بسم الله الرحمن الرحيم

 

KHUTBA JUMMAH

 

HAZRAT AMIR’UL MOMENEEN MUHYI-UD-DIN

AL KHALIFATULLAH

 

MUNIR AHMAD AZIM

 

24 Avril 2009

 

(Résumé du Khutba Jummah lors Zikr Allah)

 

Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine dire ces quelques mots à propos so visite à Rodrigues avant ki li commence lors sujet principale de so Khutba Jummah(le Zikr Allah):

 

Avant ki mo vine lor mo Khutba Jummah, couma zot tous conné, mo fine rentrer à Maurice d’ene voyage à Rodrigues. Par la grâce d’Allah, le Jamaat Ul Sahih Al Islam fine faire ene grand progrès dans le domaine de la spiritualité. Bane dimounes ki fine quitte l’Association Ahmadiyya, zot fine rentre dans le Jamaat Ul Sahih Al Islam et aussi bane plusieurs nouveau venues à travers conférence et tabligh (dawa), kot zot fine écoute les deux Khutba Jummah et fine faire plusieurs interfaith conference et aussi deux jours de Jalsa Salana. Par la faveur Immense d’Allah, zot fine être béni kan zot fine avec joie et la foi mette zot la main lor mo la main pour prend le Bai’at (Serment d’Allégeance). Alhamdolillah, ene comité centrale de Rodrigues fine établi kot à la tête du Jamaat éna ene Président, et de côté bane Siraj Makîn, ene Sadr Saheba avec zot bane membres comité. Deux centres fine ouvert là-bas, kot pou faire le Namaz, Jummah, et classe de Tarbiyyat régulièrement là-bas. Et aussi dans deux l’endroit fine pose la première pierre pour la construction d’ene Masjid, Conference Room, Guest House et Madrassa.

 

Tous nous bane frères et sœurs de nous Jamaat à Rodrigues fine envoye zot Assalamoualaikum Wa Rahmatullah Wa Barakaatuhu à tous bane frères, sœurs et zenfants du Jamaat Ul Sahih Al Islam ici à Maurice et aussi à l’extérieur.

 

Insha-Allah, zot pou gagne ça plisse en détail lor nous website.

 

Maintenant mo pou commence mo Khutba kot Allah (Tabaarak Wa Ta’ala) fine dire :

 

 

“Pense Moi (c’est-à-dire faire Mo Zikr), Mo pou pense zot. Remercier Moi et pas vine ingrats envers Moi”. (Chapitre 2 Al-Baqarah Verset 153)

 

A la lumière de sa verset ki mo fine lire devant ou la, mo pé contigne mo Khutba lor Zikr Allah. Tellement le Zikr Allah li important dépi création de sa l’univers là ki Allah (swt) fine cause sa beaucoup dans le Quran Shariff et Hazrat Mohammad (saw) aussi fine mette beaucoup l’emphase lors le Zikr Allah et personnellement li même li fine mettre sa en pratique ; kot li été, li ti pé faire Zikr Allah et aussi li fine conseil so bane compagnons et tous dimounes ki trouve dans so Ummah et aussi à l’humanité en entier, malgré ki zot pas accepter li (saw) et zot pas croire dans l’Islam et Allah So livre et aussi So l’enseignement.

 

Dans ene Hadith rapporter par Abu Saïd Khudri dire ki Hazrat Mohammad (saw) fine dire : « Faire Zikr Allah autant ki dimoune prend ou pou fou ».

 

Sa Hadith là li bien claire. Quand ou fine conne valeur de Zikr Allah et ou pas néglige ene tel Ibaadat et ou pou reste engager dans Zikr n’importe kot sa ou pou été, ki même ou pé faire ene travail, ou pas pou laisse sa grâce, faveur divine là perdi. Emplace ou pou chanter pendant ki ou pé faire n’importe ki travail, ou pou faire ou Zikr Allah, si ou pé marcher lors chemin, emplace ou fine mettre ene walkman dans ou oreille et en même temps ou pé chanter et balance balance ou le corps et ou la tête lors chemin, ki même ou pé voyager dans bus kot ou pas tende narien, zist chanter ou balance balance ou la tête et sa c’est bane zaffaire perte de temps, inutile et amène ou vers chemin Shaytan plisse. Eski li pas pli important ki ou pense ou Créateur ? Quand ou faire le Zikr d’Allah, ou sure Allah pou avec ou et Li pou protège ou contre n’importe ki danger ki capave arriver et aussi ou vine ene bien-aimé d’Allah.

 

Si ou faire Zikr Allah, dimounes prend ou pou ene fou, c’est ene grand grâce et l’honneur parceki ou vine fou dans faire Zikr Allah, pas vine fou dans chanter ou écoute chanter, ou sois vine fou à cause bane désir mondaine et vine fou pou ou bane passion satanique. Vine fou dans chemin Allah, pas tous dimoune ki gagne sa bane titres là. Quand ou faire ene travail, ou ene acte Ibaadat seulement pou Allah So plaisir et en retour ou gagne ene satisfaction dans ou le cœur avec ene la lumière d’Allah ki briller lors ou.

 

Quand ou lire le Quran Shariff, ou pou trouver ki Allah Ta’ala pas fine faire narien obligatoire lors so serviteur sans ki Li fine fixer ene limite et ki Li accepter pardon (bane manquement de So serviteur).

 

Mais pou Allah So Zikr, Li pas fine mettre aucaine limite et aussi longtemps ki ene dimoune ena encore so passion (c.à.d li capave raisonner et li conscient saki li pé faire, li capave faire Zikr). Couma Allah Ta’ala dire dans Quran Chapitre 33 Verset 41 « Faire Zikr Allah en abondance ».

 

Allah Ta’ala fine mettre si tant l’emphase lors Zikr, ki ou penser ki sans Zikr Allah narien pas profitable lors sa le monde ici-bas là. Si ou abandonne le Zikr d’Allah, c’est ene très grand la perte dans ou la vie dans sa le monde là, et Shaytan attrape ou bien fort kot Shaytan rode ene moyen et ene prétexte pou faire sa dimoune là pas faire Zikr Allah et faire sa dimoune là trouve sa ene grand fardeau pou li.

 

Ena tiguitte dimoune devant bane lézot dimoune qui faire bane actes d’Ibaadat, que ce soit Namaz, Dawa, Zikr. Et ena ki peur bane créatures couma zot-même, attention li faire bane telle actes d’Ibaadat là, ki li capave gagne problème dans so travail, ou so bane camarade capave riye li ou si li faire Tabligh (dawa) so relation avec so bane lézot dimounes de bane lézot religion li capave gagne problème ou sois li gagne honteux pou faire sa bane acte Ibaadat pou faire so Créateur plaisir, mais li pé peur créatures plisse ki li ti bizin ena pou so Créateur. Ou conner quitte ene bon action parceki ou gagne peur ki dimoune trouve ou pé faire sa, c’est totalement l’hypocrisie et si ou faire bane  bon  action expressément pou dimoune trouver, c’est purement Chirk. 

 

Au contraire n’importe kot ou été, ki ou avec camarade ou parmi bane lézot dimoune, quand fine arrive l’heure pou faire Ibaadat, pas bizin guette bane lézot, ou guette ou même et ou addresse ou avec ou Créateur, la clé pou faire bane bonne action c’est Zikr Allah et ou fine inspire ou devant ou Créateur et Shaytan pas pou capave dévier ou, ni risse ou avec li, au contraire quand ou pense Allah, sa action la capave attire ou bane lézot camarades ou bane lézot dimounes de bane lézot religion, kot sa bane actions ki ou faire la, sa capave touche zot le cœur et sa capave faire zot faire bane bonne action zot aussi. Et dans ene l’autre façon nous capave dire avec ou bane action, (actes Ibaadat seulement pou plaisir d’Allah) zot capave toucher avec sa, et zot aussi, zot faire bane bonne action kot zot tourne vers Allah zot aussi. Sa pé faire moi mazine ene Hadith kot Hazrat Mohammad (saw) fine dire « meilleur parmi zot, c’est bane dimoune ki kan ou guette zot ou pense Allah, quand ou écoute zot parole ou connaissance de la religion augmenter et quand ou trouve zot action, ou développe l’amour pou Akhérat ».

 

Niveau pli élever, c’est arrive à sa (vrai solitude) sa deux formes solitude là (c’est physique et mentales sa). Pou comprend sa bien, si ou dans ene réunion (mondaine) malgré sa ou fine réussi retire dépi dans ou le cœur tout bane lézot pensées et ou pense seulement Allah et ou faire Zikr Allah à ene tel point ki larmes couler dépi ou li yeux, dans sa cas là ou fine retire dans ou le cœur tous saki n’est pas Dieu, seulement Allah le Créateur de l’univers ki dans ou le cœur et ki aucaine kitchose de sa le monde là pas pou attire ou, ni affecté ou, n’importe kot ou pou été, ou le cœur pou reste toujours attiré avec la pensée Allah.

 

Celui ki pleurer par frayeur et l’amour pou Allah, c’est ene dimoune chanceux kot so stage de la spiritualité vine bien grand.

 

Dans ene Hadith Hazrat Mohammad (saw) fine dire ki : « difé Jahannam Haraam pou lizié ki fine reste éveiller dans chemin Allah, lizié ki fine reste loin avec kitchose interdit et lizié ki fine perdit dans chemin Allah. »

 

Bien chanceux bane dimoune ki pas perdit ene seul moment zot la vie pou faire Zikr Allah. En plus  récompense ki zot gagner pou zot Ibaadat (extérieur) zot pou gagne soixante dix fois plis récompense grâce à Zikr ki zot faire chaque seconde de zot la vie.

 

C’est bien sa kitchose là ki donne Shaytan beaucoup tracas. Ou conner celui ki faire Zikr Allah avec ene full sincérité et reste bien ferme dans concentration lors Allah, kot li couper nette avec tout kitchose de sa le monde là, péna narien plus précieux ki sa et aussi avec Zikr Allah, sa répousse Shaytan et affaibli so la force, ou gagne ene plaisir d’Allah dans ou le cœur, l’esprit et entier ou le corps, tous bane soucis et bane tracas disparaître complètement dans ou le cœur, kot ou gagne la joie et ene contentement dans ou le cœur, ou figure et le cœur même illuminé.

 

A travers le Zikr d’Allah, ou personnalité changer, kot ou développe bane humilité dans ou même et tous dimounes ki autour de ou, développe ene grand respect et contentement quand zot guette ou. Pli ou faire Zikr pli ou pé rapproche avec Allah et pense bien ki pli ou vine négligent dans Zikr, pli li pou éloigner avec Allah.

 

O bane membres du Jamaat Ul Sahih Al Islam, Zikr li nécessaire pou le cœur pareil couma de l’eau nécessaire pou poisson.

 

Pense ene coup couma ene poisson pou été sans de l’eau ; pli ou alle profondeur lors Zikr Allah, pli ou plonger dans la connaissance divine. Zikr Allah c’est ene sujet bien, bien vaste pareil couma Taqwa c’est ene sujet bien bien vaste jamais pas pou fini faire comprend so l’importance. Malgré plusieurs Khutba fine faire lors sujet de Zikr Allah, là aussi mo trouver ki fine commente bien peu lors Zikr d’Allah, d’après saki Allah fine faire nous comprend dans Quran et saki Hazrat Mohammad (saw) fine enseigne nous lors Zikr Allah.

 

Zikr Allah, ene nourriture pou le cœur et l’âme. Si ou prive ou le cœur et ou l’âme avec Zikr, malgré ou pé tende sa bane Khutba Jummah là, bé li pareil couma ou pou prive ou le corps avec nourriture, ou pé reste faim sans bane raison valable. Faudrait pas nous prive nous de Zikr Allah, parski avec Zikr Allah le cœur purifier dépi la rouille. Couma nous tous conner ki tout kitchose d’après so nature prend lé rouille et vine sale, le cœur prend le rouille et vine sale, avec plaisir mondaine et négligence. Pou purifier sa le cœur là, Zikr protéze nous contre bane erreurs et contre tous nous bane péchés.

 

Ena dimoune juste quand dans problème ki zot pense Allah et zot vine négligent. Au contraire ene dimoune bizin pense Allah dans so bien être et Allah pou pense li dans bane moments difficiles, kot Allah faire ene Sakina (tranquillité) et Rahmat (grâce) descendre lors li.

 

Alhamdollillah ! Grâce à bénédiction ki éna dans Zikr li protége nous contre ghibat, cause menti, conversation immorales et bane paroles inutiles.

 

L’expérience montrer ki celui ki faire Zikr généralement protéger de sa bane mauvais actions là tandis ki celui ki pas habituer faire Zikr tombe facilement dans bane péchés là.

 

 Li bien malheureux pou trouver ki dans Jamaat Massih Maoud (as), bane sois disant grand défenseur Nizam-é-Jamaat, quand zot causer lors micro, zot couma dire sa bane politicien ki prêt pou casse micro là. Quand ou guette zot zenfant même, sa donne ou ene l’idée zot la case intérieure couma été ; sa bane zenfant ki fine dédier comme Waqfé Naw, faire la honte sa pou trouve sa bane qualité zenfant là lors Internet péna chemise li présent so l’index devant so camarade l’école et camarade là pé tire la langue, walkman dans oreille, bane transactions malpropre et sa bane qualité ténor là penser si zot faire ene fiançailles pou zot zenfant quand même par encore arrive l’age de maturité, sa pou résoudre so problème.

 

Au contraire, sa même pou amène ou encore vers ou propre destruction, comme par example, ena mariage pas pé même duré plisse ki ene mois – tifille retourne la case so parents ; Ki faire ! Ki faire ça?

 

Là, c’est pas nom famille, garçon là so post travail, l’argent, belle belle la case ki conté, saki péna ene bon Tarbiyyat de Deen, parents la même pas ti ena ene bon Tarbiyyat (analyse li même, trouve dans li même so propre défaut, avant ki li guette défaut so camarade). Zenfant là aussi guette ki direction li prend ; sa pou faire moi mazine ene Hadith, Insha Allah mo pou rode so référence bien et mo pou cite sa pou faire bien comprend ki Hazrat Mohammad (saw) fine dire. Mo fine oublier li un peu, li à peu près coumsa. Hazrat Mohammad (saw) dire si ou tendre ene dimoune dire ki li fine change so l’habitude, ou pas croire là-dans, ou pli sur et croire si ou fine tende ki ene montagne fine change so place, au lieu ou croire ki ene dimoune fine change so l’habitude (mauvais kitchose ki fine encré dans li).

 

Au contraire, ou comme parent, l’heure ou bizin faire tarbiyyat ou zenfant bien, faire li étudier, pas seulement lire bane commandements d’Allah, mais étudier sa bane commandements là ki Allah fine mettre dans Quran, et faire li reste attacher avec so Quran, Ibaadat et surveille so bane mouvement en faisant doah pou li et Namaz Istikhaara avant ou prend ene décision. 

 

Définitivement, ene parent bizin conne so zenfant bien, quand même pas cent pou cent, alors réfléchi bien avant ki ou alle engage ene ti fille ou avant ou faire ene mariage, amène ti fille lézot dimoune dans ou la case, et surtout kot sa le monde là fine arriver, li pas fine gâté, mais plutôt fine pourri et saki passer lors Internet bien bien grave d’après saki mo l’équipe de website rapporte moi dans nous bane réunion ki nous faire tous les 15 jours concernant website.

 

Quand ou guette kot sa le monde là fine arriver de nos jours, respé mutuelle péna, haya (pudeur) péna et aussi, pli grave encore kot bane jeunes filles, jeunes garçons musulman sa bane la vie ki zot pé amène là, l’Islam so l’enseignement  fine piétiner en bas li pied sa bane sois disant savants là ou Moollahs là et c’est zot même ki responsable saki pé arriver dans l’Ummah de nous bien-aimé Hazrat Mohammad (saw), sa même ou trouver ki péna ene pays islamique ena la paix, tranquilité ; ki faire ? Parceki péna Deen ! Est-ce qui Allah pou laisse sa situation coumsa même ?

 

Est-ce qui Allah pou envoye So punition lors sa bane dimounes ki prétende ki zot musulman, mais zot pratique pas l’Islam du tout ?

 

Non ! Tanque ki Allah (swt) pas envoye So avertisseur pou donne bane avertissements divine et aussi si ou répandre ene bon nouvelle pou bane ki change zot complètement, tourne zot vers Allah, kot Allah à travers So avertisseur aussi, Li (Allah) faire donne bon nouvelle à sa bane dimounes ki repentir et faire tous zot zéffort pou améliore zot la vie et zot prend sa ferme résolution là pou tourne vers Allah, et pou reste occuper dans Zikr kot zot gagne beaucoup récompense et Allah (swt) content avec zot et avant punition d’Allah tombe lors zot, zot gagne le pardon et salut de coté d’Allah.

 

Mo termine lors ene Hadith Qudsi kot Allah Ta’ala dire : « Celui ki reste tellement engager dans Mo Zikr ki li pas gagne le temps faire duah, Mo pou donne li ene meilleur récompense ki celui ki faire duah. » Ki Allah donne nous sa Tawfiq là et guide nous lors le droit chemin et Insha Allah, Allah donne moi Tawfiq pou continue sa Khutba là, parceki mo pas encore terminer lors certaines points ki mo fine dire et faudrait ici aussi nous bane jeunes et parents comprend sa bien pou ki, nous pas tombe dans bane tel situation pareil, Insha Allah.

 

Ki Allah sauve nous avec So punition et avec difé l’enfer. Ameen.