|
Bismillah-ir-Rahman-ir-Rahim
KHUTBA JUMMAH
HAZRAT AMIR’UL MOMENEEN MUHYI-UD-DIN AL KHALIFATULLAH
MUNIR AHMAD AZIM
23 Janvier 2009
(Résumé du Khutba Jummah)
Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine lire ça bane versets Quran suivants là:
CH. 14 SURAH IBRAHIM VERSET 25-27
Alam tara kayfa zaraballaahu masalan kalimatun tayyibatan ka shajaratin tayyibatin ‘asluhaa saabituwwa far’uhaa fis-samaaa’
Tu’tiii ‘ukulahaa kulla hii-nim bi’izni Rabbihaa. Wa yaz-ribullaahul amsaala lin’naasi la’allahum yatazakkaruun.
Wa masalu kalimatin khabiisatin ka shajaratin khabii satinij’ tussat min fawqil’arzi maa lahaa min-qaraar.
Eski to pas trouvé couma Allah servi ene bon parole comme exemple. Ça li couma ene bon pié, avec des racines ferme et avec des branches ki (monte) dans léciel.
Li donne des fruits tout létemps par la grâce de so Maître. Allah donne dimoune des exemples pou ki zot réfléchi.
Et ene mauvais parole, li pareil couma ene mauvais pié, ki (facile) déraciner dépi surface la terre ; li pas tini ferme.
Sa Verset Quran ki mo fine lire devant zot là, dans ene façon ou d’autre, faire référence à Kalima Tayyeba dans ene façon indirect sans ki mots « Laa Ilâha Illallah » fine mentionné. Dans sa Verset là Allah (swt) « compare ene bon parole à ene bon pié… »
Ça bon parole ki fine mentionner là dans sa Verset là fine comparer avec ene pié et racine ça pié là, c’est proclamation la foi (Imaan) ki sorti dépi le cœur ene croyant, so branches arrive jusqu'à le ciel et par sa moyen là, bane actions ene croyant monte dans le ciel.
Couma Allah (swt) dire dans Quran Shariff (Ch. 35 (Fatir) V.11) : « Celui ki désir l’honneur (bizin conner ki) c’est Allah ki possède tout l’honneur. Bon parole monte vers Li (Allah) et Li donne valeur chaque bon action ».
« Bon parole » ki Allah (swt) mentionné dans plusieurs versets dans Quran Shariff faire référence à « Laa Ilâha Illallah ». Si ou réfléchi bien lors « Laa Ilâha Illallah » ki Allah (swt) fine faire ça vine le 1er credo de l’Islam après vine Namaz, Roza etc.
Dans Surah Al Imran V.111:
Allah dire : « Zot ene meilleur peuple ki fine choisir pou l’humanité. Zot ordonne le bien… ». Le mot « Taa’muruuna bil Ma’ruf » (Zot ordonne le bien), veut dire ki zot ordonne dimoune pou certifier ki péna aucaine divinité à part Allah (c'est-à-dire croire dans « Laa Ilâha Illallah », obéir commandement Allah et affirme ki « Laa Ilâha Illallah » meilleur et pli profitable parmi tous bon kitchoses ki capave exister. Quand ou étudier bane Hadith, ou pou trouver ki Rassoolullah (s.a.w) fine conseille bane Sahaba boucou concernant bon actions, et li fine dire couma bon actions efface mauvais actions (dépi A’mal Namah).
Ene fois Abu Zar (r.a) fine demande Rassoolullah (s.a.w) pou donne li quelques conseils. Rassoolullah (s.a.w) fine réponne li ki : « Gagne toujours peur Allah, si to fine arriver faire ene péché, tout suite faire ene bon action pou éfface sa mauvais action là », et Abu Zar (r.a) fine dire ki li fine demande Rassoolullah (s.a.w) si récitation « Laa Ilâha Illallah » compter parmi bane vertus. Rassoolullah (s.a.w) fine réponne li ki c’est sa même meilleur parmi bane vertus.
Anas (r.a) aussi dire ki Rassoolullah (s.a.w) fine dire : « Celui ki récite « Laa Ilâha Illallah » n’importe ki moment la journée, ou la nuit, so péché éffacer dépi so Livre Compte. »
Dans Surah An-Nahl Ch. 16 V. 90 :
« Sans doute Allah ordonne la justice et bonté, et… »
Ici le mot « Adl » (justice) li capave aussi interprète ki croire dans « Laa Ilâha Illallah » et « Ihsan » (bonté) rempli nous obligation (faraz) envers Allah.
Dans ene Hadith rapporté par Jabir (r.a) ki Rassoolullah (s.a.w) fine dire : « Meilleur zikr, c’est récitation « Laa Ilâha Illallah » et meilleur duah c’est « Alhamdolillah ». (Tirmidhi, Ibn Majah)
Li clair ki « Laa Ilâha Illallah »meilleur parmi tout bane zikr et d’ailleurs boucou bane Hadith fine confirme sa. Réfléchi bien ou pou trouvé ki l’ensemble religion l’islam repose lors « Laa Ilâha Illallah » ; donc ki doute nous capave ena concernant so supériorité lors tout lézot zikr et « Alhamdolillah » (tout éloges pou Allah) considéré comme meilleur duah, parceki pé faire éloges ene Etre aussi généreux. C’est en réalité kot ou pé faire duah et éloges d’Allah Ta’ala.
Quand ou étudier le Quran Shariff (pas seulement lire couma perroquet mais lire dans ene façon et ene concentration pou ou conner ki Allah Ta’ala pé rode dire nous). Alors celui ki récite « Laa Ilâha Illallah » bizin récite aussi « Alhamdolillah » parceki dans Quran Shariff après sa Verset kot Allah pé dire « Fad’uuhu Mukhliswiina Lahuddin » (Demande Allah avec ene dévotion sincère) et ena « Alhamdolillahi Rabbil Aalamin » ki vine après (Tout éloges pou Allah, Maître tout l’univers) – Ch. 40 Ghafir V. 65.
Péna aucaine doute ki « Laa Ilâha Illallah » meilleur et pli vertueux parmi tout bane zikr, parceki c’est la base même de la religion l’islam et tous l’enseignement de l’islam, li centrer lors « Laa Ilâha Illallah ». C’est pou sa raison là ki mo pé mettre boucou l’emphase lors « Laa Ilâha Illallah » et si ou ene vrai croyant sincère envers l’islam, ou bizin ena boucou l’amour pou « Laa Ilâha Illallah » et ena ene préférence lors « Laa Ilâha Illallah » lors le zot zikr.
Li nécessaire ki chaque membre Jamaat Ul Sahih Al Islam et bane musulman récite « Laa Ilâha Illallah » en abondance, implore Allah Ta’ala pou préserve so Imaan (la foi) et en même temps reste loin avec péché parceki boucou dimoune perdi zot Imaan à cause mauvais actions ki zot faire et zot mort dans Kufr (dans l’infidélité). Est-ce ki ena pli grand malheur pou ene dimoune ki fine tourne figure lors la liste musulman dans sa le monde là, mais jour Jugement Dernier so nom paraître lors la liste Kafir ?
En vérité, pas capave ena pli grand malheur ki sa ! Nous pas pou chagrin autant pou trouve ene dimoune ki tout lé temps fine faire Shirk (prier idoles) ou faire zot chef vine zot idole ou faire zot acteur ou actrice vine zot idole etc. (Pas seulement prier idole, ki faire Shirk mais donne lézot pli l’importance ki Allah, c’est Shirk.
Lors la liste Kafir dans Akhérat, li donne ou boucou de chagrin et la peine pou trouve ene dimoune ki pendant toute longue so la vie fine fréquente Masjid et li inclure parmi bane infidèles dans Akhérat. Sa c’est conséquence bane péchés ki fine faire en abondance et actions Haram ki fine faire en cachiette. Alors ki chacaine parmi nous faire sa doah là, Alhamdolillah kot Allah mette dans mo la bouche toute suite « Allahoumma Fazaa Minhu » - O Allah ! Protége nous dépi sa (sa bane pécher là).
Alors celui ki récite « Laa Ilâha Illallah » dans ene façon ki li pas donne l’importance ene kitchose plisse ki Allah et li tourne vers Allah (swt) sincèrement pou so bane péchés ki li fine commettre et remplace li par bane bons actions et en récitant sincèrement « Laa Ilâha Illallah », Jannat vine obligatoire pou li.
Pas récite « Laa Ilâha Illallah » seulement lors la lèvres après ou lé cœur attacher avec l’amour pou sa le monde là, et gourmandise pou gagne li. Boucou dimounes faire grand discours couma dire près pou casse micro et pé prend zot couma bane grand «Ulémas » pé cause bane grand, grand causer, mais zot comportement arrogants et zot bane dictateurs.
Ene Hadith rapporté par Hazrat Abu Huraira (r.a) rapporté ki Rassoolullah (s.a.w) fine dire « Pou tout serviteur ki récite « Laa Ilâha Illallah » bane la porte lé ciel ouvert jusqu'à ki sa Kalima là arrive (directement) kot Arsh Ilaahi (Trône Allah) mais faudrait ki la personne reste loin avec péchés Kabîra (graves). »
Et d’après ene l’autre Hadith, ena deux Kalima, ene là-dans pas arrête avant ki li arrive kot Trône Allah et l’autre là remplie lé ciel et la terre avec so lumière (ou récompense). Premier là c’est « Laa Ilâha Illallah » et l’autre là c’est « Allahu Akbar ».
D’après certain Hadith fine rapporté ki ena circonstances kot Rassoolullah (s.a.w) fine faire bane Sahaba (r.a) faire zikr « Laa Ilâha Illallah » en groupes et aussi individuellement et pou prouver ki capave faire zikr en groupe. Dans sa cas là Rassoolullah (s.a.w) fine demande pou ferme la porte afin bane ki ti présent capave concentrer totalement, kot aucaine étranger ki vine parmi capave dérange Rassoolullah (s.a.w), si pas li, capave dérange bane lé zot ki ti présent.
Dans ene Hadith Hazrat Abu Huraira (r.a) rapporté ki Rassoollullah (s.a.w) fine dire : « Continuer renouveler zot Imaan. » Bane Sahaba (r.a) fine demander : « O Rassoollullah (s.a.w), couma nous pou renouveler nous Imaan ? » Rassoollullah (s.a.w) fine répond: « Récite « Laa Ilâha Illallah » en abondance. (Ahmad, Tibrani).
Ene très jolie Hadith, bizin bien comprend li, mo pou essaye commente lors sa Hadith là kot « Imaan, pareil couma vieux linges usés (c.à.d) li affaibli, faire duah avec Allah pou renouveler zot Imaan. »
« Usés » ici veut dire, affaibli ; c.à.d Imaan perdi so la force et so lumière à cause bane péchés et dans ene l’autre Hadith Hazrat Mohammad (s.a.w) fine dire kan ene dimoune faire ene péché, ene point noir paraître lors so le cœur. Si li faire Tawba sincèrement, sa point noir disparaître de so le cœur, et si li continuer faire pécher ene après l’autre, bane point noir là augmenter jusqu'à ki so la cœur vine complètement noir et rouillé couma fine décrire dans Ch. 83 V. 14, kot Allah pé dire : « Non, zot mauvais actions fine recouvert zot le cœur avec la rouille. »
Nous faire doah avec Allah Ta’ala ki Li donne nous sa Tawfiq là ki dans chaque seconde, chaque minute, l’heure temps, jours, semaine, mois et l’année, nous remplie nous le cœur avec « Laa Ilâha Illallah » et « Allah O Akbar » kot nous capave gagne ene récompense ki vine du ciel (de côté d’Allah) tombé couma la pluie lors nous et sa de l’eau la pluie divine là lave nous le cœur propre et lave tous nous bane péchés et illumine nous seulement avec « Laa Ilâha Illallah » et « Allah O Akbar ». Ameen
Ça Khutba là lor « Laa Ilâha Illallah » pas arrête là-même. Insha-Allah mo pou contigne explique lor là plus tard. |
