Text Box: Bismillah-ir-Rahman-ir-Rahim KHUTBA JUMMAH HAZRAT AMIR’UL MOMENEEN MUHYI-UD-DIN AL KHALIFATULLAH MUNIR AHMAD AZIM 20 Juin 2008 (Résumé du Khutba Jummah de plus de 1½hrs) Après ki Hazrat Muhyi-ud-Din Al-Khalifatullah fine souhaite zot tout le salaam, li fine lire, Tashahhud, Taouz et ensuite li fine lire Surah Al Fatiha du Quran Shareef et li fine dire:  (An-Nisah Ch.4 V.104) Kan ou dans tranquillité, pratique ou Namaz comme d’habitude, parce ki Namaz fine prescrire pour les Musulmans à des heures fixés. O bane frères, sœurs, et zenfants du monde Islamique et du Jamaat Ul Sahih Al Islam ki pou entende ça message du Khutba Jummah d’aujourd’hui là Insha-Allah – Faire ene zeffort améliore nous Namaz. Dans bane mois de Ramadhan ou fine gagne bane bon l’habitude pour faire Namaz dans l’heure fixé et aussi en congrégation. Li important pour ki nous garde ça bon l’habitude là tout les temps, afin ki nous capave comprend l’importance Namaz. Ene vrai Mouslemeen bizin pratique so cinq fois Namaz tous les jours. Tanque capave li bizin faire li en congrégation. Néglige faire Namaz en congrégation sans ene raison valable li ene grand manquement ki représente, ki ou pé tourne le dos avec le Mobaarak Sunnah de Rassoollullah (s.a.w). Dans Bukhari Shareef, Abdullah bin Umar (r.a) pé raconté ki le Prophète d’Allah (s.a.w) fine dire : « Namaz avec Jamaat li 27 fois supérieur ki Namaz faire tout seul. » Si jamais ou pas fine capave gagne Namaz en congrégation, au moin ene Namaz en congrégation ou bizin faire ene z’effort pour gagne li, et kan l’heure Namaz fine arriver, faudé pas ou renvoye ou Namaz. Très souvent dimoune dire : « Mo pou remplace mo Namaz tal’heure. Si ça l’heure là, a cause ou paresse ou pas faire Namaz là et ou dire tal’heure, bé ou pé commette ene péché. Donc faudé pas ene dimoune permette li quitte so Namaz dans l’heure ki bizin faire li avec l’idée pour remplace li plutard. Hazrat Umar (r.a) fine dire : « La responsabilité pli essentiel pou ou auprès de moi c’est Namaz. Celui ki pou préserve ça Namaz là, li pou observe les autres kitchoses pli bien. Et celui ki néglige li, li pou néglige les autres kitchoses pli bien encore. Allah dire dans Quran : « Mo tout seul bon pou être adorer, apart Moi nannié pas bon ». Li (Allah) fine aussi dire : « Faire Namaz pou mazine Moi. » Le souvenir d’Allah (Zikr-é-Ilaahi) li le plus grand vertu. Si la grandeur et la puissance d’Allah faire l’effet lor ou, bé, premier demande de ça l’effet là, c’est ki ou bizin faire le Namaz. Et ça Namaz vers ki mo pé attire ou l’attention là, c’est Namaz avec Zikr-é-Ilaahi. Action principale ki pou éloigne nous are di feu c’est Ibaadat, et sommet de Ibaadat, c’est le Namaz. Li ene telle place kot le sommet de hauteur et le sommet de humilité vine ene (1). En fait, le plus grand Mehraj, li trouve dans Sajda. Li bon pour rappel ki au jour du jugement, premier compte ki pour prend avec bane dimounes, c’est à propos de Namaz même. Donc, si ou fine vraiment comprend l’importance et valeur de Ibaadat, à l’heure de Ibaadat, ou bizin galoupé vers li, pareille comment ene dimoune ki gagne faim galoupé derrière nourriture. Nous bizin analyse nous Namaz aussi, eski dans nous Namaz nous pé réfléchi lor bane attributs d’Allah, ou soi nous pé magine bane les autres zaffaires, bane les autres idoles ? Namaz li couma dire ene mesure, li montrer nous combien tauhid nous ena (croyance dans ene seul Dieu). Namaz montrer nous aussi ki kantité Shirk ena dans nous le cœur. Kan à Hazrat Muhammad (s.a.w), so le cœur ti toujours apendant dans Namaz. En dehors Namaz li ti toujours coze Allah même. Mais pour nous c’est le contraire, nous dans Namaz, mais nous le cœur en dehors. Kan ou commence Namaz, pas bizin presse presser comment dire pé rempli formalités. Non ! Pensez ki ou fine arrive devant Allah, et pensez ki Allah devant ou. C’est ça pensée là même ki pour faire ou gagne ene goût dans ou Namaz. Tauhid amène ou vers Zikr (souvenir) ek zikr amène ou vers Tauhid. Li bon pou penser avant chaque Namaz ki moyens ou pou servi pou magine Allah. Si ou faire Namaz zis pour gagne l’avantage mondaine, bé pas appelle ça Namaz ! Li important pour diboute devant Allah avec respect, humilité et sincérité pour cherche plaisir Allah. Faudrait ki ou l’âme li complètement tourner vers Allah. Sans ça, le Namaz pena aucaine réalité. C’est ça kalité Namaz là ki bizin pour la victoire de l’Islam dans le monde. Chaque dimoune bizin faire bane z’efforts pour faire le Namaz déboute, parce ki li ena tendance tomber. Chaque fois ou l’attention pour détourner, ou l’attention pour attirer vers les autres affaires. Des ki ou l’attention détourner, bé là-bas même le Namaz li tomber. Des ki ena bane manquements, bé li veut dire ki le Namaz là, li pas pou lor so sommet, et certainement, li pas pou donne so full avantages aussi. Li perdi so l’objectif. L’avantage de Namaz, c’est ki li bizin faire ou déboute spirituellement. Donc, premièrement, apprendre faire le Namaz déboute. Faire le Namaz diboute dans ça sens là ki n’importe kan ou l’attention pé rode sorti depi le Namaz, bé retourne l’attention là vers le Namaz même. Ça c’est ene telle la lutte ki parfois ou bizin faire pendant toute longue ou la vie. Des ki ou commence le Namaz, ou bizin conné ki chaque parole ki ou pé dire dans Namaz, zot comment dire ene perle bien précieux. Lerlà, naturellement ou l’attention pour attirer lor là. Ou bizin vine actif et porte attention lor ou Namaz et lor Namaz de ou bane zenfants aussi. Bane dimounes ki zot Namaz pli tomber, c’est bane dimoune ki ena moins de connaissance lor l’avantage et la sagesse de Namaz. Zot bizin arrête lire Namaz superficiellement. Lire li avec attention et réfléchi lor so bane significations (pour ça ou bizin naturellement apprendre traduction de Namaz). Protège ou Namaz, surtout le Namaz du milieu : le Namaz ki vini kan bane dimounes pleinement engager dans le travail, ki li vine difficile pour faire le Namaz. D’après l’expérience, ça li le Namaz Fajr. Bane ki pas lever pour le Namaz Fajr, c’est bane dimounes ki pé préparer pour ki zot brûler dans lotte monde là. D’après ene hadith, le Saint Prophète (s.a.w) dire : « Li meilleur ki ou brûler dans ça le monde là même ou bien ki ou brûler dans l’au-delà. Si a cause l’obligation du travail, zot pas pé capave accompli le droit de ça Namaz là, bé dans ça cas là, li meilleur ki zot quitte le travail parce ki ça travail là, li travail duniya (le monde) seulement. Nous la vie ici et dans Akhérat, li trouve dans Namaz même. Au Jour du Jugement, premier compte ki pou prend avec bane dimounes, c’est à propos de Namaz même. Donc, tout bane ki ena lien avec le Jamaat Ul Sahih Al Islam, bane ki ena considération pour la manifestation divine, à zot tous dans le monde en entier, mo faire ça humble appel là. Zot bizin établir le Namaz dans la caze, dans zot l’environment et dans la société. Protège le Namaz du milieu et retourne vers le Namaz du matin. Actuellement nous en hiver, faire frais, beaucoup sûrement pas pé lever pour Namaz Fajr. Zot bizin faire bane z’efforts extraordinaire pour établir le Namaz parce ki Namaz li ene zaffaire essentiel. Si ou Namaz li correcte, bé tout pour correcte. Bane ki pé prend bain cinq fois par jour, pas pour ena aucaine impureté lor zot. Aussi, bane dimounes ki amène zot bane zenfants aussi car ça li pour ene excellent Tarbiyyat pour zot. Faire Namaz dans l’heure c’est ene action ki Allah plus content. Faire ene bon wuzu, malgré ki ou pas pé trop envie, c’est ene lotte zaffaire ki Allah content beaucoup. Bane les autres zaffaires ki Allah content encore : Namaz Jummah, Namaz Ba’jamaat (en congrégation), et Namaz Fajr. Bane membres Jamaat Ul Sahih Al Islam du monde entier, bizin réuni dans ene place pour faire zot bane programmes et aussi d’autre activités et aussi avec l’intention pour faire le Namaz Ba’Jamaat. Faire ene analyse, ki faire pé dire ou trouve ene place pour faire le Namaz - pour ki zot faire bane z’efforts ki ou vini, ou consacrer ou le temps, ou assizé dans ça place là, vine ene source pour augmente ou rang spirituel. Bane madames, bane filles et zenfants capave alle dans ça place là pour augmente zot rang spirituel, li pour bien bon pour zot, même si li pas obligatoire lor zot pour alle faire Namaz dans ça place là. Bizin aussi faire en sorte ki dans la caze pas servi manger dans ene l’heure kot li coïncide avec l’heure de Namaz. Si ene madame aide so mari pour faire le Namaz, et ene missié aide so madame, bé li claire ki ça pour ena bon l’effet lor zot bane zenfants, et dans tout zot l’environnement, le Namaz pour établir. Namaz, c’est la vie même de bane humain et li objectif principale de la création de l’homme. Si consciemment nous pas commence le voyage lor ça duniya là, bé dans l’au-delà aussi nous pas pour capave faire le voyage. Si bane membre du Jamaat Ul Sahih Al Islam comprend le sujet de Namaz, et ça vine ene partie de zot être, à ce moment là, nous capave rende l’âme avec tranquillité. La beauté de Namaz, c’est ki li empêche ou alle vers l’indécence et bane mal manifeste. Namaz et l’indécence zot deux zaffaires opposés. Pour établir le Namaz, li nécessaire ki ou sorti de l’indécence, sinon le Namaz, li pou dans vide. Celui ki so lecoeur li attacher avec le Namaz, pour ene tel dimoune, ni l’indécence, ni le mal manifeste pas capave attaque li. Tout le temps, li reste lor so garde et li vigilant. Si ou envie ki ou lecoeur li attacher avec le Namaz, bé ou bizin gagne goût et plaisir dans Namaz. Le point fondamentale c’est ki pour gagne plaisir et intérêt dans Namaz. C’est ça connaissance là ki capave retire ou l’attention de bane zaffaires mondaines et amène ou lor le Namaz. Kan Allah pour faire so fazl (grâce) lor ou, lerlà ou pou gagne le bonheur et la paix. Depuis ça moment là, ou pou gagne ene goût dans Namaz. Ça goût là, ou pou gagner, mais avant ça arriver, pareil couma ene malade, li bizin boire médecine amère pou li gagne la santé, coumsa même li nécessaire ki ou persister et faire ou Namaz kan même li pena goût. Depuis ça Namaz sans goût là, pour sorti ene Namaz ki ena goût. Insha-Allah. Ene premier signe pour reconnaite l’acceptation de ou Namaz, c’est ki Namaz li pas pour laisse ou faire ene telle chose ki pour cause les autres du tort. Si ou Namaz pé accepter, li nécessaire ki dans ou façon de faire, et dans ou bane habitudes, bizin ena ene dignité. C’est avec l’aide d’Allah ki ça dignité là capave établir. Facilement ou capave reconnaître si ou Namaz li fine accepter ou non. Ou pas bizin ena grand connaissance pour reconnaître ça. Si ou sorti Namaz et ou re-alle commette bane mauvais actions et ré-cause causer inutiles, l’heure là ou fini conné ki kalité Namaz ou pé lire. Bane membres du Jamaat Ul Sahih Al Islam bizin conne les conséquences kan nous abandonne Namaz. Celui ki gagne ene dégoût pour le Namaz, li pour gagne 15 punitions de côté d’Allah. Six dans ça la vie là même, trois au moment kan li pé mort, trois dans so tombe, et trois au Jour du Jugement. Six punitions dans ça la vie là li comme suite : (1) Allah enlève tous bénédictions lor li. (2) Allah pas accepter so bane duahs. (3) Allah enlève So la lumière lors so visage. (4) Tous bane créatures lor la terre pour détester li. (5) Allah pas pour donne li récompense pour so bane bonnes actions. (6) Bane dimounes pieux pas pour faire duah pour li. Trois punitions au moment li pé mort : (1) Li mort humilié (2) Li mort affamé. (3) Li mort de soif ; kan même li boire de l’eau de tous bane océans, li pou reste toujours assoiffé. Trois punitions de la tombe : (1) Allah serre so tombe, jusqu’à so bane côtes écrasé ene lor l’autre. (2) Allah pour verse lor li, du feu avec la braises. (3) Allah jette lor li ene serpent, kot li pour morde li depuis Namaz fajr jusqu’à Zohr ; depuis Zohr jusqu’à Asr ; Asr jusqu’à Maghrib ; Maghrib jusqu’à Esha ; et avec chaque batté ou mordé li pour enfonce 70 mètres enba la terre. Trois punitions le Jour du Jugement : (1) Allah envoye celui ki pour amène li dans l’enfer pou risse li par so visage. (2) Allah pour guette li avec ene telle colère, ki la chair de so visage même pour tomber. (3) Allah pou juge li sévèrement et pour ordonne ki jette li dans l’enfer. Bane ki pas faire le : 1. Namaz Fajr : La lumière lor zot visage pour enlever. 2. Namaz Zohr : Bane barakat (bénédictions) de zot revenues pour enlever. 3. Namaz Asr : La force de zot le corps pour enlever. 4. Namaz Maghrib : Zot pas pour gagne aucaine bénéfice de côté zot enfants. 5. Namaz Esha : La tranquillité de zot sommeil pour être enlever. PARDAH AU MOMENT DE NAMAZ : Pas seulement bane madames ki bizin faire Pardah, kan faire Namaz. Bane z’hommes aussi bizin couvert zot bien. Ene question : Ki partie le corps obligatoire couvert pour ene z’homme pendant le Namaz ? Pour ene z’homme, so parties intimes (Sharam-Gah) li trouve en bas nombril jusqu’à, en bas genoux. Pour z’hommes li obligatoire (farz) couvert entièrement le sharamgah ; c-à-d, nombril jusqu’à genoux et pas seulement dans Namaz. Et nous bizin rappelle ki Allah pé guette nous, chaque instant nous bizin gagne honteux, pareil couma kan ene dimoune guette nous (example, kan mal habiller) nous gagne honteux. Alors sakaine parmi nous bizin bien couvert nous le corps, surtout kan pé faire Namaz Ba’Jamaat ou individuel. Faire Namaz sans couvert la tête, li pas ene bon façon faire Namaz. Coumsa même li pas convenable pour faire Namaz avec ene T-shirt ou bien avec ene chemise manche courte. Quran-é-kareem fine servi la formule « zeenat » au lieu « libaas » (habit) kot li fine ordonne pour habiller au moment de chaque Namaz. « Zeenat » signifie « beauté ». Évoquant la raison pour laquelle fine servi « Zeenat » au lieu « Libaas », pou montrer ki ene Mouswalli li bizin non seulement couvert so le corps, mais li bizin adopter ene tenue ki convenable au point de vue esthétique. Faudé pas li habiller couma li gagner. Li bizin habiller dans ene façon respectable parce ki dans Namaz, li fine présenter devant le Rabb-ul-Aalameen. Donc, ou pas pé déboute devant n’importe ki ; par contre kan ou mort, ou cadavre bizin bien couvert, et kan ou vivant ou pas couvert ou bien pour présente ou devant ou Rab ! Ou pas couvert la tête, mette T-shirt ou chemise manche courte. Ça c’est bane négligence dans Namaz. Donc, li makrouh pour faire Namaz dans ene tenue pareil. Alors, nous bizin éduque nous bane jeunes lor là avec beaucoup sagesse, mais c’est ki pli important séki zot bizin couvert zot le corps dépi enbas nombril jusqu’à genou et Insha-Allah, ça pou amène amélioration dans zot. Parfois ou cause avec ene jeune li faire couma dire li conné, kan li pas conner ! Mo ti conné ki li pas trop conné, mais pas ti conné coumsa li pas conné. Kan pas conné, dire mo pas conné. Li bien mauvais ki ou déclare conné, kitchose ki ou conné, ou pas conné. Kan pas conné, pas reste pas conné. Ki conné ou capave conné seki ou pas conné ! Seki ou déclare conné, ou pou conné ki ou pas ti conné. Déclare conné seki en vérité ou pas conné. Appelle pas conné ou plisse ki pas conné. Pas en colère, ki mone dire mo pas conné. Mo pas conné, ou pas conné, Allah ki conné. Alors, pour terminer, mo pou dire zot faire z’effort pour établir le Namaz; ça nous ena ça capacité là ! Mais pour établir li complètement, nous pena ça. C’est pourquoi, so l’asspé final c’est Duah. Faire duah dans Namaz et en dehors Namaz aussi. Faire duah, dire Allah ki ou bien faible, ou aveugle ; envoye ou l’aide avec la lumière. Ou bizin accepter ki Allah ki ena pouvoir, ou pena aukaine pouvoir. Demande Allah protège ou contre mauvais action. Hazrat Mu’az (r.a) raconter ki le Saint Prophète (s.a.w) fine prend so la main et fine dire : « Mu’az, mo content ou, et mo conseille ou pou pas manque faire ça duah là avec Allah après chaque Namaz : « Allahoumma ala zikréka wa shukréka wa houssné ibadatéka » - O Allah, aide-moi pou magine Toi, pou être reconnaissant envers Toi, et pou adore Toi dans meilleur façon ki bizin. Ameen