|
بسم الله الرحمن الرحيم
Khutba Jummah
Hazrat Amir’ul Momeneen Muhyi-Ud-Din Al Khalifatullah
Munir Ahmad Azim
20 Mars 2009
(Résumé de Khutba Jummah)
Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine dire:
Le fait ki Jamaat Ahmadiyya pou célébrer Massih Maoud Day Lundi le 23 Mars 2009, mo Khutba pour basé lors proclamation de Hazrat Mirza Ghulam Ahmad (as), le Messie Promis.
Nous, le Jamaat Sahih Ul Islam croire fermement ki le Messie, Krishna, Jésus ou n’importe ki lotte dimounes ki bane lézot religions pé attane, fine vini dans la personne de Hazrat Mirza Ghulam Ahmad (la paix lor li), le Messie Promis.
Tous bane prédictions concernant l’avènement de ça réformateur des derniers temps là, et ki mentionner dans plusieurs bane écrits religieux, par exemple, ki li dans la Bible, dans bane Vedas et le Quran Shareef, tous ça bane prédictions là fine réaliser dans l’époque de Hazrat Mirza Ghulam Ahmad (la paix lor li), et aussi dans nous l’époque ki nous pé vivre azordi jour aussi.
Li impensable ki pour ena dans chaque religion ene réformateur ki pour vini et pou proclamer ki c’est so religion ki pou ena le dessus ! Ça pou créer trop beaucoup de désordre ; li pou ene telle désordre ki nous pas pou fini décrire même ! Alors, li très important ki ene sél dimoune vini, ki, avec l’aide puissante d’Allah, li vini pou rallier le monde en entier sous ene sél bannière (c-à-d, bannière de l’unicité d’Allah). Ça dimoune là, c’est Allah ki pou guide li. Nous croire fermement ki ça dimoune là c’est Hazrat Mirza Ghulam Ahmad (la paix lor li) de Qadian, en Inde. Tous bane signes ki fine mentionné dans bane livres sacré, fine manifester zot en faveur de so proclamation et de so veracité et zot fine prouver ki li vine bien de côté d’Allah, Le Très Haut.
Li tout sél dans so l’époque ti proclamé ki li gagne révélations de côté d’Allah, et kot Allah fine dire li ki Li fine choisir li pour reforme lémonde et amène tous dimounes vers l’adoration de zot seul Créateur, Allah Tabaarak Wa Ta’ala. Personne péna le droit pou ignore ene telle proclamation !
Hazrat Mirza Ghulam Ahmad (la paix lor li) ti choisi par Allah comme ene Réformateur à la fin du 13ème siècle de l’Hégire et de ce fait, l’Islam fine propager ou bien mo bizin dire, la renaissance de l’Islam fine commencé dans début 14ème siècle. En 1889, Hazrat Mirza Ghulam Ahmad (la paix lor li) fine fonde le Mouvement Ahmadiyya, et de ça façon là, li fine établir la fondation d’ene révolution spirituel à travers le monde en entier.
D’après mo l’opinion personnelle, et avec ene l’étude profond du Quran Shareef et bane Hadiths de nous bien-aimé Prophète Hazrat Muhammad (la paix et la bénédiction d’Allah lor li), catégorie de bane prophètes ki fine terminer c’est zis bane prophètes ki amène la loi.
Alors, li ene fait ki jamais pour ena encore ene lotte prophète ki pou amène ene nouvo la loi ki pou vine après le Quran Shareef (Livre sacré ki Hazrat Muhammad – la paix et la bénédiction d’Allah lor li – fine améné) et ki pou surpasse li. Et aussi ça bane paroles ki « l’apostolat et l’ordre de bane prophètes fine terminé » et ki « pas pou ena lézot Messager ou Prophète après moi » ; veut dire ki « pas pou ena ene lotte Prophète après moi ki pou suivre ene lotte la loi aparte mo la loi, mais pou continuer ena Prophète ki pou sous l’ordre de mo Shariah. » Et aussi, parole kot li dire « Pas pou ena aucaine Messager », veut dire ki pas pou ena aucaine lézot prophète de loi ki pou vini pour dirige bane dimounes vers ene lotte Shariah. C’est ça kalité bane prophètes là ki fine terminé !
Mais après ça, la porte de ça grand faveur là li pas fermé ditout ! Pou continuer ena encore prophètes ki pou vini dans l’Oummah du Saint Prophète (la paix et la bénédiction d’Allah lor li). 2ème point c’est ki bane paroles du Saint Prophète (la paix et la bénédiction d’Allah lor li) ki pas pou ena lézot prophètes après li veut dire ki pas pou ena ene lotte prophète ki pou amène ene nouvo Shariah (la loi).
3ème point c’est ki « bane ki doué d’intelligence » pou réaliser ki péna aucaine vertu dans vine premier et dernier dans contexte du temps. Alors, comment eski la phrase « mais li seulement ene Messager d’Allah et le Khataman Nabiyyeen » (Sceau des Prophètes), capave être digne d’éloges dans le sens chronologique ?
Réfléchi lor ça Hadith kot Hazrat Aisha (Ki Allah content avec li) dire : « Dire ki le Messager d’Allah (la paix et la bénédiction d’Allah lor li) li le « Khataman Nabiyyeen » mais jamais dire ki pas pou ena lézot prophètes après li. » (Durri-e-Mansoor Vol.5 pg. 204)
Kan ou étudier en profondeur le Quran Shareef et bane Hadiths authentique, ou pou trouver ki Hazrat Mohammad (la paix et la bénédiction d’Allah lor li) li pas le dernier prophète, et de ce fait péna aucaine sens chronologique si ene dimoune pense le contraire à propos de ça.
Au contraire, d’après bane prophétie de nous bien-aimé Prophète Hazrat Muhammad (la paix et la bénédiction d’Allah lor li), le Messie Promis (la paix lor li) ti bizin paraîte à la fin du 13ème siècle ou commencement 14ème siècle, et c’est bien Hazrat Mirza Ghulam Ahmad (lor li la paix) ki le Messie Promis ki tous dimounes et tous religions ti pé attane. Mo pou cite quelques extraits (de bane livres) du Messie Promis Hazrat Mirza Ghulam Ahmad (lor li la paix) concernant so proclamation comme ene prophète d’Allah.
C’est ene fait ki ena toujours deux types de prophètes. Ti ena bane prophètes ki ti apporte ene la loi et lézot ki fine vini pou propage et protège bane la loi ki déjà existé.
Avec la venue du Saint Prophète Muhammad (la paix et la bénédiction d’Allah lor li), premier catégorie de bane prophètes fine terminé, c-à-d, bane ki amène la loi de côté d’Allah.
Maintenant ene nouvo catégorie de bane prophètes pou continuer exister, mais ça bane prophètes là pou bizin tous les temps ene Ummati (disciple) du Saint Prophète de l’Islam (la paix et la bénédiction d’Allah lor li) ki li le « Khataman Nabiyyeen », c-à-d, Hazrat Muhammad (la paix et la bénédiction d’Allah lor li), li-même le « Sceau de tous bane Prophètes ».
Bane écrits li très clair lor ça sujet là. Dans so livre « Ek Ghalati Ka Izala » le Messie Promis (la paix lor li) dire :
« Kot mo fine refuse pou être appelé ene prophète mo fine faire li dans le sens ki mo pas ene porteur d’ene nouveau Shariah ki indépendant et ki mo pas ene prophète indépendant.
Mais le fait ki mo fine recevoir bane bénédictions spirituelle dépi le Messager ki mo so disciple (ici, le Messager pé faire pé référence à Hazrat Muhammad – la paix et la bénédiction d’Allah lor li), et le fait ki mo fine être nommé après li, et la connaissance du monde invisible fine être donné à moi par Allah comme ene preuve de So la grâce, Mo proclamé ki mo ene prophète et ene Messager, mais seulement sans ene nouveau Shariah (la loi). Jamais mo fine renonce au titre de Prophète dans ça sens là. Allah fine appelle moi prophète et Messager dans ça façon là. Alors, jamais mo capave dénié (rénié) ki mo ene prophète. »
Concernant la base de so bane proclamations :
1) Le Messie Promis, Hazrat Mirza Ghulam Ahmad (lor li la paix) fine dire : « Mo faire serment au nom d’Allah ki c’est Li-même ki fine envoye moi, et fine appelle moi Prophète. » (Haqiqatul Wahi, pg 68)
2) « Mo déclarer d’ene point de vue, ki mo ene Ummati (disciple) et de l’autre côté Mo ene prophète ; le titre de prophète li le plus haut distinction ki accordé à ene Ummati par l’influence de grâce du prophète béni (la paix et la bénédiction d’Allah lor li). » (Al Hakam No.17 - 1947)
3) « Mo fine être clairement appelé prophète. » (Haqiqatul Wahi pg 150)
4) « Mo ene prophète d’après le commandement d’Allah. Si mo dénié ça, mo pou coupable de péché. Et kan Allah appelle moi prophète, ki mo été pou refuser ? (Dernier lettre publier dans Akbar-i-Aam - 26 May 1908)
5) « Mo déclarer ki mo ene prophète. Le controverse li tout à fait littéral (c-à-d, tous les temps kan ene prophète vini, bane dimounes pas accepter li facilement. Tous les temps ena bane conflits). Ene prophète c’est celui avec ki Allah garde contact avec li (ene telle contact) ki pli supérieur en nombre et en qualités comparé avec bane lézot (dimounes). Et ça bane relations là souvent contenir bane prophéties. Et le fait ki ça définition là appliquer à moi, Mo ene prophète. » (Badr – 5 Mars, 1908)
6) « Mo le Messie Promis et mo même celui ki fine être appelé Prophète par le Chef de bane Prophètes (la paix et la bénédiction d’Allah lor li). » (Nazoolul Massih pg 48)
7) « Parmi bane difficultés de mo mission c’est mo déclaration ki mo ene Prophète, ki mo recevoir bane révélations divines et ki mo le Messie Promis. » (Brahin-i-Ahmadiyya pg 53)
A propos bane qualités essentiels d’ene prophète, le Messie Promis (la paix lor li) dire : « Dans langaze Allah, ene prophète, c’est celui avec ki Allah ena bane relations fréquent et accorde li bane connaissances du monde invisible. » (Chasma-i-Maarifat pg. 325)
A cause péna assez létemps, mo pou dire séki le Messie Promis, Hazrat Mirza Ghulam Ahmad (la paix lor li) fine dire : « Quoi ki mo fine toujours prié ki pareil couma (zot ti faire avec) Jésus fils de Marie, pou (dimoune) pas prend moi comme ene instrument pou promouvoir bane l’idées polythéistes et mo ena confiance en Allah ki Li pas pou laisse ça arrivé, mais Li fine dire moi plusieurs fois ki li pou donne moi grandeur, Li pou inspire lécoeur de bane dimounes pou content moi et Li pou répanne mo Mouvement à travers le monde. »
Le Journal « Al-Hakam » ti gagne l’honneur pour vine le premier journal du Jamaat Ahmadiyya ki fine être publié. Jamais nous pas pou fini cause à propos bane livres du Messie Promis (la paix lor li). Nous pou cause ça de siècle en siècle.
Ki Allah guide nous toujours lor le droit chemin, le chemin de nous bien-aimé Hazrat Muhammad (la paix et la bénédiction d’Allah lor li) et ki fine réparé par le Messie Promis Hazrat Mirza Ghulam Ahmad (la paix lor li). Ameen. |
