Bismillah-ir-Rahman-ir-Rahim

 

KHUTBA JUMMAH

DE HAZRAT AMIR’UL MOMENEEN MUHYI-UD-DIN

 

29 FÉVRIER 2008

 

(BAIT-UL-ZIKR – NORD DE MAURICE)

 

 

Hazrat Amir’ul Momeneen Muhyi-ud-Din fine commence Khutba avec Tashahhud, Ta’ouz et Surah Al Fatiha, après li fine lire ça bane versets suivant là: Surah Luqman Ch.31 V.14

 

Wa Was-Saynal insaana biwaalidayh: hamalat-hu ummuhuu wahnan alaa wahninwwa fisaaluhuu fii amayni anish-kur lii wa liwaalidayk: ilayyal-masiir.

 

Nous fine prescrire pou dimounes à propos zot papa et maman – car so maman fine saryé li, supporte li dans la peine lor la peine, et fine sévrer li après deux ans. Remercier Moi et to papa – maman aussi. Et c’est vers Moi, to destination.

 

Azordi li chagrin pou trouve couma bane zenfants fine oublié valeur zot parents. Tipti zenfants pé fronté, pé jouré, avec qui? La réponse c’est chagrinant, parski ça fronté-là, ça zouré-là, ça manque du respect-là pé dirige vers celui qui fine souffert pou grandi li. C’est le parent.

 

Aujourd’hui ene parmi bane raisons ki faire ena tant de désordre partout, c’est le climat social fine détérioré beaucoup. Dimoune oubliyé devoir ene à l’autre. La bonne marche ene société, li dépende lor ene bon l’entente familiale. L’environment familiale réfléte la société. Si l’Europe pé faire face autant de crimes, bane zenfants illégales, bane prostitués, bane divorces, bane drogue c’est parceki climat social pé pourri dans ça bane pays-là.

 

L’entente familiale li extrêmement important. Devoirs envers parents forme partie pour ena ça l’entente là. Pour accomplir nous devoir envers nous parents, nous bizin conne zot valeur. C’est du moment ki nous conne valeurs ene kitchose ki nous apprécié li. Tant ki so valeur grand, nous pou ena ene grand appreciation pour ça kitchose là.

 

Tous les jours bane zenfants bizin faire beaucoup duah pour zot parents. Ki Allah recompense nous bane parents dans ça le monde là et dans l’autre monde pour l’éducation ki zot fine donne nous et grâce à zot z’éffort (par l’ordre d’Allah) et zot bénédiction, nous pé capave faire bane bons pas à l’avant.

 

O Allah pardonne nous, pardonne nous parents, pardonne bane croyants, jour ki ena pour rendre compte. O Allah nous implore To pardon et nous demande Toi, ki O Allah garde nous dans To l’obéissance et l’obéissance nous parents. (Amîn)

 

Pou conne valeur maman, mo cite ça hadith là: “Ene z’homme fine vine kot le prophète d’Allah (s.a.w) et fine demande li: “O prophète d’Allah, Qui sanlà plisse mérité mo l’affection? Le prophète (s.a.w) fine dire: ‘To Maman”. L’homme lète (s.a.w) fine dire: ‘To Maman”. L’homme lète (s.a.w) fine dire: ‘To Maman”. L’homme là fine dire: ‘Qui sanlà après?’ Le prophète (s.a.w) dire: ‘To Maman’. L’homme dire: ‘Qui sanlà après?’ Le prophète (s.a.w) dire” ‘Après to papa’. (Bukhari)

 

Avant naissance ene zenfant, ene maman bizin porte zenfant là dans so ventre pendant ene période maximum de neuf mois. Li bizin prend tout bane precautions pour emporte ça zenfant-là avec li. Faiblesse lor faiblesse. Douleur lor douleur. Et kan l’heure pour mette ça zenfant là au monde fine arrivé, c’est ene question de vie ou de mort pour maman là. Ene souffrance terrible. Ene souffrance ki seul ene maman ki conné.

 

Après la naissance c’est ene l’autre étape bien difficile pour la maman. Bébé là, pleuré la nuit. Maman là pas dormi. Faire zenfants là boire du lait. De temps en temps change so drapeau ou sois couches pour pas laisse li dans mouyé et garde li dans propreté. Et de dire, ça quantité ça maman là prend soin de ça zenfant là, si ene jour ça zenfant là fine désobéir li, ki kantité so lécoeur pour fermal.

 

Kan ene zenfant petit, li malade beaucoup parceki so constitution faible. La moindre souffrance de so zenfants c’est so grand tracas. Li pas oulé trouve so zenfant souffert. Et si nous faire so lécoeur fermal ki kalité dure, li dure pour li. Ene zenfant kan li souffert, li malade, li ene pli grand tracas parceki li pas conne causé, pas conné ki li pé gagné, alors li pas facile pour ça maman là!

 

Le plus grand cadeau ki ene parent capave donne so zenfant c’est ene bon l’éducation. Parents dépense beaucoup pour l’éducation so zenfants. Zot faire beaucoup sacrifice. La pluie ou soleil, papa rinté pour trouve so zenfant heureux. Tous les jours, maman là habille zenfant là, prepare so dipain et envoye li l’école. Parfois bizin alle quitte li. Midi kan zenfant là vini, so dipain fine fini pare et tantô kan li sorte l’école, maman là donne li so dit hé et prepare li pour alle so Madrassa. Zenfant là tous les jours bizin ena so ti kass pour li acheté gato.

 

Kan ene zenfant alle college, c’est par centaines de roupies ki dépenser. Leçon même aujourd’hui ene sujet coûte plisse ki trois cent – quatre cent roupies. Ena même coûte cinq cent roupies, dépanne lor ki sujet ça.

 

Zamais ene zenfant pou capave rembourse ça quantité ki so parents fine dépenser lor li. Parfois mangé difficile dans la caze, mais pé ramasse ti sous, ti kass pour paye leçon.

 

Ene maman parfois li boire di thé pire et li garde du lait pour so zenfant. La viande pour zenfant et lézo pour maman. Parfois ena maman dormi ventre vide. La misère, la souffrance li supporté.

 

Papa couma ene moteur ki pas en panne. Papa c’est li qui occupe le financement de la caze. Li travail bien dure. Parfois papa faire détrois travail pour capave soutenir so la famille. Pour li péna beau temps ou mauvais temps. La pluie ou soleil zenfant là pour bizin manger. Si ene papa péna ene bon place travail, zenfant là gagne honte pour dire ki travail so papa faire.

 

Travail pas ene la honte aussi longtemps ki li halaal. Ki pli bon mangé ki celui ki mange à la sueur de so front. Li pas pé coquin! Ene papa li pareil couma ene moteur ki pas en panne. Tous les temps li ene marche. Ki kantité respé nous bizin ena pou ça papa-là. Abdullah bin Amr pé raconté ki le Messager d’Allah (s.a.w) fine dire: “Le plaisir d’Allah trouve dans le plaisir papa et le mécontentement d’Allah trouve dans le mécontentement papa”. (Tirmizi)

 

Ena zenfant li honteux pou dire intel mo papa parceki soit papa là vieux ou bien li pauvre. Ena li dénigré, faire perdi point so papa divant dimounes et li bouffone li. Kan ou assizé ou réfléchit ki kantité ene papa faire, ou ti pou faire tous pour faire ça papa là plaisir. Ena ene parole ki dire: “On connaît la valeur du sel quand il n’y en a plus et celle d’un père après sa mort”. Mais li pour trop tard l’heure-là.

 

Ene maman ou ene papa tous les temps zot pour cachiette défaut zot zenfants. Zot pou garde l’honneur zot zenfants. Même si ene zenfant li ene bandit jamais li pou manqué l’affection so parents. Le monde capave dégoute li, mais pas so parents. Ça valeur nous maman et papa. Nous bizin réfléchi beaucoup lor là.

 

Dans Quran Surah Bani Israel Ch.17 V.23, Allah dire: “To Maître fine declarer: ‘Adore Li seul, et traite papa, maman bien. Si ene de zot, ou bien les deux fine arrive à ene l’âge avancé chez toi, pas cause avec zot avec fièreté, pas répousse zot, mais cause avec zot avec respé.”

 

Ça hadith ki mo pou dire là, bien souvent, nous fine tender ça, mais li longue, mo pou cite so premier là-dans.

 

Ibné Umar (r.a) fine raconté ki le prophète (s.a.w) fine dire: “Pendant ki trois personnes ti pé marché la pluie fine commence tombe et zot fine bizin rentre dans ene la cave montagne. Ene gros roche fine roule et fine bloque l’entrée cave là. Zot fine dire entre zot-même, ‘Nous invoque Allah avec plus bane bon actions ki nous fine faire, afin ki Allah capave retire roche-là.” Ene parmi zot fine dire: ‘O Allah, mo parents ti vieux et mo ti ena l’habitude alle faire mo (bane zanimo) mange l’herbe. Létemps mo retourné mo retire du lait, mo mette ça du lait là dans ene récipient pour mo parent boire. Après ki zot fine boire, mo ti pé donne, mo bane zenfants, mo famille et mo madame. Ene jour mo fine retardé pour retourné et mo fine trouve mo parents pé dormi et mo pas ti content pour reveille zot. Bane zenfants ti pé pleuré kot mo lipié à cause la faim. Nous fine continué reste comme ça même jusqu’au matin. “O Allah si To considère ki mo fine faire ça à cause Toi, mo prié Toi pour retire ça roche-là afin ki nous capave trouve léciel.” Alors roche-là fine avance un peu.

 

Alors si pas ti ena ça bon traitement parent là, ki bon action ti pou present devant Allah, et faudé ki Allah fine bien content avec ça action-là, ki li fine avance roche-là un peu.

 

Abdullah bin Masrud demande le prophète (s.a.w) pour li dire li ki action ki Allah pli content. Le prophète (s.a.w) fine réponde: “Faire Namaz à l’heure, agir aimablement avec parents.” Abdullah fine demande la troisième action. Le prophète (s.a.w) fine dire li: “Faire Jihad dans le chemin d’Allah”. (Bukhari & Muslim)

 

Abu Umamah (r.a) pé raconté ki ene dimoune fine dire: “O prophète d’Allah, ki droits bane parents ena lor zot zenfants?’ Li fine réponde: “Zot to paradis ou to l’enfer”. (Ibn Majah)

 

Dans ça hadith là, nous trouvé ki parents so valeur li extrêmement haute. Celui ki faire lécoeur so parents content, li capave gagne ene place dans paradis au cas contraire li pour trouve so place dans l’enfer.

 

Ena ene parole ki dire: “On peut tout acheter, sauf un père et une mère”. Ena ene kantité vérité dedans. Avec l’argent tout saki nous envie nous capave achété. Mais ene maman ou papa, même si nous ena fortune grandeur ça lémonde là jamais nous pour capave gagné. Ene fois zot fine quitte ça lémonde là, zot fine aller péna zot remplaçants. Ena ene parole ki dire: “Perdre sa mère c’est perdre les douceurs, perdre son père, c’est perdre l’honneur.”

 

Dans Quran surah Al-Baqarah Ch.2 V.215, Allah pé dire: “Dire zot: ‘Ou dépense en bien, kan ou donne ou papa, maman, ou proches parents ...”

 

L’obéissance envers parents veut dire aussi vine en aide à zot financièrement. Faudré pas nous avare pour dépenser pour le bien-être de nous parents. Nous bizin garde zot couma ene fleur. Non pas kan nous fine commence travail, nous declare nous même maman et papa dans la caze. Nous sauté lor nous l’argent, maman ou papa pas capave dire ene mot, bizin ferme la bouche, guette et écoute. L’autorité zot népli ena. Parents là souffert à cause ça détroi sous ki pé ammène-là. Li ene devoir lor nous pour nous aide nous parents financièrement.

 

Jabir (r.a) pé rapporté ki le prophète (s.a.w) fine dire: “Celui ki ena ça trois kitchoses là dans li, Allah pour faire so la mort facile et pour mette li dans paradis: Ena pitié vers bane faible, être bon envers parents et agir bien envers l’esclave”. (Tirmizi)

 

Faudré jamais nous dénigré nous parents devant quique-ce-soit. Tous les temps nous bizin garde zot l’honneur. Mo pou cite zot l’example de Alkamah.

 

Anas bin Malik (r.a) pé raconté ki dans l’époque du prophète Muhammad (s.a.w) ti ena ene homme ki ti appel Alkamah (r.a). Li ti bien religieux. Ene fois li fine tombe bien malade ki so madame fine alle côté le prophète Muhammad (s.a.w) et fine dire: “Mo mari bien malade et li paraite ki so dernier l’heure fine arrivé. Mo demande toi faire duah pour li”.

 

Le prophète Muhammad (s.a.w) dire Bilal (r.a), Ali (r.a) et Ammar (r.a): “Alle guette ki position Alkamah été.” Bane là alle kot Alkamah (r.a) et dire li recite Kalimah (LAA ILAAHA ILLALLAH). Mais zot trouve Alkamah (r.a) pas pé capave recite parceki so la langue fine amarré et pas pé capave lire le Kalimah. Zot envoye Bilal (r.a) kot le prophète (s.a.w) pour informe li la situation. Bilal (r.a) fine raconte tout et li dire: “Nous fine faire nous mieux pour aide li recite Kalimah mais so la langue, li attaché”. Kan le prophète Muhammad (s.a.w) fine tende ça li fine dire: “Estceki Alkamah so parents encore vivant?” Zot fine réponde: “Papa là fine mort, maman là li vivant mais li bien vieux.” Le prophète Muhammad (s.a.w) fine dire: “Bilal, aller et faire li mo salaam et dire li (Alkamah so maman) vine ene coup si li capave ou bien mo-même mo pou vine kot li.” Kan maman Alkamah fine gagne nouvelle tout de suite li fine prêt pour alle kot le prophète Muhammad (s.a.w). Avec l’aide ene baton, li fine arrive kot le prophète Muhammad (s.a.w) et li fine faire li (le prophète) salaam. Le prophète demande li: “Ki kalité dimoune Alkamah été? Pas cause menti.” Maman là dire: “Alkamah li bien pieux et devoué et garde so Roza.” Le prophète Muhammad (s.a.w) fine dire: “Ça correct. Mais couma li agir envers ou?” Li fine réponde: “Mo ti bien déplaire avec li. Li donne l’importance so femme plisse ki moi et li faire moi vine ene soubalterne. A cause ça mo déplaire avec li. ” Le prophète Muhammad (s.a.w) réponde: “Punition Allah pli sévère ki ça. Pardonne li (to garçon) au cas contraire ni so Namaz ou bane Nawafil ou Roza pour accepté.” Maman là pardonne Alkamah.(r.a). Le prophète Muhammad (s.a.w) envoye Bilal (r.a) pour alle guette position Alkamah (r.a). Kan Bilal (r.a) arrive là-bas li trouve Alkamah pé recite le kalimah. Même jour li mort.

 

Ça li ene leçon pour nous tous ici (dans ça lémonde ki nous pé vivre là) et surtout bane frères, pour nous réfléchir beaucoup, ki place, surtout ena ça bane kalité zhommes là ki place zot femme pli là-haut ki zot maman et mo message li en générale pour tous pour ki nous réfléhi beaucoup lor là et nous pas place nous madame pli supérieur ki nous maman et néglige nous maman.

 

Souvent de fois ena coupe relation avec parents. Dans ene hadith ki trouve dans sahih Al Bukhari le prophète Muhammad (s.a.w) fine dire: “Celui ki coupe relation familiale pas pour rentre dans paradis.”

 

Dans Quran Allah pé dire dans Ch.31 V.15: “Reste avec zot dans ene façon convenable dans ça la vie là; Mais suive chemin bane ki tourne vers Moi.”

 

Asmaa, tifille Abu Bakr (r.a) fine dire: “Mo maman fine vine côté moi et li ene polythéiste, pendant le pacte de Quraish. Mo fine dire: O prophète d’Allah! Mo maman fine vine kot moi et li pas ene musulmane, Estce ki mo bizin traite li bien? Hazrat Muhammad (s.a.w) fine dire: “Oui, traite li bien”. (Bukhari & Muslim).

 

Li claire ki même si nous papa ou maman pas croire dans la Manifestation d’Allah, nous doit zot même respé ki si zot ti croire. Nous obéir zot aussi longtemps ki zot pas demande nous transgresse la loi Allah. Kan nous désobéir parents? Dans Quran Allah pé dire dans Ch.31 V.15:

 

“Si zot force toi, donne Moi des associés ki to conné pas exister, pas obéir zot.”

 

Nous désobéir nous parents kan li pé faire nous faire bane kitchoses ki contre la loi Allah et pé faire nous faire shirk ou sois pé ridiculize le signe d’Allah, pé moque la Manifestation d’Allah. Là, li pas permette pour obéir ça kalité parents là. Au lieu nous gagne paradis à travers ça kalité parents là, nous pou gagne l’enfer. Ici, dans ça situation là, nous Allah passe avant tous.

 

Dans Quran Ch.17 V.23-24, Allah pé dire:

 

V.23: To Maître fine declarer: Adore li seul, et traite papa – maman bien. Si ene de zot, ou bien tous les deux fine arrive à ene l’âge avancé chez toi, pas cause avec zot avec fièreté, pas répousse zot, mais cause avec zot avec respé.

 

V.24: Couvert zot avec to les ailes, humblement et par pitié, et dire: “O mo Maître, donne zot To grâce, couma zot ti donne moi des soins kan mo ti petit”. – “Rabbir ham humaa kamaa rabba-yaanii sagiraa” (Surah Bani Israel)

 

Abu Huraira (r.a) pé raconté ki le prophète d’Allah (s.a.w) fine dire: “Ki mette so néné dans la poussière (ki li humilié)?” Le prophète (s.a.w) fine répété ça phrase-là trois fois. Bane dimoune fine demande-li de ki sanlà ça. Le prophète (s.a.w) réponde: “Celui ki so parents ene ou tous les deux fine vine vieux et li pas traite zot bien, li pas mérité pour gagne paradis”. (Bukhari & Muslim)

 

Kan nous parents vine vieux divant nous lizié c’est ene faveur ki Allah fine faire lor nous. Nous gagne l’occasion pour traite zot bien et prend zot compte plisse. Mais Malheureusement ena parmi nous kan so parents fine vine vieux, li gagne tracas, li prié kan zot pour mort. Li zoure zot et maltraite zot. Faire zot couma zanimo et humilié zot devant dimounes.

 

Nous bizin comprend zot à cet âge là. Zot raisonnement pas pareil couma ene jeune. Zot façon agir et voir les choses pour être ene l’autre façon. Zot mérite beaucoup nous l’attention. Nous bizin evite discute inutilement avec zot. Nous bizin faire duah pour ki Allah garde zot bien. Faire nous zenfants et madame pas manque zot du respé. Faire bane kitchose ki pour faire zot lécoeur content sans transgresse la loi d’Allah. Celui ki pas traite so parents ki fine vine vieux, le prophète d’Allah (s.a.w) fine dire ki li pas kalifié pour paradis. C’est ene avertissement bien bien sévère.

 

Pour termine ça khutba là, mo pour raconte ene zistoire rempli de leçons. Ene fois ti ena ene homme ki so maman ti bien vieux. Ene fois ça zhomme là fine faire l’intention pour alle faire Hajj. So maman dire li pas alle astère-là parceki mo trop vieux. Li écoute so maman et li faire l’intention ki ene jour kan so man mort, li ava alle faire Hajj. Plusieurs l’année fine passé. A la fin li ré-change so l’idée et li décide pour alle faire Hajj. So maman dire li: “Mo cher garçon, ki sanlà pour guette moi, mo vieux, si mo gagne problème.” So garçon réponde: “To pas pé mort pour mo capave aller. Li dire, ‘Mo pou alle tout de suite. Larmes dans lizié maman là, li dire so garçon : “Ki sanlà pour reste avec moi. To pé quitte moi contre mo gré.” Garçon là faire couma dire li pas tende nannié. Li prend chemin pour Hajj.

 

Pendant so voyage li arrête kot ene Masjeed et li fine reste dans Masjeed là et dans la nuite li lève pour faire Namaz. A cette heure-là bane dimounes dehors pé crié: “Voleur! Voleur!” Effectivement fine ena ene vol dans ene la caze. Bane dimounes pé galoupe derrière voleur là. A so tour voleur là rentre dans Masjeed. Bane dimounes fine trouve li, voleur là kit so bane kitchoses ki li fine coqain dans Masjeed et li saute murail et li sauver. Personne pas fine trouve li sauver.

 

Kan bane dimounes là rentre dans Masjeed, zot trouve ene dimoune pé faire Namaz et bane kitchose coqain-là, là-même. Zot prend ça dimoune pé alle faire Hajj là pour voleur et zot fine attrape li et batté li. Bane dimounes dire: “Jamais nous fine trouve ene voleur coumsa! Li coqain et li faire Namaz.” Lendemain passe so jugement. Donne verdict bizin coupe so la main, tire so lizié parceki li pé embête dimoune, li pas pé faire Namaz et coqain kitchoses li garde dans Masjeed et coupe so lipié.

 

Ene annonciateur fine prend ça soi-dizant voleur là avec li et li pé annonce partout ki châtiment fine décidé pour voleur là. Pendant ki li pé annonce, ça soi-dizant voleur là arête li et dire: “Faire attention, pas dire coumsa. Dire celui ki fine décide pour alle faire Hajj contre gré so maman pour être puni.”

 

L’heure bane dimounes tende ça zot dire ki pé arrivé! Ammène li devant le roi. L’homme là raconte tout so zistoire. Le Roi présente so excuse ki li ti pé alle puni ene dimoune innocent et li pas voleur.

 

Mais l’homme là fine réponde: “Non, pas to faute mais c’est mo faute parceki mo fine quitte mo vieux maman et mo fine alle faire Hajj et êa c’était la punition pour ça.”

 

Et tout ça là, si li ti obéir so maman nannié pas ti pour arriver. Désobéissance parents emmène nous bien bien loin. Nous trouve so punition parfois lor la terre même.

 

Ki Allah pardonne nous, si arrivé nous pas fine obéir nous parents et aide nous pour guette et faire duah pour nous parent ki encore vivant et ki fine mort et sakaine parmi nous, ki nous nous reconnaite valeur parents et penser demain nous aussi nous pour vieux, ki pour arriver si nous zenfants faire même zaffaire avec nous. Nous faire duah ki li pas coumsa, Insha-Allah.

 

“Rabbir ham humaa kamaa rabba-yaani sagiira”

O mo Maître, donne zot To grâce, couma zot ti donne moi des soins kan mo ti petit.”

 

Ameen Soumma Ameen. Ya Rabboul Aalameen