|
بسم الله الرحمن الرحيم
KHUTBA JUMMAH
HAZRAT AMIR’UL MOMENEEN MUHYI-UD-DIN AL KHALIFATULLAH
MUNIR AHMAD AZIM
22 Mai 2009
(Résumé du Khutba Jummah)
Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine lire ça verset Quran suivant là:
“Innii jaa-ilun fil arzi Khalifah”
Mo pou place ene Mo représentant lor la terre. (Chapitre 2 Verset 31)
“Fa-immaa ya-ti-yan-nakum-minnii hudan faman tabi-a hudaa-ya falaa khawfun alayhim wa laa hum yah-zanuun.”
N’importe kan ene guide arrive parmi ou depuis kot Moi ; bane ki suive Mo guide pas pou bizin peur, ni gagne la peine. (Chapitre 2 Verset 39)
A la lumière de ça deux versets ki mo fine lire devant zot, nous trouver ki c’est ene bienfait et ene bénédiction ki vine d’Allah, et non pas de bane dimounes.
Dès ki l’homme fine atteindre ene certain dégré de maturité mentale, Allah fine envoye bane prophètes pou guide li. L’arrivée de ça bane prophètes là li ene grand manifestation de la grâce d’Allah et li ene source de So bane bénédictions. Quand ça bane prophètes là disparaîte, Allah faire ene grâce lor ça lémonde là, et donne li ene l’autre manifestation de So faveurs et bénédictions – kot li envoye à bane peuples bane Mujaddids, Muhyi-ud-Din, Réformateurs, bane Messies ou même bane Khalifatullah.
Ene Khalifatullah, kan li vini, couma Allah même fine bien précisé : « Innii jaa-ilun fil arzi Khalifah », c’est-à-dire, c’est Allah Tabaarak Wa Ta’ala même ki pou place So Khalifah lor la terre ; c’est pas par vote de bane dimounes ki ça Khalifah là pou élu. Li pas pareil ditout couma élection d’ene ministre ou d’ene député. Ene Khalifatullah, li unique. Ki faire? Parce ki li pas élir par la main de bane dimounes, mais, li élir et choisir par Allah Li-même. Séki veut dire ki ene Khalifatullah li non seulement, intellectuellement et spirituellement parlant, le Choisi d’Allah, mais li commande aussi de par so statut, ene qualité morale ki pli haute. C’est pour ça bane raisons là ki ene Khalifatullah li représente pour l’Oummah de Hazrat Muhammad (la paix et bénédictions d’Allah lor li) ene source de bénédictions.
Ça manifestation divine fine clairement démontré par Allah, avec l’arrivée d’ene Khalifatullah kot ena ene révolution spirituelle surtout quand l’Islam (la religion universel) li trouve li dans nous l’époque azordi jours, dans ene situation bien difficile et bien chagrinant. Bane problèmes pas fine tardé pou lévé. Kan nous trouve beaucoup de bane soi-disant musulmans, et bane grands défenseurs de l’Islam bafouer et piétine bane enseignements de l’Islam, nous réaliser ki zot nék bane musulmans zis lor la lèvres.
Astère laisse nous guette séki Hazrat Massih Ma’oud (as), le fondateur du Jamaat Ahmadiyya fine dire. Dans so livre Shahadat’ul Quran, Hazrat Massih Ma’oud (as) fine dire : « Qudraté Saaniyah » li eternel et pou terminer ziska le jour du jugement. » Séki Hazrat Massih Ma’oud (as) pé rode dire par le terme « Qudraté Saaniyah » c’est ki li pé réfère à « Khilafat ». Et d’après Hazrat Massih Ma’oud (as), « Khilafat » pas zis veut dire « Khilafaté Rassool » mais li aussi pé réfère à « Mujaddid ». Hazrat Massih Ma’oud (as) croire ki « Khilafat » li inclure bane « quatre Khalifa-é-Rashideen », bane quatre califes ki vine après le prophète (saw), et Allah fine envie ça coumsa kot ça pou continuer exister d’ene façon permanent ziska le jour du jugement.
Alors, Hazrat Massih Ma’oud (as) zamais pas fine déclare « Khilafaté Ahmadiyya » éternel dans so bane livres. Séki li fine déclare éternel, c’est deux kitchoses : (1) Qudraté Saaniyah (2) Khilafat Islamique.
(1) Qudraté Saaniyah li inclure « Khilafat » et pas zis « Khilafaté Ahmadiyya », parce ki Hazrat Massih Ma’oud (as) fine écrire dans so livre Al-Wassiyat ki ça Qudrat là li pareil à Qudrat ki fine paraîte dans forme de Hazrat Abu Bakr Siddique, le premier Khalifa de l’Islam, séki veut dire ki « Qudraté Saaniyah » capave comparé avec « Khilafat de l’Islam ».
(2) Le Khilafat Islamique li inclure bane succésseurs de bane prophètes, Mujaddids ou Khalifatullah.
Ene fois, dans l’époque de Hazrat Massih Ma’oud (as), ene dimoune fine demande li ene question : « Eski ene Mujaddid pou vini après ou ? » Hazrat Massih Ma’oud (as) fine réponne : « Ki ena de mal si ene Mujaddid vine après moi ? » Li fine dire ki série de prophètes après Hazrat Moussa (as) fine terminer, et c’est pou ça ki ça la chaine de succésseurs après li là fine terminer avec Jésus. Mais seulement, dispensation de Hazrat Muhammad (saw) pou continuer ziska le jour du jugement. Alors, bane Mujaddids pou élever là-dans (dans Oummaté Mohammad (saw)) ziska le jour du jugement.
Aussi longtemps ki destruction jour du jugement pas encore vini, pas faire nannié si ene l’autre dimoune vini. Nous certainement pas rénié ki bane dimounes bons et vertueux pou continuer pou vini et zis ene sél coup le jour du jugement pou vini. » (Malfoozat Vol.7 P. 119)
Hazrat Massih Ma’oud (as) continuer écrire dans so livre Shahadat’ul Quran dans page 46 kot li dire : « Pour tous l’époque preuve concluant de l’Islam so zaffaires li prend forme dans ene sense différent et le Mujaddid de l’époque li vini avec pouvoirs, facultés et qualités, et ça réforme là dépanne de ça pour détruire tous bane mauvais ki existé. Allah pou continuer faire ça, aussi longtemps ki Li envie, pour ki bane signes de la droiture et la réforme li reste dans ça le monde là. Ça bane zaffaires là li pas sans preuve. Au contraire, ena bane observations régulier ki confirme ça. »
Ene l’autre point c’est lettre RA couma dans mot Alif-Lam-Ra montrer, ki ça mots là li réfère à l’institution permanent de Mujaddid et bane dimoune choisi d’Allah, et ça pour continuer ziska le jour du jugement. Tous ça bane travails et victoires miracles là arriver par la main d’ene Mujaddid ki vini de parmi bane suivants de Hazrat Muhammad (saw), après li, et ça pou continuer ziska le jour du jugement, et zot vraiment bane réussites du Saint Prophète (saw). » (Ruhani Khazain No.2 Vol.2 p.63).
Essaye analyse ça, mo bane frères et sœurs. Le Messie Promis (as) fine aussi dire ki après ene semaine, d’ordinaire bane linges vine sale et bien sur bizin alle lave zot. Dans ça façon là, après ki ene siècle passer, eski pas ena nécéssité d’ene dimoune ki pou vini pour faire revivre la foi, ene Muhyi-ud-Din, ene Khalifatullah ? Définitivement ena ça necessité là ! C’est pour ça raison là ki Allah fine établir ça institution là ki à la tête de chaque siècle, ene kikaine pou bizin vini pour réforme bane dimounes.
Ene fois ti ena ene visiteur ki fine demande Hazrat Massih Ma’oud (as) ene question : « Eski li important ki ene dimoune vini dans chaque siècle ? » Hazrat Massih Ma’oud (as) fine dire : « Oui, li bien important ki ene Mujaddid (ene kikaine de côté d’Allah) vini dans chaque siècle. » - Alors ça dimoune là fine demandé : « Alors dire nous ki bane noms de bane Mujaddids ki fine vini dans bane siècles passé. »
Hazrat Massih Ma’oud (as) fine réponne ki, premièrement, c’est pas so job pou donne bane noms de ça bane Mujaddids là. Li fine dire : « Alle mette ça question là devant le Saint Prophète Muhammad (saw) ki fine dire ki ene Mujaddid pou vini dans sak siècle. »
Hazrat Massih Ma’oud (as) fine continuer dire ki ça Hadith (à propos la venue de bane Mujaddids) fine accepté par tous bane l’autorité. Shah Wali-Ullah aussi fine accepté ça Hadith là ki vine du Saint Prophète (saw). Ça Hadith là trouve dans bane livres Hadiths et personne zamais pas fine jette ça, ni fine dire ki pas bizin prend ça Hadith là compte.
Mo assure zot ki ça Hadith là li pas fausse, mais ki au contraire li vrai. Li bien connu ki ene Mujaddid pou bizin vini dans chaque siècle… Pareil couma lécorps li détruire après 100 ans, pareillement, ena ene la mort spirituelle ki arriver. Ene nouveau génération prend naissance après ene siècle… Afin pou révitalize et faire revivre ça nouveau génération là, alors la loi d’Allah (Sunnat Allah) bizin rentre en force kot ene Mujaddid bizin vini dans sak siècle.
Hazrat Massih Ma’oud (as) fine écrire dans so livre (Izala Auham p.197) ki la porte de bane Messies pou reste toujours ouvert et zamais pou fermer. Li fine aussi dire : « Mo proclamé ki mo le Messie Promis, et ça pas seulement ene proclamation ki mo pé faire, ki mo le seul et le dernier Messie Promis (c-à-d, Mo pas le seul Messie Promis). Alors, d’après moi, c’est possible ki après mo l’époque 10,000 Messies pou vini. Mais pou ça siècle présent là, mo le Messie Promis. »
Alors, maintenant kan nous fini tende ça parole du Messie Promis là, personne pena le droit pou change ça croyance de Hazrat Massih Ma’oud (as) à propos Qudraté Saaniyah.
Mais malheureusement, ena dimoune dans l’Association Ahmadiyya, spécialement le soi-disant Amir et so bane Mullahs dans Maurice, kot zot pé répanne bane fausses conceptes du Khilafat, et zot dire : « Khilafaté Ahmadiyya nous la vie ! » et aussi « Khilafaté Ahmadiyya li éternel », mais ça bane slogan et paroles ki zot dire là li complètement contre croyance et l’enseignements de Hazrat Massih Ma’oud (as).
A kot bane croyances de bane Ahmadi ? Eski zot croyances dans bane livres et bane paroles de Hazrat Massih Ma’oud (as) vrai ou fausses ? Si zot croyance vrai, alors ki faire zot fine rejette ça bane écrits du Messie Promis là ?
Ça c’est pas mo bane écrits et paroles. C’est bane écrits et bane paroles de Hazrat Massih Ma’oud (as) dans ki mo croire, et ki zot aussi croire. Alors akot ça bane l’enseignements là fine aller ?
Ça bane kalité Ahmadi là, zot fine craze bane l’enseignements de Hazrat Massih Ma’oud (as) enba zot lipié. Eski c’est moi ki ena raison, ou zot, bane soi-disant Ahmadi ? Réponne moi (O bane Ahmadi ki attaché avec Khilafaté Ahmadiyya) si zot vraiment croire dans bane proclamations de Hazrat Massih Ma’oud (as). Ene jour Allah pou questionne zot à propos de ça, ene jour kot zot pou tout sél avec Li (Allah) – et pas pou ena personne pou défanne ou case. Pas cachiette la vérité kan la vérité fine présenté claire devant zot. Pas faire créature plaisir plisse ki ou ti bizin faire le Créateur plaisir. Gagne la crainte d’Allah seulement, pas la crainte de bane créatures, kan zot fine réussi conne faire différences entre la vérité et bane complots.
Allah Tabaarak Wa Ta’ala dire dans Quran Shareef:
« Wa laa talbisul-Haqqa bil-bastili wa taktumul Haqqa wa antum ta’-lamuun »
Pas couvert la vérité avec mensonge, et pas cassiette la vérité kan ou conne li. (Chapitre 2 Verset 43)
Ça bane soi-disant Ahmadi là capave dire ki mo pas ene Ahmadi. Zot croire ki ene fois mo ti ene Ahmadi, mais zot fine arrête croire ça astère, parce ki mo fine dire, et mo pé toujours dire : « Mo pé gagne révélation dépi kot Allah et mo le Khalifatullah. » Zot fine refuse mo proclamation parceki d’après zot, ena déjà ene Khalifah ki là. Zot fine dire : « Couma eski li possible ki kan ena ene Khalifa, toi (Munir) dire ki Allah fine choisir toi couma ene Khalifatullah. Couma ça li possible ?
Ça bane réponses à ça bane questions là li bien facile. Alle lire le Quran Shareef, et zot pou gagne la réponse. Étudier bane paroles du Saint Prophète (saw) et zot pou gagne zot réponses. Étudier aussi bane écrits de celui ki moi et zot aussi croire dans li (Hazrat Mirza Ghulam Ahmad (as)) et ki li le fondateur du Jamaat Ahmadiyya, et zot pou gagne zot bane réponses.
D’après zot tous dans l’Association Ahmadiyya, zot croire ki mo fine renonce mo la foi dans le Messie Promis (as). Écoute mo réponse bien et pas prend compte ça bane dimounes imbéciles ki pé rode juge la foi de bane les autres dimounes.
« Couper et ouvert mo le cœur et guette endans, ou faire bane les autres guette en dans, mais ça li pas dans pouvoir de bane humains pour faire ça. Mo compte lor bane serments ; mo pas trouve aucaine serments ki pareille couma : « Par Allah, le Grand, personne, ni zot ni aucaine les autres dimounes pas pou accompagne moi après mo la mort, excepté mo la foi et mo actions. Couma ça zaffaire là pou présente devant Allah Tabaarak Wa Ta’ala, mo faire serment lors Allah Tabaarak Wa Ta’ala, ki par So permission même le ciel et la terre exister, Mo croire dans Hazrat Mirza Ghulam Ahmad (as) comme le Messie Promis et le Mujaddid de so l’époque, mo croire li comme ene dimoune droite (vertueux), mo croire li comme étant ene esclave de Hazrat Muhammad (saw), le Messager d’Allah, et ki li ene serviteur sincère de so Shariah. Mo croire ki li donne bane nouvelles, parceki li fine gagne ça connaissance là avant même dépi Allah Tabaarak Wa Ta’ala ; li pas ene dimoune (Hazrat Massih Ma’oud (as)) ki fine vini avec ene nouveau Shariah. Ça c’est mo croyance, et si ene kikaine rejette ça, et refuse pou accepter ça, ou dire ki mo pas ene Musulman Ahmadi, so zaffaire li devant lizié Allah.
Pou azordi, mo termine ça Khutba là ici-même, et Insha-Allah, mo prié Allah ki Li donne moi la force nécéssaire et l’occasion pou continuer lor ça même sujet là dans mo prochain Khutba Jummah. Mo terminer par ça bane versets Quran là :
« Wa man-azlamu mim manif taraa ‘alal laahi kaziban aw kazzaba bi Aayaatih? Innahuu laa yufli-huzzaalimuun. »
Ki sanlà ki faire plisse ditort ki kikaine ki invente ene fausseté lors Allah, ou ki rejette So signe ? Surement, bane ki faire di tort pas pou prospéré. (Chapitre 6 Verset 22)
Après ki Khutba fine terminé, Allah fine donne moi ça révélation là:
‘Atii-‘ullaaha wa ‘atii’ur Rasuula wahzaruu: fa’intawallay’tum fa’lamuuu ‘annamaa ‘alaa Rasuulinal balaagul mubiin.
« Obéir Allah et le Prophète et prend ou précaution. Si ou tourner, (ça ou zaffaire), mais rapplez ki devoir Nous Messager, c’est seulement pou répanne Nous messages dans ene façon clair. »
|
