotte même li ti pé coupe connections avec so banes madames, so banes la cage, so banes zenfants et même avec so banes compagnons etc… Li ti pé pense seulement à Allah et li ti pé faire boucou, boucou Ibadaat avec Allah. Li pas ti pé dormi boucou. Li pas ti pé cause boucou ni banes causer inutiles etc. Quand Ramadhan allé, pou li c’est ene zaffaire très chagrinant, boucou de tristesse. Ene lotte hadith raporté par Hazrat Aisha (r.a) : Le Saint prophet (s.a.w) ti habitué garde le Ittekaaf pendant les dix derniers jours de Ramadhan, li fine garde sa juska li mort. Et puis quand li fine mort tous so madames fine garde sa sunnat la et zotte aussi zotte garde le Ittekaaf pendant les dernier dix jours. « Alors sa hadith là montrer nous, ki madames aussi gagne droit garde le Itekaaf. A moins zotte ena ene ti problème. Sa pas Faraz (obligatoire) lor zotte mais zotte ena le droit pou observe le Ittekaaf. Et faudrait quand zotte garde li, zotte bizin conne suivre la philosophie du Ittekaaf à la lettre et zotte bizin conner aussi pas seulement reste dans masjid ki compter, bizin conner ki zotte pé cherche ene zaffaire de coté d’Allah et alors bizin faire boucou de sacrifice. Chaque l’année, dans le mois de Ramadhan, les derniers 10 jours et le prophet ti pé garde le Ittekaaf couma bizin rester. Pas couma lire ene tigite Quran, après nek dormi, ou bien cause are lotte, lotte, lotte. Ou bien appelle zenfant, appelle madame, faire ene groupe nek causer. Sa c’est pas le but du Ittekaaf, faudrait pas ki reste Ittekaaf dans ene façon ki pas correcte. Pas capave appelle sa Ittekaaf. Faudrait ou penser ki ou devant la porte d’Allah. Absolument comme ene mendiant. Et ki lerla ou conner ki quand ou sorti Masjid le dernier jour du Ittekaaf, ou sorti avec ene purification complète. Ou fine vine propre. Comme si Allah fine lave ou, fine purifier ou et ki ou même ou senti ou ki ou fine gagne le Lailat-Ul-Qadr, Allah même fine content avec ou sacrifice ki ou fine faire pendant les dix jours. Mais si ou fine reste dans Masjid, ou pas faire narien, ou nek dormi, soit nek causer, mais alors ou même ou le vrai perdant. Comme si ou fine gaspille ene banes jours précieux dans vide. Sa qualité banes dimounes la, Allah pas guette zotte même. Et Allah pas guette aussi banes ki faire banes zaffaire juste pou li yeux dimounes. Alors tous sa là li initiles devant lizié d’Allah. Hazrat Abu Hurairah (r.a) rapporté encore : Ki dans l’annee ki le prophet (s.a.w) pou mort, alors dans sa même l’année le prophet fine reste Ittekaaf pendant 20 jours. Sa montrer nous ki juska dernier moment de so la vie le prophet fine reste toujours attaché avec so Rab, so Allah. Et sa donne nous à réfléchir, ki ene dimoune couma Hazrat Mohammad (s.a.w) , l’homme le plus parfait du monde, li fine faire autant d’Ibaadat, aster la nous banes humble et petits serviteurs d’Allah, ki rempli de péché, alors nous, combien Ibaadat nous bizin faire. Abé combien Zikr nous bizin faire ! Sa meme ki tous le temps nous bizin reste dans le droit chemin et continuer sur le pas de nous Aka Hazrat Mohammad (s.a.w) pou ki Allah content avec nous et demain quand nous quitte sa le monde la, nous gagne ene satisfaction et ene plaisir pou présente nous banes bonne actions devant Allah. Qui Allah donne nous sa Tawfiq la. Ameen.