Bismillah-ir-Rahman-ir-Rahim

 

KHUTBA JUMMAH

DE HAZRAT AMIR’UL MOMENEEN MUHYI-UD-DIN

 

27 JUILLET 2007

 

(BAIT-UL-ZIKR – DANS LE NORD)

 

 

Aujourd’hui comme Khutba Jummah, après le Salaam, Tashahhud, Taouz et Surah Al-Fatiha, le Muhyi-uddin fine lire Ch.17, Bani Israel, V.71 – 77 dans Ruku 8.

 

Allah dire:

 

V.71: Ene jour, Nous pou appelle tous dimounes ensemble, avec zot chef. Bane qui gagne zot livre dans zot la main droite pou lire zot livre (avec plaisir) et aucaine injustice, meme la plus petite, pas pou faire zot.

 

Alors Allah pé faire comprend ki ene jour na pas ene jour tous dimounes lor ça la terre là, pou quitte ça le monde là et nous pou alle kot nous Rab, Allah (swt). Nous la vie lor ça la terre là, li temporaire, et Allah (swt) Li fine créer l’homme avec ene but, ki en retour Allah gagne satisfaction de nous.

 

Tout kitchose ki nous faire, nous faire ça avec ene but: nous envoye ene zenfant l’école avec ene but, ki li gagne ene bon l’éducation. Nous envoye ene zenfant Madrassa, pou ki zenfant là li gagne ene bon l’éducation de deen. Nous construire ene la caze dans ene but ki nous pou gagne ene place pou nous habiter – ene habitation. Nous alle bazaar dans ene but pou gagne legumes frais – pou faire ene bon cari. Et coumsa meme Allah fine créer l’homme dans ene but ki kan l’homme li à nouveau rétourne vers Allah, alors ki li ti vini dans ene l’état pure. Mais li Malheureux, ki kan l’homme li rétourne vers so Créateur, li pas si pure couma li ti été. Mais li encore plus Malheureux, ki kan Allah fine créer l’homme et fine envoye li lor la terre, ki So bane créatures fine faire? Alors l’homme kan li fine vine lor la terre et li fine attiré avec ça bane plaisirs et bane distraction et l’amusement ki ena lor ça la terre là, lerlà kan li fine attirer, li fine detourner nette, et li fine oublier so Créateur, Allah (swt). Mais Allah ki Li faire? Certes, Allah Li Miséricordieux; Li envoye Miséricorde lor So bane créatures et aussi Li envoye So grâce lor So bane serviteurs. Ki ça grâce là ça? C’est ki Li envoye ene Messager parmi bane dimounes ki fine egarer et detourner dépi chemin Allah, pou reforme zot et pou guide zot sur le droit chemin. Alors kan ça dimoune là Li vini, li vine avec ene message de côté d’Allah. Li vine couma ene representant ki Allah fine envoyer lor ça la terre là – kot Allah donne li bane instructions, bane commandements pou ki li distribuer ça bane messages là, parmi bane dimounes et meme à l’humanité en entier. Alors celui ki fine capave attrape ça la corde là, le prophethood (l’apostolat) et de ça bane messages là, càd, ki li croire et li amène ene imaan bien ferme lor Allah et So prophète, lor ça dimoune là, Allah purifier so le coeur et so le coeur vine pure et propre.

 

Alors kan à bane dimounes ki fine attacher avec message Allah, ene jour zot pou mort et zot ena pou rende zot compte à Allah – pareil couma tous dimounes ki pou bizin rende ene compte. Et ene partie de bane dimounes zot pou vini ensemble avec zot chef; ici Allah pé faire reference à bane prophètes ki fine vine parmi bane peuples pou prêche messages Allah, alors Allah pé cause chef couma ça bane messagers ki ti vine dans bane peuples et regions differents. Alors ça bane dimounes là, zot ti croire dans ça prophète là et à part bane prophètes ti ena bane Muhaddiths, Mujaddid, bane sages, reformateurs et bane dimounes ki pieux. Eh bien, ça bane dimounes là zot pou ensemble avec zot chef au Jour de la Résurrection. Alors Allah dire pou ça bane dimounes ki fine accepter message Allah, zot pou gagne zot livre dans zot la main droite. Dans l’enseignement du Quran et l’enseignement du Prophète (saw), couma nous conner ki fine dire nous ki tous zaffaire bizin commence dépi côté droite. Et fine dire nous aussi ki nous ena deux anges avec nous. Ene côté droite et ene côté gauche ki note tous nous bane actions; séki côté gauche là li note mauvaises actions et séki côté droite là li note bane bon actions, càd, le bon côté de tous kitchoses.

 

Alors kan ça bane dimounes là pou gagne zot livres dans zot la main droite, alors ça c’est ene signe ki zot fine faire bane bonnes actions lor ça la terre là, càd, ki ange côté droite fine faire bane bon rapports, fine écrire bane bonnes actions dans so livre. Pareil couma ene zenfant ki fine composer alors kan li gagne so résultat, bane là donne li so rapport couma li fine comporte li durant toute l’année, couma so rapport été, bon ou mauvais, alors professeur pou mette rapport là dans bulletin.

 

Alors ou livre aussi pou pareil au Jour du Jugement. Ange li, li pou guette bane bonnes actions ki nous faire mais au Jour du Jugement Allah ki pou juge nous. Kan ça bane dimounes là gagne zot livre zot ti gagne ça dans zot la main droite – lerlà ange pou dire zot lire zot livre avec plaisir – pareil couma ça zenfant ki fine gagne so bulletin, so professeur et so parents pou lire so resultat kot zot pou fier de bane zéfforts ki zenfant là fine faire. Parents là pou trouver ki la nuite ki ça zenfant là fine passer pou li étudier. C’est là ki li pou trouve le fruit de so bane zéfforts. Li pou content pou guette so bane resultants et li pou guette ça avec plaisir car li fine gagne distinction. Et Allah dire pas pou faire aucaine injustice meme le plus petit pas pou faire à zot.

 

V.72: Celui qui aveugle (ferme zot lizié lor ça bane messages Allah) lor ça la terre là, li pou aveugle dans l’autre la vie (aussi) et li pou plus égarer encore lor so chemin.

 

Allah dire celui ki aveugle, pas aveugle physiquement mais spirituellement, càd, ki li ferme so lizié, li faire semblant li pas pé trouve manifestation et messages d’Allah. Alors si li fine declare li aveugle lor ça la terre là, li pou plus aveugle dans l’autre la vie aussi et li pou plus egarer encore lor so chemin, càd, ça dimoune ki pas rode trouve message d’Allah, So messager, So Manifestation dans ça la vie là, li faire couma dire li pas conne Allah lor ça la terre là. Li tourne le dos avec Allah lor ça la terre là alors Allah aussi pas pou conne li ni lor ça la terre là ni dans Akherat. Alors kan li pou alle kot Allah li pou parmi bane dimounes egarer parceki kan Allah ti envoye So signes, So messages claires, pou retire li de so l’obscurité pou mette li dans la Lumière, alors li, li fine ferme so lizié, li fine envie reste dans noir li même. Alors pou ça bane dimounes là zot pou egarer zot même dans zot chemin.

 

V.73: Encore ene ti peu, zot ti va faire toi tourne le dos avec séki Nous fine reveler à toi, afin ki to invente kitchose different contre Nous (revelation). Alors, surement zot ti va adopter toi comme camarade.

 

Allah dire So prophète, au fait pé explique li deux kalités dimounes; ene kalité dimoune ki faire du bien, zot sacrifier zot le temps pou Allah et zot ça bane dimounes là gagne zot livre dans zot la main droite. Ene Deuxième kalité dimounes, ça bane là zot fine rejette Allah et So prophètes, zot fine rende zot même aveugle et assuremment Allah aussi pou tourne le dos avec zot le Jour du Jugement, et zot pou reste egarer et aveugle dans l’autre monde aussi. Alors après ki Allah fine explique lor ça deux kalités dimounes là, normalement kan le prophète (saw) li ti vini, ene prophète ki ‘Rahmatul lil Aa’lamine’, ene benediction pou l’univers en entier, li, li ti rempli de ça bane problèmes là kan li ti vine prêche l’unicité d’Allah avec bane dimounes de so peuple, parceki li avec Allah kot li ti pé amène bane dimounes dans bon chemin, parceki la vie lor ça la terre là, li temporaire, c’est la vie dans le futur ki éternelle et c’est dans l’au-delà ki pou gagne bane recompenses, alors zot faire bane tel façon ki zot critique le prophète et zot faire bane zaffaires pou zot capave détourne le prophète (saw).

 

Allah pé dire au prophète (saw) ki encore ene ti peu, avec façon ki zot pé faire avec toi, encore ene ti peu zot ti à faire toi tourne le dos avec séki Nous fine revele à toi, zot façon ki zot agir avec toi tellement to fine senti dans ene façon ki to fine serer, kot to pas conner ki to pou faire. Et si Allah pas ti reste avec toi, pas ti tenir toi ferme et Allah pas ti dirige toi, bé alors encore ene ti peu zot ti pou faire toi tourne le dos avec Allah, faire toi oublier tous bane faveurs ki Allah fine faire toi et aussi So (Allah) bane revelations ki Li fine faire dessane lor toi. Alors encore ene ti peu to ti pou alle tombe dans bane là zot la trappe. Alors Allah pé rode faire So prophète comprend ki c’est MOI (Allah) ki fine élève toi, fine guide toi, révèle toi bane messages et fine donne toi la tâche pou prêche MO L’UNICITÉ (Allah). Alors toi to pas bizin écoute dimounes et to bizin reste ferme lor MO (Allah) la voie et si couma dire to pas écoute MOI (Allah), bé encore ene ti peu bane là ti à faire toi tourne le dos avec messages ki MO fine envoye toi.

 

Alors ki faire zot faire ça? C’est à cause pou ki to capave change bane messages ki fine vini dépi Allah pou change ou reforme zot. Zot faire ça afin ki to invente kitchose different contre Nous (revelations). Alors Allah dire ki ‘kan Mo fine descende lor toi bane revelations, et si to rejette ça bane messages là, c’est ki to fine rejette Allah. Et lerlà kan to pou alle vers bane ki pas ti croire alors ki to pou dire zot après ki to meme to fine tourne le dos avec Allah, et So bane revelations, ou to fine change li ou to fine nier li, alors ki zot pou faire avec toi? Alors surement zot ti va adopter toi couma ene camarade. L’heure là bane là ti pou considère toi couma zot bane bons camarades.’

 

L’Islam, nous la religion fine enseigne nous ki nous bizin soumette nous juste devant Allah, pas devant dimounes. Alors faudé pas écoute l’homme mais Allah. Alors ça c’est ene teste ki Li (Allah) faire à So bane serviteurs pou guetter si vrai même zot croire dans Allah et So bane paroles.

 

V.74: Si Nous pas ti rende toi solide, to ti va déjà verse vers zot ene ti peu.

 

Si Nous pas ti rende toi solide bé to ti va déja verse vers zot. Alors Allah fine faire toi solide, donne toi courage pou dire NON MO PAS POU ECOUTE ZOT MAIS MO POU ECOUTE ALLAH – Même si zot tous aller, mais moi mo pou reste avec Allah. Alors si Allah pas ti donne le prophète (saw) courage pou dire ça alors li ti pou verse vers zot et li ti pou vire le dos avec so Créateur.

 

V.75: Et alors Nous ti va faire toi goute ene double (punition) dans la vie aussi bien qui dans la mort. Et to pas ti pou trouve aucaine aide contre Nous.

 

Et Allah dire ki kan to ti pou faire ça to pas ti pou gagne ene punition mais Mo ti pou double to punition dans ça la vie lor la terre là meme et dans la vie futur, la vie après la mort, dans Akherat kot Allah pou juge toi, bé définitivement Allah pas ti pou quitte toi coumsa meme lerlà. Surement Allah ti pou faire ça pou tester toi mais si to ti préfère saye dans côté creatures, dans côté dimounes, to ti pou écoute zot et si to pas ti écoute to Créateur et bane messages ki Li ti révèle toi, O le Prophète (saw); alors Allah dire si Nous pas ti rende toi solide, bé to ti pou fini saye dans zot côté. Lerlà Allah dire si to ti faire ça Nous pas ti pou quitte toi coumsa meme. Assurement to ti pou gagne ene punition severe dans ça la vie là et après to la mort. Et penser ki là-bas la vie éternelle alors to ti pou gagne to punition tout au long de to la vie, et couma ça punition là pou douloureux! Et lerlà kan to ti pou gagne ça punition là to pas ti pou gagne ene ou meme aucaine aide de Nous, càd, Allah et So bane anges.

 

V.76: Encore ene ti peu zot ti va faire toi sauver depuis dans pays, pou exile toi. Et alors, zot meme ti va reste là, après to depart, ene ti moment seulement,     

 

Alors si Nous pas ti rende toi ferme et faire toi diboute couma ene lion d’Allah, lerlà ki zot ti pou faire avec toi, alors zot ti à faire toi sauver dépi dans pays – pou exile toi – par zot façon de faire mais Allah conné couma Li guide So messager ki dans so manière causer, dans so pensée, dans so movement. Alors, kan to ti pou aller zot ti pou reste là et lerlà zot ti pou capave faire séki zot encie. Tandis kan ena ene prophète parmi zot, zot conner ki zot pas capave faire séki zot envie – donc zot bizin debarasse le prophète parmi zot et Allah dire si couma dire zot ti pousse toi dépi dans pays et zot ti pou reste là comme bane bel chefs ki donne l’ordre, alors certainement Allah pas ti pou laisse zot reste là longtemps – zot ti pou reste là ene ti moment meme et après ça Allah ki pou decide avec zot.     

 

V.77: pareil couma fine arrive à bane messagers qui Nous fine envoyer avant ça. Et to pas pou trouve aucaine changement dans Nous façon faire.

 

Allah dire: pas juste dans to l’époque pé arrive ça, càd ki to pé gagne ça bane problèmes là, Nous ti révèle toi ça, pareil couma bane lézot prophètes ki Nous ti envoye lor ça la terre là – Pas juste dans to l’époque ki ena ça bane kalité dimounes là! Tous ça là ti exister et li pou exister. Assurement Allah pou toujours protège So bane prophètes, Allah pou reste toujours à zot côté. Et Allah pou faire zot reste solide. Pas pou ena aucaine changement dans Allah So façon de faire. Càd, ki Allah pou agir dans meme façon tout le temps avec bane dimounes ki faire méchant et meme avec bane dimounes ki faire de bonnes actions. Assurement Allah et So prophète ki pou sorti victorieux. Insha-Allah. Ameen.