|
بسم الله الرحمن الرحيم
KHUTBA JUMMAH
HAZRAT AMIR’UL MOMENEEN MUHYI-UD-DIN AL KHALIFATULLAH
MUNIR AHMAD AZIM
Le 24 Juillet 2009
(Résumé du Khutba Jummah)
Après ki le Khalifatullah fine saluer zot tous bane membres de Madagascar à Tana, li fine commence lire le Tashahhud, Taouz et Surah Al Fatiha et ensuite li fine dire:
« Nahnou awliyaa oukoum fi hayatid-dunya wa fil akhirah » (Ch.41 V.32)
Nous ou Alliés dans ça la vie ici-bas là et dans la vie future.
En d’autres mots Allah li Camarade de bane pieux dans ça lé monde là et dans l’au-delà. Contenu de sa verset là c’est rejette certaine croyances ki bane ange descendre seulement au moment de la mort et non pas au moment de la vie. Si ça c’est le cas, alors comment Allah capave vine Camarade de ça bane dimounes là dans ça le monde là et dans l’autre. C’est ene bénédiction pou bane camarade d’Allah ki zot trouve bane anges. L’au-delà li ene le monde ki nous croire à travers nous la foi mais ene dimoune pieux li trouve l’autre monde dans ça la vie là même, et zot trouve Allah dans ça la vie là-même. Zot trouve Li et Li cause avec zot. Si pas ti ena ça, alors ene dimoune so la mort et so départ de ça le monde là ti pou mauvais pou li. Celui ki pas fine gagne bane vrais rêves li pou faire face ene mauvais la fin.
Le Quran Shareef supporte sa comme ene signe d’ene vrai croyant. Note bien ki celui ki pas possède ça qualité signe là, li pas possède la droiture. Alors nous besoin prier nous tout ki ça condition là li accompli en nous, ki Allah donne nous ça bénédiction là, c’est-à-dire, la révélation, vrai rêve et vision (Kashaf). Li ene caractéristique spécial d’ene vrai croyant et ça li besoin être présent en li-même.
Ena les autres bénédictions ki ene croyant li gagné, c’est l’Ouverture du Quran Shareef le Surah Al-Fatiha kot Allah enseigne ene croyant pou prié comme suite :
« Guide nous dans chemin droite, ça chemin qui bane qui gagne To faveurs suive, pas chemin bane qui mérite To colère ou bien bane qui égarer. » (Ch.1 V.6-7).
En d’autres mots guide-nous sur le droit chemin et le chemin de bane, ki bane récipients de To bénédiction et de To grâce. Allah fine enseigne nous ça la prière là pou ki ene dimoune capave prend ene grand décision pou li capave comprend l’intention de so créateur. Ça l’intention là c’est ki l’Ummah de Hazrat Mohammad (saw) fine enseigne nous pou nous pas amène ene la vie couma bane z’animaux, et enlève bane voiles, c.à.d gagne ene vrai connaissance de Dieu.
Selon bane Shia, la connaissance li terminé avec douze Imams. Contrairement à ça le Surah Fatiha montrer nous avant même ki Allah, So l’intention élève bane pieux au rang prophète. Ene lotte point encore ki l’homme li possède boucou de bane capacités ki li besoin nourri et développer. Ene z’animeau li pas capave développe ça capacité là parceki li pas ene humain. Quand ene dimoune de grand résolution tende l’histoire de bane prophètes et messagers, li pas seulement envie gagne la foi dans bénédiction ki accordé à ça groupe là, mais li aussi envie gagne la connaissance de zot (de bane prophètes et messagers). Li envie gagne différent niveau de connaissance concernant ça bénédiction là, par commence gagne connaissance de la certitude puis témoigne la certitude, expérience la certitude et la vérité absolu.
Ena 3 stages de la connaissance :
1. La connaissance de la certitude par le raisonnement.
2. Témoignage de la certitude.
3. La connaissance ki nous gagner à travers l’expérience.
Par exemple, quand nous trouve la fumée, nous conner ki ena du feu là, li ene certitude l’existence ki ena du feu là. Maintenant pou trouve difé nous besoin alle témoigne avec nous propre li yeux pou nous conne ki li vrai et quand li yeux fine témoigner à ce moment là nous capave dire, oui li vrai c’est difé pas ena aucaine doute là- dans. Ene lotte exemple, pou être plus sure ki li s’agit réellement du feu c’est ki quand nous mette nous la main dans ça difé là et nous senti nous la main brûler (nous gagne ene brûlure). Malheureux ça dimoune ki pas possède ça 3 qualité connaissance là.
N’importe commié dimounes sage ou bane pieux ki exister, zot tout passe zot le temps dans ene la lutte pou perfectionne zot adoration d’Allah. Ena bane Wali-oullah dans l’histoire de l’Islam fine arrive à bane niveau très haut par bane z’effort spéciale et bane exercices spirituelle très dure ki zot fine faire. Zot pratique entièrement Sunnah (la pratique) du Saint Prophète (saw) par bane z’efforts et par bane pratique sévère kot zot arrive élimine zot fierté, zot l’arrogance et zot égoïsme. Zot vine comme si zot fine passe par le trou d’ene z’aiguille, à travers ki sak dimoune besoin passé. Pou capave atteindre zot but zot besoin faire boucou z’effort, et ça bane qualité dimoune là ki zot la prière accepter. Pou ene physicien so médicament pas ena aucaine efficacité si li fine abstenir li d’ene l’exercice. Coumsa même, la prière aussi li pas pou efficace si ene dimoune pas abandonne tout séki Allah pas content.
Certain dimounes invente bane fausses z’histoires lors bane dimounes pieux. Et ça li vine comme ene obstacle dans le chemin de bane dimounes ordinaire et dans la vie de bane les autre dimounes aussi. Ena l’histoire par exemple de Hazrat Abdul Qadir Jilani, kot n’importe ki sanlà vine devant li, li prêche zot la spiritualité à ene telle point ki ça bane dimounes là changer complètement ; zot aussi zot vine bane dimounes pieuses (pareil couma ene dimoune ki fréquente ene marchand parfum, li gagne parfum li aussi).
Pense bien ki personne pas capave atteindre ene position pareil si li pas amène ene reforme complète et touye tout so bane égo ki trouve en li et suivre la pratique du Saint Prophète (saw).
Ena certain dimoune ki dans zot nature même, comment Allah fine crée zot li facile pou zot élimine zot l’arrogance et zot fierté et li vine comme si tout ça pas ti exister en zot avant. Pareil comment ene la grain li vine la poussière quand mette li dans la terre et le pouvoir d’Allah faire li pousser, pareil coumsa, ça bane dimounes là aussi, premièrement zot perdi tout pou la cause d’Allah et après Allah redonne zot la vie, faire zot développer et épanoui et les autres dimoune accepter zot facilement.
Ene dimoune ki ferme dans so la foi et accepter tout difficulté et bane épreuves de temps en temps et prend ça comme ene teste ki vine de côté d’Allah, et subir tout bane difficultés et bane épreuves sans aucaine condition et kan li ena ça full croyance là ki tout trouve dans la main d’Allah, et Allah à travers So bénédiction montré li tout ki capave pou faire so la foi vine pli ferme. Quand à bane ki têtu et bane sans la foi, zot ouler faire Allah marche d’après zot désir au lieu suive l’instruction et commandement d’Allah, alors ça qualité dimoune là li priver de bane bénédictions. Après ça ki récompense ki ça kalité dimoune là capave attende de côté d’Allah ?
Allah Li montrer So indifférence envers ça bane kalité dimounes parski Li ena des millions de So serviteurs ki dévoué pou So cause. Si ene dimoune li pas envie accepter l’instruction et commandement ki vine de côté d’Allah, ça c’est so propre décision et ça qualité dimoune là li pou destiné à l’enfer.
Quand Allah Li envoye So signe, Allah Li pas prend compte plan ou désire ça bane kalité dimounes là. Allah Li manifesté Li seulement lors bane dimounes ki soumette à So l’instruction. Par exemple ene le grain ki ou fine crazé enba ou lédent et après ou rode plante li, li pas pou pousser ni li pou développer. Pareillement bane dimoune ki tourne le dos avec la volonté d’Allah zot pas capave vine bane héritiers de la bénédictions et signes d’Allah. Allah Li pas content bane parole inutiles, ni ou sème la haine dans le cœur bane dimounes lors mimbar, kot Allah pé déverse So grâce, bénédictions et faveurs de la révélation lors So humble serviteur. C’est ça ki fine arriver dans le mouvement Ahmadiyya kot bane soi-disant Mullahs et soi-disant Amir fine humilier moi lors le mimbar de Hazrat Muhammad (saw) le Vendredi le 5 Janvier 2001 dans tous bane mosquées Ahmadiyya à Maurice, zis à cause ça humble serviteur d’Allah là fine dire ki li pé gagne révélation de côté d’Allah.
O bane frères et sœurs ki présent là, pé écoute moi, vine vraiment sincères et accepter souffert dans le chemin d’Allah pou ki ça arrive ziska léciel. Kan Allah envie protège ene dimoune, pena aucaine l’homme ki ena ça pouvoir pou capave abaisse et humilier ça dimoune là. Pli zot humilier ça dimoune là, pli Allah Li béni ça dimoune là parski ça dimoune là, li ena ene le cœur rempli avec l’amour d’Allah. Arrive séki arrive, ça bane imbéciles là pas pou capave sépare ça dimoune so l’amour avec Allah. Allah Li guette seulement le cœur, l’amour ki ça dimoune là ena pou Li et Li observe ça (l’amour) secrètement. Allah pas porte aucaine l’attention lors bane paroles ki pena aucaine valeur devant So lizié. Allah Li pénétré Li dans le cœur ça dimoune ki fine purifier et lave li de tous bane impuretés. Li pénétré dans ça qualité le cœur et Li illumine li avec So la lumière. Ene le cœur ki pas purifié li, li ene le cœur ki attire la malédiction d’Allah, couma ça bane ki fine créer la haine dans le cœur de bane les autres dimounes, kot zot fine montrer zot vrai visages de l’hypocrisies et de jalousie pou l’humble serviteur d’Allah.
Rappelle bien ki ene la foi sans bane bonne action, ki ena la jalousie et l’hypocrisie so le cœur vine noir couma charbon. Alors comment li capave possible ki ene vrai la foi li pas accompagné par ene bon action ? Si vraiment zot pé pratique l’enseignement islamique, bé zot pas mette la haine dans le cœur bane dimounes à cause Allah pé cause avec Allah So humble serviteur. Moi mo pou conseille zot, alle renforci zot la foi, alle attrape le Quran Shareef et suivre le pratique de Hazrat Muhammad (saw) ; arrête prend créatures couma zot idoles, tourne vers Allah pou ki zot gagne ene croyance totale envers Allah.
Ena dimounes ki zot pas raffermi zot la foi mais zot toujours pé fer complainte qui zot pas pé recevoir bane bénédictions et bane récompenses de côté d’Allah, parski zot ena ene jalousie dans zot le cœur ; ça jalousie là fine envelopper couma ene la caze z’araignée ki pé empêche zot gagne bane bénédictions et bane récompenses de côté d’Allah.
O mo bane frères et sœurs de Madagascar ki nombreux dans le Jummah aujourd’hui pour ki zot tende ça bane vérités de manifestations divines là, celui qui craint Allah et Allah So Messager – Allah pou ouvert le chemin pou li, malgré ki l’homme pou rode mette toutes sortes kalités obstacles dans so chemin.
Mo bizin être reconnaissant envers Allah par ça bane épreuves et persécutions là, Allah fine élève moi parmi So bane humble serviteurs et avec ene Jamaat ki mo être présent devant zot pou mette bane vérités devant zot. Ça bane imbéciles là, zot ti penser ki kan zot pou humilier l’humble serviteur d’Allah, mette toutes sortes kalité blâmes et cokain so la sueur, l’humble serviteur d’Allah pou tombe lors zot zoli ti lipié là pou demande zot pardon parski zot fine prend zot couma bondieux de la terre. Pena différences entre zot et Pharaon. Surtout le sois-disant Amir ki représente le Pharaon de ça siècle là. Zot ti ouler ki mo tourne mo le dos avec mo Créateur avec ki mo la vie, mo l’honneur, mo manger, mo boire trouve dans So la main, et ki mo donne zot plisse l’importance ki Allah (twa) et mo renonce à ça grâce et ça faveur ki Allah fine faire moi là.
Celui ki ena la crainte d’Allah dans so le cœur, couma Allah fine mentionner dans Quran Shareef, Allah pou protège li contre tout difficultés et aussi pou donne li so bane provision sans ki li attane. Pour moi azordi mo bane frères et sœurs, dans la main de l’homme péna nannié ;c’est seulement dans la main d’Allah ki ena tout et ça c’est ene promesse d’Allah ki vrai et ki nous besoin croire ki Allah Li le Gracieux et le Miséricordieux. Et Allah Li toujours accomplir So promesse, Li pas double visages, double langages. Au contraire, celui ki vine pou Allah, Allah pou protège li contre bane humiliations et Allah pou prend soin de li. Néanmoins bane ki déclare zot couma bane pieux mais toujours pé fer bane complots et palabres, veille zaffaires dimounes, ça bane kalités dimounes là zot pas pou gagne bénédictions de côté d’Allah ; Allah pou laisse zot dans zot erreur ziska arrive zot l’heure pou attrape zot.
Allah faire dimoune passe par différents épreuves de sortes pou guetter si ene croyant donne préférence à so la foi ou sois à bane kitchoses matérielles. Ena beaucoup ki dire ki zot croire dans Allah, mais kan zot trouve croyance pé mélange avec zot bane avantages matérielle, zot abandonne zot la foi en Allah pou zot gagne grandeur et l’honneur lors ça la terre là. Ena zot gagne peur de zot sois-disant Amir (sans conner si pas séki li pé dire, vrai ou menti) ; zot gagne frayeur de li et de bane les autres Mullahs. Alors zot abandonne le chemin d’Allah, pou mo pas dire ki zot la foi faible en Allah. Ça bane qualité dimounes là en fait zot ena ene manque de la foi et confiance en Allah. En réalité zot pas conner ki Allah Li le meilleur des Juges. Le chemin d’Allah li ene chemin très difficile à moins ki ene dimoune fer beaucoup z’effort comme si li pé déchire so la peau sinon so bane actions pas accepter devant Allah. Eski ou en tant ki ene patron, eski ou ti pou content ena ene serviteur qui hypocrites envers ou ?!
Est-ce qui li pas vrai ça séki mo pé dire ki li pas loyale envers so maître et li pas constant dans so travail, et aucaine part définitivement ou pas pou guette li avec l’honneur. Ça aussi pareil devant Allah. Ene dimoune ki abandonne so Maître Divine pou la cause de banes gains matérielle, soif pouvoir de so chaise l’autorité, présente li devant bane dimounes couma ene bolome loulou ki tous dimounes capave peur li, respecter li, et confesser avec li, bé définitivement ça kalité dimounes là pas pou ena l’amour d’Allah dans so le cœur ; nek li là pou faire désordre et créer la haine dans le cœur dimoune partout !
O mo bane frères, sœurs et enfants de Madagascar, par la grâce d’Allah zot fine prend le Baiait hier dans la main de l’humble serviteur d’Allah. Laisse mo explique zot, le Baiait c’est quoi ?
Prend le Baiat c’est donne nous même à Allah. Ene dimoune qui rentre dans le Baiat li comme si li fine vendre li même à Allah. Li bien fausse pou pensé, c.à.d ki ene dimoune qui marche dans le chemin d’Allah li souffert la perte. Celui qui servi Allah sincèrement li pas capave ene perdant. Perdant c’est celui ki fausse, ki brise le lien ki li fine établi avec Allah pou le bien de ça le monde là. Laisse bane ki coupable de malhonnête rappel ki pas pou ena aucaine dirigeant ou le roi ou sois-disant Amir pou capave vine sauve zot quand la main d’Allah pou vine lors zot. Li pou ena pou faire fasse le Juge de tous les juges, c-à-d, Allah
Alors li nécessaire pou sak croyant pou gagne la foi en Allah ki Li-même Li le Roi du ciel et de la terre et nous bizin tourne vers Li (Allah) avec repentir. Ça c’est certainement le plus difficile à atteindre. Li pou possible si seulement Allah même dirige nous dans ça direction là. Et ça li nécessite boucou de prière, boucou de Zikr, boucou de Tilawat-é-Quran et l’obéissance à bane instructions divines.
Celui ki lutter dans chemin d’Allah avec sincérité, Allah pou donne li bane pouvoirs extraordinaire et aussi bane capacités. Le cœur ene croyant li possède ene telle attraction ki bane dimounes attiré vers li (croyant là). Mo pas comprend ki faire dimoune li pas pou attiré vers quelqu’un ki ena suffisamment attraction d’amour dans le chemin d’Allah et li possède ene pouvoir magnétique en li.
Certain dimounes penser ki en visitant bane dimounes sages et sans faire aucaine effort ou sans ene purification interne, zot pou capave joindre le cercle de bane véridiques. Li seulement ene désir ou ene pensée ça. Nous besoin absolument étudier le Saint Quran pou trouver ki ou pas capave gagne le plaisir d’Allah à moins ki nous faire face bane difficultés et bane épreuves comme bane prophètes d’Allah dans le passé. Zot l’expérience et zot souffrances ti tellement grand comme le Quran explique :
« Quand aide Allah pou arrivé ? » (Ch. 2 V. 215)
En vérité, l’aide d’Allah li bien proche. Tout le temps bane prophètes d’Allah fine passe par boucou de difficultés et bane épreuves pou ki zot accepté par Allah. Ena deux chemins ki amène vers le succès dans ça la lutte là. Ene c’est le chemin de Salûk.
Ça chemin là li emprunter par bane tel dimounes ki servi zot propre l’intelligence et sagesse ; zot adopter le chemin d’Allah et le prophète (saw). Couma Allah dire dans Quran :
« O Prophète dire zot : « Si ou content Allah, suive moi. Allah pou content ou et pardonne ou faute. Allah accorde ou So pardon et So grâce. » (Ch. 3 V. 32)
Si ou content Allah alors suive moi (l’humble serviteur d’Allah) puis Allah pou content ou : si ou ouler vine ene dimoune ki Allah content alors suive le chemin du Saint Prophète (saw) ki mo fine vini pou réparer. Li (le Saint Prophète (saw) li ene guide parfait et li fine passe par plusieurs de difficultés et de souffrances et ki so semblable pas fine trouver dans ça le monde là ou ailleurs. Quran Shareef même fine enseigne nous couma bane Zaalims pas fine laisse li tranquille même pou ene jour.
Le vrai suivant du Saint Prophète (saw) pour seulement bane ki suive li sincèrement dans chaque parole et chaque action. Ene dimoune ki pas mette en pratiques bane injonctions divine et celui ki ena ene l’attitude sévère vis-à-vis les autres, alors ça bane kalités dimoune là Allah pas apprécier zot ditout. Sa bane kalités dimounes là zot reste sous la colère d’Allah.
Pou vine ene vrai suivant du Saint Prophète (saw), li obligatoirement étudié so la vie (la vie du Prophète (saw)) et après suive so pas. C’est ça la signification de Salûk. Kan ou prend ça chemin là, ou pou gagne boucou d’expérience spirituelles si vraiment ou sincère dans ou la foi. Après ki nous montrer nous fermeté dans bane difficulté kot ene dimoune li vine ene Salik dévoué dans le chemin d’Allah.
Statut d’ene dimoune dans le chemin de Jazb li pli grand ki celle sur le pas de Salûk. Le terme de Jazb c’est vine intoxiqué dans l’amour d’Allah, perdi ou-même complètement dans l’amour d’Allah.
Celui ki lutter dans le chemin de Jazb li pas reste lors stage de Salûk. Allah délibérément mette li lors bane tests et bane épreuves pou amène plus près avec Li (Allah). A travers le pouvoir éternelle de l’absorption dans l’amour d’Allah, c’est ça le Jaazba-e-Azli.
Tout bane prophètes d’Allah c’est bane Majzûb, c’est ki zot fine rapprochés d’Allah et zot fine absorbe zot en Li (Allah) complètement.
Quand l’âme faire face bane difficultés et bane épreuves, l’expérience et conséquence de l’humilité faire li plus briller. Pareille comment le fer ou ene verre li brillé après ki li fine passe par ene longue processus de brûlure et après zot brillé tellement ki nous visages li refléter là-dans.
Lutter dans le chemin d’Allah li pareil comme si nous fine passe par le même chemin, kot nous poli nous le cœur à ene tel degré ki li ressemblé à ene la glace. Ki veut dire réflection du visage ? Ça veut dire l’accomplissement de l’enseignement, crée en nous la moralité en accordance avec le caractère d’Allah.
Le cœur ene Salik li ene miroir ki fine tellement poli à travers bane l’expérience de bane grands souffrances et bane épreuve ki bane réflexion moral, bane qualité moral du Saint Prophète (saw) fine fixé lors là. Ça li arrivé quand fine passe par boucou de difficulté et de purification interne, kot aucaine impureté pas fine rester. Chaque musulman nécessite ça qualité purification là dans li. Aucaine musulman pas pou capave gagne la paix si li pas faire ene devoir pou poli so le cœur et faire li refléter comme ene la glace.
Ki Allah aide nous pou nous purifier nous le cœur de toutes sortes impuretés ki So la lumière capave toujours réflécter dans nous le cœur et nous vine bane dimounes humbles et lutter dans le chemin d’Allah corps et âmes et arrive séki arrive, ou pas casse ou Baiat ki ou fine faire dans la main de ça humble serviteur d’Allah là ki présent devant ou. Et reste toujours attaché avec bane l’instructions et commandements ki Allah (swt) fine metté dans le Quran Shareef et faire ou lipié reste ferme dans le pas de nous Bien-Aimé Prophète Muhammad (saw). Insha-Allah. Ameen. |
