بسم الله الرحمن الرحيم

 

Khutba Jummah

 

HAZRAT AMIR’UL MOMENEEN MUHYI-UD-DIN

AL KHALIFATULLAH

 

Munir Ahmad Azim

 

 

25 Décembre 2009

 

(07 Muharram 1431 Hijri)

 

(Résumé du Khutba Jummah)

 

 

Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine lire ça verset Quran suivant là:

 

Azordi Vendredi le 25 Décembre 2009, beaucoup dimounes pé célébrer Noël, ki so Hindu, Musulman et les autres religions aussi. Li malheureux pour trouvé azordi Vendredi 25 Décembre ene congé public, bane missiés alle Jummah, madames et zenfants dans la caze pé concentré zot plisse lors fête Noël et pé souhaite jouyeuses Noël, et aussi péna des doutes là-dans ki ena missiés aussi pé assizé la caze pas fine alle Jummah, pé fête Noël avec madames, zenfants et bane les autres collègues de bane les autres religions ; li considère ça pli bon pour li, ki Tarbiyyat (l’éducation) Deen li pé donne so bane zenfants et même so madames, ki Dawa li pé faire dans so l’environnement.

 

O bane frères et sœurs Musulmans, eski ou pas fine gagne faveurs pour dire Kalima Tawheed ? Eski ou pas fine témoigner ki péna aucaine Ilah (Être) ki mérite ou l’adoration excepté Allah ?

 

Et eski ça pas veut dire rejette tous bane kitchoses ki bane Kuffaar adoré apart Allah (Twaghut) ? Eski ça pas veut dire détester tous bane pratiques ki commémore bane conceptions Shirk ?

 

En vérité, Noël c’est ene fête ki bane Chrétiens célébrer pour commémore naissance de Jésus, et d’après croyance de bane Chrétiens azordi jours, zot fine prend Jésus comme ene divinité à être adoré ensemble avec Allah (Nawzobillah). Donc, bane là pé mette en valeur la conception Shirk ki zot fine inventé. Ou, bane Musulmans, ou conception c’est l’Unicité d’Allah et non plus la trinité. Ki ou pé célébrer alors ensemble avec bane ki fine tombe dans Shirk ?

 

Eski ou approuve la croix, la Messe, l’Église, Shirk, mette associé avec Allah ? Pense bien bane frères et sœurs Musulmans ki imite zot dans zot bane fêtes veut dire ki nous (bane Musulmans) satisfait avec zot bane fausses croyances et zot bane pratiques. Mo pose ou ene question : Ou bane Musulmans ki souvent des fois, ou juge la foi de bane les autres Musulmans, pour dire ki sanlà Musulmans et ki sanlà pas Musulmans ; pas conné kot ou fine gagne ça certificat juge la foi bane frères et sœurs Musulmans couma ou-mêmes, ki lire Namaz, tourne seulement vers Allah, croire dans le Saint Prophète (saw) et ki lire le Quran couma ou-mêmes, et ou, ou dire zot, ki zot pas Musulmans, ou pilé lors là !

 

Ou Musulmans, avec ou bane soi-disant Mullahs là, eski ou pé approuver ki Allah ena ene garçon ? Pense bien ki Shirk, c’est l’injustice envers Allah ; rappelez ki Allah (swt) fine dire concernant ça bane là :

 

« Et bane là dire : ‘Allah fine gagne ene garçon’. Zot fine apporte ene kitchose bien monstrueux. » (Ch.19 Maryam V. 89-90)

 

Eski ou pour approuve ene kitchose pareille ? Eski ou pas bizin vine dans premier rang pour défanne l’injustice ki fine commettre envers Allah ? Eski ou pas bizin rejette bane les autres pratiques et retourne affirme Allah So l’Unicité ? Écoute réaction de bane les autres créatures face à ça bane blasphèmes là :

 

« Bane les ciels ti sur le point pour déchirer par ça parole là. Et la terre ti prêt pour fendre. Et bane montagnes ti prêt pour grainer avec fracs. Parski zot fine attribué ene zenfant à Allah. » (Ch.19 Maryam V.90-91)

 

Ou dimoune ki Allah (swt) fine faire vine meilleur créature, eski c’est ça façon ki nous réagir envers ça bane blasphèmes là ? Eski ou ti pour célébrer ene fête ensemble avec bane dimounes ki fine faire l’injustice envers ou maman-papa ? Non ! Eh bien certainement, Allah mérite plus de nous ki nous détester pratiques de bane ki fine faire l’injustice envers Li. Pas alle suivre aveuglement et décore ou la caze ou aussi avec l’arbre (Sapin) Noël ! Pas écoute bane politiciens ki dire ça c’est ene fête National et ki nous tous bizin faire Noël. Pour ene vrai Musulman, Allah So l’enseignement et l’example de So prophète passe avant tous.

 

Ou pé fête Noël aveuglement, mais eski ou conne l’histoire bonhomme Noël ? Eski Noël li simplement pé commémore naissance Jésus ?

 

Si ou fête Noël 25 Décembre, c’est-à-dire, ou aussi croire Jésus fine né 25 décembre. Bé ki ou pé dire li dessane ? Tous les 25 Décembre li pé prend naissance, ene la croix aussi li pas cassé ; ene cochon aussi li pas touyé. Au contraire beaucoup pé cuit carry cochon ça jour là, belle fête Noël avec repas cochon. Ou croire ça ou bane Musulmans ki pé attane Jésus dessane du ciel, si ou pé fête Noël, ou pé admette ki Jésus fine prend naissance le 25 Décembre, bé ki faire ou pas alle prend le Baiat dans so la main tous les 25 Décembre ; ene Baiat International.

 

L’autre question, eski Noël ti ene fête célébrer par Issa (as) ou par so bane compagnons ? Cherche réponse à ça bane questions là – lors internet, encyclopédie, dictionnaire, contacter ça bane grand grand Mullahs ki nek bon pour créer désordre ici, ki mette la haine dans le cœur bane frères et sœurs Musulmans. Ou pour trouver ki c’est ene mélange de Shirk, de bane peuples avant, bane ki fine gagne colère Allah. Bane là fine embête ou et pé faire ou faire bane pratiques Shirk sans ki ou pé conne ou propre religion.

 

Eski pas ou, Musulmans ki dans chaque Rakaat ou invoque Allah par bane paroles ki Allah même fine montrer ou :

 

« Guide nous lors le droit chemin ; chemin de bane lors ki To faveur fine dessane, Et non pas chemin de bane ki fine attire To colère (Juifs) et bane égarés (Chrétiens). » (Ch.1 Al-Fatiha V.6-7)

 

Eh bien, ki chemin de bane égarés ? C’est ça même chemin de bane Chrétiens. Eski ou contredire ça bane duah là, ki chaque Salaat ou faire 17 fois par jour au minimum ? Bane Sahaba pas ti pé rate l’occasion pour dire Ameen à haute voix kan Imaam ti pé termine lecture de Surah Al-Fatiha.

 

O frères et sœurs Musulmans, prend conscience ki c’est purement en contradiction avec l’Islam si nous pé suivre bane là zot coutume. Prend conscience ki bane là pas pou satisfait avec ou aussi longtemps ki ou pas suivre zot.

 

« Bane Juifs et bane Chrétiens pas pour satisfait avec ou, aussi longtemps ki ou.... » (Ch.2 Al-Baqara V.120)

 

Eski c’est satisfaction bane Chrétiens ki ou pé chercher ou bien c’est satisfaction Allah ? Rappelle bane ki Allah fine satisfait avec zot parmi bane Sahaba et bane ki fine suivre zot (Ch.9 At-Tawba V.100), zot pas ti pé célébrer Noël et l’année. Pas alle attire la colère d’Allah et protège ou contre ça chemins ki pou amène vers l’égarement.

 

Pense bien ki Allah (swt) fine envoye Hazrat Issa (as) comme So Messie pour continuer le travail de Hazrat Moussa (as) et pour invite so peuple vers l’adoration ene seul Dieu. Au lieu attrape fermement ça l’enseignement là, bane Chrétiens fine falsifié la religion ki fine propager par Hazrat Issa (as).

 

Jamais Hazrat Issa (as) fine enseigne pour croire dans la trinité. Jamais Hazrat Issa (as) fine enseigne pou célébrer so l’anniversaire et ni li fine monte avec so lécorps physique au ciel. Tous ça là c’est falsification de bane falsificateurs !

 

Ki Allah (swt) éloigne nous de tous ça bane innovations là et ki Allah retire tous obstacle de nous le cœurs et pardonne nous et guide nous toujours dans le chemin droit jusqu’à nous quitte ça le monde là, et non pas chemin bane ki fine égaré. Ameen.