Text Box: Bismillah-ir-Rahman-ir-Rahim KHUTBA JUMMAH HAZRAT AMIR’UL MOMENEEN MUHYI-UD-DIN AL KHALIFATULLAH MUNIR AHMAD AZIM 27 Février 2009 (Résumé du Khutba Jummah lors Zikr Allah) Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine lire ça bane versets Quran suivant là:  Wa ‘araznaa Jahannama Yawma-‘izil-lil’ Kaafiriina ‘arzaa – Allaziina kaanat’a’-yunuhum fii gitaaa’in-‘an zikrii « Sa jour là, Nous pou présente Jahannam devant banes Kaafirs (infidèles), bane ki ti ena ene voile lors zot li yeux à propos Mo Zikr ». (Ch. 18 V.101-102) A la lumière de sa verset ki mo fine lire devant ou là, mo pé continué mo Khutba lors Zikr Allah, so bane bénéfice et vertu. Dans ene Hadith rapporté par Anas (r.a) dire ki Hazrat Mohammad (s.a.w) fine dire : « Quand ene groupe (dimoune) réunit pou faire Zikr Allah uniquement pou So plaisir, éne Ange proclame dans le ciel : « Allah fine pardonne zotte et li fine remplace zot péchés par bane vertus ». Dans ene l’autre Hadith fine rapporté : « Sa l’assemblée ki réunit et séparer sans faire Zikr Allah, pou vine ene source regret Jour Jugement Dernier ». Sa Hadith là montré nous, bane dimounes ki participé dans bane groupe, réunion et perdi zot le temps dans bane zaffaires initiles kot zot pas gagne bénédiction Allah et couma Allah (swt) fine dire dans sa verset ki mo fine lire au commencement là, ki sa bane qualité dimoune là ena ene voile lors zot li yeux à propos Mo Zikr et zot pou regretter le Jour du Jugement Dernier et aussi ene tel réunion pareil. Dans ene l’autre Hadith fine rapporté ki bane dimoune ki fine participe dans ene réunion kot pas fine faire le Zikr Allah et aussi pas fine envoye Darood lors Nabi Karim (s.a.w) zot pareil couma bane dimoune ki fine léver dépi carcasse ene bourrique. Fine rapporté aussi dans ene l’autre Hadith, ki tout bane manquement ki fine arriver dans ene réunion Allah (swt) pou excuser si lire sa doah la : « Subhaan-Allahi Wa Bihamdi Subhaana Kallaahumma Wa Bihamdika Ashhadu Allah Ilaaha Anta Astagfirukah Wa Atuubu’ilayh » - « Tout gloire pou Allah avec tout So éloges. Tout gloire pou Toi, O Allah avec tout To éloges, mo témoigner ki péna aucaine divinité à part Toi. Mo rode To pardon et mo tourne vers Toi ». Hazrat Mohammad (s.a.w) aussi fine dire bane Sahaba (r.a) accomplir droit ene l’assemblée. Bane Sahaba fine dire : « Ya Rassoolullah (s.a.w) ! Couma pou accomplir droit ene l’assemblée ? » Li fine dire : « Faire beaucoup Zikr, montré chemin bane voyageurs, ferme zot li yeux lors bane kitchose Haram. » Hazrat Ali (r.a) le 4ème Khalifa-e-Rashideen, ti conseille so bane suivant, ki à la fin d’ene réunion ou ene programme récite sa doah la :  « Subhana Rabbika Rabbil Izzati Amma Yaswifun Wasalaamun Alal Mursalin Wal Hamdolillahi Rabbil Aalamin ». (Ch. 37 V. 181-183) Tout gloire pou To Rab, Rab tout l’honneur, bien loin avec saki zot dire ; la paix lors bane Messagers, tout éloges pou Allah, Rab tout bane lé monde ». Dans Quran Shariff à la fin Surah Al-Furqan, Allah (swt) fine mentionne bon qualité bane croyants, kot Allah dire :  « Sa bane là, Allah pou change zot mauvais actions en bon actions. Et Allah content pardonné et Li ena beaucoup pitié. » (Ch. 25 V.71) Sa verset Quran là Allah (swt) pé montré nous ki Li pou change zot bane mauvais l’habitude et pou remplace sa par bane bons actions. Au lieu zot alle vers mauvaise action, zot pou faire bonne action. Quand sa bane bon l’habitude là pou développé, zot pou vine ene deuxième nature et zot pas changer. Ena ene parole ki dire : «  Montagne capave change place mais l’habitude pas changer ». Concernant sa parole ki mo fine dire là, ena ene Hadith ki dire : « Si ou tender ki montagne fine change place, ou capave croire mais si ou tender ki ene dimoune fine change so l’habitude pas bizin croire ». L’origine de sa parole là, li sorti dans sa Hadith là si ou bien étudier li, c.à.d li pli difficile pou change l’habitude ene dimoune ki déplace ene montagne. Quand ou tende sa Hadith là, ene question capave soulever, couma pou capave réforme ene tel comportement ki ene dimoune ena sa bane qualité mauvaise l’habitude la ? So explication, c’est ki l’habitude pas changer, par example, ene dimoune ki ena ene mauvais caractère, li difficile pou élimine so colère complètement à travers Islah (réformation) et Mujahadah (zeffort). Dans moment so colère Hazrat Mohammad (s.a.w) fine dire boire de l’eau, pareil couma de l’eau teigne du feu et aussi pou change direction sa colère là, li bizin faire sa zeffort là pou apporte ene reforme kot li rentre dans Zikr complètement. Sa bane mauvais caractère (Akhlaq-e-Razilah) reformer dans sa façon là, faire ene belle zeffort, faire beaucoup Zikr, rappelle Allah beaucoup kot sa capave repousse sa shaytan là. Et ou pou trouver ki c’est Allah Le Tout Puissant change direction comportement sa dimoune là dépi mauvais action et dirige li vers bon action. Ene Hadith kot Mu’aaz Bin Djabal (r.a) rapporté ki Hazrat Mohammad (s.a.w) fine dire : « Aucaine action pas aussi efficace pou sauve ene dimoune dépi Azaab Qabr ki Zikr Allah ». (Ahmad) Si ou ti capave comprend sa Hadith là bien et cherche aide de connaissance d’Allah lors la, sakaine parmi nous ti capave realiser ki quantité Azaab Qabr (punition dans tombe) ene réalité ki bien dur. Quand Hazrat Uthman (r.a) ti pé visite ene Qabr, li ti pleuré tellement ki so la barbe ti pé trempé avec larmes. Ene fois, quicaine fine demande li : « Pou ki raison ou pas pleurer autant quand faire mention Jannat ou Jahannam ki quand ou devant ene Qabr ? » Li fine réponne : « Qabr, c’est premier étape vers Aakhirat. Pou celui ki fine réussit traverse sa l’étape là avec facilité (li fine protéger dépi punition Qabr), lézot étape pou vine faciles. Pou celui ki pas fine réussit gagne protection ici, lézot étapes pou vine encore pli difficiles. »  Et ensuite li fine dire ki Hazrat Mohammad (s.a.w) fine dire : « Mo pas fine trouve kitchose ki pli terrifiant ki saki passer dans Qabr ». Hazrat Aisha (r.a) dire ki Rassoolullah (s.a.w) ti ena l’habitude demande protection contre Azaab Qabr, après chaque l’heure Namaz. Zaid (r.a) dire ki Hazrat Mohammad (s.a.w) fine dire : « Si mo pas ti gagne peur ki zot arrête alle enterre bane dimoune ki fine morts, mo ti pou faire duah avec Allah Ta’ala pou laisse zot tanne bane torture ki passer dans Qabr. » Seulement l’homme ki pas tender, mais tout bane le zot créatures tanne Azaab Qabr. Ene fois Rassoollullah (s.a.w) ti dans voyage, so chamelle fine gagne peur. Quicaine fine demande li ki fine arriver. Rassouloullah (s.a.w.) fine réponne ki quicaine pé gagne punition dans Qabr et so hurlement fine faire chamelle là gagne peur. Ene fois Hazrat Mohammad (s.a.w) fine rentre dans Masjid et li fine trouve ene groupe dimoune ki ti pé rier fort fort. Alors li fine dire zot : « Si zot ti rappelle la mort pli souvent, zot pas ti pou rier coumsa. Péna ene jour ki passer sans ki Qabr faire sa annonce là : « Mo ene l’endroit misérable, ene l’endroit kot sakaine pou retrouve li tousel et mo rempli avec lé vers et insectes ». Quand ene croyant enterrer dans Qabr, Qabr li même accueillir li et dire : « Mo bien content ki to fine vini et to présence bien souhaité. Parmi tous bane dimounes ki ti pé marché lors la terre, to même ki mo ti pli content. Astère la ki to fine vine jusqu'à moi, to pou trouvé couma mo pou agir bien avec toi. » Ensuite, Qabr élargit aussi loin ki lizié capave trouver et ene la porte dépi Janaat ouvert dans direction sa Qabr la. A travers sa la porte là, ene l’air parfumé dépi Janaat rentré (dans so Qabr). Mais quand ene infidèle ou ene transgresseur enterrer, Qabr dire : « To l’arrivée ici bien désagréable et to présence pas souhaitée, li ti meilleur ki to pas ti vini. Parmi tous bane dimoune lors la terre c’est to même ki mo ti détester plisse. Astère ki to fine vini, to pou guetter couma mo pou agir avec toi. » Ensuite Qabr là rétréci et serre li sans pitié jusqu'à ki so bane côte rentre ene dans l’autre – Kan li ti pé raconte ça, Hazrat Muhammad (s.a.w) fine montrer avec so deux la main, couma ça dimoune là so côte pou crazé – Quatre-vingt-dix ou quatre-vingt dix-neuf serpents largué lors li et zot mordre li jusqu'à Qayamat. Si ene ça serpent là crasse so poison lor la terre, aukaine l’herbe pas pou pousser ziska Qayamat, et Hazrat Mohammad (s.a.w) fine ajouter : « Qabr, c’est ene jardin Janaat ou ene trou Jahannam. » Alors nous bizin faire beaucoup doah ki Allah (swt) protège nous contre punition Qabr et nous reste attacher avec bane Ibaadat et Zikr et aussi nous prend ene l’habitude, tous les soirs avant alle dormi, avant lire Kalima et Doah, lire Surah 67 (Al-Mulk) « Tabarakallazi » kot ene dimoune capave protége li dépi punition Qabr aussi bien ki punition dans Jahannam. Et dans bane Hadith aussi fine montré nous ki Zikr vraiment efficace contre Azaab Qabr.  Rabbanas-rif ‘anna ‘adhaba jahannama inna ‘adhabaha kana gharama innaha sa‘at musta-qarranw wa muqama O nous Seigneur, repousse de nous punition l’enfer, parski so punition dure toujours. Ki mauvais la case et l’endroit pou rester ça !  Ki Allah aide nous, donne nous sa z’effort là pou faire beaucoup Zikr aussi. Insha-Allah. Ameen.