بسم الله الرحمن الرحيم

 

KHUTBA JUMMAH

 

HAZRAT AMIR’UL MOMENEEN MUHYI-UD-DIN

AL KHALIFATULLAH

 

MUNIR AHMAD AZIM

 

28 Août 2009

 

RAMADHAN MUBARAK

 

(Résumé du Khutba Jummah)

 

Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine lire ça verset Quran suivant là:

 

 

“Yaaa’-ayyu-hallaziina ‘aamanuu kutiba ‘alay-kumus-siyaamu kamaa kutiba ‘alallaziina min-qablikum la-‘alla-kum tatta-quun”

 

O ou qui ena la foi, jeûner (roza) fine prescrire pou ou, couma li ti prescrire pou dimoune avant ou, afin qui ou marche dans chemin Allah. (Ch.2 Al-Baqara V.184)

 

Hadith: Hazrat Muhammad (s.a.w) fine dire: "Roza li ene protection et ene forteresse puissant." (Ahmad).

 

Le mois de Ramadhan couma mo ti mentionné semaine passé, li ene mois kot ene Momin bizin faire beaucoup sacrifice. Sacrifices ki li bizin faire c’est li lève le matin bonheur pour faire le Namaz Tahajjud et prend le Sehri. Dans mo Khutba de la semaine dernière mo ti cite ça hadith ki montrer l’importance du Sehri là. Mo ti dire aussi ki roza garde nous en bonne santé. Hadhrat Abu Hurairah (r.a) fine rapporter ki Hazrat Muhammad (r.a) fine dire: "Reste roza et ou pou reste en bonne santé." (Tibrani).

 

Ena aussi ene bienfait énorme dans le Iftaar. Celui ki content Allah, li pou presser pour ki le Iftaar vini et fini, pour ki li alle zoine so Créateur (dans Namaz). Namaz li ene source de bénédictions pour nous bane musulmans et pour l’humanité en entier. Namaz li empêche faire bane choses dégradants.

 

Dans périodes de roza, li conseillable pour faire beaucoup de Namaz nafil et faire Zikr pour gagne proximité avec Allah. Péna meilleure façon pour vini proche avec Allah ki par le Namaz et Zikr. Zikré Ilaahi permette ene dimoune pour rapproche li spirituellement avec Allah et découvert la beauté d’Allah (swt). 

 

Allah content ki So bane serviteurs faire z’éfforts dans So chemin et de ce fait Li fine établir le jeûne ki permette ene momin (croyant) pour gagne accès à so Seigneur avec ene le cœur purifiée. Le monde matériel ena tendance pour corrompe le coeur de bane dimounes. Alors bienfait de Ramadhan c’est ki pendant ene mois, ene momin bizin garde roza pour purifier so le cœur de bane attachements mondaines.

 

Allah dire dans Quran dans V.186 de Ch.2 Al Baqara:

 

 

“Shahru Ramazaa-nallaziii ‘unzila fiihil-Qur’aanu hudal-linnaasi wa bayyinaatim-minal hudaa wal furqaan.”

 

C’est dans mois Ramadhan ki Quran fine dessane pou guide l’humanité, en versets clairs, pou servi comme la loi.

 

Alors de ce fait li ti pou très bon pour nous l’âme et conscience si nous faire nous ene devoir pour lire le Quran dans ça mois béni qui nous pé vivre là et nous assizer et réfléchi lors chaque verset ki Allah (swt) fine révélé. Allah content bane ki sincère dans zot la foi et faire tout zot possible pour comprend bane messages ki ena dans So noble Quran.

 

Hadhrat Abdullah bin Umar (r.a) fine rapporter ki Hazrat Muhammad (s.a.w) fine dire: "Roza et le Qu'ran pou intercède en zot faveur le Jour du Jugement. Roza (sawm) pou dire: “O Allah! Mo fine empêche li pou mangé à so désire. Alors pour moi, accepter mo intercession en so faveur.’ Quran pou dire: ‘O Allah! Mo fine empêche li dormi. Alors accepter mo intercession en so faveur’. Intercession de tous les deux pou accepté”. (Ahmad, Tibrani, Hakim).

 

Hazrat Muhammad (s.a.w) fine dire: "O Abu Zarr (ene Sahabi) si to alle n’importe kot ça pou lire ene ayat (verset) du Quran, li ti pou pli bon pou toi ki ene centaine rakaats (nafil) de Namaz; si to alle n’importe kot ça pou gagne ene connaissance (de Deen), li ti pou pli bon pou toi plisse ki faire mille rakaat Namaz (nafil), même si to pratique (connaissance là) ou pas." (Ibn Majah).

 

Hazrat Muhammad (s.a.w) fine dire: "Le Jour du Qiyaamah ene couronne avec ene la Lumière bien fort pou placer lors la tête de bane parents de bane ki fine apprane Quran et ki pratique so bane la lois. Ça la Lumière là pou tellement fort ki li pou dépasse la Lumière du soleil ki pénétrer zot la cazes. Alors ki ou penser lors position de celui ki apprane Quran li-même et mette li en pratique?" (Ahmad, Abu Dawud).

 

Hazrat Muhammad (s.a.w) fine dire: "Personne pas fine donne so bane zenfants ene kitchoses meilleur ki adab (connaissance de la religion)." (Tirmidhi).

 

Ça bane hadiths là pé montrer nous valeur apprane et lire Quran et bane hadiths ki nous Bien-Aimé Prophète Hazrat Muhammad (s.a.w) fine dire et pratiquer. Le fait ki Ramadhan fine vini, nous bizin profite ça bane bienfaits là et attire le plaisir et la bénédiction d’Allah (swt) lors nous. Ki sanla pas pou oulé gagne de telle faveurs ki fine mentionner dans Quran et hadiths lors bienfaits apprane Quran, mette li en pratique et couma ene lotte hadiths dire, enseigne li aux autres. Ki valeurs bane parents bizin donne le Quran et enseigne li à zot enfants? Nous trouver ki récompense de ça bane parents ki dédié zot zenfants dans ça chemin ki amène la Lumière dans le cœur et dans le monde en entier.

 

Allah fine cause aussi dans plusieurs place dans Quran lors l’importance donne Zakaat. Zakaat bizin tirer lors bane capitals ki nous ena.

 

Ena aussi ene hadith ki rapporter par Hadhrat Abu Hurairah (r.a) ki dire ki Hazrat Muhammad (s.a.w) fine dire: "Chaque dimoune ena ene Zakaat (pou payer) et Zakaat lecorps c’est roza (sawm)." (Ibn Majah).

 

Zakaat ena plisse l’importance ki le Chanda; faudé pas nous néglige li. Mais ça veut pas dire aussi ki faudé pas nous contribuer dans le Chanda. Allah content avant tout ki en tant ki Musulman ki nous acquitte de nous devoirs et ene de ça bane devoirs là c’est distribuer le Zakaat. Le Saint prophète (s.a.w) ti ena l’habitude, malgré la pauvreté, li ti pé faire bocoup la charité pendant le mois de Ramadhan.

 

Allah dire dans Quran Ch.2 V.111:

 

 

“Wa ‘aqiimus-Salaata wa aatuz-Zakaah...”

Pratique la prière et donne la Zakaat

 

Dans Ch.9 At-Tauba, V.61, Allah dire:

 

“Bane sadaqat, ça vraiment pou bane sans le sou, bane pauvres, bane ki travail pou organisation ça fonds là, bane ki zot le coeur ena tendance pou tourné vers Islam, pou libère bane esclaves, bane qui ena dettes, pou tout travail dans chemin Allah et pou bane voyageurs (qui bizin aide). Ça, c’est l’ordre Allah. Allah conne tout et Li sage”.

Hazrat Muhammad (s.a.w) fine dire: “Béni est celui ki dépense de so bane du biens ki li fine gagner sans commette péchés”. (Ibn Adi, Bazzar).

Hazrat Muhammad (s.a.w) fine dire: "Meilleur charité c’est kan ene Musulman li gagne ene connaissance (de Deen) et li partage li avec so frère musulman." (Ibn Majah).

Ena ene hadith ki mentionner dans (Bukhari) kot le Saint Prophète Hazrat Muhammad (s.a.w) fine dire ki le Jour du Jugement li pour parmi bane séki pauvres. Li fine conseille so Ummat pour pas attacher avec bane luxes de ça le monde là. Le mois de Ramadhan li permette ça momin là pour détache li de ce fait avec bane choses mondaines, ki bien temporaire.

 

Hadith: Hazrat Muhammad (s.a.w) fine dire: “Nennié aparte duahs capave change le décret (d’Allah), et nennié aparte la droiture augmente la vie.”(Tirmidhi).

 

Alors nous faire duahs ki Allah aide chakaine d’entre nous pou faire zéfforts vers Li (Allah) et récolter So l’amour. Anou montrer nous bane zenfants l’importance de bane enseignements de L’Islam pour ki Allah satisfait avec nous comme Dai-Illallah et comme parents. Péna l’âge pou apprane. Ki nous tous, vieux et petit nous joindre la main ensam pour enseigne la religion de L’Islam et enseigne li aux autres, ki li ene l’autre musulman ou bane dimounes de bane différents religions. Nous travail en tant ki Dai-Illallah c’est ki nous bizin passe le message de L’Islam. C’est Allah en retour ki donne Imaan (la foi). Nous nous bizin faire nous devoir et passe le message, ki li à nous bane zenfants et à l’humanité. Ki Allah illumine nous l’âme et enrichi nous l’esprit par So bane connaissances dans ça noble mois de Ramadhan là et ki chakaine parmi nous profite de ça bane moments exceptionnelles là. Le Ramadhan de l’année passé ti certes différents de ça l’année là et nous pas conner ki pé réserver pour nous le Ramadhan prochain. Jazakallah.

 

Insha-Allah. Ameen Soumma Allahoumma Ameen.