بسم الله الرحمن الرحيم

 

Khutba Jummah

 

HAZRAT AMIR’UL MOMENEEN MUHYI-UD-DIN

AL KHALIFATULLAH

 

Munir Ahmad Azim

 

 

27 Novembre 2009

 

(Résumé du Khutba Jummah)

 

 

Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine lire ça verset Quran suivant là:

 

 

Fa basharnaahu bi ghulaaamin haliim. Falammaa balaga ma ahussa ya qaala yaa bunnayya innii araa fil manaami annii azbahuka fanzur maa zaa taraa ! Qaala yaa abatif al maa tumar satajidunii insha allaahu minas saabiriin. Falammaa aslamaa wa lallahuu lil jabiini. Wa naaday naahu any-yaaa Ibraahim. Qad saddaqatar ruyaa, Inna kazaalika najzi Mulsiniin. Inna haaza lahuwal balaa ul Mubiin, Wa Fadaynahu bizibhin aziim.

 

Alors nous fine annonce li bonne nouvelle pour ene garçon patient. Puis quand li fine vine capable pour travaille avec li, Li (Ibrahim) fine dire : "O mo garçon ! Mo fine rêver qui mo pé immole toi, aster guetter toi, qui to l’opinion ?" Li (garçon-là) fine dire : "O mo papa ! Faire ce qui to fine être ordonné pour faire. Si Allah oulé, to pour trouve moi parmi bannes qui ena patience." Alors quand ça deux-là fine soumette à Mo l’ordre, et papa là fine mette li (garçon-là) par front enbas. Et Nous fine appelle li, qui "O Ibrahim !" Sans doute, to fine réalize to rêve. Comme sa même Nous récompense bannes bienfaisants. Sans doute, sa ti ene épreuve claire. Et Nous fine ransonne li, par ene grand sacrifice. (Al-Swaffat Ch.37 V.102-108)

 

Qurbani ou sacrifice, remonte au temps de Hazrat Ibrahim (as) à qui Allah ti demande pour sacrifier so garçon, Hazrat Ismaïl (as), pour éprouve la sincérité so Imaan (la foi). Aidé et encouragé par so garçon qui donne so la vie en offrande, Hazrat Ibrahim (as) ti alle sans hésitation vers l’accomplissement so devoir. Est-ce qui li pas fine dire : "Mo soumette moi à Seigneur des Mondes."

 

Sans sa sacrifice là, Hazrat Ibrahim (as) pas ti pour capave faire li valoir comme l’Ami d’Allah (Khalilloullah). Mais l’Ami d’Allah (Khalilloullah) li pas ti besoin alle jusqu’à la fin de so l’épreuve dure là. Allah, qui ena la connaissance de toutes choses, ti conne sentiments de So serviteur fidèle. Ça épreuve symbolique là ti éna pour but pour montrer le monde la sincérité de Hazrat Ibrahim (as) envers Allah Taala.

 

Sa l’événement historique de sacrifice de Hazrat Ibrahim (as) là ine arrive dans Mina, dans banlieu de Makkah, cotte bannes hadjees faire Qurbani après ki zotte fine accomplir Hadj. Et ça action là li répété chaque l’année le 10 Zil Hadj, non seulement dans l’Arabie mais entier le monde. Et sa pour continuer Insha Allah, jusqu’à kayaamat, chaque l’année, après Salaatul Eid-ul-Adha, banne Musulmans ki ena moyen, faire Qurbani, non pas en honneur de Hazrat Ibrahim (as) ou Hazrat Ismaïl (as), banne ancêtres de Muhammad (saw), mais en l’honneur d’Allah Taala.

 

Nous célébrer ainsi sacrifice sa deux Prophètes (as) pour plaire à Allah Souhanahou Wa Taala. Li important pour comprend portée sa acte apparemment banale mais cependant cotte éna bannes significations profondes.

 

Nous lire dans Quran : "To dire : Sans doute, mo la prière, mo sacrifice, mo la vie et mo la mort appartenir à Allah, Seigneur de tous bannes l’univers." (Al-Anaam, Ch. 6 V. 163)

 

Certainement li pas capave autrement, car terme Mouslemeen (Musulman) signifier "Celui ki soumette à Allah." Mouslemeen (Musulman) c’est celui qui croire sincèrement qui so maître unique c’est Allah. Par conséquent, li adore juste Allah et li obéir juste Li tout seul. Ainsi li prêt pour sacrifier tout pour Allah car li conner qui so la vie et so la mort dépanne d’Allah seulement.

 

Est-ce qui nous Qurbani li différent de l’Epoque de Jahilliya (avant l’islam) ? Bien Sur que oui, tandis qui bannes là ti pé offert zotte bondieu du sang animal qui zot tuer, le croyant li oulé exprime à Allah, so dévotion en sacrifiant ene animal qui li capave consomme so la chaire. C’est nous piété qui faire Allah plaisir.

 

"Jamais zotte la chaire, ni zotte du sang arrive cotte Allah, mais  qui zotte piété arrive cotte li." (Al-Hadj, Ch. 22 V. 37)

 

Oui, Qurbani besoin éveille en nous ene sentiment de piété (TAQWA). Le vrai sacrifice ce qui le croyant besoin contrôle li afin qui li vivre ene la vie vertueux.

 

Nous dire qui humain li ni Farishta (ange) ni animal, cependant li possède bannes tendances angélique. Mais li ena l’intelligence, faculté qui animal pena et li ena liberté action ce qui Farishta (ange) pena. Servi ou l’intelligence pour faire bons actions.

 

Bannes paroles suivantes de Rassoulloullah (saw) zotte rapporté par Hazrat Aisha (ra) : "Narien pas plus content par Allah pendant bannes jours Qurbani qui sacrifice en animal."

 

L’animal qui fine offert en sacrifice pour présente li jour Jugement  Dernier avec so cornes poils et sabots. Avant même qui du sang l’animal offert en sacrifice touche le sol, sacrifice là li accepter par Allah. Pour sa bannes raisons là faire Qurbani sans hésitation avec grand cœur.

 

Qurbani li ene acte indépendant de Ibaadat du plus grand mérite. Ça Ibaadat là fine ordonné par Shariah (la loi islamique) en commémoration sacrifice de Hazrat Ibrahim (as) qui ti offert so garçon, Hazrat Ismaïl (as), en sacrifice comme Allah Taala ti ordonne li. Parce qui Qurbani li ene Ibaadat spécifique, pas capave remplace li par autre chose. L’argent offert en charité pas capave remplace en aucaine façon Qurbani comme Ibaadat. Si ene personne à la place Qurbani, li offert ene Sadqua ene somme bien plus important qui prix ene animal, sa li pas même assez et sa personne là pas décharger de so obligation pour Qurbani. Pareil comment Namaz pas capave remplacer par autre chose pareil comme sa même obligation pour Qurbani pas capave enlevée en offrant autre chose. Li important qui ceux qui capave accomplir sa Ibaadat là faire li.

 

Rassoulloullah (saw) fine dire formellement qui li dissocier li avec ceux qui par exprès décide pour pas faire Qurbani.

 

Ene personne lor qui Qurbani li obligatoire et ki li pas faire li, li bien malchanceux. A sa propos là, Rassoulloullah (saw) fine informe nous clairement : "Celui qui ena la possibilité pour accomplir Qurbani, mais li pas faire li, qui li pas approche avec nous Eid Gah" (Ibn Madjah). En d’autres mots sa personne là li pas digne pour présente li devant Allah.

 

Couma dans Khutba la semaine dernière mo fine dire zotte, bannes animaux qui capave offert en Qurbani zotte : bouc, chèvre, mouton, vache, bœuf, chameaux. Li pas permettre pour offert les autres animaux en Qurbani. Cabri besoin ena 1 an pour qui Qurbani valable. Bœuf et vache bizin ena 2 ans. Chameau besoin ena 5 ans. Si l’age moins, Qurbani pas valable.

 

Période Qurbani commencer à partir jour Eid-ul-Adha, c’est-à-dire, 10 Zil Hadj et li terminer le 12 Zil Hadj avant soleil coucher. Capave faire Qurbani pendant n’importe sa trois jours là, mais c’est préférable faire li jour Eid ul Adha, c'est-à-dire, 10 Zil Hadj, puis le 11 et ensuite le 12 avant soleil coucher.

 

Li rapporté dans ene hadith qui pendant les dix ans ki Huzoor (saw) fine reste dans Madinah Shareef, chaque l’année li ti faire Qurbani.

 

Li rapporté  qui Rassoulloullah (saw) dire : "Aucaine jour pena plus poids avec Allah et qui content par Li pour bonnes actions qui les 10 premier jours du mois de Zil Hadj." Donc dans sa bane jours là lire beaucoup Tasbeeh, Tahleel, Tahmeed et Takbeer.

 

TASBEEH      - Subhanallah (Saint To été O Allah)

TAHLEEL      - Laillaha Illallah (Pena personne pour adorer apart Allah)

TAHMEED - Alhamdullillah (Tous louanges appartenir à Allah)

TAKBEER      - Allaho Akbar (Allah, Li le Plus Grand)

 

Li rapporté par Hazrat Aisha (ra) qui Huzoor (saw) fine dire : "Pena narien plus chère à Allah pendant les jours de Qurbani qui sacrifice animaux. Zanimaux qui fine sacrifier là pour vini Jour  Kayaamat avec so cornes, poils et sabot (pour peser pour sawaab). Sacrifice li accepter pour Allah avant même qui du sang touche la terre."

 

Hazrat Zaid Ibn Arqam (ra) raconté qui bannes compagnons du Saint Prophète (saw) fine demander : "O Rassoulloullah (saw), qui été Qurbani ?" - Rassoulloullah (saw) fine réponne : "C’est Sunnah zotte Papa Ibrahim." - Banne compagnons fine demander : "Qui profit qui nous gagner ?" -Le Prophète (saw) fine réponne : "ene récompense pour chaque cheveux animaux qui fine sacrifié." - Banne compagnons fine demandé encore : "Qui récompense pour animaux à la laine ?” - Huzoor (saw) fine dire : "Ene récompense pour chaque fibre la laine."

 

Rassoulloullah (saw) fine dire :"La personne qui faire Qurbani avec le cœur content et Niyyat pour gagne sawaab, Jour Jugement sa Qurbani là pour barre li avec du feu l’Enfer."

 

En faisant Qurbani chaque l’année, ene Musulman li récompenser abondamment et li rapprocher avec Allah. Du fait qui Qurbani capave offert juste pendant trois jours dans ene l’année, faudé pas qui bannes musulmans lors qui Qurbani li Waajib (recommander) rate sa l’occasion qui offert par Allah là.

 

Mois Zil Hadj li possède dans nous les yeux ene lien étroit avec ene élu d’Allah, Hazrat Ibrahim (as). Hazrat Ibrahim (as) so titre de Khalilloullah pas fine gagné avec facilité. Li fine besoin dans so la vie faire face à banne épreuves bien dures, mais qui par la grâce d’Allah li fine capave faire face d’ene façon remarquable. Hazrat Ibrahim (as) fine montrer la patience, la soumission et en contrôle de soi tout à fait extraordinaire. Ou pour rappelle so conviction dans Allah quand ti jette li dans ene grand du feu pour tuer li, rappelle aussi l’expression so Imaan sans faille et so courage quand li fine gagne l’ordre depuis Allah pour abandonne so madame (Hazrat Bibi Hajrah (ra)) et so garçon (Hazrat Ismaïl (as)) dans ene vallée sec et désert (qui plus tard pour vine Makkah).

 

Mais l’épreuve plus dure qui li fine besoin faire face, reste sans doute celui de sacrifice de so garçon unique (Ismaïl (as)). Sa même garçon bien aimé qui ti né quand Hazrat Ibrahim (as) ti ena plus qui 80 ans. Pourtant quand li ti gagne l’ordre pour faire so Qurbani pour Allah, tout de suite li fine prêt. (Noter qui Allah pas ti besoin ni sacrifice humain ni du sang Hazrat Ismaïl (as). So but ti pour tester Hazrat Ibrahim (as) afin qui li manifester clairement à qui sanlà li ti plus attaché : Allah ou bien so propre zenfant). Ce n’est qui après qui Hazrat Ibrahim (as) fine gagne la bonne nouvelle qui li fine passe so teste et qui li ti besoin faire Qurbani ene zanimaux à la place de so garçon. Ça acte de soumission là ti tellement apprécier par Allah qui line faire sa vine ene signe caractéristique de Hazrat Ibrahim (as).

 

Bannes principales enseignements qui nous tirer de comportement, réaction et geste de Hazrat Ibrahim (as) c’est justement so soumission sans limite à l’ordre d’Allah. En d’autres mots, Hazrat Ibrahim (as) ti prêt pour tous sacrifices pour soumettre li à volonté d’Allah. C’est sa zarme là qui nous besoin forger pour protège nous dans sa l’environnement (spirituelle) cotte nous pé vivre là et cotte pé vine de plus en plus difficile pour pratique nous Deen (religion). Besoin arrive à sacrifier nous bannes envies pour ene plus grand soumission à Allah, mais aussi pour contrer Shaytaan (satan) et nous Nafs (qui pousse nous vers le mal et mauvais actions). Qui Allah aide nous, protège nous et faire nous tini ferme lors nous pas. Ameen