Text Box: Bismillah-ir-Rahman-ir-Rahim KHUTBA JUMMAH HAZRAT AMIR’UL MOMENEEN MUHYI-UD-DIN AL KHALIFATULLAH MUNIR AHMAD AZIM 28 Novembre 2008 (Résumé du Khutba Jummah de 1½ temps) Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine lire ça bane versets suivants là, lors qualités d’ene: CROYANT ENE CROYANT BESOIN VÉRIDIQUE Ene croyant li besoin cause la vérité, dire la vérité, vivre dans la vérité parceki la vérité amène vers paradis tandis ki menti amène vers beaucoup kitchose ki mauvais et sa fini par rentre dans l’enfer. Dans ene Hadith ki trouve dans Sahih Bukhari et Sahih Muslim, le Saint Prophète (s.a.w) fine dire : « La vérité amène vers la piété et la piété amène vers paradis. Ene personne continuer cause la vérité jusqu’à ki li être réponne kot Allah comme ene Siddique (Celui ki content la vérité). Mensonge amène vers l’iniquité (injustice ou immoralité) et l’iniquité amène vers l’enfer. Ene personne pou continuer cause menti jusqu’à li être appeler kot Allah comme menteur. » ENE CROYANT FAUDRÉ PAS TRICHER (COQUIN) Ene croyant faudrait pas li tricher, faudrait pas li embête dimoune. Au contraire dimoune besoin gagne confiance avec li. Dans ene Hadith ki trouve dans Sahih Muslim, le Saint Prophète (s.a.w) fine passe kot ene manger (dans bazar) et fine mette so la main là-dans et li humide (quoi qui so surface paraître sec). Li fine demande propriétaire de sa nourriture là : « Ki été sa ? » L’homme fine réponne : « Li fine endommagé par la pluie, O Messager d’Allah. » Alors le Saint Prophète fine dire : « To pas fine place séki fine endommagé là haut afin ki dimoune capave trouve li. Celui ki tricher li pas parmi nous. » Celui ki ene croyant faudrait ki dimoune inspire confiance en li. ENE CROYANT BESOIN PENA JALOUSIE (HASAD) Le cœur d’ene croyant bizin propre. So le cœur besoin péna la jalousie. Jalousie c’est ene faille malade. C’est ene maladie ki consomme nous la foi. Si nous le cœur ena la foi, faudrait pas ki jalousie trouve so place là-dans. Le Saint Prophète Muhammad (s.a.w) fine dire : « La foi et la jalousie pas capave ensemble dans le cœur du serviteur » et dans ene l’autre Hadith, le prophète (s.a.w) fine dire : « Dimounes pou dans le bien aussi longtemps ki zot pas jaloux ene à l’autre ». Le cœur d’ene croyant besoin propre. Anas bin Malik (r.a) fine raconté : « Nous ti pé assizé avec le Prophète (s.a.w) et li fine dire : « Ene habitant du paradis pou vine vers zot ». Alors ene homme dépi bane Ansar fine vini. So la barbe trempé dépi so wuzu et li ti pé apporte so sandalettes dans so la main gauche. Le lendemain le Prophète (s.a.w) fine dire la même chose et même dimoune fine apparaître couma li ti été hier. Lors du troisième jour, le Prophète (s.a.w) fine dire la même chose et même dimoune fine paraître. Quand le Prophète (s.a.w) fine aller, Abdullah Ibn Al’ As fine suivre ça dimoune là (l’homme du paradis) et fine dire li : « Mo fine disputer avec mo papa et mo fine faire serment ki mo pas pou vine la caze trois jours et mo fine penser ki mo capave reste kot toi jusqu'à sa délai là expirer » Alors missié là fine dire : « Très bien ». Anas (r.a) fine dire : « Abdullah ti ena l’habitude dire couma li pé reste avec li de ça trois nuites là et jamais li fine trouve ça dimoune là lever le soir pou faire Namaz. Mais kan li réveillé dépi so sommeil et change position, li pou mazine Allah et dire : « Allahu Akbar » jusqu'à ki li levé pou Namaz Fajr. Abdullah (r.a) fine dire : « Li cause juste le bien. Kan ça trois jours là ti fini et mo fine remarquer ki so bane actions pas ti remarquable. »  Abdullah (r.a) fine dire : « O serviteur Allah ! Pas fine ena la guerre entre moi et mo papa mais mo fine entend le Prophète (s.a.w) dire à trois reprises : « Ene dimoune du paradis pé vine vers zot » (à chaque fois ki ça dimoune là paraître, c’est Toi). Alors mo fine décide reste kot toi et guetter ki to faire afin ki mo capave suive to l’exemple. Mais mo pas fine trouve toi faire kitchose spécial. Alors ki kitchose capave été séki le Prophète (s.a.w) fine élève toi ça hauteur là. » Missié là fine réponne : « C’est seulement saki to fine trouvé. » « Kan mo pé alle, li fine appelle moi et li fine dire : « C’est seulement saki to fine trouver. Mais mo péna nannié contre ene musulman dans mo le cœur et mo pas jaloux personne pou faveur ki Allah fine donne li. » Abdullah fine dire : « Voila ki fine élève toi ça niveau là et ça ki nous pas capave gagner. » Quoi ki ça dimoune là so bane actions de Ibaadat (actes d’adoration) peu, mais li fine gagne ene place au paradis pou so bon caractère ki li ena. Ki serti faire ene quantité Ibaadat kan nous le cœur malpropre, et rempli avec rancune, jalousie, la haine et les autres maladies encore. Nous personnalité même li ene ditort pou les autres. Nous voisin pas pou en sécurité de nous bane mauvais actions. C’est pourquoi le Saint Prophète Muhammad (s.a.w) fine dire concernant ça madame ki passe la nuit dans Namaz et so bane jours dans Roza mais li ena l’habitude insulté so bane voisins, alors le Saint Prophète (s.a.w) fine dire ki li pou dans l’enfer. (Sahih Bukhari) ENE CROYANT BESOIN SINCERE La sincérité c’est ene qualité ki ene croyant besoin ena. Le Saint Prophète Muhammad (s.a.w) fine dire ki la religion c’est la sincérité et quand bane Sahaba fine demande à ki, le prophète (s.a.w) fine dire : « A Allah, à So Livre, à So Messager, à bane chefs, bane musulmans et à zot entourage ». Kan bane Sahaba ti prend Baï’ah (pacte d’allégeance) dans la main du Saint Prophète (s.a.w), zot ti prend l’engagement pou observe Salat (Namaz) et donne Zakaat et pou être sincère envers bane musulmans. ENE CROYANT BESOIN TENIR SO PROMESSE Ene croyant besoin tini so promesse. Quand nous fine faire ene promesse nous besoin honore nous promesse si li dans cadre Islamique. Dans Surah Maida, deuxième verset, Allah pé dire :   « O bane croyants ! Respecter zot l’engagement. » Dans ene l’autre verset Quran ki trouve dans Surah Al Isra (Bani Israel), Allah pé dire :  « Et tini zot l’engagement car zot pou être interrogé concernant zot engagement ». Kan nous fine faire ene promesse nous besoin tini li sans quoi nous pou être questionné kot Allah. Ene promesse c’est ene l’engagement ki nous fine prend avec Allah. Allah mette nous en garde contre So punition, si nous pas tini nous parole, nous l’engagement, nous promesse. Dans Chapitre 61 Verset 2&3, Allah pé adresse à bane croyants en ces termes :  « O bane croyants, ki faire zot dire kitchose ki zot pas faire ? C’est ene grand déshonneur auprès d’Allah, ki zot dire ene kitchose ki zot pas faire. » Ene croyant faudrait pas ki li casse so promesse. Li pou tombe bas devant Allah et dans lizié de bane dimounes. Le Saint Prophète Muhammad (s.a.w) fine dire : « Signes de hypocrisie c’est trois : Kan li causer li cause menti. Kan li faire ene promesse li casse li et quand faire li confiance, li faire malhonnête. » Si nous conner, nous pas pou capave tini nous promesse alors nous besoin pas faire li et cela évite nous tombe parmi catégorie de bane hypocrites. ENE CROYANT BESOIN AGIR BIEN ENVERS LES AUTRES Ene croyant besoin ena ene façon d’agir envers les autres. Li besoin pas cause brîte ou vulgaire avec les autres. Li besoin ena ene manière de parler ki li pas blesse sentiment de celui ki pé écoute li. Dans ene Hadith ki trouve dans Sahih Bukhari et Sahih Muslim, le Saint Prophète Muhammad (s.a.w) fine dire : « Meilleur parmi zot c’est bane ki agir bien envers les autres. » Pendant dix banané Anas (r.a) fine servi le Saint Prophète (s.a.w) mais tender ki Anas (r.a) pé dire lors façon ki le Saint Prophète (s.a.w) fine agir envers li. « Mo fine servi le Prophète d’Allah (s.a.w) pendant dix banané et jamais Li fine dire moi « Ouf » si mo fine faire quelque chose ou tel chose. » Hadith rapporté dépi Sahih Bukhari et Sahih Muslim, façon de parler envers les autres, li bien important. Nous la langue si nous conne servi li, nous capave construire beaucoup kitchoses, mais si nous mal servi li, nous capave détruire beaucoup kitchoses. Et la langue ene croyant li bizin constructif non pas destructif. Le Saint Prophète Muhammad (s.a.w) fine dire : « Mauvaise langage et vilain causer péna nannié à faire avec l’Islam ». (Tirmidhi) Agir bien envers les autres li pou ena so poids le jour du jugement lors balance car le Saint Prophète (s.a.w) fine dire : « Saki pou pèse lourd dans balance ene croyant le jour de la résurrection c’est agir bien (envers les autres). Certes Allah détester bane ki prononce mauvais paroles et vilain causer. » (Tirmidhi) Beaucoup l’emphase le Saint Prophète (s.a.w) fine metter lors agir bien envers les autres. Dans ene Hadith Usama Bin Sharayk (r.a) pé rapporté : « Nous ti pé assizé avec le Prophète (s.a.w) couma dire ti ena ene zoiseau lors nous la tête. Personne pas ti pé causer. Quelques dimoune fine vine vers li et fine demandé : « Ki serviteur pli aimé kot Allah ? » Li fine dire : « Bane ki agir bien envers les autres. » Si tant li important ki bizin agir bien envers les autres ki le Saint Prophète Muhammad (s.a.w) fine faire nous conner ki sa bon agissement là amène vers niveau couma dire garde Roza ou faire Namaz Tahajjud. Le Saint Prophète Muhammad (s.a.w) fine dire : « Par so vertus de so bon agissement envers les autres, ene dimoune capave arrive niveau de quelqu’un ki ena l’habitude garde Roza et faire Namaz (le soir). (Tirmidhi) Le Saint Prophète Muhammad (s.a.w) fine conseil Abu Dharr (r.a) : « O Abu Dharr ! Est ce qui mo dire toi deux qualité ki facile à atteindre mais ki pou pèse bien lourd dans balance ? » Li fine dire : « Bien sûr, O Messager d’Allah ». Li fine dire : « To bizin agir bien envers les autres et reste tranquille beaucoup. Par celui dans ki mo la vie été, péna nannié de saki dimounes fine atteindre meilleur ki sa deux kitchoses la. » Dans ene l’autre Hadith ki trouve dans Ahmad et Tirmidhi, le Saint Prophète Muhammad (s.a.w) fine dire : « Ene bon l’habitude c’est ene bénédiction et ene mauvais l’attitude c’est ene calamité. La piété prolonge la vie et la charité empêche ene mauvais la mort. » ENE CROYANT BESOIN ENA LA HONTE (HAYA) Ene croyant besoin ena ça qualité ki appelle la honte (haya). Le Saint Prophète Muhammad (s.a.w) ti ene dimoune ki ti ena beaucoup la honte. Abu Saïd Al Khudri (r.a) fine dire : « Le Messager d’Allah ti pli honter ki ene vierge ki cachiette dans so la caze. Si li trouve quelque chose ki li détester, nous pou conne li lors l’expression de so figure. (Sahih Bukhari & Sahih Muslim) Quand ene personne ena la honte li pas pou tombe dans mauvais action. Saki veut dire ki la honte c’est ene bouclier contre mauvais action. Imraan Ibn Husain (r.a) pé rapporter ki le Saint Prophète (s.a.w) fine dire : « La honte apporte le bien. » (Sahih Bukhari & Sahih Muslim) Dans ene l’autre Hadith ki trouve également dans Sahih Bukhari et Sahih Muslim, le Saint Prophète (s.a.w) fine dire : « La foi ena soixante dix branches. Meilleur c’est la Ilaaha Illallah et le pli tiguite c’est enlève ene kitchose ki cause du tort lors chemin. La honte c’est ene branche de Iman. » ENE CROYANT BESOIN GENTIL ENVERS LES AUTRES Ene croyant li besoin gentil envers bane dimounes. Li besoin pas brîte. Sa gentillesse là pou rapproche li pli près avec bane dimounes. Allah Li Gentil et Li content la gentillesse. Allah content pou trouve ça qualité là dans So bane serviteurs. Le Saint Prophète Muhammad (s.a.w) ti encourage la gentillesse et li fine dire : « Là kot ena la gentillesse c’est joli et là kot péna la gentillesse c’est dégoûtant. » (Sahih Muslim). Nous besoin agir gentiment envers bane dimounes même dans bane situation provocante. Abu Huraira (r.a) fine dire « Ene Bedoin fine uriner dans Masjid et bane dimoune ti oulé régler so compte mais le Saint Prophète (s.a.w) fine dire laisse li jette ene cuvette de l’eau lors l’urine là car zot fine être dure envers li (ça Bédouin ki fine uriner là). (Sahih Bukhari) Agir gentiment et cause bien et cela même devant quelqu’un ki mauvais. Dans z’histoire Moussa (a.s), Allah enseigne So serviteur Moussa (a.s) et Haroun (a.s) couma pou adresse la parole avec Pharaon.  « Alle kot Pharaon, li rebelle. Cause avec li bane parole courtois peut être li ava réfléchi ou li gagne la frayeur. » (20 : 43- 44). Ene croyant besoin gentil dans so la caze. Le Saint Prophète Muhammad (s.a.w) fine dire à Aisha (r.a) : « O Aisha reste (toujours) gentille car si Allah oulé du bien à ene ménage li guide zot vers gentillesse. » Ene dimoune ki ena gentillesse, li pou être épargné de l’enfer. Dans ene Hadith ki trouve dans Tirmidhi, le Saint Prophète (s.a.w) fine dire : « Est ce qui zot oulé ki mo dire zot ki sanla pou être interdit de l’enfer ou dépi ki sanla l’enfer pou être défendu ? Li pou être défendu à celui ki gentil, (ki ena) ene cœur tendre et (ki li ene) bon dimoune. » ENE CROYANT BESOIN ENA PITIÉ Ene croyant besoin ena ça qualité là ki nous appelle pitié. Pitié pas seulement pou so famille, so zenfant ou so camarades mais pou tous dimounes. L’Islam enseigne nous ki nous besoin ena pitié pou bane ki lors la terre. Celui ki péna pitié pou bane dimoune, Allah pas pou ena pitié pou li. Dans l’histoire Islamique ena beaucoup l’exemple lors pitié ki ene croyant besoin ena. Dans ene Hadith ki trouve dans Sahih Bukhari et Sahih Muslim, le Saint Prophète (s.a.w) fine dire : « Mo fine commence Namaz et mo ti ena l’intention faire li longue mais mo fine entend ene zenfant pleuré alors mo fine faire Namaz là courte parceki mo conner ki qualité ça maman là so situation pou été. » Ene bedoin fine vine kot le Saint Prophète ( s.a.w) et demande li : « Est ce qui to embrasse to bane garçons ? Car nous pas embrasse zot. » Li fine dire : « Ki mo capave faire pou toi kan Allah fine enlève pitié dépi to le cœur. » (Sahih Bukhari & Sahih Muslim) Dans Hadith Sahih Bukhari et Sahih Muslim ena la narration suivante. Le Saint Prophète (s.a.w) ti pé embrasse Al Husain Ibn Ali quand Al Aqra Ibn Habis Al Tamimi ti pé assizé avec li. Al Aqra dire : « Mo ena dix zenfants et jamais mo fine embrasse ene parmi zot. » Le Saint Prophète (s.a.w) guette li et dire : « Celui ki péna pitié, li pas gagne pitié. » Dans l’histoire de l’Islam fine rapporter ki Umar (r.a) ti pé nomme ene homme pou ki ena l’autorité lors bane musulmans. Mais Umar (r.a) fine tanne li dire quelque chose pareil couma Al Aqra fine dire ; alors Umar pas fine nomme li dans sa poste là et Umar (r.a) fine dire : « Si to le cœur péna pitié pou to propre zenfant alors couma to pou ena pitié pou bane dimounes ? Par Allah jamais mo pou nomme toi (comme chef ‘Amir’ pou guide bane musulmans). » Pas juste envers bane dimounes ki nous besoin ena pitié mais aussi envers zanimaux. Si envers zanimaux nous pou ena pitié, li logique ki nous pou ena pitié envers dimounes couma nous même. Abu Hurairah (r.a) pé rapporté ki le Saint Prophète (s.a.w) fine dire : « Ene missié ti pé marché jusqu’à ki li fine gagne bien soif. Li trouve ene puit. Alors li fine alle en bas dans puit là pou boire bien, ensuite li sorti. Li trouve ene li chien so la langue traîné par la soif. Alors li fine dire « Sa li chien là li bien soif couma mo ti été. » Alors li fine alle en bas dans puit là, li fine rempli so soulier avec de l’eau, tini li avec so la bouche et ensuite li fine donne li chien là boire. Allah fine content avec action sa missié là et ensuite li fine pardonne li. Zot fine demandé : O Messager d’Allah, est ce qui nous pou être récompenser pou pitié envers zanimaux? Li fine dire: « (Oui), ena ene récompense kan ou servi n’importe ki creatures vivant.” (Sahih Bukhari & Sahih Muslim) Juste à cause fine mal agir envers ene zanimaux et pas fine ena pitié pou sa créature là ene madame fine trouve so place dans l’enfer. Dans ene Hadith ki trouve dans Sahih Bukhari et Sahih Muslim, Ibn Umar (r.a) pé rapporté ki le Saint Prophète (s.a.w) fine dire : « Ene madame fine être puni à cause ene chat ki li ti enfermer jusqu’à ki li (chat la) fine mort de faim. Fine jette li dans l’enfer. Fine dire et Allah conne plus : « To pas fine nourri li ou donne li de l’eau quand to fine ferme li ni to fine laisse li libre afin ki li capave mange ban lévers de la terre. » Ene fois quand le Saint Prophète (s.a.w) ti arrête ene place ensemble avec so bane compagnons, ene zoiseau fine apparaître en haut couma dire pé rode so aide et pé plaigner à li concernant ene dimoune ki fine prend so dizef. Li (s.a.w) fine dire : « Ki sanlà fine rende li triste en prenant so dizef ? » Ene homme fine répond : « O Messager d’Allah ! Mo fine prend li. » Le Saint Prophète (s.a.w) fine dire : « Retourne li, par pitié pou li. » (Sahih Bukhari) Insha-Allah la semaine prochaine mo pou continué mo Khutba lors bane qualités d’ene croyant. Ki Allah pardonne nous pour nous bane péchés et nous bane faiblesses et purifier nous et compte nous parmi bane vrais croyants. Ameen