بسم الله الرحمن الرحيم

 

Khutba Jummah

 

HAZRAT AMIR’UL MOMENEEN MUHYI-UD-DIN

AL KHALIFATULLAH

 

Munir Ahmad Azim

 

 

23 Octobre 2009

 

(Résumé du Khutba Jummah)

 

 

Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine lire ça verset Quran suivant là:

 

 

Yaa ayyuhal lazeena aamanuz-kurullaaha zikran-kasiiraa; Wa sabbihuuhu bukratanwwa ‘asiilaa. Huwallazii yusallii ‘alaykum wa malaaa-‘ikatuhuu liyukhrijakum-minaz-Zuluumati ilan-Nuur: Wa kaana bil-Muminiina Rahiimaa.

 

“O bane croyants, rappelle Allah beaucoup, Faire So louanges matin et après-midi, C’est Li qui envoye la paix lors ou, et bane anges aussi, pou tire ou de l’obscurité et emmène ou vers la Lumière. Li pardonne bane croyants.” (Ch.33 Al Ahzaab, V.42-44)

 

Ça quelques versets Quran ki mo fine réciter, zot charger de bane messages spirituels pou amène l’homme vers la Source de so l’existence, c-à-d, Allah. Azordi mo pou explik zot (surtout bane jeunes ki fine accepter bane signes d’Allah et fine croire dans la révélation ki Allah fine faire dessane dans ça siècle présent là lors ça humble serviteur d’Allah là), l’importance du respect ki nous bizin ena pour accompli ça bane commandements ki Allah fine mentionner dans le Quran et spécialement dans ça bane quelques versets ki mo fine mentionner et ki trouve dans le Surah Al-Ahzaab.

 

Allah fine adresse bane ki fine gagne Imaan (la foi), bane ki fine accepter sacrifier zot la vie pour la cause d’Allah, bane ki fine accepter la vérité et la révélation ki vine de côté d’Allah, pou ki zot consacrer zot dans pense Allah beaucoup. Laisse nous guetter ki nous comprend par “pense ou rappelle Allah beaucoup”. Comment mo fine déjà expliker, Namaz li ene de bane piliers primordiale ki Allah fine établir pour ki bane croyants rapproche avec Allah et accompli zot devoir comme bane créatures bien-aimés devant zot Créateur, Allah Ta’ala. Nous bizin mette bien dans nous la tête dès maintenant même ki Allah pas bizin nous Li, mais au contraire c’est nous ki bizin Allah. Rapprochement avec Allah profite nous l’âme, ki li lors ça la terre là, ki li dans Akhérat.

 

Malheureusement si nous guette le monde musulman aujourd’hui nous triste ki malgré nous fine gagne tout dans nous la main pou amène ene bon la vie, nous trouver ki bane musulmans fine petit à petit délaisse ça bane faveurs d’Allah et fine rentre dans bane bidats (innovations) et fine alle même ziska faire le Shirk, dans plusieurs l’aspects de zot la vie. Kan Allah ti rénier Shaytane (couma fine montrer dans le Quran), Shaytane fine à so tour défier Allah ki li pou égare tous bane dimounes de chemin Allah et li pou dirige zot ensemble avec li dans l’enfer. Alors li très important pour nous bane musulmans, et surtout nous tous bane membres de la Jamaat Ul Sahih Al Islam pour respecter bane commandements d’Allah dans zot pureté et reste loin avec bane choses ki pour éloigne nous avec Allah. C’est ene de bane raisons ki faire Allah fine établir le Namaz (Salaat); pour nous propre bien, pour garde nous loin avec bane choses sataniques ki pou cause nous perte si nous pas respecter bane prescriptions d’Allah (Tabaarak Wa Ta’ala).

 

Allah fine promette Shaytane ki li pou capave égare bane ki ouler suive li, mais Shaytane pas pou capave touche bane Serviteurs Choisi d’Allah. Ki ça bane serviteurs choisi d’Allah là? Ki ça bane dimounes ki Allah fine mentionner dans le Quran ki Allah même fine donne la garantie ki Shaytane pas pou capave égare zot, bane tel dimounes ki Allah pou préserve zot contre le mal et béni zot lors ça la vie lors la terre là et dans Akhérat kot zot pour dans ene bien-être éternel (pareil couma fine mentionner dans plusieurs place dans Quran)?

 

Seul celui ki ena la crainte d’Allah dans so le cœur pou capave aspire à être parmi ça bane serviteurs ki Allah fine prend en protection. Mais n’empêche quand mo pé dire ki zot pou sous la protection d’Allah, cela pas veut dire ki zot pas pou passe par bane testes. Allah tester tous dimounes pou guette la qualité de zot sincérité envers Allah. Zot tout gagne la chance pour prouve zot loyauté envers Allah mais seulement bane ki soumette zot à la volonté d’Allah, arrive séki arrive, difficultés lors difficultés zot pas perdi zot confiance en Allah, c’est ça bane là ki pou réussi.

 

Nous bizin maziner ki nous temporaire lors ça la terre là et demain nous pou ena ene compte pour render auprès d’Allah. Nous bane Salaat, nous la vie, nous la mort, nous manger, nous boire et tous bane les autres kitchoses ki la vie fine donne nous, tous sa la appartenir à Allah. C’est Allah tousèl ki ena ene l’autorité lors nous avant tout. Donc, nous devoir envers Li li grand et nous bizin faire ene manière ki coûte que coûte nous obéir Li (Allah) dans tous kitchoses, parceki nous bizin calculer ki zamais Allah pou envie le mal pour nous à moins ki nous-mêmes nous égare nous propre l’âme par bane actions ki nous faire.

 

Zot bane membres du Jamaat Ul Sahih Al Islam, et surtout bane jeunes (car zot l’espoir de demain)! Zot forme parties de bane ki Allah fine choisi pour tenir le drapeau de l’Islam haute dans le monde. Pareil couma le message du Quran li ene message Universel, pareillement Islam li ene religion Universel et tous so bane l’enseignements et bane dimounes ki prêche ça bane l’enseignements là zot l’honneur li vine Universel, kot Allah So la Lumière li accompagne zot de par le monde, de par chaque place ki zot aller pour invite bane les autres l’âmes vers Allah. Mo fine servi le mot l’âme parceki nous bizin penser, ki bane dimounes de bane les autres religions aussi zot bane créatures d’Allah et zot aussi zot possède bane l’âme et le message du Quran ki fine dessane lors nous Bien-Aimé Prophète Hazrat Muhammad (saw) fine aussi vine pour zot afin ki zot régler zot la vie d’après so l’enseignements. Nous dans le Jamaat Ul Sahih Al Islam, nous là pour passe le message de l’Unicité d’Allah et montrer le chemin de l’Islam (la soumission complète à Allah) pareil couma nous Nabi-Kareem Muhammad (saw) fine faire dans le passé. Pareil couma Allah Li eternel, Allah So bane paroles aussi zot eternel et ene jour nous pou rende nous compte de ça.

 

Bane jeunes ki là, en tant ki ene humble serviteur d’Allah, mo faire ça l’appel là à zot, ki apprendre dès maintenant même couma pour faire de zot le cœur vine ene Masjeed kot Allah so la Lumière été, parceki c’est ça la Lumière là ki pou capave guide zot vers la Lumière et encore la Lumière, à tel point ki zot la vie vine régler par Allah seulement, à tel point ki zot senti la présence d’Allah avec zot tous les temps. Mazine bien ki Shaytane péna aucaine pouvoir lors ou. Li là seulement pou tente ou, mais décision pou suive li ou bien Allah li seulement dans zot la main.

 

Mazine bien O mo frères, sœurs et mo bane zenfants ki Imaan (la foi) c’est ene faveur de côté d’Allah. Li pareil couma ene brin di fil. Si ou cone veille li, li pou reste toujours solide, mais si ou faire négligence ou pou capave glisser et kot finalement ça du fil là li casser et li faire ou tombe dans ene l’obscurité totale.

 

Ça bane conseils ki mo pé donne zot azordi, li pas daté d’aujourd’hui mais depuis le commencement de l’humanité, kan le bien et le mal pé cohabite ensemble mais kot Allah ti envoye So bane messagers pour faire bane dimounes comprend l’importance de la soumission à Allah et obéissance à So bane Prophètes et pou faire zot comprend la différence entre le bien et le mal.

 

Par la Grâce d’Allah, Allah fine doucement doucement élève So humble serviteur, ene Khalifatullah Et Insha-Allah dans l’avenir pour ena encore d’autres Messagers d’Allah ki pou vini ki pou apporte le message ki pou vine de côté d’Allah afin pou dirige bane dimounes vers Allah, dans tout So Puissance et So Majesté. Maziner bien ki Allah pas bizin nous, mais c’est seulement par So Grâce infini ki nous là, nous tous dans la Jamaat Ul Sahih Al Islam pour contigne le travail du Saint Prophète Muhammad (saw) et le Messie Promis Hazrat Ahmad (as).

 

Kan ene Prophète vini de côté d’Allah, Allah faire So bane anges et le Ruh-il Qouddous (le Saint Esprit) dessane lors li pour apporte bane messages d’Allah, pour faire revivre bane l’enseignements ki fine bafoués par la main et la bouche de bane dimounes ki fine vine ignorants à travers le temps. Aujourd’hui c’est ene grand faveur ki Allah fine faire nous tous dans la Jamaat Ul Sahih Al Islam ki Li fine élève So humble serviteur et autour de So humble serviteur Li fine place bane disciples pour prend ça bane messages ki zot fine recevoir pour propage ça avec bane les autres dimounes ki attirer avec ça bane messages afin ki Islam rentre dans zot le cœur et zot vine proche avec Allah.

 

O mo bane frères, sœurs et bane jeunes ki pé écoute moi, mo conseille zot pour être vigilants lors couma zot amène zot la vie. Bane ki amène zot la vie d’après l’enseignements d’Allah, Allah pou élève zot degrés et faire zot arrive à de tel hauteurs ki zot pou vraiment briller telle bane z’étoiles dans le ciel. C’est kan nous reconnaite valeur bane z’étoiles? C’est en plein la nuite, kan ça la lune là sorti, ki li illumine tous lors so passage. Pareillement Allah fine faire paraite ene telle la lune ki par So la grâce fine illumine bane z’étoiles dans le ciel de l’ignorance. L’ignorance c’est ça la nuite là kot la noirté partout, mais Allah fine place l’espoir pour bane dimounes en forme de ça la lune là et bane z’étoiles.

 

La présence du Messager d’Allah Hazrat Muhammad (saw) li ene source de sécurité pour so bane compagnons et présence de so bane compagnons li ene source de sécurité pour le Oummat.

 

Hadiths: Abu Burda fine rapporter par l’autorité so papa: Nous ti faire Namaz après le couché du soleil (Maghrib) ensam avec le Messager d’Allah (saw). Après Nous fine dire: Si nous assizé (ensam avec le Messager d’Allah) et observe la prière du soir avec li, li ti pou bon, alors nous fine assizer et li (le Messager d’Allah(saw) ) fine vine cot nous et fine dire: ‘Zot encore pé assizé ici’. Mo fine dire: O Messager d’Allah, nous fine observe Namaz après couché du soleil avec ou’, après nous fine dire: ‘Laisse nous prier Namaz du soir ensam avec ou, et ler là li (saw) fine dire: ‘Zot fine bien faire’. Alors li fine lève so la tête vers le ciel et bien souvent li arrive ki li lève so la tête vers le ciel et li dire: ‘Bane z’étoiles zot ene source de sécurité pour le ciel et kan bane z’étoiles disparaîte, alors le ciel re-vine noir pareil couma fine promette. Et Mo (saw) ene source de protection et de sécurité pour mo bane compagnons et kan mo pou kit ça le monde là, alors mo bane compagnons pour gagne la quantité ki fine promette zot et mo bane compagnons zot ene source de sécurité pour le Oummat et kan zot pour quitte ça le monde là, mo Ummat pou gagne séki fine promette zot là.” (Imam Muslim)

 

Kan zot apprane régler zot la vie d’après bane commandements d’Allah, et zot observe la prière pareil couma Li fine instruire bane Musulmans, le jour et la nuite; alors Allah Li-même Li pou guide zot continuellement dans So chemin. C’est Li ki pou donne zot ça la foi et courage pou prend patience dans bane difficultés ki zot faire face dans la vie. Maziner bien ki zot bizin faire tous pour le plaisir d’Allah. “Al Hubbulillah, Al-Burzulillah”; c-à-dire, Kan ou content, content pour le plaisir d’Allah et kan ou haïr, haïr par la haine ki Allah ena envers So bane l’ennemies. Faudé ki chaque musulman pas hésité pour la guerre pour la cause d’Allah kan le moment présente devant li. Bane jeunes, L’Islam de demain pou dans zot la main. C’est zot ki pou ena la responsabilité pour amène la Lumière de l’unicité d’Allah dans so bon direction. Le monde fine plongé dans l’obscurité. Seulement bane les cœurs pures pour capave amène la Lumière d’Allah dans ça le monde là. Aujourd’hui Allah fine choisir nous pour amène ça la Lumière là. Ça reforme spirituelle là bizin commence avec nous-mêmes. Si nous-mêmes nous sale à l’intérieur, ça pou reflecter lors nous aspect extérieur, mais si ena la Lumière de l’unicité d’Allah dans nous le cœur et la crainte d’Allah et La foi en Lui ki nous Créateur, alors ça même la Lumière là, ça même Parfum divine là pour briller et embaume nous de zot beauté.

 

Les autres dimounes pou attirer avec la personne noble ki zot été si zot marche d’après bane instructions d’Allah. Si zot pas pé comprend kitchoses malgré ki Allah fine ordonne zot, à travers So bane Messagers pour faire ene kitchoses (pour la cause d’Allah), alors faire pareil couma Hazrat Nuh (as) kot li ti faire duah avec Allah:

 

“O Mo Maître, mo demande To protection, afin ki mo pas demande Toi quique chose ki mo pas conné. Si To pas pardonne moi et gracier moi, mo pou faire la perte.” (Ch.11 Hud, V. 48)

 

Le drapeau de l’Islam pou contigne flotté tanque ki ena Allah avec zot dans zot les cœurs. Vine uni couma ene seul le corps. Si ena jalousie et la haine pou zot frères en Islam, retire ça de zot, parski Shaytane content mette désordre parmi bane Serviteurs d’Allah, mais seuls bane ki croire vraiment en Allah et suive bane instructions d’Allah pou être sauvé de bane griffes de Shaytanes. Bane ki sacrifier zot la vie pour la cause de l’Islam pour conne ene la fin heureux, bane ki pas hésiter pour lever la nuite pour prier, pou rode faveurs d’Allah et So pardon pour le moindre péché et erreur ki zot fine faire. Pas la guerre entre frères. Faire la paix tous les temps. Pas ruine zot la santé par bane choses ki zot conné ki pas bon pou zot et ki capave diminuer zot la vie. Maziner bien ki zot la vie c’est ene Amaanat (dépôt) ki Allah fine donne zot. Apprane garde zot le corps bien et propre pour l’amour d’Allah. Ça le corps là li appartenir à Allah et Allah ena ene droit lors là. Pas hésiter pour rendre zot au service d’Allah par zot Ibaadat (la prière), Dawa (invite dimounes vers Allah), Jihad (la guerre dans le chemin d’Allah), et Khidmaté Khalq (service à l’humanité).

 

Pareil couma mo fine mentionner depuis dans Chapitre Al-Ahzaab, pas juste Allah pour content zot et béni zot, mais aussi So bane anges pou béni zot par amour pour Allah. Bane anges c’est bane êtres de lumières ki complètement soumis à Allah. L’homme fine gagne la capacité depuis Allah pour gagne ene rang égale à celui de bane anges et même plus. Mais seulement si li tourné le dos avec Allah et So bane commandements et So bane prophètes, alors li risquer pour vine pli bas ki bane anges, à tel point ki li vine pareil couma ene Shaytane, sans aucaine guide et Lumière pou guide li.

 

Reste attacher avec zot Namaz, duahs, Zikré Ilaahi, Telawat Quran et bane Namaz Nafil, surtout le Tahajjud kot so l’importance Allah fine indiquer dans le Quran Shariff. Namaz Nafil (en plus) permette ou pou rapproche avec Allah et empêche ou faire bane kitchoses banale, graves ou sans l’importance. Lire le Quran tous les jours sans fautes parski le Quran li ene la Lumière pou zot et c’est à travers le Quran et analyse le Quran ki Allah pou pénétré la Lumière de la Connaissance dans zot le cœur et pou faire zot comprend valeur Quran et de so bane enseignements.  Accroche zot avec le Zikré Ilaahi en forme de bane récitations et concentration lors bane Attributs d’Allah. Par la grâce d’Allah, Allah ti fine fini donne nous l’instruction pour apprendre So bane Attributs dans nous bane fonctions, spécialement dans nous bane Study-Circles. Allah So bane Attributs li vaste. Quand nous fine apprendre ça, faudé nous faire ene démarche pour récite zot tous les jours car Allah content ki So bane serviteurs appelle Li par So bane pli joli noms.

 

Évite bane choses ki ou conné pou faire ou néglige la pensée d’Allah. Faire Allah vine dans chaque soufflé ki ou prend car Insha-Allah chaque souffle ki ou pou prend par So nom pou aide ou contre le feu de l’enfer. Lire et apprane bane hadiths et Sunnah de nous bien-aimé Prophète Hazrat Muhammad (saw) car Allah fine dire: “Wattioullah, Watiour Rassool – Obéir moi et obéir Mo Messager”. A travers banes hadiths et Sunnah, zot pou apprane ene tas lors la vie bien honorable de nous bien-aimé Nabi-é-Kareem Hazrat Muhammad (saw). Malgré ki li ti ene Oummi (ki pas cone ni lire ni écrire), Allah fine élève li au-dessus de tous bane les autres créatures, à tel point ki ziska aujourd’hui et ziska le jour du jugement, kan entendre so nom, bane dimounes pou bizin dire “Sallallaah wa alayhi wa sallam” (Ki la paix et la bénédiction d’Allah lors li). Allah fine commande nous pour content Li et content So Bien-Aimé Prophète Hazrat Muhammad (saw). Ki misère Hazrat Muhammad (saw) pas fine passé pour amène la Lumière du Tauhid dans le cœur de bane Arabes, kot pas zis bane Arabes fine hérite de ça faveurs là mais l’Univers en entier, car Allah fine envoye li comme ene “Rahmatul-lil-Aalameen” (ene bénédiction pour tout l’Univers). Pense astaire commié nous bizin remercier Allah ki nous fine né ISLAM. Alors li nous devoir pou préserve ça Islam là dans nous le cœur et montrer valeur ça Islam là avec bane les autres dimounes afin ki zot aussi bénéficier de l’Islam.

 

Vine bane vrais soldats de l’Islam, pareil couma Khalid bin Walid, ki ti le commandant à la tête de l’armée Musulmane au temps du Saint Prophète Muhammad (saw). Prend l’exemple lors la vie bien simple et humble de nous Prophète Hazrat Muhammad (saw) et mette zot dans la peau de bane Sahabas Karaam ki fine accepter sacrifier tout pour la cause d’Allah et pour l’amour du Saint Prophète (saw). Bane jeunes filles et bane madames bizin prend zot l’exemple lors bane sacrifices ki bane Ummoul Momenaat (bane madames du Saint Prophète) fine faire et bane sacrifices ki bane les autres madames musulmanes (bane Sahabiyaate) fine faire pour la cause d’Allah, kot zot fine accepter donne zot la vie pour le progrès de l’Islam. Pas néglige rendre service les autres, ki li dans les autres religions car zot salut trouve en répandant le message de l’Islam et pou aide bane créatures d’Allah kan zot dans difficultés. Mais seulement kan Allah fine ordonne ou pou faire l’ennemité à ene dimoune ki Li detester, alors suive Allah car Allah conné et ou, ou pas conné. Allah Li certes Puissant et tout Connaissance appartenir pou Li tousèl. Li dévoile certain connaissance à bane ki Li fine choisir, et Li réserve la majorité de So bane secrets car Li tout seul ena Pouvoir lors ça.

 

Alors ene lourd responsabilité repose lors zot z’épaules (surtout nous bane jeunes ki pou lever) et zot bizin dès maintenant même apprane gère ça responsabilité là avec Imaan et ene sérieux, pas badiner. Kan zot pou fini bien comprend ça bane conseils là et mette ça en pratique – et ça bane conseils là li trouve dans bane commandements du Quran Shareef – alors zot pou découvert la paix en zot-mêmes, et ene paradis lors ça la terre ici-bas même, malgré ki kalité épreuves zot capave passé pour la cause d’Allah. Le monde assoiffé de la Lumière de la foi et pé cherche zot Seigneur et c’est nous devoir à tous pour amène ça révolution spirituelle là avec la volonté et l’aide d’Allah. Bane jours de la Victoire d’Allah li pas loin. Allah Li certainement Glorieux et Sage.

 

Ki nous tous nous faire bane z’éfforts exceptionnelles pour la cause d’Allah et nous pas hésiter aussi pour dépense dans So chemin afin ki Allah purifier nous et aide nous et élève nous rang en tant ki musulmans et So bane serviteurs. Ameen Soumma Allahoumma Ameen.  Jazakallah.